မကွေးမြို့ရှိ ကုန်သည်လုပ်ငန်းရှင်များနှင့် မော်တော်ယာဉ်လိုင်းဂိတ်တာဝန်ခံများအား တရားမဝင်ကုန်ပစ္စည်းများ ဝယ်ယူရောင်းချခြင်းမရှိစေရေးနှင့် တရားဝင်ကုန်သွယ်မှု လမ်းကြောင်းမှသာ ကုန်သွယ်မှုလုပ်ငန်းများ ဆောင်ရွက်ရေး အသိပညာပေးဆွေးနွေးပွဲ ဆောင်ရွက်ခြင်း
တရားမဝင်ကုန်သွယ်မှု တိုက်ဖျက်ရေး ဦးဆောင်ကော်မတီ၏ (၁၉.၈.၂၀၂၂) ရက်နေ့ ကျင်းပပြု လုပ်ခဲ့သည့် (၄/၂၀၂၂)ကြိမ်မြောက် လုပ်ငန်းညှိနှိုင်းအစည်းအဝေး၌ “တရားမဝင်ကုန်ပစ္စည်းများကို ဖမ်းဆီးရမိမှု တိုးတက်ရရှိရေး ဆောင်ရွက်သကဲ့သို့ ကုန်သည်လုပ်ငန်းရှင်များအား လမ်းကြောင်းမှန်သို့ ရောက်ရှိရေး ထိန်းကျောင်းပေးရန်” ဟု ဆုံးဖြတ်ခဲ့မှုအရ မကွေးတိုင်းဒေသကြီး တရားမဝင်ကုန်စည် စီးဆင်းမှု ထိန်းချုပ်တားဆီးရေးလုပ်ငန်း တိုင်းဒေသကြီးအဆင့် ကွပ်ကဲမှုကော်မတီ၏ အောက်ရှိ စားသုံးသူ ရေးရာဦးစီးဌာန၊ မကွေးတိုင်းဒေသကြီး၊ တိုင်းဒေသကြီးဦးစီးမှူး ဦးမြင့်ဝင်း၊ အကောက်ခွန် ဦးစီးဌာန တိုင်းဒေသကြီးဦးစီးမှူး ဦးအောင်ကျော်မိုး၊ မကွေးတိုင်းဒေသကြီး ရဲတပ်ဖွဲ့မှူး ဒု-ရဲမှူးကြီး စိုးနိုင်၊ စည်ပင်သာယာရေးအဖွဲ့ အမှုဆောင်အရာရှိ ဦးကျော်သူတို့မှ ၂၀၂၂-ခုနှစ်၊ စက်တင်ဘာလ(၈)ရက်နေ့ နံနက်(၀၉:၃၀)မှ (၁၁:၄၅)နာရီထိ မကွေးမြို့၊ ကုန်တင်ယာဉ်ကြီးများ စစ်ဆေးရေးစခန်းရှိ ကွပ်ကဲရေး ရုံးခန်းတွင် ကုန်သည်လုပ်ငန်းရှင်များ၊ မော်တော်ယာဉ်လိုင်းဂိတ်တာဝန်ခံများနှင့် စစ်ဆေးရေးဂိတ် တာဝန် ကျဌာနဆိုင်ရာဝန်ထမ်းများအား တရားမဝင် ကုန်ပစ္စည်းများ ဝယ်ယူရောင်းချခြင်း မရှိစေရေးနှင့် တရားဝင် ကုန်သွယ်မှုလမ်းကြောင်းမှသာ ကုန်သွယ်မှုလုပ်ငန်းများ ဆောင်ရွက်ရေး အသိပညာပေး ဆွေးနွေးခဲ့ပါသည်။
ထိုအသိပညာပေးဆွေးနွေးပွဲသို့ ဌာနဆိုင်ရာ(၁၆)ဦး၊ လုပ်ငန်းရှင်(၁၀)ဦးနှင့် ယာဉ်လိုင်းဂိတ် များဖြစ်သော ဦးသောင်းနှင့် သားများ၊ ပစ်တိုင်းထောင်၊ ရွှေပွင့်ဖြူ၊ နှင်းဝေဝေ၊ ရွှေပြည်အောင်နှင့် အောင်သူ ဂိတ် တာဝန်ခံ(၆)ဦး စုစုပေါင်း(၃၂)ဦး တက်ရောက်ခဲ့ပြီး စားသုံးသူရေးရာဦးစီးဌာန၏ စားသုံးသူ ကာကွယ်ရေးဥပဒေ-၂၀၁၉ ပါ စားသုံးသူအခွင့်အရေးနှင့် တာဝန်များ၊ စီးပွားရေးလုပ်ငန်းရှင်၏ တာဝန်၊ တားမြစ်ချက်၊ ကုန်အညွှန်းအမှတ်အသား ပြည့်စုံရမည့်အချက်များပါဝင်သော လက်ကမ်းစာစောင်များ လည်း ဖြန့်ဝေပေးခဲ့ကြောင်း သိရှိရပါသည်။
DOCA( မကွေး)