သတင်းနှင့် လှုပ်ရှားမှုများ

  စီးပွားရေးနှင့်းကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊စစ်ကိုင်းတိုင်းဒေသကြီး၊  ရွှေဘိုခရိုင် ဦးစီးမှူးရုံးအနေဖြင့် စားသုံးသူများဘေးအန္တရာယ်ကင်းရှင်းရေးနှင့် ထုတ်ကုန်များလုံခြုံစိတ်ချရမှု ရှိစေရေးအတွက် စီးပွားရေးလုပ်ငန်းရှင်များနှင့် တွေ့ဆုံဆွေးနွေးခြင်းများ ဆောင်ရွက်လျှက်ရှိပါသည်။

   စက်တင်ဘာလ(၁၂)ရက်နေ့၊ နံနက်(၁၁:၃၀)နာရီအချိန်တွင် ရွှေဘိုခရိုင်စားသုံးသူရေးရာဦးစီး ဌာနမှ ခရိုင်ဦးစီးမှူးနှင့် ရွှေဘိုမြို့နယ်တာဝန်ခံတို့သည် ရွှေဘိုမြို့၊ အမှတ်(၄)ရပ်ကွက်ရှိ SBO ကိတ်မုန့်၊ ပေါင်မုန့်လုပ်ငန်းရှင်နှင့် တွေ့ဆုံဆွေးနွေးခဲ့ပါသည်။ ထိုသို့တွေ့ဆုံဆွေးနွေးရာတွင် စားသုံးသူရေးရာဦးစီး ဌာနမှ ဆောင်ရွက်နေသော စားသုံးသူကာကွယ်ရေးလုပ်ငန်းများနှင့်  မိမိထုတ်လုပ်သည့် ကုန်စည်အပါ် တာဝန်ရှိမှုကို ကုန်စည်ကိုထုတ်လုပ်ဖြန့်ဖြူးရောင်းချသည့် စီးပွားရေးလုပ်ငန်းရှင်များ သိရှိနိုင်စေရန် အတွက် စားသုံးသူကာကွယ်ရေးဥပဒေ၊ အခန်း(၁၈)ပါ ကုန်အညွန်းအမှတ်အသား ဖော်ပြခြင်းနှင့် စပ်လျဉ်း၍ မြန်မာနိုင်ငံစားသုံးသူကာကွယ်ရေးကော်မရှင်၏ ညွှန်ကြားချက်အမှတ် (၂/၂၀၁၉)နှင့်အညီ ပြည့်စုံစွာထည့်သွင်းဖော်ပြ၍ ထုတ်လုပ်ဖြန့်ဖြူးရောင်းချကြရန်၊ ကုန်အညွှန်းအမှတ်အသားနှင့် ပတ်သက်၍ ဌာန၏အတည်ပြုချက်ရယူနိုင်ရေး ဆောင်ရွက်ကြရန်၊ ဥပဒေပါ စားသုံးသူ၏အခွင့်အရေး နှင့်တာဝန်များ၊ စီးပွားရေးလုပ်ငန်းရှင်၏တာဝန်များ၊ ကုန်စည်နှင့်စပ်လျဉ်း၍ အာမခံချက်ပေးခြင်းနှင့် အားမခံပေးထားမှုအပါ် စားသုံးသူကတောင်းဆိုနိုင်သည့်အခွင့်အရေးများ၊ ကုန်စည်နှင့်ဝန်ဆောင်မှု အပေါ်တာဝန်ရှိမှု၊ တားမြစ်ချက်များ၊ ပြစ်မှုနှင့်ပြစ်ဒဏ်များ၊ ကုန်စည်နှင့်ဝန်ဆောင်မှုကြောင့် စားသုံးသူ အခွင့်အရေးနှင့် အကျိုးစီးပွားနစ်နာဆုံးရှုံမှုများဖြစ်ပေါ်ပါက တိုင်ကြားနိုင်သည့် နည်းလမ်းများကြောင်း၊ စီးပွားရေးလုပ်ငန်းရှင်မှ အာမခံမှုနှင့်အညီ တာဝန်ယူ၍ ဆောင်ရွက်ပေးရမည်ဖြစ်ကြောင်းတို့ကို အကျယ်တဝင့်ရှင်းလင်းဆွေးနွေးခဲ့ပြီး မြန်မာနိုင်ငံစားသုံးသူကာကွယ်ရေးကော်မရှင်၏ ညွှန်ကြားချက် အမှတ်(၂/၂၀၁၉)နှင့် အသိပညာပေး လက်ကမ်းစာစောင်များဖြန့်ဝေခဲ့ကြောင်း သတင်းရရှိပါသည်။

DOCA(စစ်ကိုင်း)

     ကချင်ပြည်နယ်၊ စားသုံးသူရေးရာဦးစီးဌာန၊ ဗန်းမော်ခရိုင်ဦးစီးမှူးရုံးမှ ‌‌ဒေါ်ဆန္ဒမွန်(ဒု-ဦးစီးမှူး)သည် ၁၃.၉.၂၀၂၂ ရက်နေ့ နံနက်၀၉:၃၀အချိန်တွင် ခရိုင်ပြန်ကြားရေးနှင့်ပြည်သူ့ဆက်ဆံရေးဦးစီးဌာနနှင့် ပူးပေါင်း၍ ဗန်းမော်မြို့၊  အမှတ်(၄)  အခြေခံပညာအထက်တန်းကျောင်း၌    ဆရာ/ဆရာမများနှင့် ကျောင်းသား/ကျောင်းသူများအား စားသုံးသူကာကွယ်ရေးဆိုင်ရာအသိပညာပေးဟောပြောပွဲ ဆောင်ရွက်ခဲ့ပါသည်။

    အသိပညာပေးဟောပြောရာတွင် ဒေါ်ဆန္ဒမွန်(ဒု-ဦးစီးမှူး)က စားသုံးသူကာကွယ်ရေးဥပဒေ၏ အဓိပ္ပာယ်ဖော်ပြချက်များမှ စားသုံးသူကာကွယ်ရေးဆိုသည်မှာ ကုန်စည်သို့မဟုတ်ဝန်ဆောင်မှုနှင့် စပ်လျဉ်း၍ စားသုံးသူ၏အခွင့်အရေးနှင့် အကျိုးစီးပွားကို ကာကွယ်ပေးခြင်း၊ စားသုံးသူနှင့် စီးပွားရေး လုပ်ငန်းရှင်တို့အကြား ကော်မရှင်နှင့်ကော်မတီအဆင့်ဆင့်တို့မှ သတ်မှတ်ဆောင်ရွက်ပေးသည့် မျှတမှု ရှိသောလုပ်ငန်းစဉ်ကိုဆိုလိုကြောင်း၊ စားသုံးသူဆိုသည်မှာ ကုန်စည်သို့မဟုတ်ဝန်ဆောင်မှုကိုကုန်သွယ် ရောင်းဝယ်မှုပြုရန် သို့မဟုတ် အသက်မွေးဝမ်းကျောင်းပြုရန်မဟုတ်ဘဲ ကိုယ်တိုင်သုံးစွဲမှုအတွက်သော်လည်းကောင်း၊ အခြားသူများအတွက်သော်လည်းကောင်း ရည်ရွယ်၍ဝယ်ယူခြင်း၊ အသုံးပြုခြင်း၊ ရယူခြင်း၊ ကုန်စည်ချေးငှားခြင်းပြုလုပ်သူများ သို့မဟုတ် ပေးကမ်းထောက်ပံ့ခြင်းခံရသူများကို ဆိုလိုကြောင်းနှင့် ကျောင်းသူ/ကျောင်းသားများအား အသင့်စားမုန့်အမျိုးမျိုးတို့ကို ဝယ်ယူစားသုံးရာတွင် အမျိုးအမည်၊ အရွယ်အစား၊ အရေအတွက်၊ အသားတင်ပမာဏ၊  ထားသိုသိမ်းဆည်းမှုအညွန်း၊ ဓါတ်မတည့်ကြောင်းဖော်ပြချက်၊ ထုတ်လုပ်သည့်ရက်စွဲနှင့်သက်တမ်းကုန်ဆုံးသည့်ရက်စွဲများကို အဓိကဖတ်ရှုရမည်ဖြစ်ကြောင်း နမူနာပစ္စည်းများဖြင့် ခင်းကျင်းပြသကာ ရှင်းလင်း‌ဟောပြောခဲ့ပါသည်။ ထို့နောက် စာသင်ကျောင်းမုန့်ဆိုင်များအား  ဘေးအန္တရာယ်ရှိသော အစားအစာများ  ရောင်းချခြင်း ရှိ  မရှိ  စစ်ဆေးဆောင်ရွက်ခဲ့ပြီး စားသုံးသူကာကွယ်ရေးဆိုင်ရာ လက်ကမ်းစာစောင်များ ဖြန့်ဝေခဲ့ပါသည်။ဟောပြောပွဲသို့ ဆရာ/ဆရာမ(၁၇)ဦး၊ ကျောင်းသူ/ကျောင်းသား(၁၃၀)ဦး  စုစုပေါင်း(၁၄၇)ဦးတက်ရောက်ခဲ့ပါသည်။

DOCA(ကချင်)

        (၁၂.၉.၂၀၂၂)ရက်နေ့ နံနက်(၀၇:၀၀)မှ (၁၀:၀၀)နာရီထိ မကွေးမြို့၊ ကန်သာစျေး၌ အလယ်ပိုင်း တိုင်းစစ်ဌာနချုပ်၊ မကွေးတပ်နယ်မှ စားသုံးသူပြည်သူများ သက်သာချောင်ချိရေးအတွက် အခြေခံစား ကုန်ဖြစ်သော ဆန်တစ်ပြည်(၁၅၀၀)ကျပ်၊ အမဲသား(၂၅)ကျပ်သားလျှင်(၃၀၀၀)ကျပ်၊ ဒေသ ကြက်တစ် ကောင်(၆၀၀၀)ကျပ်၊ ငါးပိဘူးတစ်ဘူး(၅၅၀)ကျပ်၊ မျှစ်စားတော်ပဲတစ်ဘူး(၂၄၅၀)ကျပ်၊ ကြက်သားအာလူး တစ်ဘူး(၄၀၅၀)ကျပ်၊ ပဲထောပတ်ဘူးတစ်ဘူး(၄၅၀)ကျပ်၊ ငါးပိကြော်တစ်ဘူး (၂၂၀၀)ကျပ်၊ အမဲသားဘူး တစ်ဘူး(၆၂၀၀)ကျပ်၊ ကြက်ဥတစ်လုံး(၁၈၀)ကျပ်၊ ချဉ်ပေါင်ရွက်(၃)စီး (၁၀၀)ကျပ်၊ ဂေါ်ရခါးသီးတစ်လုံး (၁၁၀)ကျပ်၊ ခရမ်းချဉ်သီး(၅၀)သား(၁၁၅၀)ကျပ်နှင့် ဂေါ်ဖီတစ်ထုပ် (၁၃၀၀)ကျပ် နှုန်းများဖြင့် ရောင်းချခဲ့ကြောင်းနှင့် ကုမ္ပဏီများမှဖြန့်ဖြူးရောင်းချသော ဆီများအား မကွေးမြို့ ဆီကုန်သည်နှင့် ဆီလုပ်ငန်းရှင်များမှ စားအုန်းဆီတစ်ပိဿာ(၅၆၀၀)ကျပ်နှုန်းဖြင့် ပြည်သူတစ်ဦးလျှင် (၁)ပိဿာနှုန်း ရောင်းချပေးခဲ့ပါသည်။

         အဆိုပါအခြေခံစားကုန် ဟင်းသီးဟင်းရွက် အမယ်စုံနှင့် စားအုန်းဆီရောင်းချနေမှုအား စားသုံးသူ‌ရေးရာဦးစီးဌာန၊ မကွေးခရိုင်ဦးစီးမှူး ဒေါ်တင်တင်လှ(လက်ထောက်ညွှန်ကြားရေးမှူး)နှင့် ခရိုင်ရုံးဝန်ထမ်းများနှင့် တိုင်းဒေသကြီးဦးစီးမှူးရုံးမှဝန်ထမ်း(၃)ဦး မကွေးမြို့နယ်စည်ပင်သာယာရေးအဖွဲ့၊ အမှုဆောင်အရာရှိ ဦးကျော်သူနှင့် ဝန်ထမ်းများ ပူးပေါင်းကူညီဆောင်ရွက်ခဲ့ကြပြီး မကွေးတိုင်းဒေသကြီး အစိုးရအဖွဲ့ ၊ စီးပွားရေးရာဝန်ကြီးဦး‌အောင်ချိန်မှ လာ‌ရောက်ကြည့်ရှုအားပေးခဲ့ကြောင်း သိရှိရပါသည်။

DOCA(မကွေး)

       ရခိုင်ပြည်နယ်၊ စားသုံးသူရေးရာဦးစီးဌာန၊ စစ်တွေခရိုင်ဦးစီးမှူး ဦးမောင်လှဝင်း(ဦးစီးအရာရှိ)နှင့် ဝန်ထမ်းများသည် (၁၂-၉-၂၀၂၂)ရက်နေ့ နေ့လယ် (၁:၀၀)နာရီအချိန်တွင် စစ်တွေမြို့၊ မြောက်စံပြရပ်ကွက်ရှိ ဒေါ်ခင်ထွေးဝင်း Prince(မင်းသားလေး) ကိတ်မျိုးစုံ ထုတ်လုပ်ဖြန့်ဖြူးရောင်းချသည့် မုန့်လုပ်ငန်းရှင်အပါအဝင် ဝန်ထမ်း(၄)ဦးတို့အား စားသုံးသူကာကွယ်ရေး အသိပညာပေးဆွေးနွေးခဲ့ပါသည်။

      ထိုသို့ဆွေးနွေးရာတွင် ခရိုင်ဦးစီးမှူး ဦးမောင်လှဝင်းက ၂၀၁၉ စားသုံးသူကာကွယ်ရေးဉပဒေ အခန်း(၁၀)၊ ပုဒ်မ(၂၁) စီးပွားရေးလုပ်ငန်းရှင်၏တာဝန်(၁၁)ချက်၊ အခန်း(၁၁)၊ ပုဒ်မ(၂၂)အရ ရောင်းချသည့်ကုန်စည်တွင် သာမန်အားဖြင့်မမြင်နိုင်သော သဘာဝပြောင်းလဲမှုနှင့်စပ်လျဉ်း၍ စားသုံးသူအား ထင်ရှားစွာဖော်ပြ၍ အသိပေးရမည်ဖြစ်ကြောင်း၊ မြန်မာနိုင်ငံစားသုံးသူရေးရာကော်မရှင်၏ ညွန်ကြားချက်အမှတ်(၂/၂၀၁၉)အရ ကုန်အညွှန်းအမှတ်အသားဖော်ပြခြင်းနှင့်စပ်လျဉ်း၍ စီးပွားရေးလုပ်ငန်းရှင်များ လိုက်နာရန်ညွန်ကြားချက်များအား အသေးစိတ်ဟောပြောဆွေးနွေးခဲ့ပြီး လိုက်နာ ဆောင်ရွက်ရာတွင် အခက်အခဲမရှိစေရန် အသေးစိတ်ဇယားပါဝင်သော လက်ကမ်းစာစောင်အား ဖြန့်ဝေပေးခဲ့ကြောင်း သတင်းရရှိပါသည်။

DOCA(ရခိုင်)

        ရှမ်းပြည်နယ်(တောင်ပိုင်း)၊ စားသုံးသူရေးရာဦးစီးဌာန၊ ရှမ်းပြည်နယ်ဦးစီးမှူးရုံးမှ ဝန်ထမ်းများသည် စက်တင်ဘာလ (၁၃) ရက်နေ့ ၊ နံနက် (၁၀:၀၀) နာရီအချိန်တွင် တောင်ကြီးမြို့ အမှတ်(၄) အခြေခံပညာ အထက်တန်းကျောင်း၌ ကျောင်းသား/ ကျောင်းသူများ သိသင့်သိထိုက်သည့် အသိပညာဗဟုသုတများ ရရှိစေရန်အတွက် စားသုံးသူကာကွယ်ရေးဆိုင်ရာ အသိပညာပေး‌ဟောပြောပွဲ ကျင်းပခြင်းနှင့် ကျောင်းမုန့် ဈေးတန်း ဈေးကွက်စစ်ဆေးခြင်းများ ဆောင်ရွက်ခဲ့ကြောင်း သိရှိရပါသည်။

       အဆိုပါ အသိပညာပေးဟောပြောဆွေးနွေးပွဲတွင် အမှတ်(၄) အခြေခံပညာအထက်တန်း ကျောင်းက တာဝန်ခံကျောင်းအုပ်ဆရာမကြီး ဒေါ်ဇာလီနွယ်က အဖွင့်အမှာစာကားပြောကြားပြီး စားသုံးသူရေးရာဦးစီးဌာန၊ တောင်ကြီးခရိုင်ဦးစီးမှူးရုံးမှ ဦးလွင်ကိုအောင် (အကြီးတန်းစာရေး)က စားသုံးသူ ကာကွယ်ရေးဥပဒေအကြောင်းနှင့် စားသုံးသူအဓိပ္ပာယ်၊ စားသုံးသူကာကွယ်ရေးဥပဒေတွင် ပါရှိသော အခန်း (၉)ပါ စားသုံးသူအခွင့်အရေးနှင့် တာဝန်များ၊ ကုန်အညွှန်းအမှတ်အသားဖော်ပြခြင်းအကြောင်းနှင့် စားသုံးသူ ထိခိုက်နစ်နာဆုံးရှုံးမှု ဖြစ်ပေါ်လာပါက တိုင်ကြားနိုင်မည့် ပုံစံနည်းစနစ်များအကြောင်းကို ဟောပြော ဆွေးနွေးခဲ့ပြီး  တက်ရောက်လာသော ဆရာ/ ဆရာမများနှင့် ကျောင်းသား/ ကျောင်းသူများက သိရှိလိုသည် များကို အပြန်အလှန်ဆွေးနွေးမေးမြန်းခဲ့ကြောင်းနှင့် အဆိုပါ အခမ်းအနားသို့ ဆရာ/ ဆရာမများနှင့် ကျောင်းသား/ ကျောင်းသူများ (၂၂၄ ) ဦး တက်ရောက်ခဲ့ကြောင်း သိရှိရပါသည်။

       ဆက်လက်၍ ကျောင်းဝင်းအတွင်းရှိ ကျောင်းမုန့် ဈေးတန်းတွင် အစားအသောက်၊ အချိုရည်များနှင့် မုန့်မျိုးစုံတို့ ရောင်းချလျက်ရှိသော ဆိုင်များရှိ ကုန်ပစ္စည်း များကို ဆရာ/ ဆရာမများ၊ ကျောင်းသား/ ကျောင်းသူများ၊ စားသုံးသူပြည်သူများ ဘေးအန္တရာယ်ကင်းရှင်း၍ လုံခြုံစိတ်ချမှုရှိစေရေးအတွက် သက်တမ်းလွန် အစားအသောက်များ ကျောင်းဝင်းအတွင်း ရောင်းချမှု ရှိ/ မရှိ၊ ကုန်အညွှန်းအမှတ်အသားဖော်ပြခြင်းနှင့်စပ်လျဉ်း၍ ပြည့်စုံမှန်ကန်မှု ရှိ/ မရှိ တို့ကို ဈေးကွက်စစ်ဆေးခြင်း လုပ်ငန်းများကိုပါ ဆောင်ရွက်ခဲ့ကြောင်း သိရှိရပါသည်။

DOCA(ရှမ်း)