သတင်းနှင့် လှုပ်ရှားမှုများ

         ပဲခူးတိုင်းဒေသကြီး၊စားသုံးသူရေးရာဦးစီးဌာန၊ ပြည်ခရိုင်၊ ပန်းတောင်း မြို့နယ်တာဝန်ခံနှင့် ဝန်ထမ်းများအပါအဝင် မြို့နယ်အထွေထွေအုပ်ချုပ်ရေး၊ မြို့နယ်စီမံအုပ်ချုပ်ရေး၊ စိုက်ပျိုးရေး၊ မွေးမြူရေး ကျေးလက်ဖွံ့ဖြိုးရေးဦးစီးဌာန၊ သမဝါယမ ဦးစီးဌာန၊ လဝက ၊  မြို့နယ်လျှပ်စစ်တို့နှင့် ပူးပေါင်း၍ (၇.၇.၂၀၂၂)နေ့ နံနက် (၁၀:၀၀)အချိန်တွင် ဆင်တဲအုပ်စု၊ ရွာသစ်ကုန်း ကျေးရွာ ဘုန်းတော်ကြီးကျောင်းတွင် စိုက်ပျိုးရေး၊ မွေးမြူရေး၊ ကုန်ထုတ်လုပ်ငန်း တိုးတက်မြင့်မားရေး အသိပညာပေးဆွေးနွေးပွဲကို ကျင်းပပြုလုပ်ခဲ့ပါသည်။

          စိုက်ပျိုးရေး၊ မွေးမြူရေး ကုန်ထုတ်လုပ်ငန်းတိုးတက်မြင့်မားရေး အသိပညာပေး ဆွေးနွေးပွဲသို့ ကျေးလက်နေပြည်သူ(၇၈)ဦး တက်ရောက်ခဲ့ပါသည်။ ထိုဆွေးနွေးပွဲတွင် စားသုံးသူရေးရာ ဦးစီးဌာန၊ ပန်းတောင်းမြို့နယ်တာဝန်ခံ ဒေါ်သန်းသန်းအေးမှ စားသုံးသူကာကွယ်ရေးဆိုင်ရာ သိကောင်းစရာများ၊ စားသုံးသူတို့ရသင့်ရထိုက်သည့် အခွင့်အရေးများအကြောင်း နှင့် ကုန်အညွှန်း အမှတ်အသားနှင့်ပတ်သက်သည့် အကြောင်းအရာတို့ကို အကျယ်တဝင့် ဆွေးနွေးဟောပြောခဲ့ ပါသည်။ ထို့နောက် စားသုံးသူ အသိပညာပေးလက်ကမ်းစာစောင်များအား ဖြန့်ဝေပေးခဲ့ကြောင်း သိရှိရပါသည်။

DOCA(ပဲခူး)

           ရန်ကုန်တိုင်းဒေသကြီး၊ တောင်ပိုင်းခရိုင်၊ သုံးခွမြို့နယ် ပြန်ကြားရေးနှင့် ပြည်သူ့ ဆက်ဆံရေးဦးစီးဌာနတွင် ပြန်ကြားရေးနှင့်ပြည်သူ့ဆက်ဆံရေးဦးစီးဌာနက ကြီးမှူး၍ ဖွင့်လှစ်သော လက်ကိုင်အိတ်ပြုလုပ်နည်းပညာသင်တန်းကို ဇူလိုင်လ ၇ ရက် မှ ဇူလိုင် ၈ ရက် နေ့ အထိ နေ့စဉ်နံနက် ၁၁:၀၀ နာရီမှ နေ့လည် ၁၂:၀၀နာရီအထိ သင်ကြားပို့ချခဲ့ရာ သင်တန်းသူ ၁၂ ဦး တက်ရောက်ကြောင်း သိရှိရသည်။

          အဆိုပါသင်တန်းကို အမျိုးသမီးများ ပွဲတက်အနေဖြင့် အသုံးပြုလျက်ရှိသော လက်ကိုင် အိတ်များကို မိမိတို့ကိုယ်တိုင်ပြုလုပ်၍ သုံးစွဲတက်စေရန်ဖြစ်ပြီး လက်ကိုင်အိတ်သည် မြန်မာ အမျိုးသမီးများအတွက်လည်း မရှိမဖြစ်လိုအပ်သော အသုံးအဆောင်ဖြစ်သည့်အလျောက် မိမိတို့ ကိုယ်တိုင်ပြုလုပ်သုံးစွဲသဖြင့် အပိုကုန်ကျစရိတ်များ သက်သာစေရန်၊ တစ်နိုင်တပိုင် အိမ်တွင်း စက်မှုလက်မှုလုပ်ငန်းရှင်များ တိုးပွားလာစေရန်နှင့် မိသားစုဝင်ငွေ ပိုမိုရရှိလာအောင် ရည်ရွယ်၍ ဖွင့်လှစ်ကြောင်း သိရှိရသည်။

          ၎င်းသင်တန်းတွင် စားသုံးသူရေးရာဦးစီးဌာန၊ သုံးခွမြို့နယ်တာဝန်ခံ ဒေါ်စန်းစန်းမော် ကလည်း မိမိတို့ဌာန၏မျှော်မှန်းချက်၊ ရည်မှန်းချက်များ၊ စားသုံးသူများ၏ အခွင့်အရေးနှင့် တာဝန် များ စီးပွားရေးလုပ်ငန်းရှင်များ၏ တာဝန်များ၊ စားသုံးသူကာကွယ်ရေးဥပဒေပါ၊ အခန်း(၁၈) ကုန်အညွှန်းအမှတ်အသားဖော်ပြခြင်းနှင့်စပ်လျဉ်း၍ ၂၀၂၀ ပြည့်နှစ် မတ်လာ ၁၅ ရက်မှစတင်၍ ကုန်အညွှန်းအမှတ်အသားတွင် မြန်မာဘာသာဖြင့်ဖြစ်စေ မြန်မာသာသာနှင့် အခြားဘာသာ တွဲလျက်ဖြစ်စေ ဖော်ပြပါရှိမှသာလျှင် ဈေးကွက်အတွင်းသို့ ဖြန့်ဖြူးရောင်းချ ရမည်ဖြစ်ကြောင်း ဝန်ဆောင်မှုနှင့်ပတ်သက်၍လည်းကောင်း၊ နစ်နာဆုံးရှုံးမှုဖြစ်ပေါ်လာပါက စားသုံးသူ သတင်းပြန်ကြားရေးနှင့်တိုင်ကြားမှုလက်ခံဆောင်ရွက်ရေးစင်တာ(CICC)သို့ တိုင်ကြားနိုင်သည့် နည်းလမ်းများ၊ ဆက်သွယ်တိုင်ကြားနိုင်မည့် ဖုန်းနံပါတ်နှင့် လိပ်စာတို့ကို သင်တန်းတက်ရောက်သူများအား အခါအခွင့်သင့်သလို အသိပေးရှင်းလင်းဆွေးနွေး ပေးခဲ့ကြောင်း သိရှိရပါသည်။

DOCA(ရန်ကုန်)

             ကရင်ပြည်နယ်အတွင်း ပုဂ္ဂလိကကဏ္ဍ ဖွံ့ဖြိုးတိုးတက်စေရေးနှင့် အစေ့ထုတ်ပြောင်းသီးနှံကဏ္ဍ ဖွံ့ဖြိုးတိုးတက်စေရေးအတွက် ၂၀၂၂ ခုနှစ်၊ ဇူလိုင်လ ၁၃ရက်နေ့ (၁၀:၀၀) နာရီအချိန်တွင် ကရင်ပြည်နယ်၊ ဘားအံမြို့ Perfect Hotel  ၌ ကရင်ပြည်နယ် ပြောင်းလုပ်ငန်းအသင်းကို ဖွဲ့စည်းခဲ့ရာ ကရင်ပြည်နယ်အစိုးရအဖွဲ့ စီးပွားရေးရာဝန်ကြီး ဦးစောခင်မောင်မြင့်နှင့် ပြည်နယ်အဆင့်ဌာနဆိုင်ရာများ၊ မြန်မာနိုင်ငံဆိုင်ရာ ပြောင်းလုပ်ငန်းအသင်း၊ ကရင်ပြည်နယ် ကုန်သည်များနှင့် စက်မှုလက်မှုလုပ်ငန်းရှင်များအသင်း၊ ကရင်ပြည်နယ်အတွင်း အစေ့ထုတ်ပြောင်း စိုက်ပျိုး၊ ထုတ်လုပ်၊ တင်ပို့၊ ရောင်းချနေသူများနှင့် ကုန်သည်များ၊ စိတ်ပါဝင်စားသူများ တက်ရောက်ခဲ့ကြောင်း သိရသည်။

          အခမ်းအနားတွင် ကရင်ပြည်နယ်အစိုးရအဖွဲ့ စီးပွားရေးရာဝန်ကြီး ဦးစောခင်မောင်မြင့်က အဖွင့်အမှာစကားပြောကြားရာတွင် ကရင်ပြည်နယ်သည် တဖက်ထိုင်းနိုင်ငံနှင့် နှစ်နိုင်ငံကုန်သွယ်မှုပြုနေသည့် နယ်စပ်ဝင်ပေါက်၊ ထွက်ပေါက်တည်ရှိရာ ပြည်နယ်တစ်ခုဖြစ်သောကြောင့် ကရင် ပြည်နယ်အတွင်း စိုက်ပျိုးထွက်ရှိသည့် အစေ့ထုတ်ပြောင်းများကို တဖက်ထိုင်းနိုင်ငံသို့ တင်ပို့ရုံသာမက အနယ်နယ်အရပ်ရပ်မှ အစေ့ထုတ်ပြောင်းများကိုလည်း မြဝတီနယ်စပ်မှတစ်ဆင့် တင်ပို့လျက်ရှိသည်ကို တွေ့ရပါကြောင်း၊ တဖက်ထိုင်းနိုင်ငံနှင့် အစေ့ထုတ်ပြောင်းကုန်သွယ်မှုပြုကြရာတွင် အသင်းအဖွဲ့၊ အစုအဖွဲ့ဖြင့်ဆောင်ရွက်နိုင်ခြင်းမရှိဘဲ မြေပြင်အခြေအနေပေါ်သာမူတည်၍ နှစ်ဦးနှစ်ဖက် ကြိုက်ရောင်း၊ ကြိုက်ဝယ်စနစ်ဖြင့် အဆင်ပြေသလိုသာဆောင်ရွက်နေသည်ကိုသာ‌ တွေ့ရပါကြောင်း၊ ကရင်ပြည်နယ်အတွင်း ပုဂ္ဂလိကကဏ္ဍ ဖွံ့ဖြိုးတိုးတက်စေရေးနှင့် အစေ့ထုတ်ပြောင်းသီးနှံ ကဏ္ဍ ဖွံ့ဖြိုးတိုးတက်စေရေးအတွက် ကရင်ပြည်နယ်ပြောင်းလုပ်ငန်းအသင်းကို ဖွဲ့စည်းခြင်းအားဖြင့် အစေ့ထုတ်ပြောင်းနှင့် ပက်သက်သည့် ကုန်သွယ်မှုဆိုင်ရာအခက်အခဲများကို ဖြေရှင်းဆောင်ရွက်နိုင်မည်ဖြစ်ပါကြောင်းနှင့် ဈေးနှုန်း၊ ဈေးကွက် တည်ငြိမ်ခိုင်မာ၍ အစေ့ထုတ်ပြောင်းသီးနှံကဏ္ဍ ဖွံ့ဖြိုး လာမည်ဖြစ်ပါကြောင်း၊ အသင်းဖွဲ့စည်းရေးအတွက်ရွေးချယ်ရာတွင် လူမှန်၊ နေရာမှန် ရွေးချယ် ခန့်ထားကြပါရန်နှင့် ရွေးချယ်တင်မြှောက်ခြင်းအား ပွင့်လင်းမြင်သာစွာဖြင့် ဘက်လိုက်မှုကင်းစွာ ဆောင်ရွက်သွားကြရန် ဖြစ်ပါကြောင်း၊ ရွေးချယ်ခံအသင်းအဖွဲ့တာဝန်ရှိသူများအနေဖြင့်လည်း အသင်းရေရှည်တည်တံ့စေရေးအတွက် အားလုံးဝိုင်းဝန်း ကြိုးပမ်းဆောင်ရွက်သွားကြရန် ပြောကြားခဲ့ပါသည်။

       ထို့နောက် အသင်းဖွဲ့စည်းမှုကြီးကြပ်ရေးကော်မတီဝင် စားသုံးသူရေးရာဦးစီးဌာန ပြည်နယ်ဦးစီးမှူးဦးသန်းဦးက ပြည်တွင်းကုန်သွယ်ရေးဖွံ့ဖြိုးရေး အထောက်အကူဖြစ်စေရန်နှင့် ပုဂ္ဂလိကကဏ္ဍဖွံ့ဖြိုးတိုးတက်စေရေးအတွက် ကရင် ပြည်နယ်အတွင်း အသင်းအဖွဲ့၊ အစုအဖွဲ့များ ဖွဲ့စည်း ဆောင်ရွက်ထားနိုင်မှုအခြေအနေ၊ဖွဲ့စည်းထားရှိပြီးသောအသင်းများ သက်ဝင်လှုပ်ရှားမှုနှင့် ဖြစ်ပေါ် တိုးတက်မှုအခြေအနေများကို ရှင်းလင်းတင်ပြခဲ့ပြီး ကရင်ပြည်နယ်ပြောင်းလုပ်ငန်းအသင်း ဖွဲ့စည်း ရာတွင် လိုက်နာဆောင်ရွက်ရမည့် သင်းဖွဲ့စည်းမျဉ်းနှင့်ရွေးချယ်တင်မြှောက်ခြင်းဆိုင်ရာ လုပ်ထုံးလုပ်နည်း အဆင့်ဆင့်ကိုလည်းကောင်း ရှင်းလင်းခဲ့ပါသည်။

        ဆက်လက်၍ ပြည်နယ်အဆင့်ဌာနဆိုင်ရာများဖြစ်သော စားသုံးသူရေးရာဦးစီးဌာန၊ မြန်မာ့ကုန်သွယ်မှုမြှင့်တင်ရေးအဖွဲ့၊ စက်မှုကြီးကြပ်ရေးနှင့်စစ်ဆေးရေးဦးစီးဌာန၊ စိုက်ပျိုးရေးဦးစီးဌာနတို့နှင့် ကရင်ပြည်နယ် ကုန်သည်များနှင့် စက်မှုလက်မှုလုပ်ငန်းရှင်များအသင်းတို့က ကရင်ပြည်နယ် ပြောင်းလုပ်ငန်းအသင်းဖွဲ့စည်းမှုကြီးကြပ်ရေးအဖွဲ့ဝင်များအဖြစ် တာဝန်ယူ၍ ရွေးချယ်တင်မြှောက်ခြင်းဆိုင်ရာကိစ္စရပ်များကို အစီအစဉ်အတိုင်း ကျင်းပပြုလုပ်ခဲ့ရာ ကရင်ပြည်နယ် ပြောင်းလုပ်ငန်းအသင်းကို အသင်းအလုပ်အမှုဆောင် (၁၁) ဦး၊ အဖွဲ့ဝင် (၈) ဦး၊ အသင်းဝင် (၁၉) ဦး၊ စုစုပေါင်း (၃၈) ဦးဖြင့် ဖွဲ့စည်းခဲ့ပြီး အခမ်းအနားကို (၁၄:၀၀) နာရီ အချိန်တွင် ရုပ်သိမ်းခဲ့ကြောင်း သိရသည်။

DOCA(ကရင်)

              ဧရာဝတီတိုင်းဒေသကြီး   ၊    စားသုံးသူရေးရာဦးစီးဌာန၊ ဖျာပုံခရိုင်မှ ခရိုင်ဦးစီးမှူး၊ ဒုတိယခရိုင်  ဦးစီးမှူးနှင့်မြို့နယ်စစ်ဆေးရေးမှူးတို့သည် ဇူလိုင်လ(၁၀)ရက်နေ့ နံနက်( ၀၈:၀၀)နာရီအချိန်က ဖျာပုံ မြို့နယ်၊ သလိပ်ကလေးကျေးရွာရှိ    ရွှေပြည်မိုးဆန်စက်သို့   ထုတ်ကုန်လုံခြုံစိတ်ချရမှုရှိစေရေးနှင့် ဆန်စက်လုပ်ငန်းများဖွံ့ဖြိုးတိုးတက်စေရေး ကွင်းဆင်းဆောင်ရွက်ခဲ့ကြောင်း သိရသည်။

          အဆိုပါဆန်စက်တွင် လုပ်ငန်းရှင်နှင့်တွေ့ဆုံ၍ ဆန်/စပါး ဈေးကွက်အခြေအနေများ၊ဆန် လက်ကျန် စပါးလက်ကျန်နှင့် စီးဝင်စီးထွက်အခြေအနေများ ထုတ်လုပ်သည့် ကုန်ပစ္စည်းများစနစ် တကျထုပ်ပိုးမှု MSMEs လုပ်ငန်းများ ဖွံ့ဖြိုးတိုးတက်စေရေးနှင့် ဆောင်ရွက်ထားမှုအခြေအနေများအားဆွေးနွေးခဲ့ပြီး စားသုံးသူကာကွယ်ရေးဥပဒေပါ ပြဌာန်းချက်များကို ရှင်းလင်းအသိပညာပေးခြင်းများ ဆောင်ရွက်ခဲ့ပြီး လက်ကမ်းစာစောင်များ ဝေငှခဲ့ကြောင်း သတင်းရရှိပါသည်။

DOCA(ဧရာဝတီ)

    ဧရာ၀တီတိုင်းဒေသကြီး ပုသိမ်စက်မှုမြို့တော်၀န်းအတွင်း ရင်းနှီးမြှုပ်နှံမှု တန်ဖိုး အမေရိကန်ဒေါ်လာ ၂.၇၇၀ သန်း တည်ဆောက်ပြင်ဆင်ကာလ (၁)နှစ်၊ အတည်ပြုအမိန့် သက်တမ်းအနှစ် (၃၀)ဖြင့် ပြည်ပနိုင်ငံသားများမှ လာရောက်ရင်းနှီးမြှုပ်နှံလျှက်ရှိသော  Shuang Xi (Pathein) Garment Co., Ltd မှ CMP အထည်ချုပ်လုပ်ငန်း စတင်စမ်းသပ် လည်ပတ်လျှက်ရှိပြီး မြန်မာနိုင်ငံရင်းနှီးမြှုပ်နှံမှု ဥပဒေပုဒ်မ-၂၅(ဃ) အရ ဧရာ၀တီတိုင်းဒေသကြီး ရင်းနှီးမြှုပ်နှံမှုကော်မတီမှ အတည်ပြုမိန့်အမှတ် ဧရာ-၀၆၆/၂၀၂၁ ရာနှုန်းပြည့် နိုင်ငံခြား ရင်းနှီးမြှုပ်နှံမှုဖြင့် အထည်ချုပ်လုပ်ငန်း လုပ်ကိုင်ရန် ခွင့်ပြုပေးခဲ့ကြောင်း ရင်းနှီးမြှုပ်နှံမှုနှင့် ကုမ္ပဏီများ ညွှန်ကြားမှုဦးစီးဌာနမှ သိရသည်။

          အထည်ချုပ်လုပ်ငန်းအတွက် ကုန်ကြမ်းများကို ပြည်ပမှ မှာယူတင်သွင်း၍ ကုန်ချောအဖြစ် JAKO၊ UHL Sport အမှတ်တံဆိပ် အ၀တ်အထည်များ ထုတ်လုပ်ပြီး ပြည်ပသို့ တင်ပို့ရောင်းချသွားမှာဖြစ်ကြောင်း လက်ရှိစက်ရုံတွင် ပြည်ပနိုင်ငံသား (၃)ဦး၊ လုပ်သားဦးရေ (၄၆၈) ဦးဖြင့် လုပ်ကိုင်လျှက်ရှိပြီး ယခုလို ဧရာ၀တီတိုင်းဒေသကြီးအတွင်း ပြည်ပနိုင်ငံများမှ ရင်းနှီးမြှုပ်နှံမှုများ ၀င်ရောက်လာသည့်အတွက် ဒေသခံများ အလုပ်အကိုင် အခွင့်အလမ်းများရရှိသလို ပြည်ပ၀င်ငွေလည်း ရရှိမှာဖြစ်ကြောင်း နောက်ပိုင်းတွင် စက်ရုံမှ လုပ်သားအသစ်များ ထပ်မံခန့်ထားရန် စီစဉ်လျှက်ရှိပြီး စုစုပေါင်း လုပ်သားဦးရေ (၁၃၀၀) ကျော်ဖြင့် လုပ်ကိုင်သွားမှာဖြစ်ကြောင်း စက်ရုံမန်နေဂျာထံမှ သိရသည်။

DOCA(ဧရာဝတီ)