သတင်းနှင့် လှုပ်ရှားမှုများ

      ၂၀၂၄ခုနှစ်၊ ဇွန်လ (၆)ရက်နေ့၊ နံနက်(၀၉:၃၀)နာရီအချိန်တွင် စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ ဒုတိယဝန်ကြီးဦးဆောင်၍ကျင်းပပြုသည့် ပြည်တွင်းစားဆန်ဈေးနှုန်းများ သင့်တင့်မျှတစွာဖြင့် တည်ငြိမ်မှန်ကန်စေရေး လုပ်ငန်းညှိနှိုင်းအစည်းအဝေးဆုံးဖြတ်ချက်များအရ တိုင်းဒေသကြီးဦးစီးမှူးက ဆန်စက်များ၊ စပါး/ဆန်ရောင်းချသည့် လုပ်ငန်းရှင်များအားဖိတ်ကြား၍ ဆွေးနွေးခဲ့ကြောင်းသိရှိရပါသည်။

      ညွန်ကြားချက်အရ ၂၀၂၄ခုနှစ်၊ ဇွန်လ (၂၄)ရက်နေ့၊ နေ့လယ် (၁၄:၀၀)နာရီအချိန်တွင် စစ်ကိုင်းတိုင်းဒေသကြီး၊ မုံရွာခရိုင်၊ မုံရွာမြို့၊ အထွေထွေအုပ်ချုပ်ရေးဦးစီးဌာန၊ အစည်းအဝေးခန်းမ၌ မုံရွာခရိုင်၊ အထွေထွေအုပ်ချုပ်ရေးဦးစီးဌာန၊ အုပ်ချုပ်ရေးမှူးဦးဆောင်၍ ပြည်တွင်းစားဆန်ဈေးနှုန်းများ သင့်တင်မျှတစွာတည်ငြိမ်မှန်ကန်စေရေးနှင့် MyRO စနစ်တွင် သိုလှောင်ရုံမှတ်ပုံတင်ဆောင်ရွက်ရေးဆွေးနွေးပွဲကို ကျင်းပခဲ့ရာ  စားသုံးသူရေးရာဦးစီးဌာနမှ အရာထမ်း၊ အမှုထမ်း (၁၀) ဦး၊ ခရိုင်/ မြို့နယ်ကုန်ဈေးနှုန်းတည်ငြိမ်ရေးလုပ်ငန်းအဖွဲ့ဝင် (၁၅)ဦး၊ ဆန်စက်လုပ်ငန်းရှင်များနှင့် စပါး/ဆန်ရောင်းဝယ်ရေးလုပ်ငန်းရှင်များ (၄၀)ဦး၊ စုစုပေါင်း (၆၅)ဦးတက်ရောက်ခဲ့ကြောင်းသိရှိရပါသည်။

        အခမ်းအနားတွင် မုံရွာခရိုင်၊ ကုန်ဈေးနှုန်းတည်ငြိမ်ရေးလုပ်ငန်းအဖွဲ့ ဥက္ကဋ္ဌက အဖွင့်အမှာစကားနှင့် အစည်းအဝေးကျင်းပရခြင်းရည်ရွယ်ချက်ကိုပြောကြားခဲ့ပြီး စားသုံးသူရေးရာဦးစီးဌာနမှ ဒုတိယတိုင်းဒေသကြီးဦးစီးမှူးက ပြည်တွင်းစားဆန်ဈေးနှုန်းများတည်ငြိမ်မှန်ကန်စေရေး၊ သင့်တင့်မျှတသောဈေးနှုန်းဖြင့်ရောင်းချနိုင်ရေး၊ Myanmar Rice Online (MyRO) စနစ်တွင် သိုလှောင်ရုံမှတ်ပုံတင်ရေး စသည့်အချက်များကိုဆွေးနွေးခဲ့ပါသည်။

       ဆက်လက်၍ တက်ရောက်လာသော လုပ်ငန်းရှင်များက သိရှိလိုသည်များကိုမေးမြန်းဆွေးနွေးခြင်း၊ ပြန်လည်ရှင်းလင်းဖြေကြားခြင်းများပြုလုပ်ခဲ့ကြပြီး ခရိုင်ကုန်ဈေးနှုန်းတည်ငြိမ်ရေးလုပ်ငန်းအဖွဲ့ ဥက္ကဋ္ဌက နိဂုံးချုပ်စကားပြောကြားခဲ့ကြောင်း၊ အစည်းအဝေးမှာ နေ့လယ်(၁၆:၀၀)နာရီအချိန်တွင် အောင်မြင်စွာပြီးမြောက်ခဲ့ကြောင်း သတင်းရရှိပါသည်။

DOCA(စစ်ကိုင်း)

     စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၏ ဆောင်ပုဒ်ဖြစ်သည့် “စားသုံးသူအခွင့်အရေးဦးစားပေး” ဆိုသည့်အတိုင်း စားသုံးသူပြည်သူများသည် စားသုံးသူအခွင့်အရေးနှင့် ပတ်သက်သည့် အသိပညာဗဟုသုတများရရှိစေရန် ကျောင်း၊ ဈေး၊ ရပ်ကွက်၊ ကျေးရွာ များ၊ ဌာနဆိုင်ရာရုံးများ၊ တက္ကသိုလ်/ကောလိပ်များ၊ တပ်ရင်းတပ်ဖွဲ့များကို စားသုံးသူကာကွယ်ပေးရေးအသိပညာပေးဟောပြောပွဲများဆောင်ရွက်ခြင်း၊ ဈေးကွက်အတွင်းစားသုံးသူများအနေဖြင့် ကုန်စည်နှင့်ဝန်ဆောင်မှုများကိုအသုံးပြုရာတွင် ဘေးအန္တရာယ်ကင်းရှင်းစေရန်နှင့် ထုတ်ကုန်များလုံခြုံစိတ်ချရမှုရှိစေရန် ဈေးကွက်မရောက်မီနှင့် ဈေးကွက်ရောက်ပြီးသောကုန်စည်များကို ဈေးကွက်စောင့်ကြည့်စစ်ဆေးခြင်းများဆောင်ရွက်လျက်ရှိရာ စားသုံးသူများ၏အခွင့်အရေး (၈)ချက်အနက် ကုန်စည် (သို့မဟုတ်) ဝန်ဆောင်မှုများနှင့် ပတ်သက်သည့် အသိပညာဗဟုသုတများနှင့် လိုအပ်သောအချက်အလက်များကိုသိရှိလေ့လာနိုင်ရန်၊ နစ်နာဆုံးရှုံးမှုများကိုရှင်းလင်းတင်ပြနိုင်ရန်၊ တိုင်ကြားနိုင်ခြင်းကိုသိရှိစေရန်ရည်ရွယ်၍ ရွှေဘိုမြို့နယ်အတွင်းရှိ ပြည်သူများအား စားသုံးသူကာကွယ်ရေးဥပဒေ ၂၀၁၉ပါ အကြောင်းများကိုသိရှိလေ့လာနိုင်စေရန် စားသုံးသူရေးရာဦးစီးဌာန၊ ရွှေဘိုခရိုင်ဦးစီးမှူးရုံးမှ ခရိုင်ဦးစီးမှူးဦးဆောင်၍ ၂၀၂၄ခုနှစ်၊ ဇွန်လအတွင်း စားသုံးသူကာကွယ်ရေးအသိပညာပေးဆွေးနွေးပွဲ (၁) ကြိမ်ဆောင်ရွက်ခဲ့ပါသည်။

      (၂၀-၆-၂၀၂၄)ရက်နေ့၌ ရွှေဘိုမြို့၊ အမှတ်(၁)၊ အခြေခံပညာအထက်တန်းကျောင်းတွင်  ဌာနဆိုင်ရာဝန်ထမ်း၊ ဆရာ/ဆရာမနှင့် ကျောင်းသား/ကျောင်းသူ (၁၁၅)ဦးအား  စားသုံးသူကာကွယ်ရေးဥပဒေနှင့် စားသုံးသူများသည် ကုန်စည်နှင့်ဝန်ဆောင်မှုများကိုသုံးစွဲရာတွင် နစ်နာဆုံးရှုံးမှုများရှိလျှင် တိုင်ကြားနိုင်ကြောင်းနှင့် တိုင်ကြားနိုင်သည့်နေရာများအကြောင်း၊ Online Shopping များသုံးစွဲရာတွင် သတိပြုဆောင်ရွက်သင့်သည့်အချက်များ၊ အွန်လိုင်းငွေကြေးဝန်‌ဆောင်မှုလုပ်ငန်းများသုံးစွဲရာတွင် သတိပြုလိုက်နာသင့်သည့်အချက်များကို အသိပညာပေးဆွေးနွေးခဲ့ပြီး လက်ကမ်းစာစောင် (၁၁၅) စောင်ဖြန့်ဝေပေးခဲ့ကြောင်း သတင်းရရှိပါသည်။

DOCA(စစ်ကိုင်း)

    စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၏ မျှော်မှန်းချက်ဖြစ်သည့် “ပြည်တွင်းကုန်သွယ်မှုဖွံ့ဖြိုးရေးနှင့် စားသုံးသူကာကွယ်ရေးလုပ်ငန်းများဖြင့် နိုင်ငံ့စီးပွားရေးဖွံ့ဖြိုးတိုးတက်စေရန်” ဆိုသည့်ဆောင်ပုဒ်နှင့်အညီ ပြည်တွင်းကုန်သွယ်မှုဖွံ့ဖြိုးရေးလုပ်ငန်းများအပြင် စားသုံးသူကာကွယ်ရေးအသိပညာပေးလုပ်ငန်းများဆောင်ရွက်လျက်ရှိရာ ရွှေဘိုခရိုင်ဦးစီးမှူးရုံးမှ ခရိုင်ဦးစီးမှူး ဦးဆောင်၍ ၂၀၂၄ခုနှစ်၊ ဇွန်လအတွင်း စီးပွားရေးလုပ်ငန်းရှင်များနှင့်တွေ့ဆုံခြင်း (၄)  ကြိမ်ဆောင်ရွက်ခဲ့ပါသည်။

      ရွှေဘိုခရိုင်အနေဖြင့် ၂၀၂၄ခုနှစ်၊ ဇွန်လအတွင်း စီးပွားရေးလုပ်ငန်းရှင်အားတွေ့ဆုံခြင်း (၄)ကြိမ်ဆောင်ရွက်ခဲ့ရာ ခရိုင်ဦးစီးမှူးဦးဆောင်သော ဝန်ထမ်းများအဖွဲ့သည် ရွှေဘိုမြို့၊ အမှတ်(၆)ရပ်ကွက်ရှိ ဆန်ပွဲရုံအားလည်းကောင်း၊ အမှတ်(၅)ရပ်ကွက်ရှိ ဆီနှင့်ကုန်မျိုးစုံရောင်းချသည့်ဆိုင်တွင် စားအုန်းဆီလက်လီရောင်းချသည့် စီးပွားရေးလုပ်ငန်းရှင်များအားလည်းကောင်း၊ ရွှေဘိုမြို့၊ စက်မှုဇုန်ရှိ ဆန်စက်အား လည်းကောင်း၊ ရွှေဘိုမြို့၊ အမှတ်(၃)ရပ်ကွက်၊ ဈေးမြောက်ဘက်ရှိ ကွမ်းယာပစ္စည်းနှင့် ကုန်မျိုးစုံရောင်းဝယ်ရေးလုပ်ငန်းရှင်နှင့်တွေ့ဆုံပြီး စားသုံးသူကာကွယ်ရေဥပဒေ၊ အမိန့်၊ ညွှန်ကြားချက်များနှင့် ဌာနမှ ဆောင်ရွက်လျက်ရှိသော လုပ်ငန်းများအား အသိပညာပေးဆွေးနွေးခဲ့ကြောင်း သတင်းရရှိပါသည်။

DOCA(စစ်ကိုင်း)

    ဧရာဝတီတိုင်းဒေသကြီး၊ ဖျာပုံခရိုင်စားသုံးသူရေးရာဦးစီးဌာနမှ ခရိုင်ဦးစီးမှူးဦးထွေးသိမ်းနှင့်  မြို့နယ်တာဝန်ခံဦးမင်းဇော်တို့သည် ၂၀၂၄ခုနှစ်၊ ဇွန်လ(၂၄)ရက်နေ့၊ ညနေ(၁၆:၀၀)နာရီအချိန်တွင် ခရိုင်ဦးစီးမှူးရုံး၌ ဆီကုန်သည်နှင့်ဆီလုပ်ငန်းရှင်များအား စားသုံးသူကာကွယ်ရေး အသိပညာပေး ဟောပြောခြင်းကို ဆောင်ရွက်ခဲ့ပါသည်။

    အဆိုပါအခမ်းအနားတွင် ခရိုင်ဦးစီးမှူးကပြောကြားရာတွင် ပြည်တွင်းမှတရားဝင်ထုတ်လုပ် ထားသောပုံးဆီများအား ရောင်းမည်ဆိုပါက မည်သည့်ဆီအမျိုးအစား ရောင်းချမည်ဖြစ်သည်ကို စားသုံးသူရေးရာဦးစီးဌာနသို့ စာရင်းတင်ပြထားရန်လိုကြောင်း၊ (ဥပမာ-ငါးနှစ်ကောင်နှင့်ယုဇနဆီ) စားသုံးသူပြည်သူများ လက်ဝယ်ရရှိစေရေးအတွက် ရပ်ကွက် /   ကျေးရွာ၊ ဌာနဆိုင်ရာများကိုလည်း သတ်မှတ်ဈေးနှုန်းဖြင့်ရောင်းချပေးရန် ပြောကြားခဲ့ပါသည်။ ဆက်လက်၍ မြို့နယ်တာဝန်ခံမှ စားသုံးသူကာကွယ်ရေး ဥပဒေအခန်း( ၁၈ ) ပုဒ်မ( ၄၂ )ပါ ကုန်အညွှန်းအမှတ်အသားဆိုင်ရာ များနှင့်စပ်လျဉ်ပြီး အမျိုးအစား၊ အမျိုးအမည်၊ အလေးချိန်၊ သက်တမ်းကုန်ဆုံးရက်၊   ထုတ်လုပ်ရက်စွဲနှင့် FDA ထောက်ခံချက်များပါဝင်သည့် ဆီများကိုသာရောင်းချရန်၊ ပုဒ်မ( ၄၃ )အရ  မြန်မာ ဘာသာဖြင့်ဖြစ်စေ၊ မြန်မာဘာသာနှင့် အခြားဘာသာတွဲလျက်ဖြစ်စေ ဖော်ပြရမည်ဖြစ်ကြောင်း အသိပညာပေးဟောပြောခဲ့ကြောင်း သတင်းရရှိပါသည်။

 DOCA(ဧရာဝတီ)

     စားသုံးသူရေးရာဦးစီးဌာန၊ မွန်ပြည်နယ်၊ သထုံခရိုင်၊ သထုံမြို့နယ်တာဝန်ခံသည် မြို့နယ်အထွေထွေအုပ်ချုပ်ရေးဦးစီးဌာန၊ မြို့နယ်စည်ပင်သာယာရေးအဖွဲ့တို့နှင့်ပူးပေါင်း၍  ၂၅-၆-၂၀၂၄ ရက်နေ့တွင် သထုံမြို့နယ်အတွင်း ဆန်များဈေးနှုန်းမြှင့်တင်ရောင်းချမှုမရှိရေးနှင့် ဈေးနှုန်းတည်ငြိမ်းရေးအတွက် သထုံမြို့နယ်အတွင်းရှိ ဆန်ဂိုဒေါင်များ၊ ဆန်အရောင်းဆိုင်များအား လိုက်လံကွင်းဆင်းစစ်ဆေးခဲ့ကြောင်းသိရှိရပါသည်။

     ထိုသို့ကွင်းဆင်းစစ်ဆေးရာ သထုံမြို့နယ်အတွင်းရှိ ဆန်ဆိုင်(၄) ဆိုင်တွင်‌ရောင်းချလျက်ရှိသော ကျားပျံဆန် (၁၀၈) ပေါင် တစ်အိတ်လျှင် (၁၄၅၀၀၀) ကျပ်မှ (၁၅၀၀၀၀) ကျပ်၊ ပေါ်ဆန်းဆန် (၁၀၈) ပေါင် တစ်အိတ်လျှင် (၁၃၀၀၀၀) ကျပ်မှ (၁၅၀၀၀၀) ကျပ်၊ ကမာကြည် (၁၀၈) ပေါင် တစ်အိတ်လျှင် (၁၂၀၀၀၀) ကျပ်၊ ဧည့်မထ (၁၀၈) ပေါင် တစ်အိတ်လျှင် (၈၅၀၀၀) ကျပ်ဖြင့်ရောင်းချလျက်ရှိကြောင်း၊ ဈေးကစားရန်ရည်ရွယ်၍ သိုလှောင်ထားခြင်းမရှိကြောင်းစစ်ဆေးတွေ့ရှိရပြီး ဆန်ဆိုင်များအား သင့်တင့်မျှတသော ဈေးနှုန်းဖြင့်သာရောင်းချရန်၊ ဈေးကစားရန်ရည်ရွယ်၍ သိုလှောင်ထားခြင်းမပြုကြရန် ဆွေးနွေးခဲ့ကြောင်းသိရှိရပါသည်။

DOCA(မွန်)