သတင်းနှင့် လှုပ်ရှားမှုများ

   ရှမ်းပြည်နယ်(မြောက်ပိုင်း)၊ စားသုံးသူရေးရာဦးစီးဌာန၊ ဒုတိယပြည်နယ်ဦးစီးမှူးရုံးမှ ဝန်ထမ်းများသည် (၂၁.၆.၂၀၂၄) ရက်နေ့၊ နံနက်(၁၀.၀၀) နာရီအချိန်တွင် မြို့နယ်စည်ပင်သာယာရေးဦးစီးဌာန၊ ဗဟိုစာရင်းအင်းအဖွဲ့၊ ဆန်ကုန်သည်အသင်းတို့မှ တာဝန်ရှိသူများနှင့်ပူးပေါင်း၍ လားရှိုးမြို့ပေါ်ရှိ ဆန်ဆိုင်(၂) ဆိုင်အား ကုန်ဈေးနှုန်းတည်ငြိမ်မှုရှိစေရေးအတွက် ကွင်းဆင်းစစ်ဆေးခြင်းများ ဆောင်ရွက်ခဲ့ကြောင်းသိရှိရသည်။

   အဆိုပါကွင်းဆင်းစစ်ဆေးရာတွင် လက်လီ/ လက်ကားရောင်းချလျက်ရှိသော ဆန်ဆိုင်ကြီးများ၏ ဆန်စီးဝင်/ ထွက်မှုအခြေအနေ၊ သိုလှောင်ရောင်းချမှုအခြေအနေ၊ ဈေးနှုန်း/ ဈေးကွက်ဖြစ်ပေါ်မှုနှင့် လက်ကျန်အခြေအနေများကို စစ်‌ဆေးခဲ့ကြောင်းသိရှိရပါသည်။ စီးပွားရေးနှင့် ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာနသည် ဆန်အပါအဝင်အခြေခံစားသောက် ကုန်ပစ္စည်းများ ဈေးကွက်အတွင်း ပြတ်လပ်မှုမရှိစေရေးအတွက် ကြပ်မတ်ဆောင်ရွက်လျက်ရှိကြောင်း သိရှိရပါသည်။

DOCA(ရှမ်း)

    စားသုံးသူရေးရာဦးစီးဌာန၊ တောင်ငူခရိုင်ဦးစီးမှူး ဦးမျိုးအောင်သည် စက်မှုကြီးကြပ်ရေးနှင့်စစ်ဆေးရေးဦးစီးဌာန၊ ခရိုင်ဦးစီးမှူး ဦးနေထွန်းဝင်း၊ မြိုနယ်စည်ပင်သာယာရေးအဖွဲ့မှ လက်ထောက်ညွှန်ကြားရေးမှူး ဦးခိုင်ထွန်း၊ စိုက်ပျိုးရေးဦးစီးဌာနမှ ဦးစီးအရာရှိ ဦးသိန်းလွင်၊ တောင်ငူမြို့ အမှတ်(၁) ရဲစခန်းမှ ဒုတိယရဲအုပ်ကျော်လင်းသူ၊ ပဲခူးတိုင်းဒေသကြီးဆန်စပါးဒေသ ကော်မတီ(၂) (တောင်ငူခရိုင်) ဥက္ကဋ္ဌ ဦးကျော်စိုးမိုးတို့နှင့်အတူ ဇွန်လ ၂၂ ရက်နေ့၊ နံနက်ပိုင်းတွင် တောင်ငူမြို့ပေါ် ဆန်စက်များရှိ သိုလှောင်ရုံများအား ကွင်းဆင်းစစ်ဆေးခဲ့ကြပါသည်။

         စားသုံးသူရေးရာဦးစီးဌာန၊ ခရိုင်ဦးစီးမှူးနှင့် ပူးပေါင်းအဖွဲ့ဝင်များသည် ဆန်စက်များ၌ ကြိတ်ခွဲထုတ်လုပ်ရောင်းချဖြန့်ဖြူးမှုအခြေအနေများ၊ သိုလှောင်ရုံအတွင်း၌ သိုလှောင်ထားရှိမှုနှင့် လက်ကျန်အခြေအနေများကိုကြည့်ရှုစစ်ဆေးခဲ့ပြီး စားသုံးသူရေးရာဦးစီးဌာန၊ ခရိုင်ဦးစီးမှူးက အရေးကြီးကုန်စည်နှင့်ဝန်ဆောင်မှုဥပဒေအရ စားသောက်ကုန်ပစ္စည်းများကို အရေးကြီးကုန်စည်အဖြစ် သတ်မှတ်ထားရှိကြောင်း၊ အရေးကြီးကုန်စည်အဖြစ် သတ်မှတ်သောကုန်စည်များကို ဈေးနှုန်းမြှင့်တင်ရောင်းချခြင်း၊ ဈေးနှုန်းမြှင့်တင်ဖြန့်ဖြူးခြင်း၊ ဈေးကစားရန်ရည်ရွယ်ချက်ဖြင့် သိုလှောင်ခြင်းမပြုရန်တားမြစ်ထားကြောင်း၊ ထို့ကြောင့် စားသောက်ကုန်ဖြစ်သောဆန်ကို ဈေးနှုန်းမြှင့်တင်ဖြန့်ဖြူးရောင်းချခြင်း၊ ဈေးကစားရန်ရည်ရွယ်ချက်ဖြင့် သိုလှောင်ခြင်းမပြုရန် ဆန်စက်ပိုင်ရှင်များအား အသိပညာပေးဆွေးနွေးခဲ့ပါသည်။

          ဆန်စက်ပိုင်ရှင်များအား ဆန်စပါးသိုလှောင်ရုံများကို Online Registration စနစ်ဖြင့် Myanmar Rice Online (MyRo) – www.myro.com.mm တွင် မှတ်ပုံတင်ထားခြင်းမရှိသေးပါက မှတ်ပုံတင်ကြရန်ကိုလည်း အသိပညာပေးပြောကြားခဲ့ကြောင်း၊ တောင်ငူမြို့ပေါ်ရှိ လမင်းဆန်စက်၊ ရွှေအိုးဆန်စက်၊ အေးမေတ္တာဆန်စက်၊ ကောင်းပြည့်ဆန်စက်နှင့် မိဘမေတ္တာဆန်စက်များကိုစစ်ဆေးခဲ့ကြောင်းသိရှိရပါသည်။

DOCA(ပဲခူး)

     စားသုံးသူရေးရာဦးစီးဌာနသည် ကျောင်းသား၊ ကျောင်းသူများ၊ ကျေးလတ်နှင့် မြို့ပြနေ ပြည်သူများ၊ ဌာနဆိုင်ရာ ဝန်ထမ်းများနှင့် စီးပွားရေးလုပ်ငန်းရှင်များအား စားသုံးသူကာကွယ်ရေး ဥပဒေပါ စားသုံးသူအခွင့်အ‌ရေးနှင့် တာဝန်များ၊ စီးပွားရေးလုပ်ငန်းရှင်များ၏ တာဝန်များ၊ တားမြစ်ချက်များနှင့် ပြစ်မှုပြစ်ဒဏ်များအား သိရှိစေရန်၊ ကုန်အညွှန်း အမှတ်အသားဆိုင် သတ်မှတ်ချက်များအားသိရှိပြီး ဘေးအန္တရာယ်ကင်းရှင်းသော အစားအသောက်နှင့် ကုန်စည်များအား ရွေးချယ် ဝယ်ယူတတ်စေရန် အသိပညာပေးဆွေးနွေးပွဲများအား စဉ်ဆက်မပြတ်ဆောင်ရွက်လျက်ရှိပါသည်။

          စားသုံးသူရေးရာဦးစီးဌာန၊ မကွေးခရိုင်ဦးစီးမှူးရုံးမှ ဒုတိယခရိုင်ဦးစီးမှူး ဦးမျိုးဝင်း (မကွေးမြို့နယ် တာဝန်ခံ)နှင့် ဝန်ထမ်းများသည် (၂၀.၆.၂၀၂၄)ရက်နေ့၊ နံနက် (၀၉:၃၀)အချိန်တွင် မကွေးမြို့ရှိ အခြေခံပညာမူလတန်းကျောင်း (ချမ်းမြေ့သာယာ)ရှိ ဆရာ၊ ဆရာမ (၁၂)ဦးနှင့် ကျောင်းသား၊ ကျောင်းသူ (၄၁၀)ဦးအားလည်းကောင်း၊ (၂၁.၆.၂၀၂၄)ရက်နေ့၊ နံနက် (၁၀:၀၀) နာရီအချိန်တွင် အခြေခံပညာ မူလတန်းကျောင်း (အေးမြသာယာ)ရှိ ဆရာ၊ ဆရာမ (၁၀)ဦးနှင့် ကျောင်းသား၊ ကျောင်းသူ (၂၅၀)ဦးတို့အား စားသုံးသူကာကွယ်ရေးဥပဒေ ၂၀၁၉ပါ အခြေခံ ကျောင်းသား၊ ကျောင်းသူများ သိသင့်သည့် စားသုံးသူကာကွယ်ရေးဥပဒေအကြောင်း အသိပညာ ပေးဆွေးနွေးခဲ့ပြီး မြန်မာနိုင်ငံ စားသုံးသူကာကွယ်ရေးကော်မရှင်၏ ညွှန်ကြားချက်အမှတ် (၂/၂၀၁၉) ပါ လက်ကမ်းစာစောင်များ ဖြန့်ဝေပေးခဲ့ကြောင်း သိရှိရပါသည်။

DOCA(မကွေး)

   ဒေသတွင်းဖြစ်သင့်ဖြစ်ထိုက်သော စျေးနှုန်းဖြင့်သာ ရောင်းချမှုရှိစေရေးအတွက် မြိတ်ခရိုင် ကုန်စျေးနှုန်းတည်ငြိမ်ရေးအဖွဲ့ဝင်များဖြစ်သော စားသုံးသူရေးရာဦးစီးဌာန၊ အထူးစုံစမ်းစစ်ဆေးရေး အဖွဲ့၊ ဗဟိုစာရင်းအင်းဦးစီးဌာန၊ မြို့နယ်စည်ပင်သာယာရေးအဖွဲ့တို့သည် ၂၀၂၄ခုနှစ်၊ ဇွန်လ(၂၄) ရက်နေ့၊ နံနက်(၉း၀၀)အချိန်တွင် မြိတ်မြို့ပေါ်ရှိဆန်အရောင်းဆိုင်များသို့ စျေးနှုန်းမြှင့်တင်ရောင်းချခြင်းမရှိစေရေးကွင်းဆင်းစစ်ဆေးဆောင်ရွက်ခဲ့ကြပါသည်။ ကွင်းဆင်းစစ်‌ဆေးခဲ့သော ဆန်ဆိုင်များတွင် ရွှေဘိုပေါ်ဆန်းဆန် တစ်ပြည်လျှင်(၆၇၀၀)၊ ဖျာပုံဆန်တစ်ပြည်လျှင် (၆၀၅၀)ကျပ်၊ ပေါ်ကျွဲဆန် တစ်ပြည်လျှင် (၄၂၅၀)ကျပ်နှင့် စူပါဆန်တစ်ပြည်လျှင် (၃၇၀၀)ကျပ်ဖြင့် ရောင်းချနေကြောင်း ဈေးနှုန်းမြင့်တင်ရောင်းချခြင်းမရှိကြောင်း သတင်းရရှိပါသည်။

DOCA(တနင်္သာရီ)

      မွန်ပြည်နယ်၊ သထုံမြို့နယ်တွင် အငြိမ်းစားနိုင်ငံ့ဝန်ထမ်းများအား အခမဲ့ကျန်းမာရေးစောင့်ရှောက်မှုပေးခြင်း၊ အခြေခံစားသောက်ကုန်များ သက်သာသောဈေးနှုန်းတို့ဖြင့် ရောင်းချပေးခြင်းတို့ကို ၂၁-၆-၂၀၂၄ ရက်နေ့တွင် သထုံခရိုင်ပြည်သူ့ဆေးရုံကြီးအရှေ့ရှိ လူနာစောင့်နားနေဆောင်၌ တာဝန်ရှိသူများပူးပေါင်းဆောင်ရွက်ခဲ့ကြသည်။

     ထိုသို့ဆောင်ရွက်ရာတွင် သထုံခရိုင်စီမံအုပ်ချုပ်ရေးအဖွဲ့ ဥက္ကဋ္ဌ ဦးရဲနိုင်၊ မြို့နယ်စီမံအုပ်ချုပ်ရေးအဖွဲ့ဥက္ကဋ္ဌ ဦးကျော်ဆွေဝင်း၊ ခရိုင်နှင့်မြို့နယ်စီမံအုပ်ချုပ်ရေးအဖွဲ့ဝင်များမှ တာဝန်ရှိသူများသည် ခရိုင်ဆေးရုံအုပ်ကြီး ဒေါက်တာကျော်ဝင်းဇော်ဦးဆောင်သည့် အထူးကုဆရာဝန်ကြီးများ၊ သမားတော်များ၊ ခွဲစိပ်ဆရာဝန်များ၊ ကျန်းမာရေးဝန်ထမ်းများက ကျန်းမာရေးစစ်ဆေးခြင်း ကုသခြင်းနှင့် လိုအပ်သည့်ဆေးဝါးများ အခမဲ့ပေးအပ်ခြင်း၊ မြို့နယ်စည်ပင်သာယာရေးအဖွဲ့၊ မြို့နယ်ဆန်ကုန်သည်ကြီးများအသင်း၊ ဆီကုန်သည်ကြီးများအသင်းနှင့် တာဝန်ရှိသူများပူးပေါင်းကာ သက်‌သာသောဈေးနှုန်းဖြင့် ဆန်၊ ဆီ၊ အသားငါး၊ ဟင်းသီးဟင်းရွက် စသည့် အခြေခံစားသောက်ကုန်များရောင်းချပေးခြင်းတို့ကို ကြည့်ရှုအားပေးကာ လိုအပ်သည်တို့ကိုပံ့ပိုးပေးခဲ့ကြသည်။

     အဆိုပါ အငြိမ်းစားနိုင်ငံ့ဝန်ထမ်းများစောင့်ရှောက်မှုပေးရာတွင် မြို့နယ်ကြက်ခြေနီသူနာပြုတပ်ဖွဲ့၊ အမျိုးသမီးရေးရာအဖွဲ့၊ မိခင်နှင့်ကလေးစောင့်ရှောက်ရေးအသင်းနှင့် ရပ်ကွက်/ကျေးရွာ အုပ်ချုပ်ရေးအဖွဲ့တို့က လိုအပ်သည်များ ကူညီဆောင်ရွက်ပေးခဲ့ကြကြောင်းသိရှိရပါသည်။

DOCA(မွန်)