ပြည်တွင်းကုန်သွယ်မှုသတင်း

          (၂၇.၁၂.၂၀၂၁)ရက်နေ့မှ (၃၀.၁၂.၂၀၂၁)ရက်နေ့ထိ တစ်ပတ်အတွင်း ဖြစ်ပေါ်နေသော တောင်ကြီးလက်လီဈေးကွက်၏ အခြေခံစားကုန်ဈေးနှုန်းများမှာ အာလူးတစ်ပိဿာလျှင်(၂၅၀၀)  ကျပ်၊ ဂေါ်ဖီထုပ်တစ်ထုပ်လျှင်(၁၀၀၀)ကျပ်၊ ပဲနီလေးတစ်ပိဿာလျှင်(၃၅၀၀)ကျပ်၊ ဧည့်မထ(ဒေသ) ဆန်  တစ်ပြည် လျှင်(၁၂၀၀)ကျပ်၊ တစ်အိတ်လျှင် (၂၈၀၀၀)  ကျပ်၊ ရွှေဘိုပေါ်ဆန်းမွှေး(အဟောင်း) တစ်ပြည်လျှင်(၂၃၀၀)ကျပ်၊ တစ်အိတ်လျှင်(၅၄၀၀၀)ကျပ်၊ ဖျာပုံပေါ်ဆန်းမွှေး(အဟောင်း)တစ်ပြည် လျှင်(၂၀၅၀)ကျပ်၊ တစ်အိတ်လျှင်(၄၈၀၀၀)ကျပ်နှင့် ကြက်သွန်နီတစ်ပိဿာလျှင်(၁၂၀၀)ကျပ်ရှိှ ကြောင်း သိရှိရပါသည်။

          အာလူးဈေးနှုန်းမှာ ယခင်တစ်ပတ်ထက်(၅၀၀)ကျပ် ဈေးကျသွားပြီး တောင်ကြီးမြို့နယ်အနီး တစ်ဝိုက်ရွာများတွင် စိုက်ပျိုးသော ဒေသအာလူးများထွက်ရှိလာခြင်းကြောင့်ဖြစ်ကြောင်း၊ ဂေါ်ဖီထုပ် မှာယခင်တစ်ပတ်ထက် တစ်ထုပ်လျှင်(၃၀၀)ကျပ် ဈေးတက်လာကြောင်းတွေ့ရှိရပါသည်။ ဂေါ်ဖီ  ထုပ်သီးနှံသည် ယခုနှစ်တွင်တောင်သူများ စိုက်ပျိုးထုပ်လုပ်မှုနည်ပါးလာသောကြောင့် ဈေးကောင်း ရရှိသော သီးနှံဖြစ်ကြောင်းသိရှိရပါသည်။ ပဲနီလေးမှာ တစ်ပိဿာလျှင်ယခင်တစ်ပတ်ထက် (၅၀၀)ကျပ် ဈေးနှုန်းကျလာပြီး ဝယ်ယူစားသုံးမှုနည်းပါးလာခြင်းဖြစ်ကြောင်း သိရှိရပါသည်။

          ကျန်အခြေခံစားကုန်များ၏ဈေးနှုန်းများမှာ ယခင်တစ်ပတ်အတိုင်းဈေးနှုန်းပြောင်းလဲမှုမရှိဘဲ တည်ငြိမ်လျက်ရှိကြောင်း သိရှိရပါသည်။

စားသုံးသူရေးရာဦးစီး(ရှမ်းပြည်နယ်)

        စားသုံးသူရေးရာဦးစီးဌာနသည် စားသုံးသူကာကွယ်ပေးရေးလုပ်ငန်းများသာမက ပြည်တွင်း ကုန်သွယ်ရေးဖွံ့ဖြိုးမှုလုပ်ငန်းများကိုပါ ဆောင်ရွက်လျက်ရှိပါသည်။ ကုန်သွယ်မှုလုပ်ငန်းများ ဆောင်ရွက်ရာ တွင်လည်း အမှန်တကယ်ဖြစ်ပေါ်နေသော ကုန်စည်ဈေးနှုန်းဈေးကွက်အခြေအနေများကို သုံးသပ် ဖော်ပြလျက်ရှိရာ ရှမ်းပြည်နယ်(တောင်ပိုင်း) အောင်ပန်းမြို့နယ်၏ ဒီဇင်ဘာလ စတုတ္ထပတ်အတွင်း ကုန်စည်ဈေးနှုန်းဈေးကွက် အခြေအနေများမှာ ပြောင်း တစ်ပိဿာလျှင် လက်ကားဈေး(၅၈၀) ကျပ်ဖြင့် (၅၄၅)တန်၊ ကြက်သွန်ဖြူ တစ်ပိဿာလျှင် (၃၁၀၀)ကျပ်ဖြင့် (၃၅၇)တန်၊ အာလူး တစ်ပိဿာလျှင် (၂၂၀၀)ကျပ်ဖြင့် (၇၃၂)တန်၊ ဂေါ်ဖီထုပ် တစ်ပိဿာလျှင် (၁၄၀၀)ကျပ်ဖြင့် (၉၀၁)တန်၊ ပန်းမုံလာ တစ်ပိဿာလျှင် (၅၅၀)ကျပ်ဖြင့် (၂၇၉)တန်၊ ချင်း(သစ်) တစ်ပိဿာလျှင် (၅၂၀)ကျပ်ဖြင့် (၂၀၁)တန်၊ နနွင်း တစ်ပိဿာလျှင် (၂၀၀၀)ကျပ်ဖြင့် (၇၃)တန်၊ ချင်းခြောက် တစ်ပိဿာလျှင် (၂၀၀၀)ကျပ်ဖြင့် (၆၀)တန်၊ မုံညှင်းဖြူ တစ်ပိဿာလျှင် (၅၅၀)ကျပ်ဖြင့် (၃၁)တန်၊ ခရမ်းသီး တစ်ပိဿာလျှင် (၁၀၀၀) ကျပ်ဖြင့် (၅၇)တန်၊ ခရမ်းချဉ်သီး တစ်ပိဿာလျှင် (၁၇၀၀)ကျပ်ဖြင့် (၃၂၄)တန်၊ ငရုတ်ခြောက် တစ်ပိဿာလျှင် (၃၈၀၀)ကျပ်ဖြင့် (၁၀)တန် အရောင်းအဝယ်ဖြစ်ခဲ့ပါသည်။ အောင်ပန်းကုန်စည်ဒိုင်မှ ကုန်စည်များကို ရန်ကုန်၊ မန္တလေး၊ နေပြည်တော်၊ ပဲခူး၊ တပ်ကုန်း၊ မုံရွာ၊ မိတ္ထီလာ၊ ပြည်၊ မြဝတီ၊ မော်လမြိုင်မြို့များသို့ ကုန်စုံကားကြီး၊ ကားငယ်များဖြင့် ပုံမှန်စီးဆင်း လျက်ရှိပါကြောင်း သိရှိရပါသည်။

          ၂၀၂၁ခုနှစ် ဒီဇင်ဘာလ နောက်ဆုံးအပတ်တွင် ပြောင်းသီးနှံ၊ ကြက်သွန်ဖြူ၊ ချင်း(သစ်)၊ နနွင်းနှင့် ချင်းခြောက်တို့မှာ ပုံမှန်အရောင်းအဝယ်ဖြစ်နေသော်လည်း ဈေးနှုန်းအနည်းငယ်ကျဆင်းလျက်ရှိနေ ပါကြောင်း၊ ပြောင်းသီးနှံဈေးနှုန်းမှာ ယခင်အပတ်တွင် အမြင့်ဆုံးဈေး(၆၁၀)ကျပ်အထိရှိခဲ့ပြီး ယခု အပတ်တွင် အမြင့်ဆုံးဈေး(၅၈၀)ကျပ်သာရှိကြောင်း၊ ကြက်သွန်ဖြူဈေးနှုန်းမှာ ယခင်အပတ်တွင် အမြင့်ဆုံးဈေး(၃၁၀၀)ကျပ်အထိရှိခဲ့ပြီး ယခုအပတ်တွင် အမြင့်ဆုံးဈေး(၃၀၀၀)ကျပ်သာရှိကြောင်း၊ ချင်း(သစ်)သီးနှံဈေးနှုန်းမှာ ယခင်အပတ်တွင် အမြင့်ဆုံးဈေး(၅၅၀)ကျပ်အထိရှိခဲ့ပြီး ယခုအပတ်တွင် အမြင့်ဆုံးဈေး(၅၂၀)ကျပ်သာရှိကြောင်း၊ နနွင်းဈေးနှုန်းမှာ ယခင်အပတ်တွင် အမြင့်ဆုံးဈေး(၂၅၀၀)ကျပ်အထိရှိခဲ့ပြီး ယခုအပတ်တွင် အမြင့်ဆုံးဈေး(၂၀၀၀)ကျပ်သာရှိကြောင်း၊ ချင်းခြောက်ဈေးနှုန်းမှာ ယခင်အပတ် တွင် အမြင့်ဆုံးဈေး(၂၂၀၀)ကျပ်အထိရှိခဲ့ပြီး ယခုအပတ်တွင် အမြင့်ဆုံးဈေး(၂၀၀၀)ကျပ်သာရှိကြောင်းနှင့် အခြားသီးနှံများမှာ ဈေးနှုန်းအတက်အကျမရှိဘဲ တည်ငြိမ်နေကြောင်း အောင်ပန်းဈေးကွက်မှ လေ့လာသိရှိခဲ့ရပါသည်။

DOCA(ရှမ်း)

          ၂၀၂၁ခုနှစ် မိုးစပါးနှင့် ၂၀၂၂ခုနှစ် နွေစပါးတို့အတွက် စပါးတင်း(၁၀၀)၏ အခြေခံဈေးနှုန်းကို ကျပ်(၅၄၀၀၀၀) အဖြစ်သတ်မှတ်ကြောင်း တောင်သူလယ်သမားများ အခွင့်အရေးကာကွယ်ရေးနှင့်အကျိုးစီးပွားမြှင့်တင်ရေး ဦးဆောင်အဖွဲ့က ၂၀၂၁ခုနှစ် အောက်တိုဘာလ (၅)ရက်နေ့တွင် ထုတ်ပြန်ထားကြောင်း သိရှိရပါသည်။

          စပါး အစိုဓါတ်(၁၄)ရာခိုင်နှုန်းရှိပြီး အဖျင်း၊ အမှော် ၊ ဖုန်၊ သဲ၊ ခဲ ကင်းစင်ပြီး အရည်အသွေးဆိုင်ရာ သတ်မှတ်စံချိန်စံညွှန်းများနှင့် ကိုက်ညီသည့် တစ်တင်း(၄၆)ပေါင်းကိုက် စပါးတင်း (၁၀၀)၏ အခြေခံရည်ညွှန်းစပါးဈေးနှုန်းအား ကျပ်(၅၄၀၀၀၀) သတ်မှတ်လိုက်ပြီး ဈေးကွက် ပေါက်ဈေးသည် အခြေခံရည်ညွှန်း စပါးဈေးအပေါ်တွင်ဖြစ်ပါက ဈေးကွက်ပေါက်ဈေးအတိုင်း ဝယ်ယူရန်နှင့် ဈေးကွက်ပေါက်ဈေးသည် အခြေခံရည်ညွှန်းစပါးဈေးအောက်တွင်ဖြစ်ပါက အခြေခံ ဈေးနှုန်းအတိုင်းဝယ်ယူရမည်ဟု အသိပေးထားကြောင်းသိရှိပါသည်။

      အခြေခံရည်ညွှန်းဈေးနှုန်းအတိုင်း ရောင်းချရန် အခက်အခဲရှိသည့် တောင်သူလယ်သမား များအနေဖြင့် မြန်မာနိုင်ငံဆန်စပါးအသင်းချုပ်၏ မြို့နယ်ကိုယ်စားလှယ်များသို့ဖြစ်စေ၊ အသင်း ချုပ်ရုံး၏ ဖုန်း ၀၁-၂၃၀၁၁၂၈၊ ၀၈၁-၂၃၀၁၁၂၉၊ ၀၁-၂၁၈၂၆၆ သို့ ဆက်သွယ်နိုင်သည်ဟု တောင်သူလယ်သမားအခွင့်အရေးကာကွယ်ရေးနှင့် အကျိုးစီးပွား မြှင့်တင်ရေးဦးဆောင်အဖွဲ့က အသိပေးထားကြောင်း သိရပါသည်။

          ရှမ်းပြည်နယ်(တောင်ပိုင်း)တွင် စပါး တင်း(၁၀၀)၏ လက်ရှိ ပေါက်ဈေးမှာ ကျပ်(၇၅၀,၀၀၀) ရှိကြောင်းသိရှိရပါသည်။

စားသုံးသူရေးရာဦးစီးဌာန(ရှမ်းပြည်နယ်)

           ကြံတစ်ကြိမ်စိုက်လျှင် (၄)နှစ်အထိထား၍ ပထမနှစ်(ခင်းသစ်)၊ ဒုတိယနှစ်(လမိုင်း)၊ တတိယနှစ်(လမတ်)နှင့် စတုတ္ထနှစ် (ခင်းဟောင်း) ဟူ၍ ခုတ်သိမ်းရကြောင်း သိရှိရပါသည်။ ပထမနှစ် စစိုက်စိုက်ချင်း(ခင်းသစ်)ကို ဇန်နဝါရီလမှ ဖေဖော်ဝါရီလအထိ စိုက်ပျိုးကြ၍ ဒုတိယနှစ်(လမိုင်း)၊ တတိယနှစ်(လမတ်)၊ စတုတ္ထနှစ် (ခင်းဟောင်း)များကိုတော့ ဖေဖော်ဝါရီလမှ ဇူလိုင်လအထိ စိုက်ခင်းမြေပြုပြင်ခြင်းကိုသာ လုပ်ဆောင်ကြပြီး ဒီဇင်ဘာလတွင် ခုတ်သိမ်းရောင်းချကြကြောင်း သိရှိရပါသည်။

           ရှမ်းပြည်နယ် (တောင်ပိုင်း)အနေဖြင့် ကြံကို တောင်ကြီး၊ ဟိုပုံး၊ ရပ်စောက်၊ ညောင်ရွှေမြို့များတွင် အများဆုံး စိုက်ပျိုးကြပြီး ၂၀၂၀-၂၀၂၁ခုနှစ်စိုက်ဧကမှာ (၂၃၁၁၇)ဧကရှိပြီး တစ်ဧကပျှမ်းမျှအထွက်နှုန်းမှာ (၂၈မှ၃၀) တန် အထိထွက်ရှိပါသည်။ ရှမ်းပြည်နယ်(တောင်ပိုင်း)မှ ထွက်ရှိသော ကြံများကို တောင်သူအများစုသည် သကြားချက်စက်ရုံများသို့ ကြံအချောင်းလိုက် ရောင်းချလျက်ရှိကြောင်း၊ ယခုနှစ် ကြံရာသီတွင် စက်ရုံမှ ကြံတစ်တန်လျှင် (၆၀၀၀၀)ကျပ် ပေးဝယ်နေကြောင်း စုံစမ်းသိရှိပါသည်။ ယခင်နှစ် ကြံရာသီတွင် ကြံတစ်တန်လျှင် (၄၂၀၀၀မှ ၄၅၀၀၀ကျပ်)အထိ အများဆုံး (၅၀၀၀၀)ကျပ် အထိသာ ဈေးရှိခဲ့ပြီး ယခုနှစ်မှာတော့ ဈေးပိုရရှိခဲ့ကြောင်း သိရှိရပါသည်။ ရှမ်းပြည်နယ်မှ ထွက်ရှိသော ကြံများကို တောင်ကြီးမြို့နယ်၊ တောင်လေးလုံးကျေးရွာရှိ မြဘုရင် သကြားစက်ရုံသို့ အဓိကထားရောင်းချ လျက်ရှိပါသည်။

          ကြံစိုက်တောင်သူများအနေဖြင့် ကြံတစ် ဧကစိုက်လျှင် အထွေထွေကုန်ကျစရိတ်မှာ ကျပ်(၆၀၀၀၀၀)ကျော်ကုန်ကျပြီး ယခုတစ်တန် (၆၀၀၀၀)ကျပ် ပေါက်ဈေးကို တစ်ဧက အထွက်နှုန်း (၂၈)တန်ဖြင့်တွက်ပါက တောင်သူအတွက် (၁၀)သိန်းကျော် အထိ အကျိုးအမြတ်ရရှိကြောင်း တွက်ချက်မှုများအရသိရှိရပါသည်။ ယခုလို ကြံစိုက် တောင်သူများနှင့် ကြံဝယ်ယူသူများနှစ်ဉီးနှစ်ဖက်မနစ်နာသော ဈေးနှုန်းတစ်ခု ဖြင့် ရောင်းဝယ်ကြပါက တောင်သူများအနေဖြင့် အကျိုးအမြတ်ရရှိပြီး ဆက်လက်စိုက်ပျိုးရန် ဆွဲငင်အားတစ်ခု ဖြစ်လာစေသကဲ့သို ကြံ၊ သကြားဈေးကွက်သည်လည်း ဆက်လက်ဖွံ့ဖြိုးတိုးတက်နိုင်မည် ဖြစ်ကြောင်း သုံးသပ်ရေးသားလိုက်ရပါသည်။

စားသုံးသူရေးရာဦးစီးဌာန(ရှမ်းပြည်နယ်)

          မုန့်ဟင်းခါးသည် မြန်မာ့ရိုးရာအစားအစာတစ်ခုဖြစ်ပြီး၊ မြန်မာလူမျိုးအများစု ကြိုက်နှစ် သက်တဲ့ အစားအစာတစ်ခုဖြစ်ပါသည်။ မုန့်ဟင်းခါးချက်ရာတွင်လည်း ဒေသအလိုက်ကြိုက်နှစ်သက်မှုအပေါ်မူတည်၍ ဟင်းရည်ချက်ပြုတ် နည်းစနစ် အနည်းငယ်ကွာခြားပါသည်။ ဟင်းရည် ချက် ရာတွင် အဓိက အသုံးပြုရသော ငါးကိုမူတည်၍ ငါးပေါသောဒေသများဖြစ်သည့် ဧရာဝတီတိုင်း အတွင်းရှိ မြို့အမည်များကို စွဲ၍ခေါ်တွင်သော  ဟင်္သာတမုန့်ဟင်းခါး၊ မြောင်းမြမုန့်ဟင်းခါးတို့မှာ နာမည်ကြီးလူကြိုက် များလှပါသည်။ 

          ဟင်္သာတမြို့သည် လူဦးရေ တစ်သိန်းလေးသောင်းကျော် နေထိုင်သောမြို့ဖြစ်ပြီး ၊ ကျေးရွာ အုပ်စု ၁၀၃ အုပ်စု၊ ရပ်ကွက် ၂၁ ရပ်ကွက်ဖြင့် ဖွဲ့စည်းထားကာ၊ ဧရာဝတီမြစ်၏ အနောက်ဘက် ကမ်းတွင် တည်ရှိသောမြို့ဖြစ်ပါသည်။ ရပ်ကွက်အလိုက် အသံမစဲ မဟာပဌာန်းပွဲများ မပြတ်သော မြို့ဖြစ်ပြီး ၊ ဝါတွင်း(မိုးသံဃဒါန)/ဝါပ(နွေသံဃဒါန) ဆွမ်းလောင်းအသင်းများဖွဲ့စည်း၍ မြို့ပေါ်ရှိ ကျောင်းပေါင်း တစ်ရာကျော်မှ စာချ၊ စာသင်သံဃာတော်များကို အာရုံဆွမ်းဆက်ကပ် လှူဒါန်းလာ သည်မှာ နှစ်ပေါင်း တစ်ရာကျော်ခဲ့ပြီဖြစ်ပါသည်။ မိုး/နွေ ဆွမ်းလောင်းအသင်းများ၏ ဆွမ်းသိမ်းပွဲ များတွင် ချက်ပြုတ်ကျွေးမွေးရာတွင် မုန့်ဟင်းခါးနှင့် မင်္ဂလာဆိုင်းမှာမပါမဖြစ်သော အဓိကစားစရာ နှင့် ဖျော်ဖြေရေးလည်းဖြစ်ပါသည်။

          ရပ်ကွက်သားချင်းတွေ့ရင် “ဟေ့ ဒီနေ့အင်္ဂါပတ်ဆွမ်းလောင်း၊ ဆိုင်းလည်းကောင်း၊မုန့်ဟင်း ခါးလည်းကောင်း၊ ညကျရင်ဆိုင်းသွားနားထောင်မယ်ဟေ့” လို့တစ်ယောက်နှင့် တစ်ယောက် နှုတ် ဆက်လေ့ရှိကြပါသည်။ ဆွမ်းပတ်အလိုက် သံဃာတော်များကို အာရုဏ် ဆွမ်းလောင်း လှူပြီးပါက ကြွရောက်လာတဲ့ ဧည့်သည်များကိုမုန့်ဟင်းခါးဖြင့် ဧည့်ခံပါသည်။ မုန့်ဟင်းရည် ချက်ရာမှာ လည်း ဆွမ်းပတ်အလိုက် ငါးနှင့်ပဲပါဝင်မှု အချိုးအစားပေါ်မူတည်ပြီး ဟင်းရည်ချက် နည်းမှာလည်း ကွာခြားပါသည်။ ဆွမ်းပတ်များအပြိုင်အဆိုင် မုန့်ဟင်းခါးချက်ပြုတ်လှူဒါန်းရာမှ ဟင်္သာတမုန့်ဟင်း ခါးရယ်လို့နာမည်ကြီးလာပြီး၊ မုန့်ဟင်းခါးမှာ အလှူပွဲများတွင် မပါမဖြစ် စားစရာ ဖြစ်တဲ့အပြင်၊ အိမ်များနှင့် ဈေးများတွင် တနိုင်တပိုင်ရောင်းချသော မုန့်ဟင်းခါးမှာလည်း မနက် သွားရည်စာအဖြစ် စားသုံးသူ များလှပါသည်။ ယခု ကိုဗစ်-၁၉ ကာလ စည်းကမ်းချက်များကြောင့် မင်္ဂလာဆိုင်းမှာ ဖျော်ဖြေဧည့်ခံခြင်းမရှိတော့သော်လည်း မုန့်ဟင်းခါးမှာတော့ မပါမဖြစ်ဧည့်ခံစားစရာ တစ်ခုဖြစ် လျက်ရှိပါသည်။

          ယခုအခါ ဟင်္သာတမုန့်ဟင်းခါးမှာ အိမ်ဆိုင်၊ ဈေးဆိုင်များမှ တဆင့် Super Market ပေါ်ထိ ရောက်ရှိလာပါပြီ။ ဆိုင်များတွင် ပြင်ဆင်ရောင်းချသော အဆင့်မှ အသင့်စားသုံးနိုင်သော Ready Made မုန့်ဟင်းရည် အနှစ်ထုပ်များ ပြုလုပ်ရောင်းချလာကြပါသည်။ ဟင်္သာတမြို့မှ ထုတ်လုပ်သော မြင့် မုန့်ဟင်းခါးအနှစ်ထုပ်၊ သီရိမေ မုန့်ဟင်းခါးအနှစ်ထုပ်၊ ငွေနန်းထိုက် မုန့်ဟင်းခါးအနှစ်ထုပ်များသည် စားသုံးသူများကြိုက်နှစ်သက်သော အသင့်စား မုန့်ဟင်းခါးအနှစ်ထုပ်များဖြစ်ပါသည်။

          စားသုံးသူရေးရာဦးစီးဌာန၊ ဟင်္သာတခရိုင်ဦးစီးမှူးနှင့်အဖွဲ့မှ အာဆီယံ-ဟောင်ကောင် China Free Trade Aggrement Work Program တွင် ဝင်ရောက်ပြိုင်ပွဲဝင်သော ဟင်္သာတမြို့၊ တာကလေးရပ်ကွက်၊ နတ်မော်လမ်း၊ အိမ်အမှတ် (၁၀)ရှိ သီရီမေစားသောက်ကုန်လုပ်ငန်းမှ ထုတ်လုပ်သော သီရိမေမုန့်ဟင်းခါး အနှစ်ထုပ်လုပ်ငန်းခွင်သို့ (22.12.2021)နေ့တွင် သွားရောက်လေ့လာခဲ့ပါသည်။ သီရိမေစားသောက်ကုန်လုပ်ငန်းအနေဖြင့် ၂၀၁၉ ခုနှစ်တွင် စတင်တည်ထောင်ခဲ့ပြီး၊ မုန့်ဟင်းခါးအနှစ်ထုပ်၊ အုန်းနို့်ခေါက်ဆွဲအနှစ်ထုပ်တို့ကို ထုတ်လုပ်ဖြန့်ချီလျက်ရှိပါသည်။ အိမ်တွင်းမှုလုပ်ငန်းဖြစ်ပြီး Digital Marketing အရ ရောင်းအားကောင်းတဲ့ထုတ်ကုန်လည်းဖြစ်ပါသည်။ ပြည်တွင်းထုတ်ကုန်ကြမ်းများဖြစ်တဲ့ ကြက်သွန်အဖြူ၊ အနီ၊ ဂျင်း၊ စပါးလင်၊ ငရုတ်ကောင်း၊ ငါး၊ ငံပြာရည်၊ ကုလားပဲခွဲခြမ်း၊ ဆန်မှုန့်၊ အရောင်တင်မှုန့်၊ ပဲဆီသန့်၊ ဆားတို့ကိုအသုံးပြု၍ သတ်မှတ်အချိုးအစားအတိုင်း ရောစပ်၍ သဘာဝနည်းစဉ်များအတိုင်း ကျန်းမာရေးနှင့်အညီ မုန့်ဟင်းခါးအနှစ်ကို ထုတ်လုပ်ထားကြောင်း သိရှိရပါ သည်။

          ကုန်ကြမ်းများကို အနှစ်ထုပ်ရရန် အချိုးအစားမှာလည်း အလှူပွဲများတွင် ချက်လုပ်သော ဟင်္သာတမုန့်ဟင်းခါး ချက်နည်းအတိုင်းပြုလုပ်ပြီး၊ ဟင်းအနှစ်ရအောင်ပြုလုပ်ကာ လှပသေသပ် သော ထုပ်ပိုးမှုများနှင့် ဈေးကွက်တင်ရောင်းချခြင်းဖြစ်ပါသည်။ သီရိမေ မုန့်ဟင်းခါးအနှစ်ထုပ်အနေ ဖြင့် ပုံမှန်(ပတ်ဝန်းကျင်) အပူချိန်တွင် ၃ရက်ခန့်အထားခံပြီး၊ အနှုတ် ၄’ C တွင်ထားသို သိမ်းဆည်း ပါက တစ်လခန့်  အထားခံသည်ကိုလည်းလေ့လာသိရှိရပါသည်။ မုန့်ဟင်းခါးအနှစ်ထုတ်တထုပ် အလေးချိန် (၅၀၀) ဂရမ်ရှိပြီး၊ ရေနွေးတစ်လီတာခန့်နှင့် ချက်ပါက မုန့်ဖတ် ငါးဆယ်သားဖြင့် စားသုံးနိုင်သော မုန့်ဟင်းရည်အနှစ်ထုတ်များကို ထုတ်လုပ်ဖြန့်ဖြူး လျက်ရှိပါသည်။ လုပ်သား (၅) ဦးနှင့်ထုတ်လုပ်လျက်ရှိပြီး သန့်ရှင်းမှုကို ဦးစားပေးထုတ်လုပ်နေသည်ကိုလည်း တွေ့ရှိ ရပြီး၊ လုပ်ငန်းအနေဖြင့် စည်ပင်လိုင်စင်ရရှိထားပြီး၊ အသေးစားစက်မှုလက်မှုလုပ်ငန်းလိုင်စင်  ၊ FDA ထောက်ခံချက်တို့ရရှိအောင် ဆက်လက်ဆောင်ရွက်မည်ဖြစ်ကြောင်းတို့ကိုလည်းသိရှိရပါသည်။

          စားသုံးသူရေးရာဦးစီးဌာန၊ ဟင်္သာတခရိုင်မှူးမှလည်း အသင့်စား အစားအသောက်များတွင် ဖော်ပြရန်လိုအပ်သော ကုန်အညွှန်းအမှတ်အသားများအား ထုပ်ပိုးမှုအပေါ်တွင် ရေးသားဖော်ပြနိုင် ရေးတို့ကို လမ်းညွှန်အကြံပြုဆွေးနွေးခဲ့ပြီး၊ လုပ်ငန်းရှင်မှ လိုက်နာဆောင်ရွက်သွားမည့်အကြောင်း၊ ထုတ်ကုန်ကိုလည်း မုန့်ဟင်းခါးအနှစ်ထုပ်မှ မုန့်ဟင်းခါးအခြောက်မှုန့်ထိ တို့မြှင့်ထုတ်လုပ်နိုင်ရေး ကြိုးစားဆောင်ရွက်သွားမည့် အကြောင်းကိုလည်းရှင်းလင်းပြောကြားပါသည်။

          မုန့်ဟင်းခါးသည် လူမျိုးဘာသာမရွေးစားသုံးပြီး မုန့်ဖတ်အဖြစ် မုန့်ဟင်းခါးဖတ်၊ ခေါက်ဆွဲ ဖတ်တို့ဖြင့် ကြိုက်နှစ်သက်ရာ စားသုံးနိုင်ပြီး၊ အိုးဘဲဥ၊ ပဲကြော်၊ ဗူးသီးကြော်၊ ငါးဖယ်ကြော်တို့ကို ထည့်လျှက် စားသုံးနိုင်သောမြန်မာ့ရိုးရာ အစားအစာတစ်ခုလည်းဖြစ်ပါသည်။ မုန့်ဟင်းခါးနှင့် ခေါက်ဆွဲဖတ်တို့ကို ခေါက်ဆွဲခြောက်(Fried Noodle) အဖြစ် တိုးမြှင့်ထုတ်လုပ်နိုင်ပါက ပြည်ပထိ တင်ပို့ရောင်းချနိုင်သော ရိုးရာစားသောက်ကုန်လည်းဖြစ်ပါသည်။ ယခုအခါအလှူ မင်္ဂလာပွဲများတွင် နာမည်ကြီးသော ဟင်္သာတ မုန့်ဟင်းခါးသည် Street Market မှ Super Market သို့တက်လှမ်းလာပြီး မဝေးတော့သောကာလတွင် ပြည်ပတင်ပို့နိုင်သော ရိုးရာအစားအစာ ဒေသထုတ်ကုန်တစ်ခုဖြစ်လာတော့မှာအမှန်ပင်ဖြစ်ပါသည်။

စားသုံးသူရေးရာဦးစီးဌာန(ဧရာဝတီတိုင်းဒေသကြီး)