ပြည်တွင်းကုန်သွယ်မှုသတင်း

               မန္တလေးတိုင်းဒေသကြီး ၊ ကျောက်ဆည်ခရိုင်သည် ဆည်ရေသောက်ဒေသတစ်ခု ဖြစ်သော ကြောင့်စပါး၊ပဲ၊ပြောင်း၊နှမ်းသီးနှံမျိုးစုံ အောင်မြင်ဖြစ်ထွန်းလျက်ရှိရာ ၄င်းသီးနှံများအနက် ပဲတီစိမ်း သီးနှံကိုလည်း တောင်သူများမှ သီးထပ်သီးညှပ် စိုက်ပျိုးသည့်အပြင် သီးသန့်ဧကအလိုက် စိုက်ပျိုး လျက်ရှိပါသည်။ ပဲတီစိမ်းဆောင်း စိုက်ပျိုးမှုကုန်ကျစရိတ်အနေဖြင့် မျိုး၊သွင်းအားစု၊လုပ်သားခ အပါအဝင် စုစုပေါင်း (၆၅၀၀၀၀/-)ကျပ် ခန့်ကုန်ကျကြောင်း၊ ပဲတီစိမ်းကို မတ်လများတွင် စတင်စိုက်ပျိုးပြီး ဇွန်လနှင့် ဇူလိုင်လများတွင် ရိတ်သိမ်းမည်ဖြစ်ကြောင်း၊ ပဲတီစိမ်း စိုက်ပျိုးမှုမျိုး အနေဖြင့် ကျောက်စိမ်းမျိုး နှင့် ရေးဆင်း-၁၁မျိုး များကိုသာအများဆုံးစိုက်ပျိုးကြကြောင်း၊ (၁)ဧက မျိုးစေ့(၅-၆) ပြည်ခန့် ကုန်ကျကြောင်း ၊ ပဲတီစိမ်းမျိုး စျေးနှုန်းအနေဖြင့် (၁)ပြည်လျှင် (၇၀၀၀/-) ကျပ်စျေးနှုန်းဖြင့် ဝယ်ယူစိုက်ပျိုးရကြောင်း၊ (၁)ဧက အထွက်နှုန်းအနေဖြင့်(၁၃-၁၅) တင်း ခန့်ထွက် ရှိကြောင်း၊ အများဆုံးစိုက်ပျိုးသောရွာများမှာ ရွာမုန်းကြီး၊ စပယ်တော၊ မယှက်ရွာများတွင် အများဆုံး စိုက်ပျိုးကြကြောင်း၊ ပဲတီစိမ်း စိုက်ပျိုးမှုအနေဖြင့် ဘောင်ကြောင်းပေး အတန်းလိုက်စနစ်ဖြင့် အစေ့ချစိုက်ပျိုးကြကြောင်း၊ ယခင်နှစ် ပဲတီစိမ်းစျေးနှုန်းအနေဖြင့် တစ်တင်းလျှင်(၈၀၀၀၀/-) ကျပ်‌ စျေးနှုန်းများဖြင့် အရောင်းအဝယ်ဖြစ်ခဲ့ကြောင်း သတင်းရရှိပါသည်။

DOCA(မန္တလေး)

                 မန္တလေးတိုင်းဒေသကြီး၊ ကျောက်ဆည်ခရိုင်သည် ဆည်ရေသောက်ဒေသတစ်ခု ဖြစ်သော ကြောင့်စပါး၊ပဲ၊ပြောင်း၊နှမ်းသီးနှံမျိုးစုံ စိုက်ပျိုးဖြစ်ထွန်းလျက်ရှိရာ ၄င်းသီးနှံများအနက် ဆီထွက်သီးနှံ တစ်မျိုးဖြစ်သောနွေနှမ်းသီးနှံကို၂၀၂၅-၂၀၂၆ ဘဏ္ဍာနှစ်တွင် ကျောက်ဆည်မြို့နယ်တွင်(၁၅၇၂၂)ဧက၊ စဉ့်ကိုင်မြို့နယ်တွင်(၉၃၉၂)ဧက၊ မြစ်သားမြို့နယ်တွင် (၂၁၀၅၀)ဧက ၊ စုစုပေါင်း(၄၆၁၆၄)ဧက စိုက်ပျိုးထားရှိပြီးဖြစ်ကြောင်း သက်ဆိုင်ရာဌာန၏ စာရင်းများအရသိရှိရပါသည်။ နွေနှမ်းကို မတ်လတွင်စတင်စိုက်ပျိုးလျက်ရှိပြီး နှမ်းစိုက်ပျိုးမှုအနေဖြင့် ဘောင်ကြောင်းပေးစနစ်ဖြင့်စိုက်ပျိုးကြ ပြီးအများဆုံးစိုက်ပျိုးသောမျိုးများမှာနှမ်းဖြူ၊နှမ်းညိုနှင့်နှမ်းနက်မျိုးများကိုစိုက်ပျိုးကြပါသည်။(၁)ဧက စိုက်ပျိုးမှုအနေဖြင့် နှမ်းမျိုး ၁ပြည်လျှင် (၈၀၀၀-၈၅၀၀)ကျပ်အထိ ပေးဝယ်ရကြောင်း  ၊ (၁)ဧက ကုန်ကျစရိတ် အနေဖြင့် မျိုး၊သွင်းအားစု၊လုပ်သားခအပါအဝင်  စုစုပေါင်း(၄၅၀၀၀၀/-)ကျပ်ခန့် ကုန်ကျကြောင်း၊ (၁)ဧက မျိုး(၂-၃)ပြည် စိုက်ပျိုးရကြောင်း ၊ နှမ်းစျေးနှုန်း အနေဖြင့် နှမ်းဖြူတစ်တင်း လျှင်(၁၃၀၀၀၀/-)ကျပ် ၊ နှမ်းညို တစ်တင်းလျှင်(၁၃၂၀၀၀/-)ကျပ် ၊ နှမ်းနက် တစ်တင်းလျှင် (၁၂၀၀၀၀/-)ကျပ် စျေးနှုန်းများဖြင့်  အရောင်းအဝယ်ဖြစ်နေပြီး နှမ်းဆီ ၁ပိဿာ လျှင်(၁၈၀၀၀/-) ကျပ်စျေးနှုန်းများဖြင့် ရောင်းဝယ်လျက်ရှိပါသည် ။ ကုန်သွယ်ရောင်းဝယ်မှုအနေဖြင့် တောင်သူများမှ နှမ်းပေါ်ချိန်တွင် နီးစပ်ရာ ကျောက်ဆည်မြို့ပေါ်ရှိ ပွဲရုံများသို့ တိုက်ရိုက်သွားရောက်ရောင်းချ ကြကြောင်း ၊ ပွဲရုံများမှတဆင့် ရန်ကုန် ၊ မန္တ‌လေးမြို့များသို့ တင်ပို့ရောင်းချလျက်ရှိပါသည်။ တောင်သူများမှာ နှမ်းကိုဆီထွက်သီးနှံအဖြစ် ကျယ်ကျယ်ပြန့်ပြန့် စိုက်ပျိုးလျှက်ရှိပါသည်။နှမ်းပေါ်ချိန်တွင်စျေးနှုန်းများကောင်းမွန်ပါကတောင်သူများအကျိုးအမြတ်ပိုမိုဖြစ်ထွန်းနိုင်ကြောင်း၊ နှမ်းစိုက်ပျိုးသော တောင်သူများအနေဖြင့်  မိသားစု စားသုံးဆီဖူလုံရုံမျှမက အကျိုးအမြတ်များရရှိ သောကြောင့် ဆီထွက်သီးနှံဖြစ်သော နှမ်းသီးနှံကိုလည်း နှစ်စဉ်စိုက်ပျိုးသင့်ကြောင်း ရေးသားတင်ပြ အပ်ပါသည်။

DOCA(မန္တလေး)

           မအူပင်ခရိုင်၊ ဓနုဖြူမြို့နယ်မှ စိုက်ပျိုးထွက်ရှိသော စပါးများကို ဆန်စက်များမှကြိတ်ခွဲပြီး ထွက်ရှိလာသော ဆန်/ဆန်ကွဲများကို ရန်ကုန်သို့ အဓိကထားတင်ပို့လျက်ရှိပါသည်။ ၂၀၂၆ခုနှစ် မတ်လ ၁လအတွင်း ဆန် ၄၅၄၉၅ အိတ်နှင့် တန်အားဖြင့် ၂၂၇၄တန်၊  ဆန်ကွဲအနေဖြင့် ၁၁၁၃၃ အိတ်၊ တန်အားဖြင့် ၅၅၆ တန်၊ တင်ပို့ခဲ့ကြောင်းသိရသည်။ ယခင်လ တင်ပို့မှုဖြင့် နှိုင်းယှဉ်ပါက ဆန် ၉၁၁၆အိတ် နှင့် ဆန်ကွဲ ၃၄၀၈ အိတ် ပိုမိုတင်ပိုလာကြောင်း ပန်းတိုင်နယ်စပ်ဖြတ်ကျော်ဂိတ်စာရင်းများအရ သိရသည်။ တိုင်းဒေသကြီး အခြားမြို့နယ်များမှ ဆန်/ဆန်ကွင် တင်ပို့မှုအနေဖြင့် မတ်လက ဆန် ၈၈၈၉၇၀ အိတ် ဆန်အားဖြင့် ၄၄၄၄၈တန်၊   ဆန်ကွဲ ၁၇၈၂၆၁ အိတ် တန်အားဖြင့် ၈၉၁၃ တန် တင်ပို့ကြောင်း သိရသည်။

            ဧရာဝတီတိုင်းဒေသကြီး၊ မအူပင်ခရိုင်၊ ဓနုဖြူမြို့နယ်အနေဖြင့် ဆန်စက် ၂၅ စက်ရှိပြီး ဒေသထွက်ရှိသော ဆန်နှင့် ဆန်ကွဲများကို ရန်ကုန်မြို့ သီလဝါဆိပ်ကမ်း၊ သံလျင်မြို့၊ ဆူးလေဆိပ်ကမ်း ပန်းပဲတန်းမြို့၊ Asiaworld ဆိပ်ကမ်းအလုံမြို့၊ ဇုန်-၂ ရွှေပြည်သာမြို့၊ ကျိုက်ဝိုင်းဈေး မရမ်းကုန်းမြို့၊ ကားကြီးဝန်း ဘုရင့်နောင်မြို့၊ ဇုန်-၃ လှိုင်သာယာမြို့၊ ယုဇန ၂လမ်း၊ ဘုရင့်နောင်မြို့၊ ၁ရပ်ကွက်မရမ်းကုန်းမြို့၊ ကျိုက်ဝိုင်းဈေး၊ မရမ်းကုန်းမြို့၊ ပဲခူးဈေးကြီး၊ ပဲခူးမြို့၊ သုဇနလမ်း၊ ထောက့်မြို့၊ ရွှေလင်ပန်းစက်မှု ဇုန်လှိုင်သာယာမြို့၊ ပိတောက်လမ်း ဘုရင့်နောင်၊ AWPT ဆိတ်ကမ်းအလုံမြို့တို့သို့ တင်လျက်ရှိကြောင်း သိရှိရပါသည်။

DOCA(ဧရာဝတီ)

        ရန်ကုန်တိုင်းဒေသကြီး၊ သန်လျင်ခရိုင်၊ ကျောက်တန်းမြို့နယ်သည် အဓိကစီးပွားရေးလုပ်ငန်းအနေဖြင့် စိုက်ပျိုးရေး၊ ရေလုပ်ငန်းနှင့် ငါးခြောက်ထုတ်လုပ်ခြင်းလုပ်ငန်းများ လုပ်ကိုင်ဆောင်ရွက်လျက်ရှိပြီး ကျောက်တန်းဒေသတွင်းထွက်ရှိသည့် ဆန်စပါးနှင့် ငါးခြောက်များမှာ လူသိများလာပေသည်။ ထို့အပြင် ယခုလက်ရှိစီးပွားရေးလုပ်ငန်းများအနေဖြင့် သဘာဝဌက်သိုက်များ ထုတ်လုပ်ရန်အတွက် ဇီဝဇိုးဌက်များ မွေးမြူခြင်းလုပ်ငန်းအား စီးပွားဖြစ်ချဲ့ထွင်လုပ်ကိုင်လာကြသည်။ 

        စီးပွားဖြစ်ဇီဝဇိုးဌက်အိမ်ဆောက်ရန်အတွက် ကုန်ကျစရိတ်အားဖြင့် သိန်းရာချီရှိပေသည်။ ဌက်အိမ်ဆောက်ရန်အတွက် အရေးကြီးဆုံးအချက်အနေဖြင့် ဇီဝဇိုးဌက်ရှိခြင်း/ မရှိခြင်း၊ ဌက်များခြင်း/ မများခြင်း စသည့် တည်နေရာ (Location)ကို ရွေးချယ်ရမှာဖြစ်ပြီး စမ်းခေါ်ကြည့်ရန် လိုအပ်ပေသည်။ ဌက်များလာရောက်ရန် အစမ်းခေါ်ရာတွင်လည်း အဆောက်အအုံ (အမြင်သံ/ အတွင်းသံ) နှစ်မျိုးခွဲ၍ အသံတုဖြင့် စမ်းသပ်ခေါ်ရခြင်းဖြစ်ပါသည်။

       ဇီဝဇိုးဌက်များ မွေးမြူခြင်း၏ ရင်းနှီးမြှပ်နှံမှုနှင့် အကျိုးအမြတ်တို့မှာ ဇီဝဇိုးဌက်မွေးမြူခြင်းသည် အစာဖိုးကုန်ကျစရိတ် လုံးဝမရှိသော်လည်း ကုန်သည့်ရင်းနှီးမြှပ်နှံမှုမှာ အဆောက်အဦး ဆောက်လုပ်ရန် မြေနေရာနှင့် ဌက်များမွေးမြူရန်အဆောက်အဦးမှာ များပြားလှပေသည်။ ဇီဝဇိုးဌက်များသည် လေထုထဲတွင်ရှိပြီး ကောင်းကင်မှာပျံသန်းနေတဲ့ ပိုးမွှားများကို စားခြင်းဖြစ်သည့်အတွက် ပညာရှင်များမှ တိမ်ညွန့်စားသည့် ဌက်များဟု တင်စားခေါ်ဝေါ်ကြသည်။

          ဇီဝဇိုးဌက်များသည် အသိုက်ထုတ်လုပ်ရာတွင် အချိန်မတူညီကြပေ။ အချို့ဌက်များမှာ ဌက်အိမ်စတင်ဝင်ရောက်ပြီး (၁)လ၊ (၂)လ၊ (၃)လကြာပြီး အသိုက်ထုတ်လုပ်တည်ဆောက်ကြသလို တစ်ချို့ဌက်များမှာ နှစ်ချီ၍ အချိန်ကြာမြင့်တက်ကြသည်။ အဆိုပါ ဇီဝဇိုးဌက်များ မွေးမြူခြင်းလုပ်ငန်းအား (၂၀၁၉)ခုနှစ်မှ စတင်၍ စမ်းသပ်မွေးမြူခဲ့ရာ ယခုအချိန်ထိ (၇)နှစ်တိုင်တိုင် ကြာမြင့်ပြီးဖြစ်ကြောင်း သိရှိရသည်။ ဌက်သိုက် အခွက်ကြမ်းရရှိမှုမှာ ပုံမှန်မရှိသည့်အတွက် (၁)လ လျှင် မည်မျှရရှိသည့်ကိုမှု ခန့်မှန်း၍မရပေ။

           သဘာဝဌက်သိုက်ပေါင်းရည် ထုတ်လုပ်ဖြန့်ဖြူးရောင်းချခြင်းလုပ်ငန်းကိုမှု ၂၀၂၄-၂၀၂၅ ခုနှစ်မှ စတင်ထုတ်လုပ်ဖြန့်ဖြူးရောင်းချကြောင်း သိရှိရသည်။

           သန့်စင်ထားခြင်းမရှိသေးသည့် အခွက်ကြမ်း (၁)ပိဿာကို ကုန်ချောပြုလုပ်ပါက သန့်စင်ပြီးခွက်သန့်ချော အနေဖြင့် Grade (A,B,C)သုံးမျိုးကွဲ၍ (၇၀)ကျပ်သားနှုန်းထွက်ရှိကြောင်း သိရှိရသည်။ ၎င်းသန့်စင်ပြီး ခွက်သန့်ချောများအားရောင်းချပါက Grade A  (၁)ကျပ်သားလျှင် (၆၅၀၀၀/-)ကျပ်၊ Grade B (၁)ကျပ်သားလျှင် (၅၀၀၀၀-၆၀၀၀၀/-)ကျပ်ထိ၊ Grade C (၁)ကျပ် သားလျှင် (၄၀၀၀၀/-)ကျပ် စသည့်ဖြင့် ရောင်းချကြောင်း သိရှိရသည်။

          သဘာဝဌက်သိုက်ပေါင်းရည် ထုတ်လုပ်ရောင်းချမှုအနေဖြင့် တစ်လျှင် (၄၅)မီလီမီတာ အသားတင်ပမာဏရှိသည့် ပုလင်းပေါင်း (၄၀၀)မှ (၅၀၀)ထိ ဖြန့်ဖြူးရောင်းချရပြီး အဆိုပါ ပုလင်း (၁)ပုလင်းလျှင် (၇၀၀၀/-)ကျပ်နှုန်းဖြင့် ရောင်းချပါသည်။ ဖြန့်ဖြူးရောင်းချမှုအပိုင်းအနေဖြင့် တစ်ပိုင်တစ်နိုင် အသေးစား စက်မှုလက်မှုလုပ်ငန်းဖြစ်သည့်အတွက် ဝင်ငွေအားဖြင့် တစ်လျှင် (၅)သိန်းမှ (၆)သိန်းအထိ အမြတ်ရရှိကြောင်း သိရှိရသည်။

          ဇီဝဇိုးဌက်မွေးမြူခြင်းနှင့် သဘာဝဌက်သိုက်ပေါင်းရည် ထုတ်လုပ်ဖြန့်ဖြူးခြင်းလုပ်ငန်းသည် လုပ်ငန်းရှင်များအတွက် အကျိုးအမြတ်ရရှိရုံသာမက ဒေသတစ်ခု၏ ထွက်ကုန်ပစ္စည်းဖြစ်သည့်အတွက် ဒေသခံပြည်သူများ အလုပ်အကိုင်ရရှိသည့်အပြင် ပြည်တွင်းစားသုံးမှုအနေဖြင့် လည်း သင့်တင့်မျှတသည့် ဈေးနှုန်းဖြင့် ဝယ်ယူသုံးစွဲရနိုင်ကြောင်း သိရှိရပါသည်။

DOCA(ရန်ကုန်)

          စားသုံးသူပြည်သူများ စားသုံးဆီဝယ်ယူစားသုံးရာတွင် ဘေးအန္တရာယ် ကင်းရှင်းပြီး သင့်တင့်သောဈေးနှုန်းဖြင့်ဝယ်ယူစားသုံးနိုင်စေရန်နှင့်ပြည်တွင်းလိုအပ်ချက်များကို ဖြည့်ဆည်း ပေးနိုင်ရန် စီးပွားရေးနှင့် ကူးသန်းရောင်းဝယ်ရေးဝန်ကြီးဌာန၊ စားသုံးဆီ တင်သွင်း သိုလှောင် ဖြန့်ဖြူးခြင်းလုပ်ငန်း ကြီးကြပ်ရေးကော်မတီက ဆောင်ရွက်ပေးလျက်ရှိကြောင်း သိရပါသည်။

          စားအုန်းဆီကို ပြည်ပမှဝယ်ယူတင်သွင်းရာတွင် စားအုန်းဆီ တင်ပို့သည့်နိုင်ငံများ၏ စျေးနှုန်းအတက်အကျပေါ်မူတည်၍ ပြည်တွင်း၌ ဖြစ်သင့်ဖြစ်ထိုက်သည့်ဈေးနှုန်းများ ဖြစ်ပေါ် စေရေးကို ထိန်းကျောင်းဆောင်ရွက်လျက်ရှိပါသည်။

          ပြည်ပမှစားအုန်းဆီထုတ်လုပ်တင်ပို့သည့်နိုင်ငံများတွင် ဈေးကွက်နှင့်ဈေးနှုန်းဖြစ်ပေါ်မှု များအရ ၂၀၂၆ ခုနှစ်၊ ဧပြီလ ၁၀ ရက်နေ့မှ ၁၆ ရက်နေ့အထိ ရန်ကုန်အထိုင်ဈေးအခြေခံ လက်ကားရည်ညွှန်းဈေးနှုန်းမှာ စားအုန်းဆီတစ်ပိဿာလျှင်  ငွေကျပ် ၆,၇၃၅ ဖြစ်ကြောင်း စားသုံးဆီ တင်သွင်းသိုလှောင်ဖြန့်ဖြူးခြင်းလုပ်ငန်းကြီးကြပ်ရေးကော်မတီက အသိပေးထုတ်ပြန် ကြေညာထားကြောင်း သိရှိရပါ​သည်။       

          စားအုန်းဆီ အခြေခံလက်ကားရည်ညွှန်းဈေးနှုန်းကို အပတ်စဉ် သောကြာနေ့တိုင်း ထုတ် ပြန်ကြေညာလျက်ရှိပြီး စားသုံးသူပြည်သူများအနေဖြင့် စားသုံးသူရေးရာဦးစီးဌာန၏ Website: www.doca.gov.mm၊  Facebook Page  နှင့် မြန်မာနိုင်ငံဆီကုန်သည်နှင့် ဆီလုပ်ငန်းရှင်များ အသင်း၏ Facebook Page တို့တွင် ဝင်ရောက် ကြည့်ရှုလေ့လာနိုင်ကြောင်း သိရှိရပါသည်။