ပြည်တွင်းကုန်သွယ်မှုသတင်း

     ကချင်ပြည်နယ်တွင်စိုက်ပျိုးထွက်ရှိသည့် ကြက်မောက်သီးသည် နှစ်ရှည်ပင်သီးနှံမျိုးဖြစ်ပြီး အစေ့စိုက်ပျိုးခြင်းနှင့် ကိုင်းကူးစိုက်ပျိုးခြင်းတို့ဖြင့်စိုက်ပျိုးကြသည်။ ကြက်မောက်ပင်များကို အစေ့ စိုက်ပျိုးပါက စတင်စိုက်ပျိုးချိန်မှ(၇)နှစ်ခန့်တွင်လည်းကောင်း ကိုင်းကူးစိုက်ပျိုးပါက(၄)နှစ်ခန့်တွင် လည်းကောင်း ခူးဆွတ်ရောင်းချနိုင်ကြောင်းသိရှိရပါသည်။ ကြက်မောက်ပင်သည် ပျမ်းမျှအမြင့်ပေ (၁၀)ပေခန့်မှ ပေ(၃၀) ဝန်းကျင်ထိ ရှိတတ်ပြီး  ကချင်ပြည်နယ်၊ မြစ်ကြီးနားမြို့နှင့် ဝိုင်းမော်မြို့နယ် တို့တွင် ခြံများနှင့်အိမ်ခြံဝင်းများ၌ စီးပွားဖြစ်စိုက်ပျိုးခြင်းနှင့် တနိုင်တပိုင်စိုက်ပျိုးကြသည်။

      မြစ်ကြီးနားမြို့ရှိဈေးများတွင် ကြက်မောက်သီးသည် ဇူလိုင်လဒုတိယပတ်ခန့်မှ စတင်ပြီး ဈေးကွက်အတွင်း စတင်ဝင်ရောက်လာကာ ဩဂုတ်လတွင်လှိုင်လှိုင်ထွက်ရှိသည်။  ကြက်မောက်သီး သည် ရာသီအလိုက်ထွက်ရှိသည့် သီးနှံဖြစ်သောကြောင့် အချိန်ကာလအလိုက် ဈေးကောင်းရကြပြီး  အသီး‌ရေ(၅၀)ပါ တစ်တွဲလျှင် ကျပ် (၂၀၀၀) မှ ကျပ်(၄၀၀၀) အထိရောင်းရကြောင်း ကြက်မောက်သီး ရောင်းချသူထံမှ သိရှိရပါသည်။

          ကချင်ပြည်နယ် ဒေသထွက်ကြက်မောက်သီးသည် နှစ်ရှည်သီးနှံအဖြစ် ရာသီချိန်တွင် များစွာ ထွက်ရှိသဖြင့် စနစ်တကျ စိုက်ပျိုးထုတ်လုပ်ရောင်းချနေသော တောင်သူများ တွက်ချေကိုက်လျက်ရှိပြီး MSMEလုပ်ငန်းများ အတွက် တန်ဖိုးမြှင့်ထုတ်ကုန်များ တိုးတက်ထုတ်လုပ်နိုင်ပါက ဒေသတွင်း စီးပွားရေးဖွံ့ဖြိုးတိုးတက်ရေး အတွက် အထောက်အကူပြုနိုင်မည့် အလားအလာကောင်းသီးနှံတစ်ခု အဖြစ်ဆက်လက် ရပ်တည် လာနိုင်ကြောင်း တင်ပြလိုက်ရပါသည်။

DOCA(ကချင်)

       မြင်းခြံမြို့နယ်သည် ဥယျာဉ်ခြံမြေလုပ်ငန်းများကိုလည်း လုပ်ကိုင်လျက်ရှိရာ ငှက်ပျော စိုက်ပျိုးခြင်း လုပ်ငန်းကိုလည်းလုပ်ကိုင်ကြောင်းသိရှိရသည်။ ဒေသတွင်းကျေးရွာများဖြစ်သော ပတ္တာရွာ၊  သင်္ဘောတင်ရွာ၊ ပိုက်တဲကုန်းနှင့် အနိမ့်ကျေးရွာများသည် ငှက်ပျောပင်များကို မိမိတို့ ခြံဝန်းများ၌ တစ်နိုင်တစ်ပိုင် စိုက်ပျိုးထားကြကြောင်းနှင့် စီးပွားဖြစ်လည်းစိုက်ပျိုး ကြကြောင်းသိရှိရသည်။ ငှက်ပျောပင်များကို မိုးဦးမကျမီ မေလဆန်းပိုင်းတွင် စိုက်ပျိုးထားရှိကြောင်း၊ စိုက်ဧကအနေဖြင့် (၁၁၅)ဧကခန့်စိုက်ပျိုးထားကြောင်း ကြေးတိုင်နှင့်မြေစာရင်းဦးစီးဌာန၏ စာရင်းများအရ သိရှိရသည်။ ငှက်ပျောစိုက်ပျိုးရာတွင် လှံစို့သားတက်အပင်မြင့်မျိုးကို စိုက်ပျိုးထားကြောင်း၊ရခိုင်ငှက်ပျော မျိုးနှင့် ဖီးကြမ်းငှက်ပျောမျိုးကိုစိုက်ပျိုးထားကြောင်း၊ ငှက်ပျောပင်ကို(၇)ပေပတ်လည်အထိပင်ကြား တန်းကြား အကွာအဝေးထား စိုက်ပျိုးရကြောင်း၊ အထွက်နှုန်းကောင်းစေရန် တစ်ဧကငှက်ပျောပင် (၁၃၀၀) ခန့်စိုက်ပျိုးထားကြောင်း စိုက်ပျိုးပြီး (၅-၆)လအကြာတွင် ငှက်ပျောဖူးများမထွက်မီအချိန်၌ အပင်ခြေ တွင် ဓာတ်မြေဩဇာကို ထည့်သွင်းကျွေးရမည်ဖြစ်ကြောင်း၊ ပန်းပွင့်ပြီးနောက် သားတက် တစ်ခုသာ ထားရှိပြီး မိခင်အပင်မှ မလိုအပ်သော သားတက်အားလုံးကို ဖယ်ရှားရန်လိုအပ်ကြောင်း၊ ငှက်ပျော ကြီးထွားရန် ငှက်ပျောဖူး(အဖိုဖူး)အားဖြတ်ပေးရကြောင်း၊ မိုးရာသီတွင် ရေစိမ့်ဆင်းမှု ကောင်းရန်နှင့် အပင်ခြေရေမဝပ်စေရန် အပင်ခြေကိုမြေဖို့ပေးပါက အပင်ဖြစ်ထွန်းကြောင်း၊ စိုက်ပျိုးချိန်မှ (၈) လအကြာတွင် ငှက်ပျောသီးများရင့်မှည့်၍ စတင်ခုတ်ယူပြီး ဈေးကွက်သို့တင်ပို့ ရောင်းချကြောင်း၊  တစ်ဧကကုန်ကျစရိတ်အနေဖြင့် မျိုး၊ သွင်းအားစု၊ လုပ်သားခအပါအဝင် စုစုပေါင်း(၁၉)သိန်း ကျပ်ခန့်ကုန်ကျကြောင်း၊ အထွက်နှုန်းအနေဖြင့်(၉၀၀) အခိုင်ထွက်ရှိကြောင်း၊ ၂၀၂၆ခုနှစ် ဇူလိုင်လ နောက်ဆုံးပတ်တွင် ငှက်ပျောဖီးကြမ်း တစ်ဖီးလျှင် (၄၀၀၀-၅၀၀၀)ကျပ်ခန့်၊ ရခိုင်ငှက်ပျောဖီး တစ်ဖီးလျှင် (၂၀၀၀-၂၅၀၀) ကျပ်ပေါက်ဈေးများရှိကြောင်း၊ ငှက်ပျောအဖီး အရည်အသွေးပေါ်မူတည်၍ ဈေးနှုန်းကွာခြားကြောင်း၊ ထွက်ရှိသော ငှက်ပျောသီးများကို ဒေသတွင်းစားသုံးရန်နှင့် သာရေးနာရေး ပွဲများတွင်လည်း အသုံးပြုသောကြောင့် ရောင်းချရကြောင်း၊ ဈေးကွက်တင်ပို့မှုအနေဖြင့် တောင်သာမြို့ သို့တင်ပို့ရောင်းချကြောင်း၊ တစ်ဧကအကျိုးအမြတ်အနေဖြင့် (၃၀)သိန်းကျပ် ဝန်းကျင် ခန့်ရရှိကြောင်း ငှက်ပျောစိုက် တောင်သူတစ်ဦး၏ ပြောပြချက်အရ သိရှိရသည်။

DOCA(မန္တလေး)

          မကွေးတိုင်းဒေသကြီး၊ပခုက္ကူခရိုင်၊ ပခုက္ကူကုန်စည်ဒိုင်တွင် ပဲမျိုးစုံနှင့် စားဖိုဆောင်သီးနှံဖြစ်သည့် ပဲစဉ်းငုံ၊ ပဲတီစိမ်း၊ ကုလားပဲ၊ ထောဖြူ၊ မတ်ပဲ၊ CP ပြောင်းဖူးစေ့နှင့် ကြက်သွန်နီသီးနှံများ အရောင်းအဝယ်ဖြစ်လျက်ရှိကြောင်း သိရသည်။

        ၂၀၂၆ခုနှစ်၊ ဇူလိုင်လ (ပထမပတ်)တွင် ပဲစဉ်းငုံ တစ်တင်းလျှင် ကျပ်(၉၅၈၀၀)ဖြစ်၍ ယခု (စတုတ္ထပတ်)တွင် တစ်တင်းကျပ် (၁၀၀၂၀၀)ဖြင့် အရောင်းအဝယ်ဖြစ်လျက်ရှိပြီး ပြည်ပဝယ်လိုအား ရှိသောကြောင့် ဈေးနှုန်းမြင့်တက်လျက်ရှိသော်လည်း အိတ်ရေ (၅၀၀၀)ခန့် အရောင်းအဝယ်ဖြစ်လျက်ရှိကြောင်း သိရှိရပါသည်။

       ဇူလိုင်လ (ပထမပတ်)တွင် ပဲတီစိမ်းကြီး တစ်တင်းလျှင် ကျပ် (၇၃၀၀၀/၈၀၀၀၀) ဖြစ်၍ ယခု (စတုတ္ထပတ်)တွင် တစ်တင်းလျှင် ကျပ်(၈၇၅၀၀)ဖြင့် အရောင်းအဝယ်ဖြစ်လျက်ရှိပြီး ဈေးကွက် ဝယ်လိုအားရှိသောကြောင့် ဈေးနှုန်းအတက်ဖြင့် အိတ်ရေ (၄၅၀၀) ခန့် အရောင်းအဝယ်ဖြစ်လျက်ရှိ ကြောင်း သိရှိရပါသည်။

          ဇူလိုင်လ (ပထမပတ်)တွင် ပဲတီစိမ်းသေး တစ်တင်းလျှင် ကျပ် (၉၃၀၀၀) ဖြစ်၍ ယခု (စတုတ္ထပတ်)တွင် တစ်တင်းလျှင် ကျပ်(၉၃၅၀၀)ဖြင့် အရောင်းအဝယ်ဖြစ်လျက်ရှိပြီး ဈေးကွက်ဝယ်လိုအားရှိသောကြောင့် ဈေးနှုန်းအတက်ဖြင့် အိတ်ရေ(၃၅၀၀)ခန့် အရောင်းအဝယ် ဖြစ်လျက်ရှိကြောင်း သိရှိရပါသည်။

             ဇူလိုင်လ (ပထမပတ်)တွင် ကုလားပဲ (929) တစ်တင်းလျှင် ကျပ် (၇၃၀၀၀)၊ ကုလားပဲ (V6) တစ်တင်းလျှင်ကျပ် (၇၂၀၀၀) ဖြစ်၍ ယခု (စတုတ္ထပတ်) တွင် ကုလားပဲ (929) တစ်တင်းလျှင် ကျပ် (၇၆၀၀၀)၊ ကုလားပဲ (V6) တစ်တင်းလျှင်ကျပ် (၇၃၈၀၀) ဈေးဖြင့် အရောင်းအဝယ်ဖြစ်လျက်ရှိပြီး ဈေးကွက်ဝယ်လိုအား ရှိသောကြောင့် ဈေးနှုန်းအနည်းငယ်မြင့်တက်ပြီး အိတ်ရေ(၄၀၀၀)ခန့် အရောင်းအဝယ်ဖြစ်လျက်ရှိကြောင်း သိရှိရပါသည်။

            ဇူလိုင်လ(ပထမပတ်)တွင် ထောဖြူ (ကျွန်း)တစ်တင်းလျှင် ကျပ် (၆၅၀၀၀) ဖြစ်၍ ယခု (စတုတ္ထပတ်)တွင် ထောဖြူ(ကျွန်း)တစ်တင်းလျှင် ကျပ်(၆၅၀၀၀)ဈေးဖြင့် အရောင်းအဝယ်ဖြစ်လျက်ရှိကြောင်း ဈေးနှုန်းတည်ငြိမ်ပြီး အိတ်ရေ (၅၀၀)ခန့် အရောင်းအဝယ်ဖြစ်လျက်ရှိကြောင်း သိရှိရပါသည်။

          ဇူလိုင်လ (ပထမပတ်)တွင် မတ်ပဲ တစ်တင်းလျှင် ကျပ် (၈၀၀၀၀/၈၇၀၀၀) ယခု (စတုတ္ထပတ်) တွင် မတ်ပဲ တစ်တင်းလျှင် ကျပ်(၈၅၀၀၀/၉၇၀၀၀)ဖြင့် အရောင်းအဝယ်ဖြစ်လျက်ရှိပြီး ပြည်ပဝယ်လို အားရှိသောကြောင့် ဈေးနှုန်းမြင့်တက်လျက်ရှိသော်လည်း အိတ်ရေ (၃၀၀၀)ခန့် အရောင်းအဝယ်ဖြစ်လျက်ရှိကြောင်း သိရှိရပါသည်။

            ဇူလိုင်လ (ပထမပတ်)တွင် CP ပြောင်းဖူးစေ့ တစ်တင်းလျှင် ကျပ် (၂၇၀၀၀) ဖြစ်၍ ယခု (စတုတ္ထပတ်)တွင် CP ပြောင်းဖူးစေ့ တစ်တင်းလျှင် ကျပ် (၂၇၅၀၀)ဖြင့် အရောင်းအဝယ်ဖြစ်လျက်ရှိပြီး ဈေးနှုန်းအနည်းငယ်မြင့်တက်သော်လည်း အိတ်ရေ (၁၀၀၀)ခန့် အရောင်းအဝယ်ဖြစ်လျက်ရှိကြောင်း သိရှိရပါသည်။

          ဇူလိုင်လ (ပထမပတ်)တွင် ကြက်သွန်နီ တစ်ပိဿာလျှင် ကျပ် (၂၀၀၀/၄၀၀၀) ဖြစ်၍ ယခု (စတုတ္ထပတ်)တွင် ကြက်သွန်နီတစ်ပိဿာလျှင် ကျပ် (၃၀၀၀/၄၉၅၀) ဖြင့် အရောင်းအဝယ်ဖြစ်လျက်ရှိပြီး ဈေးနှုန်းအနည်းငယ်မြင့်တက်လာသော်လည်း ဈေးကွက်ဝယ်လို အားရှိသောကြောင့် ဥပုသ်မှလွဲ၍ နေ့စဉ် ပိဿာ (၁၅၀၀၀/၂၀၀၀၀)ခန့် အရောင်းအဝယ်ဖြစ်လျက်ရှိကြောင်း သိရှိရပါသည်။

          ပခုက္ကူကုန်စည်ဒိုင်တွင် ပဲမျိုးစုံ၊ဆီထွက်သီးနှံနှင့်စားဖိုဆောင်သီးနှံများ အရည်အသွေးအလိုက် ဈေးနှုန်းများ အနည်းငယ်ကွာခြား၍ နေ့စဉ်အရောင်းအဝယ်ဖြစ်လျက်ရှိကြောင်း သိရှိရပါသည်။

DOCA(မကွေး)

           မကွေးတိုင်းဒေသကြီး၊ ပခုက္ကူခရိုင်၊ ဆိပ်ဖြူဒေသထွက် ကြက်သွန်နီများ ပြည်တွင်းစားသုံးမှုအပြင် ပြည်ပဝယ်လိုအားကောင်း၍ ဇူလိုင်လ (တတိယပတ်)တွင် ဈေးဆက်လက်မြင့်တက်ပြီး အရောင်းအဝယ် ဖြစ်ကြောင်း၊ ကြက်သွန်နီ (ပွဲရုံ)ဈေးကွက်သို့ ဇူလိုင်လ (၁၆)ရက်နေ့မှ (၂၁)ရက်အတွင်း ဒေသတွင်း စိုက်ပျိုးမှုများသော အုံးမှင်ရွာ၊ လက်ဆည်ရွာ၊ ဆူးလေကုန်းရွာ၊ တပ်မရွာ၊ ဝဲမရွာ၊ ဘဲကျရွာ၊ တပေါင်းရွာ၊ ကူရှည်အလယ်စု ကျေးရွာများမှ ဝင်ရောက်လျက်ရှိပြီး ပွဲရုံဈေးကွက်သို့ တစ်ရက်လျှင် ကုန်ချိန်ပိဿာ(၅) သောင်းခန့် ဝင်ရောက်လျက်ရှိကြောင်း သိရှိရပါသည်။

            ဆိပ်ဖြူကြက်သွန်နီဈေးကွက်အတွင်း ၂၀၂၆ခုနှစ်၊ ဇူလိုင်လ (တတိယပတ်)တွင် ဝယ်လိုအားများပြီး ကုန်ဝင်နည်း၍ ဈေးနှုန်းမြင့်တက်လာရာ ကြက်သွန်နီ တစ်ပိဿာလျှင် ကျပ်(၅၀၀၀)ဝန်းကျင်ခန့်အထိ ရရှိလာကြောင်း၊ ဇူလိုင်လဆန်းပိုင်းတွင် အမြင့်ဈေး ကြက်သွန်နီ တစ်ပိဿာလျှင် ကျပ်(၃၇၀၀)၊ လလယ်ပိုင်းတွင် တစ်ပိဿာလျှင် ကျပ်(၃၅၀၀)၊ ယခုဇူလိုင်လ (တတိယပတ်) (၂၁) ရက်နေ့တွင် တစ်ပိ ဿာလျှင် ကျပ်(၅၀၀၀)ခန့်ထိ ဈေးမြင့်တက်လာကြောင်း သိရှိရသည်။

            ဆိပ်ဖြူဈေးကွက်အတွင်း ဇူလိုင်လ (တတိယပတ်)တွင် ကြက်သွန်နီ (ဂျွန်သေး) တစ်ပိဿာလျှင် ကျပ် (၃၀၀၀-၃၅၀၀)၊ (ဂျွန်လတ်) တစ်ပိဿာလျှင် ကျပ်(၃၇၀၀-၄၃၀၀)နှင့် (ဂျွန်ကြီး) တစ်ပိဿာလျှင် ကျပ်(၄၆၀၀-၄၇၀၀)ပေါက်ဈေးရှိကြောင်း၊ နယ်ဝယ်လက်များမှ ကြက်သွန်နီ တစ်ပိဿာလျှင် ကျပ် (၅၀၀၀) ရက်ဆိုင်းဈေးဖြင့် ဝယ်ယူလျက်ရှိကြောင်း သိရှိရသည်။

          ဘဏ္ဍာနှစ်အလိုက် ကာလတူဈေးနှုန်း နှိုင်းယှဉ်ပါက ၂၀၂၅ ခုနှစ်၊ ဇူလိုင်လ(တတိယပတ်)တွင် ကြက်သွန်နီတစ်ပိဿာလျှင် အမြင့်ဈေး ကျပ်(၁၀၀၀)ဈေးထိသာ အရောင်းအဝယ်ဖြစ်ခဲ့ပြီး ယခု ၂၀၂၆ ခုနှစ်၊ ဇူလိုင်လ (တတိယပတ်)တွင် ကြက်သွန်နီတစ်ပိဿာလျှင် ကျပ်(၅၀၀၀)ခန့် အရောင်းအဝယ်ဖြစ်၍ ကျပ် (၄၀၀၀)ခန့်ဈေးတက်ပြီး အရောင်းအဝယ်ဖြစ်ကြောင်း၊ ကြက်သွန်စိုက်တောင်သူနှင့် ပွဲစားများ များစွာအကျိုး အမြတ်ရှိကြောင်း သိရှိရသည်။

           ကုန်စည်စီးဆင်းမှုအနေဖြင့် ဇူလိုင်လ(တတိယပတ်)တွင် ကြက်သွန်နီကုန်ချိန် ပိဿာ (၃၅၀၀၀၀) ခန့်စီးဆင်းခဲ့ကြောင်း၊ ရန်ကုန်ဘုရင့်နောင်ပွဲရုံသို့ တင်ပို့မှုနည်းပြီး ပြည်ပပို့ကုန်အဖြစ် မြဝတီမြို့သို့ တင်ပို့ပြီး ပြည်ပဝယ်လက်များမှတစ်ဆင့် ထိုင်းနိုင်ငံသို့ တင်ပို့မှုများကြောင်း ဆိပ်ဖြူ ကြက်သွန်နီဈေးကွက်မှ သိရှိရပါသည်။

DOCA(မကွေး)

            မကွေးတိုင်းဒေသကြီး၊ ပခုက္ကူခရိုင်၊ ပေါက်မြို့အနီးပတ်ဝန်းကျင်ရှိ ကျေးရွာများဖြစ်သော အင်းတော၊ ရှားတော၊ ထန်းတပင်၊ သရက်တော၊ စမ်းရေခုံကျေးရွာများသည် လယ်ယာစိုက်ပျိုးရေးလုပ်ငန်းကို အဓိကထားပြီး လုပ်ကိုင်ကြပါသည်။ စိုက်ပျိုးသီးနှံများထဲမှ စားဖိုဆောင်သီးနှံဖြစ်သည့် ငရုတ်သီးနှံကို ဝင်ငွေပိုမိုရရှိလာစေရန် မိသားစု တစ်ပိုင်တစ်နိုင် စိုက်ပျိုးလာကြောင်း သိရသည်။

          ရှားတောကျေးရွာရှိ တောင်သူတစ်ဦးမှ ငရုတ်သီးနှံကို ၂၀၂၅ ခုနှစ်၊  နိုဝင်ဘာလတွင် စတင်စိုက်ပျိုးပြီး (၃)လအကြာတွင် ခူးဆွတ်ရကြောင်း၊ ကုန်ကျစရိတ်အနေဖြင့် မြေပြုပြင်ခ၊ လုပ်အားခနှင့် အခြားသွင်းအားစုစရိတ်အပါအဝင် (၁)ဧကလျှင် ကျပ်သိန်း(၂၀)ဝန်းကျင်ခန့် ကုန်ကျကြောင်း သိရ ပါသည်။ အထွက်နှုန်းမှာ(၁)ဧကလျှင် ပိဿာ(၆၀၀) ဝန်းကျင်အထိ ထွက်ရှိကြောင်း (၁)ပိဿာလျှင် ကျပ်(၆၀၀၀) နှုန်းဖြင့် ရောင်းရကြောင်း၊ ဈေးကွက်အနေဖြင့် ပေါက်မြို့ပေါ်ရှိ မြို့မဈေးသို့ လာရောက်ရောင်းချကြောင်း၊ ယခုနှစ်တွင်မူ ငရုတ်စိုက်တောင်သူများ၏ အကျိုးအမြတ်အနေဖြင့် ကျပ်(၁၄-၁၅)သိန်းဝန်းကျင်အထိ ရရှိနိုင်မည်ဖြစ်ကြောင်း သိရှိရပါသည်။

DOCA(မကွေး)