ပြည်တွင်းကုန်သွယ်မှုသတင်း

         ကရင်ပြည်နယ်အတွင်းရှိ မြို့နယ်အသီးသီးတွင် ရာသီဥတုမျှတမှုကြောင့် ဒေသထွက်ကန်စွန်းဥများ အထွက်နှုန်းကောင်းမွန်ပြီး ဈေးကွက်အတွင်း အရောင်းအဝယ်သွက်လျက်ရှိကြောင်း သိရသည်။

          ဘားအံ၊ လှိုင်းဘွဲ့၊ ကော့ကရိတ်နှင့် ကြာအင်းဆိပ်ကြီးမြို့နယ်များရှိ ကိုင်းကျွန်းမြေများတွင် စိုက်ပျိုးထားသော ကန်စွန်းဥပင်များမှာ ယခင်နှစ်ထက် အထွက်နှုန်း ၁၀ ရာခိုင်နှုန်းအထိ တိုးတက် လာခဲ့သည်။ ဓာတ်မြေဩဇာ အသုံးပြုမှုကို လျှော့ချကာ သဘာဝမြေဩဇာ ပိုမိုသုံးစွဲကြသောကြောင်း  ကန်စွန်းဥအရည်အသွေး ပိုမိုကောင်းမွန်းသည်။ ကန်စွန်းဥသည် လူတို့၏ ကျန်းမာရေးအတွက် များစွား အကျိုးပြုသည်။ ကိုင်းကျွန်းမှထွက်သော ကန်စွန်းဥများကို ဒေသတွင်းဈေးများ၊ ဘားအံ မြို့မဈေးကြီးအပြင် မော်လမြိုင်မြို့နှင့်ရန်ကုန်မြို့ဈေးကွက်များသို့ပါ တင်ပို့ရောင်းချလျက်ရှိသည်။ ထွက်ရှိသော ကန်စွန်းဥဈေးနှုန်းများမှာ ကန်စွန်းဥ (အဖြူနှင့်အဝါရောင်)  လက်ကားဈေး တစ်ပိဿာ လျှင် (၃၅၀၀/၄၀၀၀)ကျပ်၊ ကန်စွန်းဥ (ခရမ်းရောင်) လက်ကားဈေး တစ်ပိဿာလျှင် (၃၀၀၀/ ၃၅၀၀) ကျပ် နှင့်ကန်စွန်းဥ (အဖြူနှင့် အဝါရောင်)  လက်လီဈေး တစ်ပိဿာလျှင် (၄၀၀၀/ ၅၀၀၀)ကျပ်၊ ကန်စွန်းဥ (ခရမ်းရောင်) လက်လီဈေး တစ်ပိဿာလျှင် (၅၀၀၀/၆၅၀၀)ကျပ်တို့ ဖြစ် ရောင်းချကြပြီး ယခုနှစ်တွင်အထွက်နှုန်းကောင်းမွန်ကာဈေးကောင်းရရှိသောကြောင့် ကန်စွန်းဥစိုက်တောင်သူများ သွက်ခြေကိုက်လျက်ရှိကြောင်း သိရသည်။

DOCA(ကရင်)

             မြန်မာနိုင်ငံ၏ ခရုဈေးကွက်တွင် စားခရုများဖြစ်ကြသော မျက်ပြဲခရု၊ ပင်လယ်ခရု၊ ပန်းခရု၊ အုန်းခရုနှင့် ခရုဖင်ချွန် များမှာ ဒေသအလိုက် အရောင်းအဝယ်ဖြစ်လျက်ရှိပြီး ရန်ကုန်နှင့် မန္တလေးမြို့ကြီး များတွင် ပို၍ ဈေးကောင်းလာပါသည်။ ခရုများအနက် ခရုဖင်ချွန်သည် ပရိုတင်းဓာတ်ကြွယ်ဝပြီး မြန်မာနိုင်ငံတွင် အရသာရှိသော ရေထွက်စားစရာတစ်မျိုးအဖြစ် လူကြိုက်များကာ အာဟာရလည်း ဖြစ်စေပါသည်။ ခရုဖင်ချွန်သည် သတ္တုဓာတ်ပါရှိခြင်းကြောင့် သံဓာတ်အားနည်းရောဂါကို ကာကွယ်ရန် နှင့် အရိုးအဆစ်ကျန်းမာရေးအတွက် ကောင်းမွန်ပြီး အဆီအဆိမ့်နည်းခြင်းကြောင့် ကိုယ်အလေးချိန် ထိန်းညှိနေသူများအတွက် သင့်တော်သော အာဟာရကိုလည်းရစေပါသည်။ ခရုဖင်ချွန်ကို အစပ်ကြော်၊ ခရုမာလာချက်၊ ခရုမျှစ်ဆန်လှော်ချက် စသည်ဖြင့် အမျိုးအမျိုးချက်စားကြပါသည်။ ခရုဖင်ချွန် တစ်ဆယ် သားလျှင် (၂၀၀၀) ကျပ် လက်ရှိပေါက်ဈေးရှိနေပြီး၊  အသင့်စားခရုမျှစ်ဆန်လှောင်ချက် ပလပ်စတစ်ဗူး သေး (၁) ဗူးလျှင် (၅၀၀၀) ကျပ်၊ ဗူးကြီး (၁) ဗူးလျှင် (၁၀၀၀၀) ကျပ်နှုန်းဖြင့် အရောင်းအဝယ်ဖြစ်လျက် ရှိကြောင်း သိရှိရပါသည်။

DOCA(ဧရာဝတီ)

       ပုသိမ်မြို့အတွင်း အရောင်းအဝယ်ဖြစ်နေသာ ဆန်စပါးဈေးနှုန်းမှာ ဩဂုတ်လ နောက်ဆုံးပတ်ဈေးနှုန်းအနည်းငယ်မြင့်တက်လျက်ရှိကြောင်း ဈေးကွက်မှ သိရသည်၊၊ ဩဂုတ်လဆန်း ပထမပတ်အတွင်း လူနည်းစုစားသုံးမှုရှိသော  ပေါ်ဆန်းစပါးတစ်တင်းလျှင် ကျပ် ၃၂၀၀၀/၃၄၀၀၀ ဆန်တစ်အိတ် ကျပ် ၁၂၅၀၀၀/၁၃၀၀၀၀ လူအများစားသုံးမှုရှိသော မိုးမနောသုခ မျိုးပွားစပါး တစ်တင်းကျပ် ၁၉၀၀၀/၂၀၀၀၀ ဈေး ဆန်တစ်အိတ် ကျပ် ၇၅၀၀၀/၇၇၀၀၀ ဈေးနှင့် ဈေးတန်းအနည်းငယ်နိမ့်သော နွေသီးထပ်ရင်စပါးတစ်တင်းလျှင် ကျပ် ၁၈၀၀၀/၁၈၅၀၀ ဈေး ဆန်တစ်အိတ် ကျပ်၆၅၀၀၀/ ၆၇၀၀၀ ဈေးဖြင့် အရောင်းအဝယ်ဖြစ်နေကြောင်း ဈေးကွက်မှ သိရသည်၊၊

          ယခုဩဂုတ်လနောက်ဆုံးပတ်အတွင်း ပေါ်ဆန်းစပါးတစ်တင်းကျပ် ၃၄၀၀၀/၃၆၀၀၀ ဆန်တစ်အိတ် ၁၃၅၀၀၀/၁၄၀၀၀၀ ဈေး မိုးမနောသုခမျိုးပွားစပါးတစ်တင်း ကျပ် ၂၁၀၀၀/၂၂၀၀၀ ဆန်တစ်အိတ် ကျပ်၈၀၀၀၀/၈၂၀၀၀ ဈေး နွေသီးထပ်ရင်စပါးတစ်တင်းလျှင် ကျပ် ၂၀၀၀၀/၂၀၅၀၀ ဝန်းကျင် ဆန်တစ်အိတ်ကျပ် ၇၀၀၀၀/၇၂၀၀၀ ဈေး ဖြစ်သွားသည့်အတွက် စပါး ၁ တင်း ကျပ် ၂၀၀၀၀ ဝန်းကျင် ဧည့်မထဆန်တစ်အိတ် ၅၀၀၀ ကျပ်နှင့် ပေါ်ဆန်းဆန်တစ်အိတ်  ၁၀၀၀၀ ကျပ် ဝန်းကျင် ဈေးနှုန်းမြင့်တက်လျှက်ရှိကြောင်း ဆန်အရောင်းဆိုင်နှင့်ဆန်ကုန်သည် များထံမှသိရ သည်၊၊

          ပုသိမ်ဈေးကွက်မှ ဆန်/ဆန်ထွက်ပစ္စည်းများကို ရန်ကုန်နှင့်အထက်အညာဒေသများသို့  တင်ပို့ရောင်းချလျှက်ရှိပြီး နှစ်စဉ်ယခုလို အချိန်စပါးလက်ကျန်များနည်းပါး၍ တောင်သူလက်ကြီး သမားများအချို့နှင့် စက်ပိုင်ကုန်သည် လှောင်လက်ကြီးသမားများထံတွင်သာ စပါးလက်ကျန်များ ရှိနေချိန် ဈေးနှုန်းအနည်းငယ်မြင့်တက်မှုရှိကြောင်း ဆန်စပါးအသိုင်းအဝိုင်းမှ သိရသည်၊၊                                                             

(DOCA ဧရာဝတီ)

          မကွေးတိုင်းဒေသကြီး၊ ပခုက္ကူခရိုင်၊ ပခုက္ကူမြို့မဈေး၊ အမှတ်(၂)ဈေးနှင့် ပျံကျဈေးတို့တွင် ရာသီပေါ်သီးနှံ ဩဇာသီးများကို ကျောက်ပန်းတောင်း၊ ပုပ္ပါးဒေသမှ အများဆုံးဝင်ရောက်ပြီး ဒေသခံ စိုက်ပျိုးတောင်သူများက မိမိတို့ခြံထွက် ဩဇာသီးများကို ကောက်ရိုး ၊သတင်းစာ စက္ကူများခံကာ ခြင်းတောင်းထဲသို့ စနစ်တကျထုပ်ပိုး၍ ပခုက္ကူဈေးကွက်သို့ လိုင်းကားဖြင့် တင်ဆောင်ကာ လာရောက်ရောင်းချကြကြောင်း၊ ဝင်ရောက်သည့် ကာလမှာ များသောအားဖြင့် မိုးနှောင်း ကာလနှင့် ဆောင်းဦးအစ (ဩဂုတ်လ၊ စက်တင်ဘာလ) ဝန်းကျင်တွင် အများဆုံး ဝင်ရောက် လေ့ရှိပါသည်။

          ဩဇာသီးစားသုံးပေးခြင်းဖြင့် ခန္ဓာကိုယ်ကျန်းမာရေးအတွက် အကျိုးကျေးဇူး အမြောက် အမြားကိုရရှိစေသည်။ ဗီတာမင်စီ မြင့်မားစွာ ပါဝင်သောကြောင့် ခန္ဓာကိုယ်အတွင်းရှိ ဆဲလ်များ ပျက်စီးခြင်းမှ ကာကွယ်ပေးခြင်း၊ အမျှင်ဓာတ် ကြွယ်ဝစွာ ပါဝင်သောကြောင့် အူမကြီး လှုပ်ရှားမှုကို ကောင်းမွန်စေပြီး ဝမ်းချုပ်ခြင်းမှ ကာကွယ်ပေးခြင်း၊ ထို့ပြင် အူလမ်းကြောင်းရှိ အကျိုးပြု ဗက်တီး ရီးယားများကို ဖွံ့ဖြိုးစေသဖြင့် အစာခြေစနစ်ကို  ‌ကောင်းမွန်စေခြင်းတို့ကြောင့် ပေါ်ဦးပေါ်ဖျားရာသီ ချိန်တွင် ဩဇာသီးများ ရောင်းအားကောင်းလျက်ရှိပါသည်။

၂၀၂၆ ခုနှစ်၊ စက်တင်ဘာလ(ဒုတိယပတ်)တွင် ရောင်းချနေသော ဩဇာသီး ဈေးနှုန်းမှာ အလုံးကြီး  (ထိပ်စ)တစ်ပိဿာလျှင် ကျပ်(၄၀၀၀-၄၅၀၀) ၊ အလုံးသေး(အလတ်စ)တစ်ပိဿာလျှင် ကျပ်(၃၀၀၀-၃၅၀၀)ဈေးဖြင့်ရောင်းချလျက်ရှိပါသည်။ ယခင်နှစ်(၂၀၂၅ခုနှစ်)နှင့် ဈေးနှုန်းနှိုင်းယှဉ်ပါ က ကျပ်(၁၀၀၀-၁၅၀၀)ဝန်းကျင်ခန့် ဈေးမြင့်တက်လာကြောင်း၊ ယခင်နှစ်က  မိုးရွာသွန်းမှု ကောင်း မွန်သဖြင့် အထွက်နှုန်းကောင်းသောကြောင့် ဈေးနှုန်းချိုသာစွာ ဝယ်ယူရရှိခဲ့သော်လည်း ယခုနှစ်တွင် လမ်းပန်းဆက်သွယ်ရေး အခက်အခဲ၊ နယ်မြေအခက်အခဲနှင့် စက်သုံးဆီ ဈေးနှုန်း များမြင့်တက်ခြင်း ကြောင့် ဩဇာသီးဈေးနှုန်းများမှာ ယခင်နှစ်ထက် ဈေးမြင့်တက်လာသည်ဟု သစ်သီးရောင်းချသူထံ မှသိရှိရပါသည်။

DOCA(မကွေး)

         ဧရာဝတီတိုင်းဒေသကြီး၊ပုသိမ်မြို့နယ်၊ တာကိုင်းကျေးရွာတွင် ဗူးပင်စိုက်ပျိုး၍ ဗူးသီးထွက်ရှိနေပြီး ရန်ကုန်သို့ တင်ပို့လျှက်ရှိကြောင်း သိရသည်။ဟင်းသီးဟင်းရွက်သီးနှံစုံကို ဆောင်း၊ နွေရာသီတို့တွင် စိုက်ပျိုးတောင်သူများပေါများကြောင်း သိရသည်။

       စိုက်ပျိုးမှုအနေဖြင့် ဗမာမျိုး ဗူးကိုသာစိုက်ပျိုးပြီး ယခင်က ဗူးမျိုးစေ့ ၁၀စေ့ပါ တစ်ထုတ်ကို ၈၀၀၀ကျပ် ဝယ်ယူပြီးစိုက်ပျိုးကြောင်း၊ နှစ်စဉ်စိုက်ပျိုးလာ၍ ဗူးပင်မှ မျိုးစေ့ ခံ၍ နှစ်စဉ် ဗူးမျိုးစေ့ပါ ရောင်းချ နေပြီး ဗူးစေ့ ၁စေ့ကို ၂၀၀-၃၀၀ ကျပ်ထိဈေးရရှိသည်။  စိုက်ပျိုး ရာတွင် စင်တင် စိုက်ပျိုးခြင်း နည်းဖြင့်သာ စိုက်ပျိုးကြသည်။ မြေချ စင်မဲ့စိုက်ပျိုးခြင်းလဲရှိကြောင်း၊ စင်ထိုးစိုက်ပျိုးပါက ဝါးစင်သည် ၂နှစ်အတွင်း ပြန်လည်အသုံးပြု၍ ရရှိကြောင်းသိရသည်၊ ဗူးသက်တမ်းမှာ စက်တင်ဘာလတွင် စိုက်ပျိုးပါက မတ်လအထိ ထွက်ရှိကြောင်း၊ စိုက်ပျိုးရာတွင် ၁၀လန် ၂ခွက်တွင် အပင်ရေ ၈၀-၁၀၀ခန့် စိုက်ပျိုးပြီး  ၂လခွဲ အကြာတွင် အသီး စတင်ခူးရကြောင်း ဗူး စိုက်ပျိုးထုတ်လုပ်မှု ကုန်ကျ စရိတ်အနေဖြင့် မျိုး၊ သွင်းအားစု၊ လုပ်သားခ၊ ဝါး ဖိုး  အပါအဝင် ငွေကျပ် ၆၀၀၀၀၀ခန့် ကုန်ကျကြောင်း၊ ၁လကို ၁၂ရက်ခူးရပြီး ၁ကြိမ်ခူးလျှင် ၂၀လုံးခန့်ထွက်ရှိသည်။ ၅လအကြာအထိ အသီးလှိုင်လှိုင်ထွက်ရှိ သောကြောင့်  ဗူးသီးထွက်ရှိမှု  အလုံး ၈၀၀ မှ ၁၀၀၀ ထိ ထွက်ရှိကြောင်းသိရသည်။

    ယခု ဗူးသီးဈေးနှုန်းအနေဖြင့် တစ်စိပ်လျင် (၁၀၀၀)ကျပ်၊ တစ်လုံး(၇၀၀၀)နှင့်(၈၀၀၀၀)ကျပ်ရရှိပြီး ဈေးကောင်းရရှိ၍ အကျိုးအမြတ် အနေဖြင့် ဈေးကွက်တင်ပို့မှု အနေဖြင့် ရန်ကုန်သို့ အဓိကထားတင်ပို့ပြီး ဗူးပင်အကျိုးအမြတ်ရရှိ၍ နှစ်စဉ်စိုက်ပျိုးလျက်ရှိကြောင်း သိရသည်။

DOCA(ဧရာဝတီ)