ပြည်တွင်းကုန်သွယ်မှုသတင်း

           မြင်းခြံခရိုင်၊ နွားထိုးကြီးမြို့နယ်သည် လယ်ယာစိုက်ပျိုးရေးလုပ်ငန်းများ လုပ်ကိုင် လျက်ရှိရာ အစေ့ထုတ်ပြောင်းသီးနှံများကို အုပ်သျှစ်ကုန်းရွာ၊ ပြရာချောင်းရွာ၊ အင်ချောင်းရွာ၊ သရက်ကန်ရွာနှင့် သပြေသာရွာတို့တွင် စိုက်ပျိုးလျက်ရှိပြီး စိုက်ပျိုးရာတွင် ရာသီဥတုဒဏ် ခံနိုင်ရည်ရှိသော အထွက်နှုန်း ကောင်းမွန်သည့် စီပီ(808)နှင့် (888)မျိုးများကို စိုက်ပျိုးထားကြောင်း သိရသည်။ ၂၀၂၆-၂၀၂၇ ခုနှစ်တွင် နွားထိုးကြီးမြို့နယ်အနေဖြင့် အစေ့ထုတ်ပြောင်း စိုက်ဧက (၁၀၃၈)ဧက စိုက်ပျိုးထား ကြောင်း မြို့နယ်ကြေးတိုင်နှင့် မြေစာရင်း ဦးစီးဌာန၏ စာရင်းများ အရသိရှိရသည်။

      ၂၀၂၆ ခုနှစ်၊ ဇူလိုင်လ ဒုတိယပတ်အတွင်း အရည်အသွေးကောင်းသော အစေ့ထုတ်ပြောင်း တစ်ပိဿာလျှင် (၁၅၀၀-၁၆၀၀) ကျပ်ခန့်၊ အရည်အသွေးညံ့သော အစေ့ထုတ်ပြောင်း တစ်ပိဿာ လျှင် (၁၄၀၀) ကျပ်ခန့် ပေါက်ဈေးများဖြင့်  အရောင်းအဝယ်ဖြစ်လျက်ရှိကြောင်း၊ ယခင်တစ်ပတ်နှင့် နှိုင်းယှဉ်ပါက ယခုတစ်ပတ်တွင် အရည်အသွေးအမျိုးအစားကိုလိုက်၍ အစေ့ထုတ်ပြောင်း  တစ်ပိဿာလျှင် (၁၅၀-၂၀၀)ကျပ်ခန့် ဈေးနှုန်းမြင့်တက်လာကြောင်း၊ အရောင်းအဝယ် ဖြစ်မှုအနေ ဖြင့် တစ်ပတ်လျှင် (၂၀၀- ၃၀၀) အိတ်ခန့်အရောင်းအဝယ်ဖြစ်ကြောင်း၊  တင်ပို့မှုအနေဖြင့် ပခုက္ကူမြို့၊ မန္တလေးမြို့နှင့် ရန်ကုန်မြို့သို့ ရောင်းချကြောင်း၊ ဒေသတွင်းကုန်လက်ကျန်နည်းလာပြီ ဖြစ်သောကြောင့်  အစေ့ထုတ်ပြောင်း ဈေးနှုန်းအနည်းငယ် မြင့်တက်လာကြောင်း၊  အစေ့ထုတ်ပြောင်းများကို ပြည်တွင်း၌ မွေးမြူရေးလုပ်ငန်းများတွင် ကုန်ကြမ်းတိရိစ္ဆာန် အစာအဖြစ်အသုံးပြုကြသလို အပင်များကိုကျွဲ၊ နွားအစာအဖြစ်လည်းကောင်း၊ အစားသောက် ကုန်ကြမ်းအဖြစ် ဝယ်ယူမှုများ၍ ဈေးကွက်ခိုင်မာမှုရှိကြောင်း ဒေသတွင်း ပွဲရုံလုပ်ငန်းရှင်များထံမှ သိရှိရသည်။ 

DOCa(မန္တလေး)

                   နာနတ်သီး(အင်္ဂလိပ်အမည်-pineapple) သည်စားသုံးရန် ကောင်းမွန်သည့်အသီးဖြစ်သည့်အပြင် ဗီတာမင်ဓာတ်နှင့် သတ္တုဓာတ် များပါဝင်ပြီး အလှအပအတွက်လည်း အလွန်ကောင်းမွန်သည့် အသီးဖြစ် ပါသည်။ နာနတ်သီးတွင် ပါဝင်သောအမျှင်ဓာတ်များသည် ကျန်းမာရေးအတွက် အလွန်ကောင်းမွန်ပါသည်။ နာနတ်သီးကို အဓိကအားဖြင့် ရှမ်းပြည်နယ်မှထွက်ရှိပြီး ရှမ်းပြည်နယ်မြောက်ပိုင်း သီပေါမှ ထွက်ရှိသည့် အသီးသည် ဈေးကွက်တွင် အလွန်ကျယ်ပြန့်စွာ ရောင်းချလျက်ရှိပါသည်။ တရုတ်နိုင်ငံသို့ တင်ပို့ရန်အတွက် ရှမ်းပြည်မြောက်ပိုင်း သီပေါနှင့်ကျောက်မဲဒေသထွက် နာနတ်သီးများကို  SPS ညီညွှတ်စွာဖြင့် နှစ်နိုင်ငံကြား ဆက်လက်ညှိနှိုင်းဆောင်ရွက်လျက်ရှိပါသည်။ ရှမ်းပြည်မြောက်ပိုင်း မှနာနတ်သီးများကို မန္တလေးသို့ အဓိက ဝင်ရောက်လျက်ရှိပြီး ထိုမှတစ်ဆင့် မြန်မာပြည်အောက်ပိုင်းနှင့် အညာဒေသများသို့ တစ်ဆင့်ဖြန့်ဖြူးလျက် ရှိပါသည်။ နာနတ်သီးကို မန္တလေးသီရိမာလာဈေး အပါအဝင် သစ်သီးဝလံ ပွဲရုံများသို့ ရှမ်းနာနတ်သီး များ အများအပြားဝင်ရောက်လျက်ရှိပါသည်။ နာနတ်သီးများကို ဆိုဒ်နှင့်အရွယ်အစားအစားပေါ် မူတည်၍ ကွဲ ပြားလျက်ရှိပါသည်။ ယခုအခါ အကြီးဆိုဒ် တစ်လုံးလျှင် ပျှမ်းမျှ ဈေးနှုန်း (၄၀၀၀-၅၀၀၀)ကြား၊ အလတ်ဆိုဒ် တစ်လုံးလျှင်(၂၀၀၀-၃၀၀၀)ကြား ရောင်းချလျက်ရှိကြောင်း သိရှိရပါသည်။

DOCa(မန္တလေး)

        မအူပင်ခရိုင်သည် စပါးနှင့် သားငါးများကို အဓိကထုတ်လုပ်သော ဒေသဖြစ်သည်။ ဆန်နှင့်ဆန်ကွဲများကို ရန်ကုန်သို့ အဓိကပို့ပြီးမှ ပြည်ပသို့ တင်ပို့ကြသည်။ သားငါးကဏ္ဍတွင် ငါးမွေးမြူရေးကို အဓိကထားလုပ်ကိုင်ပြီး ပြည်ပသို့ ငါးရှဥ့်များ အများဆုံးတင်ပို့ရောင်းချလျက်ရှိသည်။

      မအူပင်ခရိုင်ရှိ ဆန်စက်များမှ ကြိတ်ခွဲထွက်ရှိသော ဆန်နှင့်ဆန်ကွဲများကို ရန်ကုန်မြို့ရှိ စက်မှုဇုန်များနှင့် ဆိပ်ကမ်းများသို့ ကုန်းလမ်းဖြင့် အဓိက ပို့ဆောင်ကြသည်။ ပြည်ပတင်ပိုမှုမှာ ရန်ကုန်ဆိပ်ကမ်းများမှတစ်ဆင့် တရုတ်၊ အာဆီယံနှင့် အခြားနိုင်ငံများသို့ ကုမ္ပဏီများမှတဆင့် ရေကြောင်း၊ နယ်စပ်ကုန်သွယ်ရေးတို့ဖြင့် ဆက်လက် တင်ပို့ကြသည်။ ပေါင်ဆန် အနေဖြင့်  ပြည်ပဝယ်လိုအားပေါ်မူတည်၍ အချို့သော ပေါင်းဆန်များကိုလည်း ပြည်ပသို့ တင်ပို့လေ့ရှိကြောင်း သိရသည်။

        ညောင်တုန်းမြို့နယ် ကုမ္ပဏီများမှ ဆန်များကို ၁/၂၀၂၆ မှ ၆/၂၀၂၆ အထိ တင်ပို့သော ရွှေဝါနဒီစိုက်ပျိုးထုတ်လုပ်မှု ကုမ္ပဏီမှ ဆန် ၄၆၃၇၇ တန်၊ ညောင်တုန်းမြို့နယ် YOMA Sun Co., Ltd မှ ၉၄၉၂ တန်၊ ညောင်တုန်းမြို့နယ် The PerPetual Co.,Ltd မှ တင်ပို့မှု ၁၉၀၉တန်၊  ညောင်တုန်းမြို့နယ် Good BrotherCo., Ltd မှ ၂၉၀၉၆ တန်၊ ဓနုဖြူမြို့နယ်  GoldDelta Co.,Ltd  ၁၆၀၅၈ တန် တင်ပို့ကြောင်း သိရသည်။

       ဆန်ကွဲများကို တင်ပို့သော ကုမ္ပဏီများမှာ ညောင်တုန်းမြို့နယ်  ရွှေဝါနဒီစိုက်ပျိုးထုတ်လုပ်မှု ကုမ္ပဏီမှ (၁၄၄၃၉)တန်၊ ညောင်တုန်းမြို့နယ် YOMA Sun Co., Ltd မှ (၂၁၁၀) တန်၊ ညောင်တုန်းမြို့နယ် The PerPetual Co.,Ltd မှ တင်ပို့မှု (၁၅၂၅)တန်၊  ညောင်တုန်းမြို့နယ် Good BrotherCo., Ltd မှ (၂၀၀၁၄) တန်၊ ဓနုဖြူမြို့နယ်  GoldDelta Co.,Ltd  (၇၀၄၅) တန် တင်ပို့ကြောင်း သိရသည်။

      ပေါင်းဆန်များကိုတင်ပို့သောကုမ္ပဏီများမှာညောင်တုန်းမြို့နယ်  ရွှေဝါနဒီစိုက်ပျိုးထုတ်လုပ်မှု ကုမ္ပဏီမှ (၁၉၄) တန်၊ ညောင်တုန်းမြို့နယ် The PerPetual Co.,Ltd မှ  (၁၈၀၀)တန် တင်ပို့ကြောင်း သိရသည်။

        မတ်ပဲကို ပဲနှမ်းအသင်းမှ  ၅၂၀၀၀ တန်၊ ပဲတီစိမ်းကို ပဲနှမ်းအသင်းမှ ၁၁၀၀ တန်၊ ပြောင်းအသင့်းမှ အစြေထုတ်ပြောင်းကို ၆၂၀၀ တန် တင်ပို့ကြောင်း၊ ငါးမျိုးစုံကို ဝါဝါဝင်ကုမ္ပဏီမှ ငါးကို ၅၄ တန်တင်ပို့ ကြောင်း၊ နယ်မြေစာရင်း ကုမ္ပဏီများမှ ပေးပို့သောစာရင်းအရ သိရှိရပါသည်။

DOCA(ဧရာဝတီ)

      စားသုံးသူပြည်သူများ စားသုံးဆီဝယ်ယူစားသုံးရာတွင် ဘေးအန္တရာယ် ကင်းရှင်းပြီး သင့်တင့်သောဈေးနှုန်းဖြင့်ဝယ်ယူစားသုံးနိုင်စေရန်နှင့်ပြည်တွင်းလိုအပ်ချက်များကို ဖြည့်ဆည်း ပေးနိုင်ရန် စီးပွားရေးနှင့် ကူးသန်းရောင်းဝယ်ရေးဝန်ကြီးဌာန၊ စားသုံးဆီ တင်သွင်း သိုလှောင် ဖြန့်ဖြူးခြင်းလုပ်ငန်း ကြီးကြပ်ရေးကော်မတီက ဆောင်ရွက်ပေးလျက်ရှိကြောင်း သိရပါသည်။

          စားအုန်းဆီကို ပြည်ပမှဝယ်ယူတင်သွင်းရာတွင် စားအုန်းဆီ တင်ပို့သည့်နိုင်ငံများ၏ စျေးနှုန်းအတက်အကျပေါ်မူတည်၍ ပြည်တွင်း၌ ဖြစ်သင့်ဖြစ်ထိုက်သည့်ဈေးနှုန်းများ ဖြစ်ပေါ် စေရေးကို ထိန်းကျောင်းဆောင်ရွက်လျက်ရှိပါသည်။

          ပြည်ပမှစားအုန်းဆီထုတ်လုပ်တင်ပို့သည့်နိုင်ငံများတွင် ဈေးကွက်နှင့်ဈေးနှုန်းဖြစ်ပေါ်မှု များအရ ၂၀၂၆ ခုနှစ်၊ ဇူလိုင်လ ၁7 ရက်နေ့မှ 23 ရက်နေ့အထိ ရန်ကုန်အထိုင်ဈေး အခြေခံ လက်ကားရည်ညွှန်းဈေးနှုန်းမှာ စားအုန်းဆီတစ်ပိဿာလျှင် ငွေကျပ် ၇,၂2၀ ဖြစ်ကြောင်း စားသုံးဆီတင်သွင်းသိုလှောင်ဖြန့်ဖြူးခြင်းလုပ်ငန်းကြီးကြပ်ရေးကော်မတီက အသိပေးထုတ်ပြန် ကြေညာထားကြောင်း သိရှိရပါ​သည်။  

          စားအုန်းဆီ အခြေခံလက်ကားရည်ညွှန်းဈေးနှုန်းကို အပတ်စဉ် သောကြာနေ့တိုင်း ထုတ် ပြန်ကြေညာလျက်ရှိပြီး စားသုံးသူပြည်သူများအနေဖြင့် စားသုံးသူရေးရာဦးစီးဌာန၏ Website: www.doca.gov.mm၊  Facebook Page  နှင့် မြန်မာနိုင်ငံဆီကုန်သည်နှင့် ဆီလုပ်ငန်းရှင်များ အသင်း၏ Facebook Page တို့တွင် ဝင်ရောက် ကြည့်ရှုလေ့လာနိုင်ကြောင်း သိရှိရပါသည်။

တိုင်းဒေသကြီး/ပြည်နယ် မြို့နယ်များအလိုက် ၁၄ -၇ -၂၀၂၆ ရက်နေ့တွင် ဖြစ်ပေါ်လျက်ရှိသော ဆန်၊ ဆီ၊ မီးဖိုချောင်သုံးပစ္စည်းများ၊ သားငါးနှင့် ဥ‌ဈေးနှုန်းများကို ပူးတွဲပါ ဖိုင်တွင် ကြည့်ရှုနိုင်ပါသည်-