ပြည်တွင်းကုန်သွယ်မှုသတင်း

            ဧရာဝတီတိုင်းဒေသကြီး၊ မအူပင်မြို့၊ အရှေ့ဘက်ကမ်းကျေးရွာအုပ်စုရှိ လယ်ကိုင်းကျေးရွာတွင် သီးနှံမျိုးစုံစိုက်ပျိုးကြပြီး ပြောင်းသီးနှံများကို စိုက်ဧက ၄၂၇၀ ဧကခန့် စိုက်ပျိုးထားရှိကြောင်း သိရသည်။ ဖူးစားပြောင်းကို စိုက်ပျိုးကာလမတူညီပဲ တောင်သူများစိုက်ပျိုးကြကြောင်း ၂၀၂၅ခုနှစ် ဩဂုတ်လက စိုက်ပျိုးသူများလည်းရှိကြောင်း ပွင်းလင်းရာသီတွင် စတင်စိုက်ပျိုးကြပြီး ၂၀၂၆ခုနှစ် ဇန်နဝါရီလအထိ စိုက်ပျိုးလျက်ရှိကြောင်းသိရသည်။

          ပြောင်းသီးနှံကို ၂၀၂၅ခုနှစ် ဒီဇင်ဘာလတွင် စတင်စိုက်ပျိုး၍ စိုက်ပျိုးပြီး ၂ လကျော်အကြာ ၂၀၂၆ခုနှစ် ဖေဖော်ဝါရီတွင် ခူးဆွတ်ရကြောင်း၊ မျိုးအနေဖြင့် သကြားပြောင်းနှင့် ပြောင်းစီး(အဖြူ) မျိုးများကို စိုက်ပျိုးကြပြီး တစ်ဧက လျှင် မျိုးထုပ် ၄ ထုပ်ခန့် ကုန်ကျကြောင်း၊ စိုက်ပျိုးရာတွင် ထွန်ကြောင်းဆွဲအစေ့ချစနစ်ဖြင့် စိုက်ပျိုးကြပြီး စိုက်ပျိုးမှုကုန်ကျစရိတ်အနေဖြင့် မျိုး၊ သွင်းအားစု၊ မြေပြုပြင်ခ၊ လုပ်သားခအပါအဝင် တစ်ဧက လျှင် ငွေကျပ် ၇၀၀၀၀၀ ခန့် ကုန်ကျကြောင်း၊ ယခင်နှစ်အထွက်နှုန်းအနေဖြင့် တစ်ဧကလျှင် ပြောင်းဖူးအရေအတွက် ၄၀၀၀ ခန့် ထွက်ရှိရာ ယခုနှစ် ၅၀၀၀ခန့် ထွက်ရှိကြောင်းသိရသည်။  စိုက်ပျိုးမြေ အနေအထားနှင့် သီးနှံဖြစ်ထွန်းအောင်မြင်မှုအပေါ်မူတည်၍ သီးနှံအထွက်နှုန်းများ ကွဲပြားမှုရှိကြောင်း၊ ဈေးနှုန်းအနေဖြင့် ပြောင်းဖူးတစ်ဖူးလျှင် စတင်ပေါ်ပေါက်ချိန် ၂၀၂၅ခုနှစ် အောက်တိုဘာလက လက်ကား ဈေး ငွေကျပ် ၇၀၀ နှုန်းဖြင့် ဈေးပေါ်ပေါက်ခဲ့ပြီး၊ ယနေ့ စိုက်ပျိုးထွက်ရှိသော ပြောင်းဖူးလက်ကားဈေးမှာ ၃၀၀ကျပ်ခန့်သာ ရောင်းချရပြီး အကျိုးအမြတ်အနေဖြင့် တစ်ဧကလျှင် ကျပ် ၈ သိန်းခန့် ရရှိခဲ့ကြောင်း၊ ဈေးကွက်အနေဖြင့် မအူပင်မြို့ပေါ်ရှိ ကုန်စိမ်းပွဲရုံများသို့လည်းကောင်း၊ ရန်ကုန်မြို့သို့လည်း တင်ပို့ရောင်းချလျက်ရှိရာ ပြောင်းသီးနှံစိုက်ပျိုးခြင်းဖြင့် တောင်သူများ အကျိုးအမြတ်ရရှိကာ အဆင်ပြေလျက်ရှိကြောင်း ပြောင်းစိုက်တောင်သူတစ်ဦးထံမှ သိရှိရပါသည်။

DOCA(ဧရာဝတီ)

           မကွေးတိုင်းဒေသကြီး၊မင်းဘူးခရိုင်၊ မင်းဘူးမြို့နယ် ကျောက်တန်းကျေးရွာနှင့် ရေတွင်းကုန်း ကျေးရွာရှိ တောင်သူများသည် ဆားပွက်ချောင်းရေကိုအမှီပြု၍ မေမြို့ပန်းများစိုက်ပျိုးရောင်းချလျက်ရှိရာ ယခုနှစ်တွင် အပင်များအောင်မြင်ဖြစ်ထွန်း၍ မိသားစုအပိုဝင်ငွေရလျက်ရှိကြောင်း သိရ သည်။

          မေမြို့ပန်းစိုက်ပျိုးရာတွင် ယခင်နှစ်ကချန်ထားသောမျိုးစေ့များကို ပျိုးထောင်စိုက်ပျိုးကြ ကြောင်း၊ နတ်တော်လတွင်စိုက်ပျိုးကြပြီး အပင်သက်တမ်း(၃)လခန့်ရှိလျှင် ဈေးကွက်တွင်ရောင်းချ နိုင်ကြောင်း၊ ဆောင်းရာသီတွင်စိုက်ပျိုးလျှင် အပင်များပိုမိုအောင်မြင်ဖြစ်ထွန်းကြောင်း၊ အပင်ကို ဘောင်ဖော်၍စိုက်ပျိုးရပြီး ရေဝပ်ခြင်းကိုမကြိုက်ကြောင်း၊ မြေတောင်မြှောက်ခြင်း၊ ပေါင်းထိုးခြင်း၊ ခေါင်နှိမ်ခြင်းများလည်းပြုလုပ်ပေးရကြောင်း၊ အပင်အားမြေဩဇာကျွေး၍ တစ်ပတ်လျှင်တစ်ကြိမ် ခန့် ပိုးသတ်ဆေးဖြန်းပေးရကြောင်း၊ သို့မှသာ အပင်ပိုးမကျဘဲ ရောင်းပန်းလှကြောင်း၊ အပင်ရေ (၂၀၀၀)ခန့် တစ်ပိုင်တစ်နိုင်စိုက်ပျိုးကြကြောင်း၊ မေမြို့ပန်းအမျိုးမျိုးရှိရာ အက်စတာ၊ ကြက်လည်ဆံ၊ ရိုးစိမ်းကျောက်နီ၊ ခိုပြာမျိုးများကို ပိုမိုအားထားစိုက်ပျိုးကြကြောင်း သိရသည်။ ၂၀၂၆ခုနှစ်၊ မတ်လ ဆန်းတွင် မေမြို့ပန်းလက်ဆုပ်  တစ်စည်းလျှင် (၁၀၀၀)ကျပ်မှ(၁၂၀၀)ကျပ်ခန့်ထိ ဈေးကောင်းရရှိပြီး ဝယ်လို အားပေါ်မူတည်၍ တစ်ခါခူးဆွတ်လျှင် အစည်းရေ(၅၀)မှ(၁၀၀)ခန့်ထိ ခူးဆွတ်ရောင်း ချကြကြောင်း၊ မင်းဘူးမြို့နယ်ထွက် မေမြို့ပန်းများကို ပွင့်ဖြူ၊ မင်းဘူး၊ စကု၊ မကွေးမြို့များသို့ တင်ပို့ရောင်းချရာ မိသားစု အပိုဝင်ငွေရရှိပြီး အဆင်ပြေလျက်ရှိကြောင်း သိရသည်။

DOCA(မကွေး)

                  ပေါင်းတည်မြို့နယ်အတွင်းရှိ အဓိကစိုက်ပျိုးခဲ့သည့် မတ်ပဲဧက (၄၂၀၀၀)ကျော် စတင်ရိတ် သိမ်းလျှက်ရှိပြီး ပဲခူးတိုင်းဒေသကြီး ပေါင်းတည်မြို့နယ်ရှိ တောင်သူများသည် အဓိကသီးနှံအဖြစ် ပဲမျိုးစုံစိုက်ပျိုးကြရာယခုနှစ်တွင်မတ်ပဲဧက(၄၂၀၀၀)ကျော် စိုက်ပျိုးရာ အောင်မြင်ဖြစ်ထွန်းခဲ့ပြီး ဒေသခံတောင်သူများအနေဖြင့် မတ်ပဲသီးနှံများကို ယခုရက်ပိုင်းအတွင်းမှာ စတင်ရိတ်သိမ်းလျက် ရှိကြောင်း မြို့နယ်စိုက်ပျိုးရေးဦးစီးဌာနမှ သိရပါသည်။

          ထိုသို့ ပဲမျိုးစုံစိုက်ပျိုးရာတွင် မျိုးကောင်းမျိုးသန့် အထွက်ကောင်းမျိုးကို အားထားစိုက်ပျိုးခဲ့ ကြကြောင်း နိုင်ငံတော်မှ မတ်ပဲသီးနှံအပါအဝင် ပဲမျိုးစုံစိုက်ပျိုးထုတ်လုပ်ရေးကို အလေးထားအား ပေးလျက်ရှိရာ တောင်သူများ၏ စိုက်ပျိုးရေးစရိတ်လိုအပ်ချက်များ စိုက်ပျိုးရေးနည်းပညာများနှင့် သွင်းအားစုများကို ကူညီဖြည့်ဆည်း ပေးခဲ့ကြောင်း တောင်သူအကျိုးစီးပွား ကြိုဖြစ်ထွန်းနိုင်ရေးနှင့် သီးနှံပိုကုန်တိုးတက်ရေးတို့အတွက် မတ်ပဲသီးနှံ အနေဖြင့် ပန်းတိုင်အထွက်နှုန်းသတ်မှတ်ချက် တစ်ဧက(၂၅)ရာခိုင်နှုန်း ပြည့်မီကျော်လွန်အောင် ထုတ်လုပ်ရရှိနိုင် ရေးအတွက် မြို့နယ်စိုက်ပျိုး ကြီးကြပ်ရေးကော်မတီအဖွဲ့က တောင်သူများနှင့် တွေဆုံဆွေးနွေးကာ ပူးပေါင်း ကူညီကြိုးစား အားထုတ်ခဲ့ကြကြောင်း သိရပါသည်။

          ပဲပေါ်စယခုလက်တလောအချိန်၌ ဒေသတွင်းပဲမျိုးစုံရောင်းဝယ်ရေး လုပ်ကိုင်သူများအနေဖြင့် မတ်ပဲတစ်တင်းလျှင် (၁၀၀၀၀၀)ကျပ် ဝန်းကျင်ခန့်ဖြင့် ဈေးဖွင့်ထားလျက်ရှိပြီး တောင်သူများ အနေဖြင့် လက်တလော ရိတ်သိမ်းပြီးပဲများကို လက်ဝယ်စုဆောင်းထားရှိကာ ပဲဈေးနှုန်းပိုမို ရရှိရေးအတွက် ဆက်လက်မျှော်လင့်လျက်ရှိ ကြောင်းသိရပါသည်။ 

DOCA(ပဲခူး)

                        ပဲခူးတိုင်းဒေသကြီး၊ တောင်ငူခရိုင်သည် စပါး၊ ပြောင်း နှင့် ပဲမျိုးစုံ၊ နေကြာ နှင့် နှမ်းသီးနှံ မျိုးစုံ အောင်မြင်ဖြစ်ထွန်းလျက်ရှိရာ စိုက်ပျိုးရေး လုပ်ကိုင်ကြသော တောင်သူများသည် ပြောင်း၊ မြေပဲ စသည့်သီးနှံများကြားတွင် ကြားသီးနှံအဖြစ် စားဖိုဆောင်သီးနှံဖြစ်သော ပဲကြီးသီးနှံကို စိုက်ပျိုးကြသည်။ စိုက်ပျိုး၍ရရှိသော ကြားသီးနှံများကို မိမိတို့မိသားစုစားသောက်၍ ပိုလျှံသည်များကို ကုန်ကြမ်းမှ ကုန်ချောထုတ်လုပ်သော ပြည်တွင်း ပဲလှော်/ပဲကြော် လုပ်ငန်းရှင်များနှင့် လှောင်လက်များသို့ တစ်ဆင့် ပြန်လည် ရောင်းချခြင်းဖြင့် ဝင်ငွေနှစ်ဆရရှိကြောင်း သိရှိရသည်။

             ပြည်တွင်းစားသုံးမှု အခိုင်အမာရှိသည့် ပဲကြီးသီးနှံကို တောင်ငူခရိုင်အတွင်းတွင် စီးပွားဖြစ် စိုက်ပျိုးခြင်း မရှိခြင်းကြောင့် တောင်ငူခရိုင်အတွင်းရှိ ပဲကြော် / ပဲလှော် လုပ်ငန်းရှင်များအနေဖြင့် ပဲကြီး သီးနှံ(အကြီး)ကို မန္တလေးတိုင်းဒေသကြီး ကုန်စည်ဒိုင်များ နှင့် ပျဉ်းမနားမြို့တို့မှ အဓိက ဝယ်ယူ ရရှိကြောင်း၊ ယခင်လ များက  ပဲကြီးသီးနှံ အဟောင်း (၁)ပိဿာလျှင် ၁၂၀၀၀ ကျပ်၊ ပိဿာ(၃၀)လျှင် ၃၅၀၀၀၀ ကျပ်ဈေးနှုန်း ရှိခဲ့ပြီး ယခု တပေါင်းလနှင့်တန်ခူးလများတွင် ပဲကြီး သီးနှံအသစ်များ ဝယ်ယူရှိနေပြီဖြစ်ကာ ဒေသထွက် ပဲကြီးသီးနှံအသေး(၃၀)ပိဿာလျှင် ၁၅၀၀၀၀ ကျပ် ဈေးနှုန်းရှိပြီး၊ အခြားမြို့နယ်များမှ ပဲကြီးသီးနှံအကြီး (၁)ပိဿာ လျှင် ၈၀၀၀ ကျပ်၊ ပိဿာ(၃၀)လျှင် ၂၄၀၀၀၀ ကျပ်ဖြင့် ဝယ်ယူရရှိကြောင်း သိရှိရသည်။

DOCA(ပဲခူး)

        မြန်မာနိုင်ငံအပါအဝင် အရှေ့တောင်အာရှနိုင်ငံ(၇)နိုင်ငံတွင်သာ တွေ့ရှိရသောငှက်သိုက် ထွက်ကုန်များတင်ပို့နိုင်ရန် မြန်မာနိုင်ငံငှက်သိုက်မွေးမြူရေးအသင်းအဖွဲ့ကို စတင်ဖွဲ့စည်းသွားမည် ဖြစ်သည်။ ၂၀၂၃ခုနှစ်တွင် မြန်မာနိုင်ငံငှက်သိုက်မွေးမြူရေးအသင်းအဖွဲ့ကို ယာယီဖွဲ့စည်းခဲ့သည်။ လက်ရှိတွင် အဆိုပါအသင်းသည် မြန်မာနိုင်ငံမွေးမြူရေးအဖွဲ့ချုပ် (MLF)နှင့်တွဲဖက်အဖွဲ့အစည်း ပေါ်ပေါက်လာ‌စေရန် လုပ်ငန်းအဖွဲ့တစ်ခုဖွဲ့စည်းထားသည်။ ငှက်မွေးမြူသူများနှင့် စားသုံးနိုင်သော အော်ဂဲနစ်ငှက်သိုက်ထုတ်လုပ်သူများ တိုးပွားလာသည်နှင့်အမျှ စားသုံးနိုင်သောငှက်သိုက် ထွက်ကုန်များ တင်ပို့နိုင်ရေးဆွေးနွေးညှိနှိုင်းမှုများ ဆောင်ရွက်လျက်ရှိသည်။ အသင်းကြီးသည် မြန်မာ့ငှက်သိုက်မွေးမြူရေးလုပ်ငန်းကို တိုးတက်အောင်ဆောင်ရွက်ပြီး ၎င်းကဏ္ဍအတွင်းဗဟုသုတမျှဝေရေး လမ်းဖွင့်ပေးသွားမည်ဖြစ်သည်။ ငှက်သိုက်မွေးမြူခြင်းလုပ်ငန်းသည် ယခင်ကတနင်္သာရီတိုင်းဒေသကြီးရှိမြိတ်နှင့်ကော့သောင်းမြို့များတွင်အဓိကစုစည်းလုပ်ကိုင်ခဲ့သော်လည်း ယခုအခါ ရန်ကုန်တိုင်းဒေသကြီး၊ ပဲခူးတိုင်းဒေသကြီး၊ ဧရာဝတီတိုင်းဒေသကြီးနှင့် ရခိုင်ပြည်နယ်တွင်လည်း ကျယ်ပြန့်စွာ လုပ်ကိုင်လျက်ရှိသည်။

          အရှေ့တောင်အာရှဒေသများဖြစ်‌သော ထိုင်း၊ မလေးရှား၊ အင်ဒိုနီးရှား၊ဖီလစ်ပိုင်၊ဗီယက်နမ်၊ ကမ္ဘောဒီးယားနှင့် မြန်မာနိုင်ငံတို့တွင် ငှက်သိုက်များသည် သဘာဝအလျောက်ဖြစ်ထွန်းပါသည်။ ပုံမှန်အားဖြင့် ငှက်သိုက်ငှက်များသည် ကျောက်ဂူကြီးများအတွင်း၌ ၎င်းတို့၏အသိုက်များကို ဆောက်လုပ်လေ့ရှိပါသည်။  ငှက်သိုက်များသည် တန်ဖိုးမြင့်ထုတ်ကုန်တစ်ခုဖြစ်ပြီး မြိတ်ကျွန်းစု ကဲ့သို့သော နေရာများမှငှက်သိုက်များကို နိုင်ငံခြားသို့တင်ပို့ပါသည်။ မကြာသေးမီနှစ်များအတွင်း စားသုံးနိုင်သောငှက်သိုက်ထုတ်လုပ်မှုများတိုးတက်များပြားလာခဲ့ပြီး သဘာဝဂူများအပြင် အိမ်တွင်း စနစ်များဖြင့်ပါ ငှက်သိုက်များမွေးမြူထုတ်လုပ်လာနိုင်ကြောင်း သိရှိရပါသည်။

DOCA(ပဲခူး)