ပြည်တွင်းကုန်သွယ်မှုသတင်း

        ရန်ကုန်တိုင်းဒေသကြီး၊ သန်လျင်ခရိုင်၊ ကျောက်တန်းမြို့နယ်သည် အဓိကစီးပွားရေးလုပ်ငန်းအနေဖြင့် စိုက်ပျိုးရေး၊ ရေလုပ်ငန်းနှင့် ငါးခြောက်ထုတ်လုပ်ခြင်းလုပ်ငန်းများ လုပ်ကိုင်ဆောင်ရွက်လျက်ရှိပြီး ကျောက်တန်းဒေသတွင်းထွက်ရှိသည့် ဆန်စပါးနှင့် ငါးခြောက်များမှာ လူသိများလာပေသည်။ ထို့အပြင် ယခုလက်ရှိစီးပွားရေးလုပ်ငန်းများအနေဖြင့် သဘာဝဌက်သိုက်များ ထုတ်လုပ်ရန်အတွက် ဇီဝဇိုးဌက်များ မွေးမြူခြင်းလုပ်ငန်းအား စီးပွားဖြစ်ချဲ့ထွင်လုပ်ကိုင်လာကြသည်။ 

        စီးပွားဖြစ်ဇီဝဇိုးဌက်အိမ်ဆောက်ရန်အတွက် ကုန်ကျစရိတ်အားဖြင့် သိန်းရာချီရှိပေသည်။ ဌက်အိမ်ဆောက်ရန်အတွက် အရေးကြီးဆုံးအချက်အနေဖြင့် ဇီဝဇိုးဌက်ရှိခြင်း/ မရှိခြင်း၊ ဌက်များခြင်း/ မများခြင်း စသည့် တည်နေရာ (Location)ကို ရွေးချယ်ရမှာဖြစ်ပြီး စမ်းခေါ်ကြည့်ရန် လိုအပ်ပေသည်။ ဌက်များလာရောက်ရန် အစမ်းခေါ်ရာတွင်လည်း အဆောက်အအုံ (အမြင်သံ/ အတွင်းသံ) နှစ်မျိုးခွဲ၍ အသံတုဖြင့် စမ်းသပ်ခေါ်ရခြင်းဖြစ်ပါသည်။

       ဇီဝဇိုးဌက်များ မွေးမြူခြင်း၏ ရင်းနှီးမြှပ်နှံမှုနှင့် အကျိုးအမြတ်တို့မှာ ဇီဝဇိုးဌက်မွေးမြူခြင်းသည် အစာဖိုးကုန်ကျစရိတ် လုံးဝမရှိသော်လည်း ကုန်သည့်ရင်းနှီးမြှပ်နှံမှုမှာ အဆောက်အဦး ဆောက်လုပ်ရန် မြေနေရာနှင့် ဌက်များမွေးမြူရန်အဆောက်အဦးမှာ များပြားလှပေသည်။ ဇီဝဇိုးဌက်များသည် လေထုထဲတွင်ရှိပြီး ကောင်းကင်မှာပျံသန်းနေတဲ့ ပိုးမွှားများကို စားခြင်းဖြစ်သည့်အတွက် ပညာရှင်များမှ တိမ်ညွန့်စားသည့် ဌက်များဟု တင်စားခေါ်ဝေါ်ကြသည်။

          ဇီဝဇိုးဌက်များသည် အသိုက်ထုတ်လုပ်ရာတွင် အချိန်မတူညီကြပေ။ အချို့ဌက်များမှာ ဌက်အိမ်စတင်ဝင်ရောက်ပြီး (၁)လ၊ (၂)လ၊ (၃)လကြာပြီး အသိုက်ထုတ်လုပ်တည်ဆောက်ကြသလို တစ်ချို့ဌက်များမှာ နှစ်ချီ၍ အချိန်ကြာမြင့်တက်ကြသည်။ အဆိုပါ ဇီဝဇိုးဌက်များ မွေးမြူခြင်းလုပ်ငန်းအား (၂၀၁၉)ခုနှစ်မှ စတင်၍ စမ်းသပ်မွေးမြူခဲ့ရာ ယခုအချိန်ထိ (၇)နှစ်တိုင်တိုင် ကြာမြင့်ပြီးဖြစ်ကြောင်း သိရှိရသည်။ ဌက်သိုက် အခွက်ကြမ်းရရှိမှုမှာ ပုံမှန်မရှိသည့်အတွက် (၁)လ လျှင် မည်မျှရရှိသည့်ကိုမှု ခန့်မှန်း၍မရပေ။

           သဘာဝဌက်သိုက်ပေါင်းရည် ထုတ်လုပ်ဖြန့်ဖြူးရောင်းချခြင်းလုပ်ငန်းကိုမှု ၂၀၂၄-၂၀၂၅ ခုနှစ်မှ စတင်ထုတ်လုပ်ဖြန့်ဖြူးရောင်းချကြောင်း သိရှိရသည်။

           သန့်စင်ထားခြင်းမရှိသေးသည့် အခွက်ကြမ်း (၁)ပိဿာကို ကုန်ချောပြုလုပ်ပါက သန့်စင်ပြီးခွက်သန့်ချော အနေဖြင့် Grade (A,B,C)သုံးမျိုးကွဲ၍ (၇၀)ကျပ်သားနှုန်းထွက်ရှိကြောင်း သိရှိရသည်။ ၎င်းသန့်စင်ပြီး ခွက်သန့်ချောများအားရောင်းချပါက Grade A  (၁)ကျပ်သားလျှင် (၆၅၀၀၀/-)ကျပ်၊ Grade B (၁)ကျပ်သားလျှင် (၅၀၀၀၀-၆၀၀၀၀/-)ကျပ်ထိ၊ Grade C (၁)ကျပ် သားလျှင် (၄၀၀၀၀/-)ကျပ် စသည့်ဖြင့် ရောင်းချကြောင်း သိရှိရသည်။

          သဘာဝဌက်သိုက်ပေါင်းရည် ထုတ်လုပ်ရောင်းချမှုအနေဖြင့် တစ်လျှင် (၄၅)မီလီမီတာ အသားတင်ပမာဏရှိသည့် ပုလင်းပေါင်း (၄၀၀)မှ (၅၀၀)ထိ ဖြန့်ဖြူးရောင်းချရပြီး အဆိုပါ ပုလင်း (၁)ပုလင်းလျှင် (၇၀၀၀/-)ကျပ်နှုန်းဖြင့် ရောင်းချပါသည်။ ဖြန့်ဖြူးရောင်းချမှုအပိုင်းအနေဖြင့် တစ်ပိုင်တစ်နိုင် အသေးစား စက်မှုလက်မှုလုပ်ငန်းဖြစ်သည့်အတွက် ဝင်ငွေအားဖြင့် တစ်လျှင် (၅)သိန်းမှ (၆)သိန်းအထိ အမြတ်ရရှိကြောင်း သိရှိရသည်။

          ဇီဝဇိုးဌက်မွေးမြူခြင်းနှင့် သဘာဝဌက်သိုက်ပေါင်းရည် ထုတ်လုပ်ဖြန့်ဖြူးခြင်းလုပ်ငန်းသည် လုပ်ငန်းရှင်များအတွက် အကျိုးအမြတ်ရရှိရုံသာမက ဒေသတစ်ခု၏ ထွက်ကုန်ပစ္စည်းဖြစ်သည့်အတွက် ဒေသခံပြည်သူများ အလုပ်အကိုင်ရရှိသည့်အပြင် ပြည်တွင်းစားသုံးမှုအနေဖြင့် လည်း သင့်တင့်မျှတသည့် ဈေးနှုန်းဖြင့် ဝယ်ယူသုံးစွဲရနိုင်ကြောင်း သိရှိရပါသည်။

DOCA(ရန်ကုန်)

          စားသုံးသူပြည်သူများ စားသုံးဆီဝယ်ယူစားသုံးရာတွင် ဘေးအန္တရာယ် ကင်းရှင်းပြီး သင့်တင့်သောဈေးနှုန်းဖြင့်ဝယ်ယူစားသုံးနိုင်စေရန်နှင့်ပြည်တွင်းလိုအပ်ချက်များကို ဖြည့်ဆည်း ပေးနိုင်ရန် စီးပွားရေးနှင့် ကူးသန်းရောင်းဝယ်ရေးဝန်ကြီးဌာန၊ စားသုံးဆီ တင်သွင်း သိုလှောင် ဖြန့်ဖြူးခြင်းလုပ်ငန်း ကြီးကြပ်ရေးကော်မတီက ဆောင်ရွက်ပေးလျက်ရှိကြောင်း သိရပါသည်။

          စားအုန်းဆီကို ပြည်ပမှဝယ်ယူတင်သွင်းရာတွင် စားအုန်းဆီ တင်ပို့သည့်နိုင်ငံများ၏ စျေးနှုန်းအတက်အကျပေါ်မူတည်၍ ပြည်တွင်း၌ ဖြစ်သင့်ဖြစ်ထိုက်သည့်ဈေးနှုန်းများ ဖြစ်ပေါ် စေရေးကို ထိန်းကျောင်းဆောင်ရွက်လျက်ရှိပါသည်။

          ပြည်ပမှစားအုန်းဆီထုတ်လုပ်တင်ပို့သည့်နိုင်ငံများတွင် ဈေးကွက်နှင့်ဈေးနှုန်းဖြစ်ပေါ်မှု များအရ ၂၀၂၆ ခုနှစ်၊ ဧပြီလ ၁၀ ရက်နေ့မှ ၁၆ ရက်နေ့အထိ ရန်ကုန်အထိုင်ဈေးအခြေခံ လက်ကားရည်ညွှန်းဈေးနှုန်းမှာ စားအုန်းဆီတစ်ပိဿာလျှင်  ငွေကျပ် ၆,၇၃၅ ဖြစ်ကြောင်း စားသုံးဆီ တင်သွင်းသိုလှောင်ဖြန့်ဖြူးခြင်းလုပ်ငန်းကြီးကြပ်ရေးကော်မတီက အသိပေးထုတ်ပြန် ကြေညာထားကြောင်း သိရှိရပါ​သည်။       

          စားအုန်းဆီ အခြေခံလက်ကားရည်ညွှန်းဈေးနှုန်းကို အပတ်စဉ် သောကြာနေ့တိုင်း ထုတ် ပြန်ကြေညာလျက်ရှိပြီး စားသုံးသူပြည်သူများအနေဖြင့် စားသုံးသူရေးရာဦးစီးဌာန၏ Website: www.doca.gov.mm၊  Facebook Page  နှင့် မြန်မာနိုင်ငံဆီကုန်သည်နှင့် ဆီလုပ်ငန်းရှင်များ အသင်း၏ Facebook Page တို့တွင် ဝင်ရောက် ကြည့်ရှုလေ့လာနိုင်ကြောင်း သိရှိရပါသည်။

                     ရွှေဘိုမြို့ ဈေးကွက်အတွင်း မတ်လ၊ စတုတ္ထအပတ်တွင် ရောင်းချသည့် ပုဂံပဲဈေးနှုန်းမှာ တစ်ပြည်လျှင် ကျပ်၉၀ဝ၀နှင့် တစ်တင်းလျှင် ကျပ်၁၄၄၀၀၀ ဖြစ်ပြီး ကုလားပဲလုံးတစ်ပြည်လျှင် ကျပ်၆၀၀၀နှင့် တစ်တင်းလျှင် ကျပ်၉၆၀၀၀ ဖြစ်သည်။ စားတော်ပဲတစ်ပြည်လျှင် ကျပ်၈၅၀၀ နှင့် တစ်တင်းလျှင် ကျပ်၁၃၆၀၀၀ဖြစ်ပြီး စားတော်ပဲရေစိမ် တစ်ပြည်လျှင် ကျပ်၄၅၀၀ ဖြစ်သည်။ မတ်ပဲခြမ်းတစ်ပြည်လျှင် ကျပ်၇၀၀၀နှင့် တစ်တင်းလျှင် ကျပ်၁၁၂၀၀၀ ဖြစ်ပြီး ပဲတီဆံတစ်ပြည်လျှင် ကျပ်၈၂၀၀နှင့် တစ်တင်းလျှင်ကျပ်၁၃၁၂၀၀ဖြစ်သည်။

                      ပဲပုတ်တစ်ပြည်လျှင် ကျပ်၉၀၀၀နှင့် တစ်တင်းလျှင် ကျပ် ၁၄၄၀၀၀ဖြစ်ပြီး ပဲရာဇာတစ်ပြည်လျှင် ကျပ်၁၆၀၀၀ ဖြစ်ပြီး တစ်တင်းလျှင် ကျပ်၂၅၆၀၀၀ဖြစ်သည်။ ပဲလွန်းဖြူတစ်ပြည်လျှင် ကျပ်၆၀၀၀ ဖြစ်ပြီး တစ်တင်းလျှင် ကျပ်၉၆၀၀၀ဖြစ်ပြီး ပဲလွန်းပြာတစ်ပြည်လျှင် ကျပ်၅၅၀၀ဖြစ်ပြီး တစ်တင်းလျှင် ကျပ်၈၈၀၀၀ဖြစ်သည်။ ပဲနီပြားတစ်ပြည်လျှင် ကျပ်၁၁၀၀၀နှင့် တစ်တင်းလျှင် ၁၇၆၀၀၀ဖြစ်ပြီး ပဲဖြူပြား တစ်ပြည်လျှင် ကျပ်၉၀၀၀နှင့် တစ်တင်းလျှင် ကျပ်၁၄၄၀၀၀ဖြစ်သည်။ တရုတ်ပဲကြီးတစ်ပြည်လျှင် ကျပ် ၁၇၅၀၀နှင့် တစ်တင်းလျှင် ကျပ်၂၈၀၀၀၀ဖြစ်ပြီး မြေထောက်ပဲ(ညို)တစ်ပြည်လျှင် ကျပ်၇၅၀၀နှင့် တစ်တင်းလျှင် ကျပ်၁၂၀၀၀၀ဖြစ်သည်။ ဘိုပဲတစ်ပြည်လျှင် ကျပ်၁၂၀၀၀နှင့် တစ်တင်းလျှင် ကျပ်၁၉၂၀၀၀ဖြစ်ပြီး ပဲကြားတစ်ပြည်လျှင် ကျပ်၈၅၀၀နှင့် တစ်တင်းလျှင် ကျပ်၁၃၆၀၀၀ဖြစ်သည်။ ကုလားပဲဆံ တစ်ပြည်လျှင် ကျပ်၇၉၀၀နှင့် တစ်တင်းလျှင် ကျပ်၁၂၆၄၀၀ဖြစ်ပြီး မြေပဲဆံတစ်ပြည်လျှင် ကျပ်၁၃၅၀၀နှင့် တစ်တင်းလျှင်၂၁၆၀၀၀ဖြစ်သည်။

             ယခုအပတ်တွင် ရွှေဘိုဈေးကွက်အတွင်းသို့ ရွှေဘိုဒေသထွက်ပဲများ ဝင်ရောက်မှုနည်းပါးသွားပြီး မုံရွာနယ်ဘက်မှထွက်ရှိသော ပဲများဝင်ရောက်လျက်ရှိကြောင်း၊ ပဲကြားမှာ အရောင်းအဝယ်အဖြစ်ဆုံး ပဲဖြစ်ပြီး ကျန်ပဲမျိုးစုံအရောင်းအဝယ်ဖြစ်မှုမှာ ပုံမှန်သာရှိနေကြောင်း၊ ယခုအပတ်တွင် ယခင်အပတ်ထက် ပဲကြား၊ ကုလားပဲဆံ၊ မြေပဲဆံ၊ ပဲလွန်းပြာများမှာ ဈေးပိုခဲ့ပြီး ကျန်ပဲဈေးနှုန်းများမှာ ပြောင်းလဲမှုမရှိဘဲ ယခင်အပတ်ဈေးနှုန်းများအတိုင်း တည်ငြိမ်နေကြောင်း သိရသည်။ 

DOCA( စစ်ကိုင်း)

    ယခုနှစ်တွင် ကျိုက်ထိုမြို့နယ်အတွင်းရှိ မြေပဲစိုက်ခင်းများမှ မြေပဲထွက်ရှိမှုနှုန်းသည် ယခင်နှစ်များနှင့် နှိုင်းယှဉ်ပါက အထွက်နှုန်းလျော့နည်းလာကြောင်း သိရှိရပါသည်။ ထို့ကြောင့် ယခုနှစ်တွင် မြေပဲဈေး အနည်းငယ်မြင့်တက်လာကြောင်း သိရပါသည်။ မြေပဲဆံ တစ်ပြည်ကို ၁၀၀၀၀ ကျပ်နှင့် အခွံမခွာရသေးသော မြေပဲတောင့်တစ်ပြည်သည် ၇၇၀၀ ကျပ်နှုန်းဖြင့် ကျိုက်ထိုဈေးကွက်အတွင်း ရောင်းချနေလျက်ရှိကြောင်းလည်း သိရပါသည်။

ကျိုက်ထိုမြို့နယ်အတွင်းရှိ မြေပဲစိုက်ခင်းများမှ ထွက်ရှိသော မြေပဲများအား အောင်လံ၊ မကွေးရှိ မြေပဲဒိုင်များသို့ အဓိက တင်ပို့ရောင်းချလျက်ရှိကြောင်း သိရပါသည်။ သို့ရာတွင်‌ မြေပဲစိုက်ပျိုးမှု အထွက်နှုန်းလျော့နည်းခြင်းနှင့်အတူ သယ်ယူပို့ဆောင် စရိတ်များကြောင့် မြေပဲစိုက်တောင်သူများအနေဖြင့် တွက်ခြေကိုက်မှုနည်းပါးနေကြောင်း သိရသည်။

    မြေပဲကြိတ်ခွဲမှုအနေဖြင့် မြေပဲဆီကြိတ်ခွဲရာတွင် မြေပဲဆံ ၂၇ ပိဿာ ကြိတ်ခွဲလျှင် ဆီ (၁၀) ပိဿာခန့် ထွက်ရှိပြီး မြေပဲဆံ ပိဿာ (၁၀၀) ကြိတ်ခွဲပါက မြေပဲဆီ ပိဿာ (၄၀) ကျော်ကျော် ထွက်ရှိသည်ဟု သိရပါသည်။ ယခုလတ်တလော ကာလများတွင် မြေပဲဆီ ၁၀ ပိဿာ ၁ပုံးလျှင် ၂၇၀၀၀၀ ကျပ်ရှိနေပြီး မြေပဲဆီ (၁) ပိဿာလျှင် ၂၇၀၀၀ ကျပ်အထိ ဈေးပေါက်နေကြောင်း သိရပါသည်။

   ဆီကြိတ်စက်များအနေဖြင့် ဈေးကွက်တွင် ရောင်းအားကောင်းနေပြီး ၆၅၀၀ ကျပ်မှ ၇၅၀၀ ကျပ်အထိ ဈေးကောင်းနေကြောင်း သိရသည်။ ပြည်တွင်းပြည်ပ ဝယ်လိုအား မြင့်တက်လာမှုကြောင့် မြေပဲထွက်ပစ္စည်းများအနေဖြင့် မတ်လနောက်ဆုံးနှင့် ဧပြီလ လကုန်ပိုင်းအထိ ဈေးနှုန်းမြင့်တက်နေနိုင်ကြောင်း ခန့်မှန်းသိရှိရပါသည်။

                       DOCA (မွန်)

                 အပူပိုင်း‌ဒေသဖြစ်သော မြင်းခြံခရိုင်အတွင်းရှိ တောင်သာမြို့နယ်သည် စပါးမျိုးကောင်း မျိုးသန့် စိုက်ပျိုးဖြစ်ထွန်းမှု နည်းသောကြောင့် မနောသုခစပါးမျိုးကို ဒေသတွင်း စားသုံးရန် အတွက်သာ စိုက်ပျိုးကြောင်း၊ စိုက်ပျိုးသော ကျေးရွာများမှာ ဆင်တဲဝကျေးရွာ၊ အိုင်သာကျေးရွာ၊ ကျောက်တစ်လုံးကျေးရွာနှင့် ခါတက်ကုန်းကျေးရွာတို့တွင် ဆည်ရေသောက်စနစ်ဖြင့် စိုက်ပျိုးထား ကြောင်း၊ ၂၀၂၅-၂၀၂၆ခုနှစ်၊ အဆိုပါကျေးရွာတို့၌ နွေစပါးစိုက်ဧက(၆၀) ဧကခန့် စိုက်ပျိုးထား ကြောင်း စိုက်ပျိုးရေးဦးစီးဌာနမှ သိရှိရသည်။  ယခင်နှစ်တစ်ဧက အထွက်နှုန်းအနေဖြင့် (၈၀)တင်း ခန့်ထွက်ရှိခဲ့ကြောင်း၊ ယခင်နှစ် နွေစပါးစိုက်ပျိုး ထွက်ပေါ်ချိန်တွင် စပါးတစ်တင်းခွဲ တစ်အိတ်လျှင် (၃၀၀၀၀) ကျပ်ခန့် ပေါက်ဈေးများ ရှိခဲ့ကြောင်း၊ စပါးစိုက်ပျိုးမှုနည်းသောကြောင့် စပါးအရောင်းအဝယ်အနေဖြင့် ဈေးကွက်မရှိကြောင်း၊ စပါးအစိုဓါတ်ကို ၁၃%၊ ၁၄% တွင်မျက်မြင် ခန့်မှန်းဖြင့်ဆုံးဖြတ်ကြကြောင်း၊ ရိတ်သိမ်းထွက်ရှိသော စပါးများကို ကျေးရွာရှိ ဆန်စက်များတွင် ကြိတ်ခွဲပြီးထွက်ရှိသော ဆန်သားများကိုသာ ‌ကျေးရွာအတွင်းစားသုံးရန် အရောင်းအဝယ် ပြုလုပ်ကြ ကြောင်း၊ ၂၀၂၆ခုနှစ်၊ မတ်လ၌ မနောသုခမိုး တစ်တင်းခွဲတစ်အိတ်လျှင် ဒေသတွင်းပေါက်ဈေး (၈၀၀၀၀) ကျပ်ခန့်ရှိကြောင်း၊ နွေစပါးများကို မတ်လ၊ ဧပြီလနှင့် မေလတွင်တို့တွင် စတင်စိုက်ပျိုးပြီး ဇွန်လ၊ ဇူလိုင်လနှင့် ဩဂုတ်လတို့တွင် ရိတ်သိမ်းထွက် ပေါ်မည်ဖြစ်ပေါ်ကြောင်း၊ ယခုနှစ်တွင် စိုက်ပျိုးထားသောနွေစပါးများမှာ စိုက်ပျိုးရေးဦးစီးဌာနမှ ပန်းတိုင်အထွက်နှုန်းကောင်းမျိုး မနောသုခ မျိုးများကို စိုက်ပျိုးထားကြောင်း၊ ရာသီဥတု၊ အပင်ပြုစုမှု၊ သွင်းအားစုနှင့် အချိန်မှန် ရေသွင်းနိုင်ပါက နွေစပါးများအထွက်နှုန်း ကောင်းနိုင်ကြောင်း၊ ကျောက်တစ်လုံးကျေးရွာမှ စပါးစိုက် တောင်သူ၏ ပြောပြချက်အရသိရှိရသည်။  

DOCA(မန္တလေး)