ပြည်တွင်းကုန်သွယ်မှုသတင်း

    ကန့်ဘလူခရိုင်၊ ကျွန်းလှမြို့နယ်အတွင်း ငါးဈေးနှုန်းများ အနည်းငယ်မြင့်တက်လျက်ရှိရာမှ ငါးရံ့ နှင့် ငါးရံ့ခြောက်ဈေးနှုန်းသည်လည်း မြင့်တက်လျက်ရှိကြောင်း သိရှိရပါသည်။

      နိုဝင်ဘာလ တတိယပတ်တွင် ကျွန်းလှမြို့နယ်အတွင်း ရောင်းချနေသော ငါးရံ့ ဈေးနှုန်း များမှာ ငါးရံ့ အကြီး တစ်ပိဿာလျှင်(၃၂၀၀၀)ကျပ်၊ (၅၀)ကျပ်သားလျှင်(၁၆၀၀၀)ကျပ် ငါးရံ့(အသေး)တစ်ပိဿာလျှင်(၂၅၀၀၀)ကျပ်၊ (၅၀)ကျပ်သားလျှင်(၁၂၅၀၀)ကျပ် ဈေးနှုန်းဖြင့် လည်း ကောင်း၊ ငါးရံ့ခြောက် ဈေးနှုန်းများအနေဖြင့် ငါးရံ့ခြောက် အကြီး လက်လီဈေး တစ်ပိဿာလျှင် (၉၀၀၀၀)ကျပ်၊ ငါးရံ့ခြောက်(၅၀)ကျပ်သားလျှင်(၄၅၀၀၀)ကျပ်၊ ငါးရံ့ခြောက်(အ‌သေး)လက်လီဈေး တစ်ပိဿာလျှင်(၇၀၀၀၀)ကျပ်၊ (၅၀)ကျပ်သားလျှင်(၃၅၀၀၀)ကျပ် ဈေးနှုန်းတို့ဖြင့် ရောင်းချသောကြောင့် ယခင်အပတ်ထက် ငါးရံ့အကြီးဈေး တစ်ပိဿာလျှင်(၂၀၀၀)ကျပ် နှင့် ငါးရံ့ခြောက်ဈေး အနည်းငယ် မြင့်တက်လျက်ရှိကြောင်း  ငါးရံ့သည် အခြားငါးများထက် အသားကျစ် လစ်ပြီး အရိုးနည်းသည့်အတွက် လူကြိုက်များပြီး ရောင်းအား ကောင်းလျက်ရှိကြောင်း ငါးသည် ထံမှ သိရပါသည်။

DOCA(စစ်ကိုင်း)

ကျွန်းလှမြို့နယ်အတွင်းရှိ ဈေးများတွင် ဒေသထွက် ပေါ်ဦးပေါ်ဖျား ခေါဆီ(ခေါ်)ကောက်ညှင်းပြားများကို  ဆောင်ဝင်ခါနီ စက်တင်ဘာ၊ အောက်တိုဘာလများတွင် တင်ရောင်းချလျက်ရှိကြောင်းနှင့် ယခုအချိန်တွင် ကောက်ညှင်းပြားသည်များ လှိုင်လှိုင်ပေါလာသည့်အချိန်ဖြစ်၍ ဈေးအနည်းငယ်လျော့ကာ ကောက်ညှင်းပြားများ အခုရေတိုးပြီး ရရှိလာကြောင်း သိရှိရသည်။

     ကောက်ညှင်းပြား ပြုလုပ်ရန် ကောက်ညှင်းဆန်ကို ကျောက်ခဲ၊ သလဲများအပါအောင် ရွေးချယ်သန့်စင်ပြီး ကောက်ညှင်းဆန်ကိုရေဆေးပြီး အချိန်အတန်ကြာအောင်ရေစိမ်ထားရပါကြောင်း၊ ရေစိမ်ရသော ကောက်ညှင်းဆန်များကို ပေါင်းအိုဖြင့်ပေါင်းပြီး ပေါက်ဆိန်၊ ပေါင်တူ၊ မောင်းတို့ဖြင့်ထည့်၍ ထုထောင်းပြီး အိစက်ညက်ညောသည့် အနေအထားရောက်မှ နှမ်းထောင်း/ဆီတို့ကိုသုံးပြီး ကောက်ညှင်းပြားများ ပြား၍ ငှက်ပျောဖက်/ပလပ်စတစ်အိတ်အကြည်ပေါ်တွင် အအေးခံပြီးလျှင် စားသုံးရသည့် ကောက်ညှင်းပြား များရရှိပါသည်။

      ယခု နိုဝင်ဘာလ တတိယပတ်တွင် ခေါဆီ(ခေါ်)ကောက်ညှင်းပြား  ဈေးနှုန်းများမှာ ခေါဆီ(ခေါ်)ကောက်ညှင်းပြား အသေးတစ်ခုလျှင်(၁၀၀)ကျပ်၊ ခေါဆီ(ခေါ်)ကောက်ညှင်းပြား အကြီး တစ်ခုလျှင်(၅၀၀)ကျပ်ဈေးနှုန်းတို့ဖြင့် အရောင်းအဝယ်ဖြစ်လျက်ရှိကြောင်း သိရသည်။

DOCA(စစ်ကိုင်း)

     စစ်ကိုင်းတိုင်းဒေသကြီး၊ ကန့်ဘလူခရိုင်၊ ကန့်ဘလူမြို့ရှိ မြို့မဈေးနှင့် အသီးမျိုးစုံရောင်း ချနေသော သစ်သီးဆိုင်များတွင် Hassထောပတ်သီးနှင့် ယာကွန်ဥ(ခေါ်)ရေကန်စွန်းဥများကို အများအပြား ရောင်းချနေကြကြောင်း သိရသည်။ Hassထောပတ်သီးနှင့် ယာကွန်ဥ(ခေါ်)ရေကန် စွန်းဥများကို မန္တလေးမြို့ရှိ သစ်သီးပွဲရုံများမှမှာ ယူရောင်းချလျက်ရှိ‌ကြောင်း သိရသည်။

     Hassထောပတ်သီးသည် ကျန်းမာရေးအတွက် အထောက်အကူများစွာပြုသော အသီးဖြစ် သောကြောင့် အဖျော်ရည်ပြုလုပ်၍ကာ  သရေစာအဖြစ်လည်းစားသုံးကြကြောင်း၊ ယာကွန်ဥ (ခေါ်)ရေကန်စွန်းဥသည် အရည်ရွှမ်း၍ ပန်းသစ်တော်သီးအရသာနှင့်တူပြီး ခန္ဓာကိုယ်အတွက် အထောက်အကူပြုကာ ချိုချိုကြွပ်ကြွပ်လေးနဲ့ အရသာရှိသောကြောင့် လူကြိုက်များပြီး သရေစာ အဖြစ် လူကြီးလူငယ်မရွေးဝယ်ယူစားသုံးကြကြောင်း၊  ၂၀၂၅ ခုနှစ်၊ နိုဝင်ဘာလ တတိယပတ် အတွင်း Hassထောပတ်သီးဈေးနှုန်းမှာ Hassထောပတ်သီး(1)kgလျှင်  (၆၅၀၀)ကျပ်၊ ယာကွန်ဥ (ခေါ်)ရေကန်စွန်းဥ(၁)ပိဿာလျှင် (၁၅၀၀၀)ကျပ်၊ ယာကွန်ဥ (ခေါ်)ရေကန်စွန်းဥ(၅၀)ကျပ်သား လျှင်(၇၅၀၀)ကျပ်ဖြင့်ရောင်းအဝယ်ဖြစ်လျက်ရှိကြောင်း ကန့်ဘလူမြို့တွင် ရောင်းချလျက်ရှိသော သစ်သီးဆိုင်များမှ သတင်းရရှိပါသည်။

DOCA(စစ်ကိုင်း)

      စစ်ကိုင်းတိုင်းဒေသကြီး၊ ကန့်ဘလူမြို့ “မြို့မဈေး”သည် နေ့စဉ်ဈေးရောင်းသူများ၊ ဈေးဝယ်သူများနှင့် စည်ကားလျက်ရှိပြီး ရာသီပေါ်သီးနှံများ၊ ဒေသထွက်ကုန်များအပြင် အခြားဒေသမှဝင်ရောက်သည့် လူသုံးကုန်နှင့် စားသောက်ကုန်ပစ္စည်းများသာမက ယခုအခါ မြန်မာ့ရိုးရာအချိုပွဲ မုန့်အမျိုးမျိုးကို ရောင်းချလျက်ရှိကြောင်း သိရသည်။

      မြန်မာ့ရိုးရာအချိုပွဲများကို ကန့်ဘလူမြို့ပေါ်ရှိဒေသခံများမှ လာရောက်ရောင်းချကြကြောင်း၊ အချိုပွဲတွင် ဆနွင်းမကင်း၊ ငှက်ပျောပူတင်း၊ ပဲပူတင်း၊ အာလူးပူတင်းနှင့် ကျောက်ကျောစသည်ဖြင့် အမျိုးမျိုးရှိကြောင်း၊ ၂၀၂၅ခုနှစ်၊ နိုဝင်ဘာလ တတိယပတ်အတွင်း ကန့်ဘလူမြို့မဈေးတွင် ရောင်းချနေသည့် အချိုပွဲ ဈေးနှုန်းများမှာ ဆနွင်းမကင်း(၁)တုံးလျှင် (၃၀၀)ကျပ်၊ ငှက်ပျောပူတင်း(၁)တုံး လျှင်(၂၀၀)ကျပ်၊ အာလူးပူတင်း(၁)တုံးလျှင် (၃၀၀)ကျပ်၊ ပဲပူတင်း(၁)တုံးလျှင် (၃၀၀)ကျပ်နှင့် ကျောက်ကျော(၁)တုံးလျှင်(၂၀၀)ကျပ်ဖြင့် ရောင်းချလျက်ကြောင်း၊ မြန်မာ့ရိုးရာအချိုပွဲများကို သရေစာအဖြစ်စားသုံးရန်၊ အလှူပွဲ၊ မင်္ဂလာပွဲများတွင် တည်ခင်းဧည့်ခံရန်နှင့် လက်ဆောင်ပေးရန်အတွက် ဝယ်ယူစားသုံးကြသဖြင့် အရောင်းအဝယ်သွက်လျက်ရှိကြောင်း မုန့်ရောင်းချသူထံမှ သိရှိရပါသည်။

DOCA(စစ်ကိုင်း)

    ဇီးဖြူသီးသည် မြန်မာနိုင်ငံတွင် လူသိများသော သစ်သီးတစ်မျိုးဖြစ်ပြီး ဆေးဖက်ဝင်အပင် ဖြစ်လည်းထင်ရှားပါသည်။ မြန်မာနိုင်ငံ၏ ပူပြင်းခြောက်သွေ့သော ဒေသများတွင် ပိုမိုဖြစ်ထွန်းပြီး ကန့်ဘလူခရိုင်၌လည်း ဇီးဖြူပင်များ အလေ့ကျပေါက်နေသည်ကို နေရာအနှံ့အပြားတွင်တွေ့ရ သည်။ ဇီးဖြူပင်များကို နေအိမ်ခြံစည်းရိုးများ၌လည်းကောင်း၊ လယ်တော၊ ယာတောများတွင် စိုက်ပျိုးပြီး မိမိတို့အိမ်တွင် စားသုံး၍ပိုလျှံသည့်အသီးများကို ဇီးဖြူသီးအစိုနှင့် ဇီးဖြူသီးအခြောက် ပြုလုပ်၍ ကန့်ဘလူမြို့မဈေးတွင် ရောင်းချကြောင်း သိရသည်။

      ဇီးဖြူသီးသည် အနံ့အရသာထူးခြားပြီး ချဉ်ဖန်သောအရသာရှိသည့်အတွက် လူကြိုက်များ သောအသီးတစ်မျိုးဖြစ်သည်။ ထို့ကြောင့် ဇီးဖြူသီးကို ဇီးဖြူသီးအစိမ်းထောင်း၊ ဇီးဖြူသီးသနပ်နှင့် ဇီးဖြူသီးကို ကြာရှည်အသုံးပြုနိုင်ရန် အခြောက်လှန်း၍လည်း စားသုံးကြသည်။ ၂၀၂၅ခုနှစ်၊ နိုဝင်ဘာလ တတိယပတ်အတွင်း ကန့်ဘလူမြို့၊မြို့မဈေးတွင် ဇီးဖြူသီးအစိမ်း နို့ဆီဘူး(၁)ဘူး လျှင်(၅၀၀)ကျပ်၊(၁)ပြည်လျှင်(၃၈၀၀)ကျပ်၊ ဇီးဖြူသီးအခြောက်(၁)ဘူးလျှင် (၁၀၀၀)ကျပ်၊ (၁)ပြည် လျှင်(၇၈၀၀)ကျပ်ဖြင့် ရောင်းချလျက်ရှိကြောင်း ကုန်စိမ်းရောင်းချသူများ ထံမှသိရှိရပါသည်။

DOCA(စစ်ကိုင်း)