ပြည်တွင်းကုန်သွယ်မှုသတင်း

     မြစ်ငါးများသည် လူကြိုက်များသော သဘာဝရေချိုငါးများဖြစ်ကြောင်း၊ မြင်းခြံမြို့၊ လေးအိမ်တန်းအုပ်စု၊ လှိုင်းတက်ရွာ၊ အင်ကြင်းပင်ကျေးရွာသည် ဧရာဝတီမြစ်၏ အရှေ့ဘက်တွင် တည်ရှိပြီး တံငါလုပ်ငန်းဖြင့် အသက် မွေးဝမ်းကျောင်းများ ပြုကြောင်း၊  ရေလုပ်သားများသည် မြစ်မှရရှိသော ငါးများကို   မြင်းခြံမြို့၊ အေးမြသီတာဈေးတွင် လာရောက် ရောင်းချ ကြောင်း၊ မြစ်ငါးများသည် သဘာဝငါး များဖြစ်သောကြောင့် အရသာမှာ ထူးကဲချိုမြပြီး  မွေးမြူရေး ငါးများထက် ဈေးကောင်း ရရှိကြောင်း၊ ၂၀၂၅ခုနှစ်ဇူလိုင်လ စတုတ္ထပတ်တွင်ငါးဖမ်းမ ၂၅ကျပ်သား လျှင် (၃၀၀၀) ကျပ်၊ တစ်ပိဿာလျှင်(၁၁၀၀၀)ကျပ်၊ ငါးလူး၂၅ကျပ်သား လျှင်(၃၀၀၀)ကျပ်၊ တစ်ပိဿာလျှင်(၁၁၀၀၀) ကျပ်၊ တိလားဘီးရားငါး ၂၅ ကျပ်သားလျှင် (၂၅၀၀) ကျပ်၊ တစ်ပိဿာ လျှင် (၉၅၀၀) ကျပ်၊ ငါးဇင်ရိုင်း အဖြူကြီး၂၅ ကျပ်သားလျှင် (၅၀၀၀) ကျပ်၊ တစ်ပိဿာလျှင် (၁၉၀၀၀)၊ မြစ်ငါးခူ (၂၅) ကျပ်သားလျှင် (၆၀၀၀) ကျပ်၊ တစ်ပိဿာလျှင် (၂၃၀၀၀) ကျပ်၊  မြစ်ပုစွန် (၂၅) ကျပ်သားလျှင် (၁၂၀၀၀) ကျပ်၊ တစ်ပိဿာလျှင် (၄၇၀၀၀) ကျပ် ပေါက်ဈေးများဖြင့် ရောင်းချကြောင်း၊ မြစ်ငါးများသည် သဘာဝရေချိုငါးများ ဖြစ်သောကြောင့် ဈေးကွက်တွင် လူကြိုက်များ၍ အရောင်း အဝယ် သွက်လျက်ရှိကြောင်း၊ ယခုအချိန်တွင် ရေကျ ချိန်ဖြစ်သောကြောင်း ငါးများဈေးကွက်တွင် ပေါများစွာရောင်းချကြောင်း ငါးရောင်းချသူ တစ်ဦး၏ ပြောပြချက်အရသိရသည်။

DOCA(မန္တလေး)

  စီးပွားရေးနှင့်ကူးသန်းရောင်းဝယ်ရေးဝန်ကြီးဌာနနှင့်   မြန်မာနိုင်ငံစက်သုံးဆီတင်သွင်းသိုလှောင်ဖြန့်ဖြူးခြင်း လုပ်ငန်းကြီးကြပ်ရေးကော်မတီအသင်းတို့ ပူးပေါင်းစီစဉ်မှုဖြင့်  ပြည်သူများ သက်သာသောဈေးနှုန်းဖြင့် ဝယ်ယူရရှိနိုင်ရန် ရည်ရွယ်၍ သတ်မှတ်ရည်ညွှန်း ဈေးများအား အပတ်စဉ် သောကြာနေ့တိုင်းထုတ်ပြန် လျက်ရှိကြောင်း  သိရှိရသည်။

   မြင်းခြံမြို့၏ စက်သုံးဆီအရောင်းဆိုင်များမှာ ပုံမှန်အတိုင်းဖွင့်လှစ် ရောင်းချ လျက်ရှိကြောင်း၊၂၀၂၅ခုနှစ်၊ ဇူလိုင်လ စတုတ္ထပတ်စက်သုံးဆီ တစ်လီတာဈေးနှုန်းများမှာ 92 Octance ဓါတ်ဆီ (၃၀၄၅) ကျပ်၊ 95 Octance ဓါတ်ဆီ  (၃၁၀၅ ) ကျပ်၊ ရိုးရိုးဒီဇယ် ( ၂၈၂၀) ကျပ်၊ ပရီမီယမ်ဒီဇယ် (၃၄၇၀) ကျပ်ဖြင့်ရောင်းချကြောင်းသိရှိရသည်။ ယခင်လဖြစ်သောဇွန်လ စတုတ္ထပတ် စက်သုံးဆီ တစ်လီတာဈေးနှုန်းများမှာ 92 Octance ဓါတ်ဆီ (၃၂၅၅)ကျပ်၊ 95 Octance ဓါတ်ဆီ (၃၃၂၅) ကျပ်၊ ရိုးရိုးဒီဇယ် (၂၈၄၅) ကျပ်၊ ပရီမီယမ်ဒီဇယ် (၃၅၀၀)ကျပ်ဖြစ်ခဲ့ကြောင်းသိရှိရသည်။ ကာလတူနှိုင်းယှဉ်ပါကဇူလိုင်လ စတုတ္ထပတ်တွင် စက်သုံးဆီ တစ်လီတာလျှင် 92 Octance ဓါတ်ဆီ (၂၁၀) ကျပ်၊ 95 Octance ဓါတ်ဆီ (၂၂၀) ကျပ်၊ ရိုးရိုးဒီဇယ် (၂၅) ကျပ်၊ ပရီမီယမ်ဒီဇယ်(၃၀) ကျပ်ဈေးနှုန်းများ ကျဆင်းခဲ့ကြောင်း စက်သုံးဆီများကို  အများပြည်သူများအား နေ့စဉ် ရောင်းချပေးလျက် ရှိကြောင်း သိရှိရသည်။

DOCA(မန္တလေး)

  တောင်သာမြို့နယ်သည် ဆည်ရေသောက်အသင့်အတင့်ရှိပြီး ပဲမျိုးစုံ၊ ဆီထွက်သီးနှံနှင့်  ကြက်သွန်နီများကို အဓိကစိုက်ပျိုးလျက်ရှိရာ မိုးဦးပဲစဉ်းငုံကိုလည်း စိုက်ပျိုးလျက် ရှိကြောင်း သိရှိရသည်။  မိုးဦးပဲစဉ်းငုံကို (မေလ-ဇွန်လ-ဇူလိုင်လ) များတွင် စတင်စိုက်ပျိုးပြီး ရိတ်သိမ်းထွက်ပေါ်ချိန်မှာ (ဖေဖော်ဝါရီလ-မတ်လ) တို့တွင် ရိတ်သိမ်းထွက်ပေါ်ကြောင်း၊ စိုက်ပျိုးချိန်မှ ရိတ်သိမ်း ချိန်အထိ (၇)လခန့်ကြာမြင့်ကြောင်းသိရှိရသည်။

   ၂၀၂၅-၂၀၂၆ ခုနှစ်၊ ဇူလိုင်လစတုတ္ထပတ်တွင် တောင်သာမြို့နယ်၌ ပဲစဉ်းငုံစိုက်ပျိုး ဧက(၁၄၅၅၂) ဧကစိုက်ပျိုးထားရှိကြောင်း ခရိုင်‌ကြေးတိုင်နှင့်မြေစာရင်းဦးစီးဌာန၏ စာရင်းများအရ သိရှိရသည်။ စိုက်ပျိုးမှုအနေဖြင့် သက်ကြီး ရွှေဒင်္ဂါးမျိုးကို တန်းကြား ၄ပေခွဲထား၍ စိုက်ကြောင်း များစွဲပြီး အစေ့ချ စနစ်ဖြင့် စိုက်ပျိုးကြောင်း၊ တောင်သာမြို့နယ် ပဲစဉ်းငုံစိုက်ရာ၌ တန်းကြားတွင် မြေပဲ၊ နှမ်း၊ ပဲတို့နှင့် သီးညှပ်စိုက်ပျိုးထားကြောင်းသိရသည်။ ယခင်နှစ် ပဲစဉ်းငုံတစ်ဧက အထွက် နှုန်းမှာ (၁၁) တင်း ခန့်ထွက် ရှိခဲ့ကြောင်း၊ ယခုနှစ်တွင် မိုးအသင့်အတင့်ရွာသွန်းသဖြင့် အပင်များ ဖြစ်ထွန်းသောကြောင့် ယခင် နှစ်ထက် အထွက်နှုန်း များပိုမိုထွက်ရှိ်နိုင်မည်ဟုခန့်မှန်းရကြောင်း၊ ပဲစဉ်းငုံသီးနှံသည် အကျိုးအမြတ် များစွာရရှိပြီး သီးထပ်သီးညှပ်အနေဖြင့်လည်း စိုက်ပျိုး၍ ဝင်ငွေ တိုးသော သီးနှံဖြစ်ကြောင်း ပဲစဉ်းငုံစိုက် တောင်သူတစ်ဦး၏ ပြောပြချက်အရသိရှိရသည်။ တောင် သာ မြို့နယ်၌ ယခုဇူလိုင်စတုတ္ထပတ် တွင် ပဲစဉ်းငုံနီ တစ်တင်းလျှင် (၈၈၀၀၀) ကျပ်ခန့် ပေါက်ဈေး များဖြင့် ဒေသတွင်းပွဲရုံများတွင် အရောင်းအဝယ် ဖြစ်လျက်ရှိကြောင်း၊ ထိုပွဲရုံများမှတဆင့် မန္တလေး မြို့၊ ရန်ကုန်ဘုရင့်နောင်ပွဲရုံများသို့ တင်ပို့‌ရောင်း ချ ကြောင်းသိရှိရသည်။

DOCA(မန္တလေး)

     ဧရာဝတီတိုင်းဒေသကြီး ၊ မအူပင်ခရိုင်အတွင်းရှိ ကျေးလက်နေတောင်သူများသည် စပါး၊ ပဲ၊ ပြောင်း၊ နှမ်း စသည့်သီးနှံများကိုစိုက်ပျိုးသည့်အပြင် ဟင်းသီးဟင်းရွက်နှင့် သစ်သီးဝလံများကိုလည်း နှစ်စဉ် ရာသီအလိုက် စိုက်ပျိုးကြပါသည်။ 

     စိုက်ပျိုးသီးနှံများအနက်မှ ဆေးဖက်ဝင် ဟင်းချက်စားသုံးရသော ရုံးပတီသီးသီးနှံကို မိသားစုစားသုံးရန်နှင့် အပိုဝင်ငွေရရှိရေးအတွက် တစ်နိုင်တစ်ပိုင်စိုက်ပျိုးရာမှ ယခုအခါ စီးပွားဖြစ်စိုက်ပျိုးလာကြပါသည်။ တစ်ဧက ဝက်စိုက်ပျိုးပြီး  မျိုးစေ့(၂၀)ထုပ်စိုက်ပျိုးရပြီး မျိုးစေ့တစ်ထုပ်လျှင် (၆၅၀၀၀)ကျပ်ပေးရကြောင်း၊ အပင်ရေ ၂၅၀၀၀ ပင်စိုက်ပျိုးထာကြောင်း သိရသည်။   ကုန်ကျစရိတ်အနေဖြင့် မျိုး၊ သွင်းအားစု၊ လုပ်သားခအပါအဝင် စုစုပေါင်း (၁၅၀၀၀၀၀)ကျပ်ခန့်ကုန်ကျကြောင်း၊ စတင်စိုက်ပျိုးပြီး (၄၅)ရက်အကြာတွင် စတင်၍ခူးဆွတ်ရပါသည်။ ခူးဆွတ်မှုအနေဖြင့် တစ်ရက်ခြားတစ်ကြိမ် ခူးဆွတ်ပေးရပါသည်။ ရုံပတီထွက်ရှိမှု သက်တမ်းအနေဖြင့် (၃)လထိခူးဆွတ်ရကြောင်း၊ ဈေးနှုန်း၊ ဈေးကွက်အနေဖြင့် ဖောက်သည်ဈေးမှာ ၁ ပိဿာလျှင် (၈၀၀)ကျပ်ဈေးနှုန်းရရှိပြီး အရောင်းအဝယ်ဖြစ်နေကြောင်း၊ ရုံးပတီတစ်ပင်လျှင် အတောင့် ၈၀ခန့်ထွက်ရှိပြီး အထွက်နှုန်းအနေဖြင့် ပိဿာချိန် အနေဖြင့်  (၃၀၀၀) ခန့်ထွက်ရှိကြောင်း၊ အကျိုးအမြတ်အနေဖြင့် ၂နှစ်အတွင်း(၉)သိန်းကျပ်ခန့်မြတ်ပြီး ဈေးနှုန်းအတက်အကျပေါ်တွင်လည်းမူတည်သည်။ တင်ပို့မှုအနေဖြင့် ရန်ကုန်ကို့သော ကုန်စိမ်းကားများ တစ်ရက်ခြား တစ်ခါ ဟင်းသီးဟင်းရွက်လာကောက်ပြီး ရန်ကုန်ဈေးကွက်တင်ပို့ရောင်းချသလို မြို့နယ်အနီးဒေသများသို့လည်း ရောင်းချသည်။  ရုံးပတီသီးသီးနှံစိုက်ပျိုးခြင်းဖြင့် မိသားစုအပိုဝင်ငွေရရှိသည့်အပြင် စားသုံးသူအတွက် ဆေးဖက်ဝင်သည့်သီးနှံဖြစ်သည့်အတွက် ဟင်းစားရုံးပတီသီးသီးနှံအား တိုးချဲ့စိုက်ပျိုးသင့်ကြောင်း တောင်သူတစ်ဦး၏ ပြောကြားချက်အရ သိရှိရပါသည်။

DOCA (ဧရာဝတီ)

    ဒေသထုတ်ကုန်ဖြစ်သော “ရွှေပင်” ပဲချောင်းမုန့်လုပ်ငန်းအား ရောင်းဝယ်ဖြန့်ဖြူးမှု အခြေအနေနှင့် အသေးစား၊ အငယ်စားနှင့် အလတ်စားလုပ်ငန်းများမှ အမှတ်တရလက်ဆောင်မုန့်တစ်ခုအနေဖြင့် ထုတ်လုပ်ရောင်းချပေးလျက်ရှိသော ဒေသထွက်ထုတ်ကုန်တစ်ခုဖြစ်သည့် ဘာသာမရွေး သန့်ရှင်းလတ်ဆတ်စွာစားသုံးနိုင်ရန် ထုတ်လုပ်ရောင်းချပေးလျက်ရှိကြောင်း သိရသည်။

    ပုဂံ (ရွှေပင်) ပဲချောင်းပြုလုပ်ရာတွင် ဒုံးပျံတံဆိတ် ဂျုံကိုသာ အဓိက အသုံးပြုရပြီး ဂျုံ ၁အိတ်လျှင် အချိန် ၁၅ပိဿာပါ (၁၈၀၀၀၀/-ကျပ်)ဖြင့် ဝယ်ယူရပါသည်။ အခြားပါဝင်ပစ္စည်းများမှာ ပဲ၊ ဆီ၊ သကြား၊ ဆား၊ ရေသန့်တို့ပါဝင်ပြီး ပါဝင်ပစ္စည်းများကို မအူပင်မြို့နယ်တွင် ဝယ်ယူ၍ ရရှိကြောင်းသိရသည်။ ပြုလုပ်ပုံမှာ ဂျုံသားကိုနှဲ၍ ပဲကိုပြုတ်ပြီး ချေထားကာ ဂျုံနှင့် ပဲ ရောနှပ်၍ မုန့်ကြိုးလိမ်ချောင်း၊ မုန့်ခေါင်းအုံး၊ မုန့်ခါဂျာ၊ ပဲချောင်း မျိုးစုံကို ဆီဖြင့်ကျော်ပြီးလျှင် ကြိုထားသော သကြားထဲကိုနှစ်၍ အအေးခံ၍  အိတ်သွပ်၍ ၅ထုတ်တွဲ အတွဲထုတ်ရပါသည်။ တစ်နေ့လျှင် ဂျုံ ၁အိတ်အသုံးပြုပြီး ၁လလျှင် ၃ရက် မုန့်ထုတ်လုပ်ရကြောင်း သိရသည်။ မုန့်ထုတ်ပါက ခေါင်းအုံးမုန့် ၅၀၀ထုတ်၊ ၁ထုတ်လျှင် ၁၀၀ကျပ် လက်ကားဈေးပေးရသည်။ မုန့်ကျိုးလိမ် ၅၀၀ထုတ်၊ ခါဂျာမုန့် ၉၀၀ထုတ်၊ ပဲချောင်းမုန့် ၅၀၀ထုတ် ထွက်ရှိသည်။

    တစ်နေ့လျှင်ကုန်ကျစရိတ် ၈သိန်း ဝန်းကျင် ကုန်ကျပြီး အကျိုးအမြတ်အနေဖြင့် ၁၀၉၀၀၀၀/-ကျပ် ရရှိပါသည်။ ဈေးကွက်အနေဖြင့် ဖျာပုံ၊ ကျိုတ်လတ်၊ မော်ကျွန်းဘက်သို့ ဖြန့်ဖြူးကြောင်း သိရသည်။

DOCA (ဧရာဝတီ)