ပြည်တွင်းကုန်သွယ်မှုသတင်း

     စစ်ကိုင်းတိုင်းဒေသကြီး၊ ကန့်ဘလူခရိုင်၊ ကန့်ဘလူမြို့ရှိ မြို့မဈေးနှင့် အသီးမျိုးစုံရောင်း ချနေသော သစ်သီးဆိုင်များတွင် Hassထောပတ်သီးနှင့် ယာကွန်ဥ(ခေါ်)ရေကန်စွန်းဥများကို အများအပြား ရောင်းချနေကြကြောင်း သိရသည်။ Hassထောပတ်သီးနှင့် ယာကွန်ဥ(ခေါ်)ရေကန် စွန်းဥများကို မန္တလေးမြို့ရှိ သစ်သီးပွဲရုံများမှမှာ ယူရောင်းချလျက်ရှိ‌ကြောင်း သိရသည်။

     Hassထောပတ်သီးသည် ကျန်းမာရေးအတွက် အထောက်အကူများစွာပြုသော အသီးဖြစ် သောကြောင့် အဖျော်ရည်ပြုလုပ်၍ကာ  သရေစာအဖြစ်လည်းစားသုံးကြကြောင်း၊ ယာကွန်ဥ (ခေါ်)ရေကန်စွန်းဥသည် အရည်ရွှမ်း၍ ပန်းသစ်တော်သီးအရသာနှင့်တူပြီး ခန္ဓာကိုယ်အတွက် အထောက်အကူပြုကာ ချိုချိုကြွပ်ကြွပ်လေးနဲ့ အရသာရှိသောကြောင့် လူကြိုက်များပြီး သရေစာ အဖြစ် လူကြီးလူငယ်မရွေးဝယ်ယူစားသုံးကြကြောင်း၊  ၂၀၂၅ ခုနှစ်၊ နိုဝင်ဘာလ တတိယပတ် အတွင်း Hassထောပတ်သီးဈေးနှုန်းမှာ Hassထောပတ်သီး(1)kgလျှင်  (၆၅၀၀)ကျပ်၊ ယာကွန်ဥ (ခေါ်)ရေကန်စွန်းဥ(၁)ပိဿာလျှင် (၁၅၀၀၀)ကျပ်၊ ယာကွန်ဥ (ခေါ်)ရေကန်စွန်းဥ(၅၀)ကျပ်သား လျှင်(၇၅၀၀)ကျပ်ဖြင့်ရောင်းအဝယ်ဖြစ်လျက်ရှိကြောင်း ကန့်ဘလူမြို့တွင် ရောင်းချလျက်ရှိသော သစ်သီးဆိုင်များမှ သတင်းရရှိပါသည်။

DOCA(စစ်ကိုင်း)

      စစ်ကိုင်းတိုင်းဒေသကြီး၊ ကန့်ဘလူမြို့ “မြို့မဈေး”သည် နေ့စဉ်ဈေးရောင်းသူများ၊ ဈေးဝယ်သူများနှင့် စည်ကားလျက်ရှိပြီး ရာသီပေါ်သီးနှံများ၊ ဒေသထွက်ကုန်များအပြင် အခြားဒေသမှဝင်ရောက်သည့် လူသုံးကုန်နှင့် စားသောက်ကုန်ပစ္စည်းများသာမက ယခုအခါ မြန်မာ့ရိုးရာအချိုပွဲ မုန့်အမျိုးမျိုးကို ရောင်းချလျက်ရှိကြောင်း သိရသည်။

      မြန်မာ့ရိုးရာအချိုပွဲများကို ကန့်ဘလူမြို့ပေါ်ရှိဒေသခံများမှ လာရောက်ရောင်းချကြကြောင်း၊ အချိုပွဲတွင် ဆနွင်းမကင်း၊ ငှက်ပျောပူတင်း၊ ပဲပူတင်း၊ အာလူးပူတင်းနှင့် ကျောက်ကျောစသည်ဖြင့် အမျိုးမျိုးရှိကြောင်း၊ ၂၀၂၅ခုနှစ်၊ နိုဝင်ဘာလ တတိယပတ်အတွင်း ကန့်ဘလူမြို့မဈေးတွင် ရောင်းချနေသည့် အချိုပွဲ ဈေးနှုန်းများမှာ ဆနွင်းမကင်း(၁)တုံးလျှင် (၃၀၀)ကျပ်၊ ငှက်ပျောပူတင်း(၁)တုံး လျှင်(၂၀၀)ကျပ်၊ အာလူးပူတင်း(၁)တုံးလျှင် (၃၀၀)ကျပ်၊ ပဲပူတင်း(၁)တုံးလျှင် (၃၀၀)ကျပ်နှင့် ကျောက်ကျော(၁)တုံးလျှင်(၂၀၀)ကျပ်ဖြင့် ရောင်းချလျက်ကြောင်း၊ မြန်မာ့ရိုးရာအချိုပွဲများကို သရေစာအဖြစ်စားသုံးရန်၊ အလှူပွဲ၊ မင်္ဂလာပွဲများတွင် တည်ခင်းဧည့်ခံရန်နှင့် လက်ဆောင်ပေးရန်အတွက် ဝယ်ယူစားသုံးကြသဖြင့် အရောင်းအဝယ်သွက်လျက်ရှိကြောင်း မုန့်ရောင်းချသူထံမှ သိရှိရပါသည်။

DOCA(စစ်ကိုင်း)

    ဇီးဖြူသီးသည် မြန်မာနိုင်ငံတွင် လူသိများသော သစ်သီးတစ်မျိုးဖြစ်ပြီး ဆေးဖက်ဝင်အပင် ဖြစ်လည်းထင်ရှားပါသည်။ မြန်မာနိုင်ငံ၏ ပူပြင်းခြောက်သွေ့သော ဒေသများတွင် ပိုမိုဖြစ်ထွန်းပြီး ကန့်ဘလူခရိုင်၌လည်း ဇီးဖြူပင်များ အလေ့ကျပေါက်နေသည်ကို နေရာအနှံ့အပြားတွင်တွေ့ရ သည်။ ဇီးဖြူပင်များကို နေအိမ်ခြံစည်းရိုးများ၌လည်းကောင်း၊ လယ်တော၊ ယာတောများတွင် စိုက်ပျိုးပြီး မိမိတို့အိမ်တွင် စားသုံး၍ပိုလျှံသည့်အသီးများကို ဇီးဖြူသီးအစိုနှင့် ဇီးဖြူသီးအခြောက် ပြုလုပ်၍ ကန့်ဘလူမြို့မဈေးတွင် ရောင်းချကြောင်း သိရသည်။

      ဇီးဖြူသီးသည် အနံ့အရသာထူးခြားပြီး ချဉ်ဖန်သောအရသာရှိသည့်အတွက် လူကြိုက်များ သောအသီးတစ်မျိုးဖြစ်သည်။ ထို့ကြောင့် ဇီးဖြူသီးကို ဇီးဖြူသီးအစိမ်းထောင်း၊ ဇီးဖြူသီးသနပ်နှင့် ဇီးဖြူသီးကို ကြာရှည်အသုံးပြုနိုင်ရန် အခြောက်လှန်း၍လည်း စားသုံးကြသည်။ ၂၀၂၅ခုနှစ်၊ နိုဝင်ဘာလ တတိယပတ်အတွင်း ကန့်ဘလူမြို့၊မြို့မဈေးတွင် ဇီးဖြူသီးအစိမ်း နို့ဆီဘူး(၁)ဘူး လျှင်(၅၀၀)ကျပ်၊(၁)ပြည်လျှင်(၃၈၀၀)ကျပ်၊ ဇီးဖြူသီးအခြောက်(၁)ဘူးလျှင် (၁၀၀၀)ကျပ်၊ (၁)ပြည် လျှင်(၇၈၀၀)ကျပ်ဖြင့် ရောင်းချလျက်ရှိကြောင်း ကုန်စိမ်းရောင်းချသူများ ထံမှသိရှိရပါသည်။

DOCA(စစ်ကိုင်း)

               စားသုံးသူရေးရာဦးစီးဌာန၊ မန္တလေးတိုင်းဒေသကြီး၊ မိတ္ထီလာခရိုင်ဦးစီးမှူးရုံး၊ ခရိုင်ဦးစီးမှူး၏ လမ်းညွှန်မှုဖြင့် ပျော်ဘွယ်မြို့နယ်တာဝန်ခံ ဦးစန်းအောင်နှင့် ဝန်ထမ်းများသည် (၁၉-၁၁-၂၀၂၄) ရက်နေ့(၁၄၀၀) နာရီချိန်တွင် ပျော်ဘွယ်မြို့နယ် မုန့်ကြွပ်လုပ်ငန်း လုပ်ကိုင်သူများနှင့် တွေ့ဆုံ ဆွေးနွေးခဲ့ပါသည်။

          ပျော်ဘွယ်မြို့ရှိ ဆင်နှစ်ကောင်မုန့်ကြွပ်လုပ်ငန်း၊ ရွှေငါး မုန့်ကြွပ်လုပ်ငန်း၊ ပဒေသာမုန့်ကြွပ်၊ စိန်တောင်ကြီး လုပ်ငန်းရှင်များနှင့် သွားရောက်တွေ့ဆုံရာတွင် မုန့်ကြွပ်လုပ်ငန်းကို နှစ်ပေါင်းများစွာကတည်းက လုပ်ကိုင်လာခြင်းဖြစ်ကြောင်း သိရှိရပါသည်။

          မုန့်ကြွပ်ကို အဆင့် (၁) ဂျုံ၊ သကြား၊ ထောပတ်တို့ကို ရောနယ်ခြင်း၊ အဆင့် (၂) အပွခံ ပုံစံသွင်းခြင်း၊ အဆင့် (၃) မီးဖုတ်ခြင်း (အစိုတစ်ကြိမ်၊ အခြောက်တစ်ကြိမ်)၊ အဆင့် (၄) အအေးခံခြင်း ၊ အဆင့် (၅) ပက်ကင်ထုတ်ပိုးခြင်းဟူ၍ အဆင့်ဆင့်ဆောင်ရွက်ရပါသည်။ လုပ်သားဦးရေ ကျား (၈) ယောက်၊ မ (၄) ယောက်ရှိပြီး လုပ်ကိုင်ဆောင်ရွက်လျက်ရှိပါသည်။ကုန်ကြမ်းရရှိမှုအနေဖြင့် ထောပတ်ကို ဒေသ တွင်းမှရရှိပြီး၊ ဂျုံ၊ နို့မှုန့်၊ မုန့်ပွဆေး၊ သကြားနှင့် ဆီများကို ရန်ကုန်မှ ဝယ်ယူကြပါသည်။

          (၁) ရက်လျှင် ဂျုံပိဿာ (၇၅) မှ (၈၀) ပိဿာ ကုန်ကြမ်းကုန်ကျပြီး၊ ကုန်ချောထွက်ရှိမှု အထုပ်သေး (၁၆၀) ထုပ်ခန့်၊ အထုပ်လတ် (၁၂၀) ထုပ်ခန့်၊ အထုပ်ကြီး (၈၀) ထုပ်ခန့် ထုတ်လုပ်နိုင် ကြောင်း ၊ စျေးနှုန်းအနေဖြင့် အခု (၂၀) ပါ အထုပ်သေး တစ်ထုပ်လျှင် (၂၅၀၀) ကျပ်၊ အခု (၂၀) ပါ အလတ်တစ်ထုပ်လျှင် (၄၀၀၀-၄၅၀၀) ကျပ်စျေးဖြင့် ရောင်းချရကြောင်း သိရှိရပါသည်။ စျေးကွက် အနေဖြင့် တစ်နိုင်ငံလုံးတင်ပို့ကြောင်း သိရှိရပါသည်။

DOCA(မန္တ‌လေး)

DOCA(မန္တ‌လေး)

     စစ်ကိုင်းတိုင်းဒေသကြီး၊ ကန့်ဘလူခရိုင်၊ ကန့်ဘလူမြို့တွင် ရာသီပေါ်သီးနှံများကို စိုက်ပျိုး ရောင်းချလျက်ရှိရာ ယခုအခါ ကန်စွန်းရွက်၊ကင်ပွန်းချဉ်ရွက်နှင့် ချဉ်ပေါင်ရွက်များကို  နေအိမ်ခြံဝင်း များတွင်လည်းကောင်း၊ ယာတော၊ လယ်တောများတွင်လည်းကောင်း တစ်နိုင်တစ်ပိုင်စိုက်ပျိုး၍ ရောင်းချလျက်ရှိကြောင်းသိရသည်။  

     ၂၀၂၅ခုနှစ်၊ နိုဝင်ဘာလ တတိယပတ်အတွင်း ကန့်ဘလူမြို့မဈေးတွင် ကုန်စိမ်းရောင်းချ သူတစ်ဦး၏ ပြောပြချက်အရ ကန်စွန်းရွက်၊ကင်ပွန်းချဉ်ရွက်နှင့် ချဉ်ပေါင်ရွက်များကို ကန့်ဘလူမြို့ ပေါ်နှင့်နတ်ပေးကျေးရွာ၊ နတ်အင်းကျေးရွာများမှလည်းကောင်း ဝယ်ယူရောင်းချလျက်ရှိကြောင်း ကန်စွန်းရွက်များကို အစည်းလေးများစည်း၍ ရောင်းချရာ(၁)စည်းလျှင် (၂၀၀)ကျပ်၊ (၃)စည်းလျှင် (၅၀၀)ကျပ်၊ ကင်ပွန်းချဉ်ရွက်(၁)စည်းလျှင် (၂၀၀)ကျပ်၊ (၃)စည်းလျှင်( ၅၀၀)ကျပ်နှင့် ချဉ်ပေါင်ရွက် (၁)ပိဿာလျှင် (၁၂၀၀)ကျပ်၊ (၅၀)ကျပ်သားလျှင် (၆၀၀)ကျပ်၊ (၁)ပုံလျှင်(၂၀၀)ကျပ်ဖြင့်ရောင်းချ လျက်ရှိကြောင်း သတင်းရရှိပါသည်။

DOCA(စစ်ကိုင်း)