ပြည်တွင်းကုန်သွယ်မှုသတင်း

           ပဲခူးတိုင်းဒေသကြီး၊ ပြည်ခရိုင်၊ ပြည်မြို့နယ်၊ အောင်ဆန်းရပ်ကွက်နှင့် တောင်ခွေးရဲကျေးရွာ၊ ပျဉ်းပင်ကိုင်းကျေးရွာတို့တွင် အာဆီယံသပြေပန်းများကို စီးပွားဖြစ် စိုက်ပျိုးထားကြောင်းသိရသည်။ အာဆီယံသပြေများ ဖြစ်ထွန်းအောင်မြင်လျက်ရှိပြီး နေ့စဉ်ဝင်ငွေ ရရှိသောကြောင့် သပြေပန်း စိုက်သူများ အဆင်ပြေလျက်ရှိကြောင်းသိရသည်။ အာဆီယံသပြေသည် ရဲရဲနီသော ရွက်သစ်အညွန့် များကြောင့် ကြည့်ရဆန်းပြီး ကျက်သရေရှိသည့် နှစ်ရှည်သပြေပင် အမျိုးအစားဖြစ်ပါသည်။ ဗုဒ္ဓဘာသာဝင်များ အထွတ်အမြတ် ထားရာ သပြေပန်းအညွန့်များကို စီးပွားဖြစ် တစ်နိုင်တစ်ပိုင် စိုက်ပျိုးကြပြီး နေ့စဉ်ပုံမှန်ဝင်ငွေ ကောင်းမွန်သော အလှစိုက်နှင့် ဘုရားပန်းရောင်းတန်းဝင် အပင်တစ်မျိုးဖြစ်ပါသည်။

          အာဆီယံသပြေပန်းများကို ရာသီမရွေး စိုက်ပျိုးကြသည်။ အာဆီယံသပြေသည် နှစ်ရှည်ပင် အမျိုးအစားဖြစ်ပါသည်။ အာဆီယံသပြေကို စီးပွားဖြစ်စိုက်ပျိုးပါက တစ်နေ့ (၂)ကြိမ် ရေလောင်း ပေးရပါသည်။ မနက်တစ်ကြိမ်၊ ညနေတစ်ကြိမ် ရေလောင်းပါက လုံလောက်ပါသည်။အာဆီယံ သပြေသည်  စစိုက်ပျိုးချိန်မှ (၈)လမှ (၁)နှစ်ခွဲအကြာတွင် ဈေးကွက်အတွင်းသို့ တင်ပို့ရောင်းချ နိုင်ပါသည်။ အာဆီယံသပြေအညွန့်များကို (၁၅)ရက်တစ်ကြိမ် ဖြတ်တောက်ရောင်းချလို့ရနိုင် ကြောင်းသိရပါသည်။ အာဆီယံသပြေများ စိုက်ပျိုးရောင်းချရာတွင် အောင်အတိတ်၊ အောင်နမိတ် ပန်းဖြစ်သည့်အပြင် ကုန်ကျစရိတ် သက်သာခြင်း၊ နှစ်ရှည်ပင်ဖြစ်ခြင်းတို့ကြောင့် စိုက်ပျိုးသူများ များပြားလာကြောင်းသိရသည်။ ပြည်မြို့တွင်းရှိ (Plant Zone)ပျိုးပင်ရောင်းဝယ်ရေးတွင် အာဆီယံပျိုးပင်များရောင်းချနေပြီး ရောင်းဈေးမှာ အမြင့် (၂/၃)ပေ ဝန်းကျင်ရှိ သပြေပင်ပေါက် တစ်ပင်လျှင် (၂၅၀၀၀)ကျပ်ဖြင့် ရောင်းချကြောင်းသိရသည်။ ပြည်မြို့ဈေးကွက်တွင် အာဆီယံ သပြေပန်းအညွန့် အစည်း တစ်စည်းလျှင် (၁၀)ညွန့် ပါဝင်ပြီး တစ်စည်းလျှင် (၅၀၀)ကျပ်ဖြင့် ဈေးကွက်အတွင်း ရောင်းချနေကြောင်း သိရသည်။

DOCA(ပဲခူး)

တိုင်းဒေသကြီး/ပြည်နယ် မြို့နယ်များအလိုက် ၂၇ -၈ -၂၀၂၆ ရက်နေ့တွင် ဖြစ်ပေါ်လျက်ရှိသော ဆန်၊ ဆီ၊ မီးဖိုချောင်သုံးပစ္စည်းများ၊ သားငါးနှင့် ဥ‌ဈေးနှုန်းများကို ပူးတွဲပါ ဖိုင်တွင် ကြည့်ရှုနိုင်ပါသည်-

         ကရင်ပြည်နယ်ထွက် သံပရာသီး စိုက်ဧကတိုးတက်လာပြီး ဒေသတွင်း ကုန်သွယ်မှုသွက် လက်လျက်ရှိသည်။

          ကရင်ပြည်နယ်အတွင်း သံပရာသီးကို မိသားစုတစ်နိုင်တစ်ပိုင်မှစီးပွားဖြစ်  စိုက်ပျိုးထုတ်လုပ် ကြသည်။  ယခုနှစ်တွင် စိုက်ပျိုးဧကပိုမိုကျယ်ပြန့်လာပြီး ဒေသတွင်းနှင့်ပြည်နယ်မြို့ကြီးများသို့ တင်ပို့ရောင်းချမှုများပြားကာ ဈေးကွက်ခိုင်မာလျက်ရှိသည်။ ကရင်ပြည်နယ် တစ်ခုလုံးတွင် သံပရာသီး  စိုက်ပျိုးဧက စုစုပေါင်း ၈,၅၀၀ ဧက ကျော်ရှိပြီး ရေမြေရာသီဥတု သင့်တော်သည့် ဘားအံ၊ လှိုင်းဘွဲ့နှင့် ကြာအင်းဆိပ်ကြီးမြို့များတွင် အများဆုံးစိုက်ပျိုးကြသည်။ သံပရာသီးပင်ကို စိုက်ပျိုးရာတွင် တစ်ဧကလျှင် ပင်ကြားတန်းကြား (၁၂)ပေ အကွာအဝေးဖြင့် အပင်ရေ(၂၅၀မှ ၃၀၀) ကျော်အထိ စိုက်ပျိုးနိုင်သည်။ စိုက်ပျိုးပြီး (၂)နှစ်ကျော်မှစ၍ အသီးခူးဆွတ်နိုင်ပြီး တစ်ဧကလျှင် တစ်နှစ်ပတ်လုံး ပျမ်းမျှသံပရာသီး အလုံးရေ ( ၂၅၀၀၀ )အထိ ထွက်ရှိသည်။ သံပရာသီးကို မိုးရာသီ (ဇွန်လမှအောက်တိုဘာလ)အထိထွက်သည်။

          ဈေးကွက်အတွင်းပေါ်ဦးပေါ်ဖျားဈေးနှုန်းများ ရာသီလိုက် အသီးလှိုင်လှိုင်ထွက်ချိန်နှင့် အသီး ရှားပါးချိန်ပေါ်မူတည်၍ ဈေးနှုန်းကွာခြားချက်ရှိသော်လည်း လက်ရှိဒေသတွင်း ကုန်စိမ်းဒိုင် ဈေးနှုန်းများမှာ လက်ကားဈေး (ဒိုင်ဈေး) သံပရာသီးဆိုဒ်ကြီးတစ်လုံးလျှင် ၁၀၀ မှ ၁၅၀ ကျပ်၊ လက်ကားဈေး (ဒိုင်ဈေး) သံပရာသီး ဆိုဒ်သေး တစ်လုံးလျှင် ၅၀ မှ ၁၀၀ ကျပ်နှင့် လက်လီဈေး (ဈေးကွက်) တွင် သံပရာသီး အရွယ်အစားပေါ်မူတည်၍ ၃လုံးလျှင် (၅၀၀ ကျပ် မှ ၁ လုံးလျှင် ၂၀၀) ကျပ် အထိရောင်းချကြသည်။

          ကရင်ပြည်နယ်ထွက် သံပရာသီးများကို ဒေသတွင်း စားသုံးမှုအပြင်ပြည်နယ်တွင်း ဖြစ်သည့် ဘားအံမြို့၊ မြဝတီမြို့၊ ကော့ကရိတ်မြို့၊ ကြာအင်းဆိပ်ကြီးမြို့ နှင့် ပြည်နယ်ပြင်ပတင်ပို့မှုများမှာတော့ ရန်ကုန်၊မော်လမြိုင်၊ ပဲခူးမြို့တို့ဖြစ်ပါသည်။ ကရင်ပြည်နယ်ထွက် သံပရာသီးသည် အရည်ရွှမ်းပြီး အနံ့မွှေးသည့်အတွက် ပြည်နယ်ပြင်ပ ဈေးကွက်များတွင် ဝယ်လိုအား ကောင်းမွန်လျက်ရှိရာ ဒေသခံစိုက်ပျိုးရေးတောင်သူများအတွက် ပုံမှန်ဝင်ငွေရရှိစေသည့် သီးနှံတစ်ခုဖြစ်လာကြောင်း သိရသည်။

DOCA(ကရင်)

           စစ်ကိုင်းတိုင်းဒေသကြီး၊ ကန့်ဘလူခရိုင်၊ ကန့်ဘလူမြို့နယ်သည် စိုက်ပျိုးရေးလုပ်ငန်းများ ဖြစ်သည့် စပါး၊ မြေပဲ၊ နှမ်း၊ နေကြာ၊ ပဲစင်းငုံ၊ မတ်ပဲနှင့် ပဲမျိုးစုံ စသည့်သီးနှံမျိုးစုံ စိုက်ပျိုးလျက်ရှိရာ နိုင်ငံခြားဝင်ငွေရှာဖွေပေးနေသည့် ပြည်ပပို့ကုန် မတ်ပဲသီးနှံကို ကန့်ဘလူမြို့နယ် မြေထူးကျေးရွာ၊ ထန်းကုန်းကျေးရွာနှင့် အခြားသောကျေးရွာများတွင် စိုက်ပျိုးလျက်ရှိကြောင်း ကြေးတိုင်နှင့် မြေစာ ရင်းဦးစီးဌာန၏ စာရင်းများအရ သိရသည်။

       ၂၀၂၆ ခုနှစ်၊ ဩဂုတ်လ တတိယပတ်အတွင်း ဈေးနှုန်းများမှာ မတ်ပဲ တစ်တင်းလျှင် ၈၉၀၀၀ ကျပ်၊ မတ်ပဲ(ဂျပန်)တစ်တင်းလျှင် ၉၂၀၀၀ ကျပ်နှုန်းတို့ဖြင့် အရောင်းအဝယ် ဖြစ်လျက်ရှိကြောင်း၊ ယခင်ဇူလိုင်လ တတိယပတ်၏ ဈေးနှုန်းများမှာ မတ်ပဲတစ်တင်းလျှင် ကျပ် ၈၀၀၀၀ နှင့်မတ်ပဲ(ဂျပန်)တစ်တင်းလျှင် ကျပ် ၉၂၀၀၀ ဖြင့်အရောင်းအဝယ်ဖြစ်ခဲ့ပြီး ယခင်လနှင့် ယခုလဈေးနှုန်းနှိုင်းယှဉ်ပါက ဩဂုတ်လ တတိယပတ်အတွင်း မတ်ပဲတစ်တင်းလျှင် ကျပ် ၉၀၀၀ ဈေးနှုန်းမြင့်တက်လာကြောင်းနှင့် မတ်ပဲ(ဂျပန်)မှာ ဈေးနှုန်းတည်ငြိမ်လျက်ရှိကြောင်း၊ မတ်ပဲသီးနှံ များကို မန္တလေးမြို့ရှိပွဲရုံများ၊ ကုန်စည်ဒိုင်များသို့ တင်ပို့ရောင်းချကြောင်း၊ မန္တလေးပဲဈေးကွက်၏ အရောင်းအဝယ်ဖြစ်မှုနှင့် ဈေးနှုန်းအတက်၊အကျပေါ် မူတည်၍ ဈေးနှုန်းပြောင်းလဲမှု ပြုလုပ်ကြောင်း သီးနှံရောင်းဝယ်ရေး လုပ်ငန်းရှင်များထံမှ သတင်းရရှိသည်။

DOCA(စစ်ကိုင်း)

    မြန်မာနိုင်ငံသည် လယ်ယာစိုက်ပျိုးရေးလုပ်ငန်းကို အဓိကလုပ်ကိုင်သည့် နိုင်ငံဖြစ်ပြီး စစ်ကိုင်းတိုင်းဒေသကြီး ၊ ကန့်ဘလူခရိုင်၊ ကန့်ဘလူမြို့နယ်တွင် သီးနှံမျိုးစုံ စိုက်ပျိုးလျက်ရှိရာ ရေ၊ မြေ၊ ရာသီဥတုနှင့်ကိုက်ညီသည့် ပဲစင်းငုံသီးနှံကို အဓိကစိုက်ပျိုးလျက်ရှိကြောင်း စိုက်ပျိုးရေးဦးစီး ဌာန၏ စာရင်းများအရ သိရသည်။

     ဒေသတွင်းဈေးကွက်၌ ၂၀၂၆ ခုနှစ်၊ ဩဂုတ်လ တတိယပတ်အတွင်း ပဲစင်းငုံနီတစ်တင်းလျှင် ကျပ် ၉၀၀၀၀၊ ပဲစင်းငုံဖြူ တစ်တင်းလျှင် ကျပ် ၇၉၀၀၀ နှုန်းတို့ဖြင့် အရောင်းအဝယ်ဖြစ်လျက်ရှိ ကြောင်း၊ ယခင်ဇူလိုင်လ တတိယပတ်ဈေးနှုန်းများမှာ ပဲစင်းငုံနီတစ်တင်းလျှင် ကျပ် ၉၃၀၀၀နှင့် ပဲစင်းငုံဖြူတစ်တင်းလျှင် ကျပ် ၈၃၀၀၀ ဖြင့်အရောင်းအဝယ်ဖြစ်ခဲ့ရာ ယခင်လနှင့် ယခုလဈေးနှုန်း အတက်/အကျနှိုင်းယှဉ်ပါက ယခုလတတိယ ပတ်အတွင်း ပဲစင်းငုံနီတစ်တင်းလျှင် ကျပ် ၃၀၀၀နှင့် ပဲစင်းငုံဖြူတစ်တင်းလျှင် ကျပ် ၁၄၀၀၀ ဈေးနှုန်းကျဆင်းသွားကြောင်း၊ ကန့်ဘလူဒေသထွက် သီးနှံများကို မန္တလေးမြို့ရှိ ပွဲရုံများနှင့် ကုန်စည်ဒိုင်သို့ တင်ပို့ရောင်းချလျက်ရှိသောကြောင့် ဒေသတွင်းဈေးကွက်၏ ဈေးနှုန်းအတက်/အကျမှာ  မန္တလေး ဈေးကွက်အပေါ်မူတည်ကြောင်း လုပ်ငန်းရှင်များထံမှ သိရှိရသည်။

DOCA(စစ်ကိုင်း)