ပြည်တွင်းကုန်သွယ်မှုသတင်း

            ၂၀၂၅ ခုနှစ်၊ စက်တင်ဘာလ တတိယပတ်အတွင်း ပုသိမ်မြို့ရှိ အဓိကဈေးကြီးများဖြစ်သော မြို့မဈေး၊ ကုလားကုန်းဈေးနှင့် ရပ်ကွက်ဈေးငယ်များတွင် ရောင်းချနေသော ကြက်သားဈေးနှုန်းများမှာ တစ်ပိဿာလျှင် ကျပ် ၁၈,၀၀၀ မှ ၂၀,၀၀၀ အထိ ရှိကြောင်း သိရှိရပါသည်။

            ယခင် စက်တင်ဘာလ တတိယပတ်ကဈေးနှုန်းများနှင့် နှိုင်းယှဉ်ပါက ဈေးနှုန်းများ အတန်ငယ်မြင့်တက်လာခဲ့သော်လည်း ဝက်သားဈေးနှုန်းများထက် ပိုမိုတည်ငြိမ်နေကြောင်း တွေ့ရှိရပါသည်။ ကြက်သားဈေးနှုန်းများ မြင့်တက်နေရခြင်းမှာ မိုးရာသီကြောင့် ကြက်မွေးမြူရေးအတွက် အစာကုန်ကျစရိတ်များ မြင့်တက်မှု၊ ရောဂါကာကွယ်ရေးအတွက် ကျပ်ငွေကုန်ကျမှုများနှင့် လမ်းပန်းဆက်သွယ်ရေး အခက်အခဲတို့ကြောင့်ဖြစ်ကြောင်း ဒေသခံမွေးမြူရေးသမားများထံမှ သိရှိရပါသည်။

            ပုသိမ်မြို့အနေဖြင့် ကြက်သားထုတ်လုပ်မှုတွင် ဒေသခံမွေးမြူရေးကဏ္ဍမှ ထုတ်လုပ်သည့် ကြက်သားများနှင့် အနီးအနားရှိ မြို့နယ်များမှ တင်ပို့လာသော ကြက်သားများ ရောနှောရောင်းချနေရခြင်းကြောင့် ဈေးနှုန်းများ အနည်းငယ်ကွဲပြားမှုရှိနိုင်ကြောင်း သိရပါသည်။ ဈေးကွက်အတွင်း ကြက်သားဝယ်လိုအားမှာ ပုံမှန်ထက်ပိုမိုမြင့်မားနေပြီး ဒေသခံများ၏ နေ့စဉ်စားသုံးမှု၊ ပွဲလမ်းသဘင်များနှင့် အလှူအတန်းများအတွက် ဝယ်ယူသုံးစွဲမှုများ ရှိနေဆဲဖြစ်ကြောင်း သိရှိရပါသည်။ ကြက်သားသည် စားသုံးမှုအတွက် ဈေးနှုန်းချိုသာပြီး ကျန်းမာရေးနှင့် ညီညွတ်သည်ဟု ယူဆထားသည့် အလေ့အထများကြောင့် ဝယ်လိုအားမြင့်မားနေခြင်းဖြစ်ကြောင်း သိရှိရပါသည်။

DOCA (ဧရာဝတီ)

              ဧရာဝတီတိုင်းဒေသကြီး၊ ပုသိမ်မြို့နယ်အတွင်းရှိ ဈေးများ၌ ရောင်းချနေသော မာလကာသီးများကို ပုသိမ်မြို့နယ်အတွင်းရှိ ခြံများမှ ရယူရောင်းချခြင်းနှင့် အနီးဝန်းကျင်ဒေသများဖြစ်သော ကြံခင်းမြို့နယ်၊ ရေကြည်မြို့နယ်များမှ ဖြန့်ဖြူးရောင်းချကြောင်း သိရသည်။

            ၂၀၂၅ ခုနှစ်၊ စက်တင်ဘာလ (တတိယပတ်) ဈေးနှုန်းများအရ မာလကာသီး တစ်လုံးလျှင် အမြင့်ဈေး ကျပ် (၁၅၀၀)၊ အလတ်ဈေး ကျပ် (၁၀၀၀)၊ အနိမ့်ဈေး ကျပ် (၇၀၀) ခန့်ဖြင့် အသီး၏ အရည်အသွေး၊ အရွယ်အစားနှင့် လတ်ဆတ်မှုအပေါ်မူတည်၍ ရောင်းချလျက်ရှိကြောင်း ဈေးသည်များထံမှ သိရှိရပါသည်။ ပုသိမ်မြို့နယ်တွင် ဒေသတွင်းထွက်ကုန်ဖြစ်သော်လည်း သယ်ယူပို့ဆောင်ရေး ကုန်ကျစရိတ်နှင့် ဝယ်ယူမှုအရေအတွက်ပေါ်မူတည်၍ ဈေးနှုန်းများ ကွဲပြားမှုရှိနိုင်ကြောင်း သတိပြုရန် လိုအပ်ပါသည်။

DOCA (ဧရာဝတီ)

          ဧရာဝတီတိုင်းဒေသကြီး၊ ပုသိမ်မြို့၊ ဘူတာဈေးအတွင်းသို့ ရှမ်းပြည်နယ်ဒေသများမှ မြေပဲတောင့်အစိုများ ဈေးကွက်အတွင်းသို့ ဝင်ရောက်လာပြီး ကျန်းမာရေးနှင့် ညီညွတ်သည့် ဆီထွက်သီးနှံများကို စားသုံးသူများ အများအပြား ဝယ်ယူစားသုံးလာကြကြောင်း သိရသည်။ မြေပဲတောင့်အစိုများကို ရှမ်းပြည်နယ်၊ ပင်းတယ၊ အောင်ပန်း၊ ရေဦး၊ ရွာငံဒေသများမှ အဓိကတင်ပို့လာပြီး မြေပြန့်ဒေသများတွင် ထွက်ရှိမှုနည်းပါးသော အချိန်ဖြစ်သဖြင့် ဈေးကွက်တွင် ဝယ်လိုအားကောင်းမွန်နေကြောင်း သိရသည်။ မြေပဲစိုက်ပျိုးရာတွင် မြေပဲပင်များကို ကျင်းတူး၍ တစ်ကျင်းလျှင် နှစ်စေ့နှုန်းဖြင့် တစ်တောင်ခြား စိုက်ပျိုးကြပြီး သဲနှုန်းမြေပေါ်တွင် စိုက်ပျိုးပါက အထွက်နှုန်းပိုမိုကောင်းမွန်ကြောင်း သိရသည်။

            မြေပဲများအား နှုတ်ယူပြီးပါက မြေပဲတောင့်အစိုများကို ဈေးကွက်အတွင်းသို့ တင်ပို့ရောင်းချကြပါကြောင်း၊ ပုသိမ်မြို့ ဘူတာဈေးတွင် ရောင်းချနေသော မြေပဲတောင့်အစိုများ၏ ဈေးနှုန်းမှာ လက်ကားအနေဖြင့် (၁)ပြည်လျှင် (၃၀၀၀)ကျပ်၊ လက်လီဈေးအနေဖြင့် (၁)ပြည်လျှင် (၄၀၀၀)ကျပ်ဖြင့် ရောင်းချလျက်ရှိကြောင်း ဈေးသည်တစ်ဦးထံမှ သိရှိရသည်။ ဈေးသည်များမှ ရှမ်းမြေပဲများကို အစိမ်းရောင်းချသလို ပြုတ်၍လည်း ရောင်းချလျက်ရှိကြောင်း၊ မြေပဲကိုပြုတ်ပြီး ရောင်းချပါက (၁)ဗူးလျှင် (၁၀၀၀)ကျပ်နှုန်းဖြင့် ရောင်းချနေကြောင်း၊ ပြုတ်မြေပဲ (၁)ပြည်လျှင် (၆၀၀၀)ကျပ်ခန့် ရရှိသောကြောင့် ပိုမိုအကျိုးအမြတ်ရရှိကြောင်း သိရသည်။ မြေပဲစားသုံးခြင်းဖြင့် ပရိုတိန်းဓာတ်၊ မဂ္ဂနီစီယမ်ဓာတ်တို့ ပါဝင်ပြီး သွေးလည်ပတ်မှုကို ကောင်းမွန်စေကာ သွေးပေါင်ချိန်ကို ထိန်းညှိပေးကြောင်း၊ အဆစ်ရောင်ရမ်းခြင်းနှင့် နှလုံးရောဂါဖြစ်နိုင်ခြေကို လျော့ချပေးကြောင်း ကျန်းမာရေးအကျိုးကျေးဇူးများရှိသဖြင့် စားသုံးသူများ ဝယ်ယူစားသုံးသင့်ပါကြောင်း ရေးသားတင်ပြအပ်ပါသည်။

DOCA (ဧရာဝတီ)

     မန္တလေးတိုင်းအတွင်း သရက်ရာသီကာလ ဖေဖော်ဝါရီ၊ မတ်၊ ဧပြီလများတွင် သရက်သီး များ ကြီးရင့်၍ အစေ့ယှက်ကာမှည့်မည့်အချိန်တွင် ရာသီဥတုကြောင့် အသီးများကြွေကာ မရင့်မှည့်သည့် အတွက် အချိုဓါတ်မရရှိဘဲ အလေအလွင့်ဘဝမဖြစ်စေရန် သရက်သီးမျိုးစုံကို သရက်သီးဓါးပေါက် ပြုလုပ်၍ ဆားကြမ်းနှင့်နယ်ကာ ၂ ရက်မှ ၃ ရက်အထိ တောင်းများထဲတွင်ထည့်ကာ ရေစစ်ခြင်း ဆောင်ရွက်ပြီး ၂ ရက်မှ ၃ ရက်အ ထိရေစစ်ပြီးပါက ပီနံအိတ်ထဲသို့ သရက်သီးဓါးပေါက်များကို အထက် နှင့် အောက်လှည့်လှည်ခြင်း၊ အနည်းငယ်မွှေခြင်းများဆောင်ရွက်ပြီး ပီနံအိတ်အတွင်းထည့်၍ စင်မြင့် တွင် အပေါ်မှ ကျောက်များနှင့်ဖိကာထားရှိကြပါသည်။ ကျောက်ဖိထားသည့်သရက်သီးများ မာလာသည့် အခါ ပီနံအိတ်တွင်းမှထုတ်၍ စဉ့်အင်တုံကြီးများထဲတွင် လေလုံမိုးလုံသိပ်၍ အပေါ်မှ အင်ဖက် အထပ်ထပ် ဖြင့် စနစ်တကျထားရှိပြီး ယင်ကောင်နှင့်ကြွက်များ၏ အန္တရာယ်မှကင်းဝေးစေရန် ဘေးပတ်ဝန်းကျင်ကို လည်း စနစ်တကျသန့်သန့်ရှင်းရှင်းထားရှိရပါသည်။

           သရက်သီးဓါးပေါက်လုပ်ငန်းသည် မိသားစုတပိုင်တနိုင်လုပ်သည့်လုပ်ငန်းတစ်ခုဖြစ်ပြီး မတ်၊ ဧပြီ လများတွင် ပြုလုပ်သည့်ဓါးပေါက်ဆားသိပ်ထားသည့် သရက်ချဉ်များကို နိုဝင်ဘာ၊ ဒီဇင်ဘာလများတွင် စတင်၍ ဈေးကွက်တွင် စတင်ရောင်းချနိုင်ပြီဖြစ်ပါသည်။ ယခင်နှစ်ကပြုလုပ်သည့် သရက်သီးဓါးပေါက် သရက်ချဉ်များ ယခုနှစ်ရာသီတွင် ၁ ပိဿာလျှင် ၁၈၀၀၀ ကျပ်မှ ၂၀၀၀၀ ကျပ်ထိ ဈေးရရှိခဲ့ပြီး ယခင်နှစ် သရက်ရာသီတွင် စဉ့်အင်တုံ ၁၅ လုံးဖြင့် မိသားစုတပိုင်တနိုင်လုပ်ဆောင်သည့် သရက်ချဉ်လုပ်ငန်းမှ ပိဿာချိန် ၁၅၀ ကျော်ရရှိသည့်အတွက် မိသားစုဝင်ငွေကို တိုးစေပါသည်။

    ယခုနှစ် ရာသီကာလတွင်လည်း သရက်သီးဓါးပေါက်များ ယခင်နှစ်ကအတိုင်းပြုလုပ်ထားသည့် အတွက် တောင်သူလုပ်ငန်းအားလပ်ချိန်များတွင် သရက်သီးဓါးပေါက်လုပ်ငန်းမှ ဝင်ငွေရရှိစေသည့်အပြင် မိသားစုတပိုင်တနိုင်နှင့် ဝင်ငွေတိုးပွားစေသည့် သရက်သီးဓါးပေါက်လုပ်ငန်းသည် လုပ်ကိုင်သင့်သည့် လုပ်ငန်းတစ်ခုဖြစ်ပါကြောင်း တင်ပြလိုက်ရပါသည်။

DOCA(မန္တလေး)  

          အာလူးသည် မြန်မာနိုင်ငံအနှံ့အပြားတွင် စိုက်ပျိုးဖြစ်ထွန်းသော်လည်း အထူးသဖြင့် အပူချိန်အေးမြပြီး မြေဆီလွှာထက်သန်သော ရှမ်းပြည်နယ်နှင့် ချင်းပြည်နယ်ကဲ့သို့သော တောင်ပေါ်ဒေသများတွင် အဓိကစိုက်ပျိုးလျက်ရှိပါသည်။ ပုသိမ်မြို့နယ်သို့ ရောင်းချရန် အာလူးများကို အဆိုပါဒေသများမှ သယ်ယူပို့ဆောင်ရခြင်းကြောင့် သယ်ယူပို့ဆောင်ခွင့်ရ ကုန်ကျစရိတ်များနှင့် ဈေးကွက်ဝယ်လိုအားအပေါ် စျေးနှုန်းများ မူတည်နေပါသည်။

            ပုသိမ်မြို့နယ်အတွင်းရှိ ဈေးကြီးများ၊ ကုန်စုံဆိုင်များနှင့် ကျေးရွာဈေးများတွင် စုံစမ်းရရှိချက်အရ အာလူးစျေးနှုန်းမှာ တစ်ပိဿာလျှင် ကျပ် (၆၅၀၀) မှ (၈၀၀၀) ကျပ်ကြားရှိနေကြောင်း သိရှိရပါသည်။ အာလူးအရည်အသွေး (အရွယ်အစား၊ လတ်ဆတ်မှု) နှင့် ရာသီအလိုက် ရိတ်သိမ်းရောင်းချမှု အခြေအနေပေါ်မူတည်၍ စျေးနှုန်းအနည်းငယ် ကွာခြားမှုရှိနိုင်ပါသည်။ လက်ရှိဈေးကွက်တွင် ဝယ်လိုအား မှန်သင့်သလောက်ရှိပြီး ရောင်းအားလည်းရှိကြောင်း တွေ့ရှိရပါသည်။

DOCA (ဧရာဝတီ)