ပြည်တွင်းကုန်သွယ်မှုသတင်း

      လွိုင်ကော်မြို့၌ ၂၀၂၀ ပြည့်နှစ် ဖေဖော်ဝါရီလ ပထမပတ်တွင် စပါးဈေးနှုန်းမှာ ဧည့်မထ စပါး ၄၆ ပေါင် တင်း(၁၀၀)လျှင် ငွေကျပ် ၇၅၄၀၀၀/- ဖြစ်ပြီး တတိယပတ်တွင် ၇၄၁၅၀၀/- ကျပ် သို့ ကျဆင်းသွားပြီး ပြည်နယ်အတွင်း အရောင်းအဝယ် အေးနေကြောင်း စက်ပိုင်ရှင်တစ်ဦးထံမှ သိရှိရပါသည်။ ဧည့်မထ(ဒေသ) ရွှေရင်အေး(၁) ဆန်ဈေးနှုန်း မှာဖေဖော်ဝါရီလပထမပတ်တွင် တစ်အိတ်လျှင် ( ၃၅၀၀၀ )ကျပ်၊ တစ်ပြည်လျှင် (၁၆၀၀)ကျပ် ဖြစ်ပြီး ယနေ့ထိဆန်ဈေးနှုန်း တည်ငြိမ်နေကြောင်း သိရပါသည်။

ကယားပြည်နယ်

စားသုံးသူရေးရာဦးစီးဌာန

တောင်တွင်းကြီးကုန်စည်ဒိုင်ဖွင့်ပွဲကို (၈.၂.၂၀၂၀)နေ့တွင် တောင်တွင်းကြီးမြို ကုန်သည်များနှင့် စက်မှုလက်မှုလုပ်ငန်းရှင်များအသင်းရုံး၌ ကျင်းပခဲ့ရာ အမျိုးသားလွှတ်တော်ကိုယ်စားလှယ် စိုက်ပျိုးရေး၊ မွေးမြူရေးနှင့်ရေလုပ်ငန်းဖွံ့ဖြိုးတိုးတက်ရေးကော်မတီ ဥက္ကဌ ဦးအောင်ကြည်ညွန့်၊ ပြည်သူ့လွှတ်တော်ကိုယ်စားလှယ် ဦးမင်းသိန်း၊ တိုင်းအဆင့် ဌာနဆိုင်ရာများဖြစ်သော မကွေးတိုင်း ဒေသကြီး စားသုံးသူရေးရာဦးစီးဌာနမှ တိုင်းဒေသကြီးဦးစီးမှူး၊ ရင်းနှီးမြှုပ်နှံမှုနှင့်ကုမ္ပဏီများညွှန်ကြား မှုဦးစီးဌာန၊ စက်မှုကြီးကြပ်ရေးနှင့်စစ်ဆေးရေးဦးစီးဌာန၊ တောင်တွင်းကြီးမြို့နယ် အထွေထွေအုပ်ချုပ် ရေးဦးစီးဌာန မြို့နယ်အုပ်ချုပ်ရေးမှူးနှင့် မိတ်ဖက်ဌာနများ၊ မကွေး၊ အောင်လံကုန်စည်ဒိုင်မှ တာဝန် ရှိသူများ၊ တောင်တွင်းကြီးမြို့နယ် ကုန်သည်များနှင့်စက်မှုလက်မှုလုပ်ငန်းရှင်များအသင်းမှ အသင်းဝင် စုစုပေါင်း(၁၂၀)ဦးတို့ တက်ရောက်ခဲ့ကြပါသည်။

အဆိုပါအခမ်းအနားတွင် အမျိုးသားလွှတ်တော်ကိုယ်စားလှယ် ဦးအောင်ကြည်ညွန့်မှ လတ်တလောတက်ရောက်လာခဲ့သည့် ပုဂ္ဂလိကကဏ္ဍဖွံ့ဖြိုးတိုးတက်ရေးကော်မတီ၏(၁၂) ကြိမ်မြောက် အစည်းအဝေးတက်ရောက်ခဲ့မှုအခြေအနေများနှင့် ပေါင်းစပ်ညှိနှိုင်းဆောင်ရွက်ပေးခဲ့၊ ဖြေလျော့ ဆောင်ရွက်ပေးခဲ့ပြီး အခြေအနေများ၊ လယ်ယာကဏ္ဍဖွံ့ဖြိုးတိုးတက်ရေးအတွက် လေ့လာရေး ခရီးစဉ်သွားရောက်ခဲ့သည့် ဒေသများမှ ဆောက်ရွက်နေမှုများအား မိမိတို့ဒေသတွင် ဆောင်ရွက် သင့်ပါက အတုယူ ဆောင်ရွက်သင့်သည့်အချက်များနှင့် တောင်တွင်းကြီးကုန်စည်ဒိုင်အား ယခုထက် စည်းလုံးညီညွတ်စွာ ပိုမိုဖွံ့ဖြိုးတိုးတက်ရေးတို့ ဆောင်ရွက်ရန် ပြောကြားခဲ့ပြီး မကွေးတိုင်းဒေသကြီး၊ တိုင်းဒေသကြီးဦးစီးမှူး ဦးမြင့်ဝင်းမှ တောင်သူလယ်သမားများ စိုက်ပျိုးထုတ်လုပ်ရာတွင် အဓိက မှန်လေးမှန်ရှိသလို ကုန်စည်ဒိုင်များတွင်လိုက်နာရမည့် မှန်လေးမှန်ဖြစ်သည့် ပစ္စည်းမှန်၊ဈေးနှုန်းမှန်၊ အလေးချိန်မှန်၊ အရောင်းအဝယ်မှန်ဖြစ်ဖို့နှင့် ကုန်စည်ဒိုင်စည်းမျဉ်းစည်းကမ်းများ၊ အသင်းဖွဲ့ စည်းမျဉ်းစည်းကမ်း မှတ်တမ်းထားရှိရမည်ဖြစ်ကြောင်းနှင့် အသင်းသားများမှ စည်းလုံးညီညွတ်စွာ ဆောင်ရွက်နိုင်ရေးတို့အား ပြောကြားခဲ့ပြီး မြို့နယ်အုပ်ချုပ်ရေးမှူး ဦးအောင်မြင်မှ ကုန်သည်များနှင့် စက်မှုလက်မှုလုပ်ငန်းရှင်များအသင်းမှ မိမိတို့နှင့်နီးစပ်သည့် တောင်သူများအား စည်းရုံးချိတ်ဆက်၍တောင်တွင်းကြီးမြို့တွင် တဆက်တစပ်တည်း ပေါင်းစည်းလယ်ယာစနစ်များ ဖြစ်ထွန်းရေးအတွက် ဆောင်ရွက်မည်ဆိုပါက မိမိတို့ဌာနဆိုင်များမှ သက်ဆိုင်ရာကဏ္ဍအလိုက် ပေါင်းစပ်ဆောင်ရွက်ပေး သွားမည်ဖြစ်ကြောင်းနှင့် ယခုတောင်တွင်းကြီး  ကုန်စည်ဒိုင်ကိုလည်း စဉ်ဆက်မပြတ် တိုးတက် ဖွံ့ဖြိုးစေရန် ဆုမွန်ကောင်းများ တောင်းပါကြောင်း၊ သက်ဆိုင်ရာဌာနများနှင့်လည်း တွေ့ဆုံဆွေးနွေး မေးမြန်းပူးပေါင်းဆောင်ရွက်ရန် လိုပါကြောင်း ပြောကြားခဲ့ပြီး အခမ်းအနားအား ပထမပိုင်း အစီအစဉ်အဖြစ် ရုပ်သိမ်းခဲ့ပါသည်။

ထို့နောက် ဒုတိယပိုင်းတွင် တောင်တွင်းကြီးကုန်စည်ဒိုင်ရုံးခန်းသစ်အား တက်ရောက်လာ သော အမျိုးသားလွှတ်တော်ကိုယ်စားလှယ် ဦးအောင်ကြည်ညွန့်၊ စားသုံးသူရေးရာဦးစီးဌာန တိုင်းဒေသကြီးဦးစီးမှူး ဦးမြင့်ဝင်း၊ တောင်တွင်းကြီးမြို့နယ်အုပ်ချုပ်ရေးမှူး ဦးအောင်မြင်နှင့် တောင်တွင်းကြီးကုန်စည်ဒိုင် ဥက္ကဌ ဦးချိုတို့မှ ဖဲကြိုးဖြတ်ဖွင့်လှစ်ပေးခဲ့ကြောင်း သတင်းရရှိပါသည်။

မကွေးတိုင်းဒေသကြီး

စားသုံးသူရေးရာဦးစီးဌာန

   မွန်ပြည်နယ်အတွင်း ဒေသထွက်ကုန်ပစ္စည်းများ ရောင်းဝယ်ချိတ်ဆက်မှု ဆောင်ရွက်နိုင်ရေးအတွက် မော်လမြိုင်ကုန်စည်ဒိုင်ကို ၂၁.၁.၂၀၂၀ ရက်နေ့တွင် ဖွင့်လှစ်ခဲ့ပြီး အဆိုပါ ဖွင့်လှစ်ပြီးခဲ့သည့်ကုန်စည်ဒိုင်၏ လုပ်ငန်းဆောင်ရွက်မှုပိုမိုကောင်းမွန်စေရန်၊ ကုန်စည်ဒိုင်သီးနှံပေါက်ဈေးနှုန်းများကို အချိန်နှင့်တပြေးညီ ထုတ်ပြန်နိုင်ရန်၊ ဒေသထွက်ကုန်များ၏ ဈေးနှုန်း၊ ဈေးကွက်၊ ကုန်စည်စီးဆင်းမှု သတင်းအချက်အလက်များကို ထုတ်ပြန်နိုင်ရေးအတွက် ညှိနှိုင်းအစည်းအဝေးတစ်ရပ်ကို ၅.၂.၂၀၂၀ ရက်နေ့က မွန်ပြည်နယ် စားသုံးသူရေးရာဦးစီးဌာန၊ ပြည်နယ်ဦးစီးမှူးရုံး၌ ကျင်းပပြုလုပ်ခဲ့သည်။

         အဆိုပါ အစည်းအဝေးတွင် သီးနှံများ၊ ဒေသထွက်ကုန်များ၏ ဈေးနှုန်းများ၊ ဈေးကွက်သတင်းအချက်အလက်များကို ထုတ်ပြန်နိုင်ရန် သက်ဆိုင်ရာကုန်သည်အသင်းအဖွဲ့အသီးသီးမှ ဈေးနှုန်းများကို တာ၀န်ရှိသူများက လက်မှတ်ရေးထိုး၍ ကုန်စည်ဒိုင်သို့ ပေးပို့ရမည်ဖြစ်ပြီး ကုန်စည်ဒိုင်မှ သတင်းအချက်အလက်များကို စုစည်း၍ အပတ်စဉ် တနင်္လာနေ့မှ သောကြာနေ့အထိ နေ့စဉ်ထုတ်ပြန်ပေးသွားမည် ဖြစ်ကြောင်း သိရှိရပါသည်။

မွန်ပြည်နယ်

စားသုံးသူရေးရာဦးစီးဌာန

တမူးမြို့နယ်တွင် မှော်ဘီ၊ ဆင်းသုခ၊ ဆင်း - ၃ နှင့် ဧရာမင်းတို့သာအများဆုံး စိုက်ပျိုးပြီး စပါစျေး အနေဖြင့် မှော်ဘီစပါးတစ်တင်းလျှင် ​(၇၈၀၀/-)၊ ဆင်းသုခစပါးတစ်တင်းလျှင် ​(၇၀၀၀/- )၊ ဆင်း-၃စပါး တစ်တင်းလျှင် ​(၇၀၀၀/-)၊ ဧရာမင်းစပါးတစ်တင်းလျှင် ​( ၈၀၀၀/- ) ရှိကြောင်းနှင့် ယခင်လများနှင့် နှိုင်းယှဉ် ပါကစျေးနှုန်းအတက် အကျမရှိကြောင်း၊ ဆန်စျေးနှုန်းအနေဖြင့် မှော်ဘီဆန်တစ်အိတ်လျှင်  ( ၁၉၅၀၀/- )၊ ဧရာမင်းဆန် တစ်အိတ်လျှင်( ၂၁၀၀၀/- )၊ ဆင်း-၃ဆန်တစ်အိတ်လျှင် ( ၁၈၀၀၀/- ) နှင့် ဆင်းသုခ ဆန်တစ်အိတ်လျှင် (၁၇၅၀၀/-)ဖြစ်ပေါ်လျက်ရှိကာမှော်ဘီနှင့် ဆင်း-၃တို့သာ တစ်တင်းစျေ ( ၅၀၀/- ) ဝန်းကျင် စျေးတက်ခဲ့ကြောင်းနှင့် အိန္ဒိယဘက်မှ ငွေစျေးအတက်အကျပေါ် မူတည်၍ အရောင်းအဝယ်ဖြစ် လျက်ရှိ ကာတစ်ရက်လျှင် တင်းရေ ( ၂၀-၃၀ ) ခန့် တင်ပို့ရောင်းချလျက်ရှိကြောင်းသိရှိရပါသည်။

            ဆီစျေးကွက်အနေဖြင့် မြေပဲနှင့် နေကြာတို့သာကြိတ်ခွဲနေရပြီးမြေပဲတောင့်တစ်တင်းလျှင်( ၈၀၀၀/- )၊ နေကြာတစ်တင်းလျှင် (၈၀၀၀/-)ပေါက်စျေးရှိပြီးဆီစျေးနှုန်းမှာယခုလက်ရှိတွင် မြေပဲဆီတစ်ပိဿာလျှင် (၅၅၀၀/-)၊ နေကြာဆီတစ်ပိဿာလျှင် ( ၃၅၀၀/- ) နှင့် မြို့တွင်းစျေးကွက်သာ အရောင်းအဝယ်ဖြစ်ပေါ် နေပြီးကုန်သည်၊ စက်ပိုင်များထံတွင် လက်ကျန်နည်းပါးနေပြီဖြစ်ကြောင်းကုန်သည်တစ်ဦး၏ ပြောပြချက်အရ သိရှိခဲ့ရပါတယ်။

စွမ်းရည် ( တမူး )