ပြည်တွင်းကုန်သွယ်မှုသတင်း

          စားသုံးသူရေးရာဦးစီးဌာနသည် သွင်းကုန်အစားထိုးရန်၊ ပြည်ပပို့ကုန်တိုးမြှင့်တင်ပို့ရန်နှင့် အလားအလာကောင်းသည့် အမယ်သစ် သီးနှံတစ်မျိုးခြင်းအလိုက် သီးနှံဆိုင်ရာသတင်းအချက် အလက်များကို လေ့လာပြုစုတင်ပြလျက်ရှိပါသည်။

          ကျောက်ဖြူခရိုင်တွင် ဆီဝမ်းစာဖူလုံမှုမရှိ၍ နှစ်စဉ်စားသုံးဆီတန်ချိန် (၁၅၀၀)ကျော် တင်သွင်းနေရပါသည်။ သွင်းကုန်အစားထိုးနိုင်ရေးရည်ရွယ်၍ ကျောက်ဖြူခရိုင်၊ ရမ်းဗြဲမြို့နယ် ခွဆုံရွာနှင့် ရွှေရွာဟောင်းကျေးရွာများတွင် စိုက်ပျိုးလျှက်ရှိသော ဆောင်းမြေပဲသီးနှံဆိုင်ရာ သတင်း အချက်အလက်များကို ခရိုင်ဦးစီးမှူးနှင့်မြို့နယ်တာဝန်ခံတို့မှ ၂၁.၁.၂၀၂၂ ရက်နေ့တွင် ကွင်းဆင်းလေ့လာခဲ့ပါသည်။

          ယခုနှစ်ဆောင်းမြေပဲရာသီတွင် မြေပဲစိုက်ပျိုးနိုင်ရန်အတွက်  ခွဆုံရွာနှင့် ရွှေရွာဟောင်း ကျေးရွာမှ တောင်သူ(၁၅)ဦးသည် မိမိတို့ပိုင်ဆိုင်သည့် လယ်မြေဧက(၄၀)ကျော် ပေါ်တွင် မိုးကောင်း ရေသောက်ကောက်စောစပါးများ စိုက်ပျိုးကြသည်။ ကောက်စောစပါးများကို ရိတ်သိမ်းပြီး ရိုးပြတ် များကို ရှင်းလင်းကာ ကျန်နေသော မြေအစိုဓါတ်ပေါ်တွင် ထွန်(၅)စင်းစက်ဖြင့် ထိုးပြီး ဒီဇင်ဘာလ ပထမအပတ်တွင် စိုက်ပျိုးပြီးစီးခဲ့ပါသည်။ စိုက်ဧကစုစုပေါင်း(၃၅)ဧကကျော် ရှိပြီး တစ်ဦးလျှင် အနည်းဆုံး (၀.၅၀)ဧကမှ အများဆုံး (၃.၀၀)ဧက စိုက်ပျိုးသည်အထိပါဝင်ကြောင်း တွေ့ဆုံဆွေးနွေးခဲ့သည့် ပဲစိုက်တောင်သူ ဦးနီထွန်းအောင်ထံမှ သိရှိရပါသည်။ စိုက်ပျိုးသည့် မျိုးများအနေဖြင့် ဆင်းပဒေသာ (၅)၊(၆)နှင့်(၁၁)တို့ဖြစ်ပါသည်။ မျိုးတန်းဖိုးမှာ တစ်ဧကကျပ် (၁၀၀၀၀၀)ခန့် ကုန်ကျပါသည်။ သွင်းအားစုအနေဖြင့် သဘာဝမြေဩဇာ အီးအင်ဘိုကာချီနှင့် ဓာတ်မြေဩဇာများကို အချိုးကျသုံးစွဲပြီး ပိုးသတ်ဆေးနှင့်မှိုသတ်ဆေးတို့ကိုပါ သုံးစွဲရသည့် အတွက်ကြောင်း တစ်ဧကကုန် ကျစရိတ် ကျပ်(၂၀၀၀၀၀)ကျော်ခန့် ကုန်ကျ မည် ဖြစ်ပါသည်။ စံပြစိုက်ကွက်ဖြစ်သည့်အားလျှော်စွာ  Good Agriturail Practice(GAP) စနစ်ဖြင့် စိုက်ပျိုးနေပြီး စိုက်ပျိုးရေးဦးစီးဌာနမှ အနီးကပ်ပညာပေးလျှက်ရှိပါသည်။ အပင်သက်တမ်းမှ ရက်(၁၀၀)မှ (၁၀၅)ရက်ဖြစ်ပြီး မတ်လကုန်တွင် ရိတ်သိမ်းရမည်ဖြစ်ပါသည်။ သီးထပ်စိုက်ပျိုး မြေဖြစ်၍ ရိတ်သိမ်းခြင်းမှ ကျန်ရှိ သော ပင်စည်ဟောင်းနှင့် အမြစ်ဟောင်းများကို လယ်ကွင်းတွင်ပြန်လည် ထည့်သွင်းပေးခြင်း အားဖြင့် လာမည့်မိုးရာသီတွင် သဘာဝမြေဩဇာ အဖြစ် ရရှိမည်ဖြစ်၍ များစွာအကျိုးရှိပါသည်။ ပန်တိုင်းအထွက်နှုန်းမှာ (၁)ဧက တင်း(၅၀) ထွက်ရှိလာပါက ကာလပေါက်ဈေးဖြင့် တွက်ချက်ပါက ကျပ်(၁၀)သိန်းခန့် ရရှိမည်ဖြစ်ပါသည်။ စိုက်ခင်း အောင်မြင်ပါက တောင်သူများအနေဖြင့်လည်း လူမှုစီးပွားဘဝမြင့်မားလာမည်ဖြစ်ပြီး ဒေသအတွက် လည်း အာဟာရတန်ဖိုးမြင့်မားသည့် မြေပဲဆီများကို စားသောက်ရမည်ဖြစ်ပါကြောင်း တင်ပြအပ် ပါသည်။

DOCA(ရခိုင်)

              ဧရာဝတီတိုင်းဒေသကြီး၊ ပုသိမ်ခရိုင်၊ ရေကြည်မြို့နယ်တွင် စားသုံးသူရေးရာဦးစီးဌာန အနေဖြင့် ပြည်တွင်းကုန်သွယ်မှုဖွံ့ဖြိုးတိုးတက်စေရန်အတွက် ဧရာဝတီပေါ်ဆန်းခေတ်ပြန်လည် ဆန်းသစ်ပေါ်ထွန်းလာစေရန် တိုင်းဒေသကြီးအစိုးရအဖွဲ့၏ လမ်းညွှန်ချက်ဖြင့် သက်ဆိုင်ရာဌာန ဆိုင်ရာများပေါင်းစပ်၍ ရေကြည်ပေါ်ဆန်းစပါးစိုက်ပျိုးထုတ်လုပ် တင်ပို့ရောင်းချလျှက်ရှိသော တောင်သူများ၊ ကုန်သည်များ၊ စက်ပိုင်များနှင့် ပေါင်းစည်းဆောင်ရွက်လျက်ရှိပါသည်။

              ရေကြည်မြို့နယ်အတွင်းရှိ ပေါ်ဆန်းစိုက်ပျိုးသော တောင်သူများအနေဖြင့် ယခင်ကာလက မိရိုးဖလာနည်းဖြင့်သာစိုက်ပျိုးခဲ့ခြင်းဖြင့် သူတစ်ကွက်ငါတစ်ကွက်စိုက်ပျိုးခြင်းနှင့် အရည်အသွေးမမှီ သော ဒေသမျိုးများစိုက်ပျိုးကြသည့်အတွက် ဈေးကွက်မရှိဘဲ တောင်သူများမှာ စိုက်ပျိုးစရိတ် ကာမီရုံသာ အကျိုးအမြတ်ဖြစ်ထွန်းမှုနည်းပါးစွာရရှိခဲ့ပါသည်။  ယခုအခါ ကန်ထရိုက်လယ်ယာစနစ် Contract Famming ဖြင့် စိုက်ပျိုးခဲ့ခြင်းကြောင့် ဈေးကွက်သို့ဝင်ရောက်နိုင်ခဲ့ပါသည်။

              ရေကြည်မြို့နယ်၊ နွားရေတိုက်ကျေးရွာအုပ်စုရှိ ဧက ၁၆၀၀ အပါအဝင် တစ်စပ်တစ်ဆက် တည်းရှိသော ပန်းဇံကွင်း၊ ကွင်းကြီး၊ မကျည်းသဟာ စသည့်ကျေးရွာအုပ်စုများတွင် Contract Famming စနစ်ဖြင့် တောင်သူ(၃၆၇)ဦးမှ ပေါ်ဆန်းစိုက်ဧက (၂၆၃၈)ဧကအား စိုက်ပျိုးရေးဦးစီး ဌာနမှ အနီးကပ်ကြီးကြပ်၍ စိုက်ပျိုးထုတ်လုပ်လျှက်ရှိပါသည်။ ဧရာဝတီပေါ်ဆန်း(ဘေးကြား)အား ဈေးကွက်တွင်ဖြစ်ပေါ်လာစေရေးအတွက် စိုက်ပျိုးရေးဦးစီးဌာနမှ ၂၀၁၇-၂၀၁၈ခုနှစ်မှစတင်၍ ကြီးကြပ် ဆောင်ရွက်ပေးလျက်ရှိပြီး မျိုးကောင်း မျိုးသန့်များထုတ်ပေးခြင်း၊ မြေဆီလွှာအားထိမ်းသိမ်းပြုပြင် ခြင်း၊ ဓါတ်မြေဩဇာကျွေးခြင်းများကို စနစ်တကျရှိစေရေးအတွက် ကြီးကြပ်ဆောင်ရွက်ပေးလျှက် ရှိပါသည်။ ထို့အပြင် လိုအပ်သည့်လုပ်ငန်းများကို စိုက်ပျိုးရေးသုတေသနဌာနစိတ်မှ စမ်းသပ် ဖြည့်ဆည်းပေးလျှက် အရည်အသွေးပြည့်မီ၍ အထွက်တိုးစေရေးအတွက် ဆောင်ရွက်ပေးလျှက်ရှိရာ တောင်သူများမှာ ဗဟုသုတများတိုးတက်လာပြီး စိတ်ပါဝင်စားစွာစိုက်ပျိုးမှုကြောင့် တစ်နှစ်ထက် တစ်နှစ် အရည်အသွေးပြည့်မီ၍ ရွှေဘိုပေါ်ဆန်းမွှေးကဲ့သို့ အရည်အသွေးပြည့်မီလာခဲ့ပါသည်။

              ယခင်နှစ်က ဧကပျမ်းမျှအထွက်နှုန်းမှာ(၇၉)တင်းနှုန်းထွက်ရှိပြီး ယခုနှစ်တွင် တစ်ဧကပျမ်းမျှ အထွက်နှုန်း(၈၀)တင်းခန့်ထွက်ရှိခဲ့ပါသည်။ ပေါ်ဆန်းစပါးဈေးနှုန်းအနေဖြင့် ယခင်နှစ်စပါးတစ်တင်း အခြောက်(၅၀)ပေါင်လျှင် ၁၂၅၀၀ကျပ်ရရှိခဲ့ပြီး ယခုနှစ်တွင် စပါးတစ်တင်းအခြောက်(၅၀)ပေါင်လျှင် ၁၃၂၀၀ ကျပ်ဈေးရရှိခဲ့ပါသည်။ ယခုနှစ် တစ်ဧကပျမ်းမျှအထွက်တင်း(၈၀) တင်းဖြစ်ပြီး စပါးတင်း(၁၀၀)လျှင် (၁၃၂၀၀၀၀)ကျပ်ရရှိပြီး တစ်ဧကစိုက်ပျိုးထုတ်လုပ်မှုကုန်ကျစရိတ်မှာ (၅၂၅၅၀၀) ကျပ်ကုန်ကျသည့်အတွက် တောင်သူအကျိုးအမြတ်အနေဖြင့် (၅၃၀၅၀၀)ကျပ် ရရှိမည်ဖြစ်ပါသည်။ ဈေးကွက်အနေဖြင့် ဒေသတွင်း ကုန်သည်၊ စက်ပိုင်များအပြင်၊ ပုသိမ်၊ မြောင်းမြ ဈေးကွက်နှင့် အညာ ဈေးကွက်အထိ လာရောက်ဝယ်ယူလျှက်ရှိပါသည်။

              စားသုံးသူရေးရာဦးစီးဌာနအနေဖြင့် စီးပွားရေးဦးတည်ချက်(၄)ရပ်နှင့်အညီ ကြိုးပမ်း ဆောင်ရွက်လျက်ရှိရာ စိုက်ပျိုးရေးအခြေခံသည့် စီးပွားရေးကဏ္ဍအား ဖွံ့ဖြိုးတိုးတက်စေရေး ထွက်ရှိလာသည့်အရည်အသွေးပြည့်မီသော ရေကြည်ပေါ်ဆန်းမွှေးအား ပြည်တွင်း ဈေးကွက်ရရှိစေရေးနှင့်ပြည်ပသို့တင်ပို့ ရောင်းချနိုင်ရေး ဒေသကုမ္ပဏီများ၊ ဆန်စက်ပိုင်ရှင်များ၊ သက်ဆိုင်ရာဌာနများနှင့် ပေါင်းစပ်၍ ဆောင်ရွက်လျက်ရှိပြီး Milling Quality နှင့် Eating Quality အဆင့်မီကောင်းမွန်စေရန်၊ ခေတ်မှီအခြောက်ခံစက်များနှင့်သိုလှောင်ရုံခြင်း၊ ကြိတ်ခွဲခြင်း၊ ထုတ်ပိုးခြင်းများကို ကြီးကြပ်ဆောင်ရွက်ပေးလျှက် ရှိပါသည်။

              ဧရာဝတီတိုင်းအစိုးရအဖွဲ့အနေဖြင့် ဧရာဝတီတိုင်းဒေသကြီးအတွင်း အမှန်တကယ် အရည်အသွေးကောင်းမွန်သော ပေါ်ဆန်းစပါးအား ဈေးကွက်အတွင်း Branded ဖော်ဆောင်၍ ဈေးကွက်ထိုးဖောက်နိုင်ရန်အတွက် တိုင်းဒေသကြီးအဆင့်ရေကြည်ပေါ်ဆန်း ကြီးကြပ်ကွပ်ကဲရေးအထူးအဖွဲ့အား ဖွဲ့စည်းဆောင်ရွက်လျှက်ရှိသည်။ သို့ဖြစ်ပါ၍ ရေကြည်ပေါ်ဆန်းမွှေး ဈေးကွက်အခိုင်အမာရရှိလာပါက တောင်သူများအနေဖြင့် ဧရာဝတီပေါ်ဆန်း တစ်ခေတ်ဆန်းသစ်လာပြီး ဝင်ငွေအခွင့်အလမ်းများစွာရရှိနိုင်မည် ဖြစ်ကြောင်း တင်ပြလိုက်ရပါသည်။

DOCA(ဧရာဝတီ)

          စားသုံးသူရေးရာဦးစီးဌာန၊ မကွေးတိုင်းဒေသကြီး၊ တိုင်းဒေသကြီးဦးစီးမှူး၏ လမ်းညွှန်မှုဖြင့် ပခုက္ကူခရိုင်ဦးစီးမှူးရုံးမှ ခရိုင်ဦးစီးမှူး ဦးဝေဠုအောင်နှင့် ဝန်ထမ်းများသည် ပြည်တွင်းဒေသ ထွက်ကုန်ချည်ထည်များအား ပြည်ပဈေးကွက်သို့ ပိုမိုထိုးဖောက်နိုင်ရန်ရည်ရွယ်၍ ပြည်တွင်း SMEs ကုန်စည်ပြပွဲများနှင့် ပြည်ပကုန်စည်ပြပွဲများသို့ သွားရောက်ပြသနေသည့် ပခုက္ကူမြို့၊ အမှတ်(၁၁) ရပ်ကွက်၊ (၆)လမ်းတွင်တည်ရှိသော “ဂဠုန်မင်းညီနောင်” ချည်ထည်အမျိုးမျိုး ထုတ်လုပ် ရောင်းဝယ်ရေးသို့ ဇန်နဝါရီလ(၂၀)ရက်နေ့၊ နံနက်(၁၁:၀၀)အချိန်တွင် ကွင်းဆင်းလေ့လာခဲ့ပါသည်။

          “ဂဠုန်မင်းညီနောင်” ချည်ထည်အမျိုးမျိုးထုတ်လုပ်ရောင်းဝယ်ရေး လုပ်ငန်းရှင် ဒေါ်နီလာမှ  မိမိတို့ ချည်ထည်လုပ်ငန်းမှထုတ်လုပ်သော ၁/၇ (၂)ပင်လိမ် ဝါချည်အတိုင်၊ အဖောက်ရက်လုပ် ထားသော  ဝါချည်စောင်ကို  ကနေဒါနိုင်ငံ၊ ကီလိုဝါ(Kelowa)မြို့ရှိ မိတ်ဆွေတစ်ဦးမှ ကနေဒါနိုင်ငံ အတွင်းဖြန့်ဖြူးရောင်းချနိုင်ရန်ဆက်သွယ်လာပါကြောင်း၊ ပြည်တွင်းဈေးကွက်မှာ ဝါချည်စောင်(၁) ထည်လျှင်(၂၆၀၀၀)ကျပ်ရောင်းချရပြီး ပြည်ပသို့ဈေးကွက်ပေါက်သွားလျှင် ပို၍ဈေးကောင်းရနိုင် သောကြောင့် ပြည်ပဈေးကွက်ကိုထိုးဖောက်ရန်အတွက် နမူနာအဖြစ် ချည်ထည်များကို ဈေးနှုန်း သက်သာစွာဖြင့် တင်ပို့လိုပါကြောင်း၊ ကုန်ကျစရိတ်သက်သာစေရန် ပခုက္ကူမြို့ စာတိုက်မှ တင်ပို့နိုင် ရန်စုံစမ်းသည့်အခါ ပြည်ပနိုင်ငံ(၆)နိုင်ငံကိုသာ တင်ပို့နိုင်ပြီး ကနေဒါနိုင်ငံမပါဝင်သည်ကိုသိရှိရပါ ကြောင်း၊ အခြားနည်းလမ်းဖြင့် ဝါချည်စောင်များကို တင်ပို့လျှင် သယ်ယူခကုန်ကျစရိတ် မြင့်မားပြီး ဈေးကွက်မှာ ရောင်းချရန်အဆင်မပြေသောကြောင့် စာတိုက်မှသာ တင်ပို့လိုပါကြောင်း၊ ကနေဒါ နိုင်ငံသို့ နမူနာအဖြစ် ဝါချည်စောင်အထည်(၅၀)ခန့်တင်ပို့ရန်ခန့်မှန်းထားပါကြောင်း၊ ပြည်ပ ဈေးကွက်တွင် ချည်ထည်များဖြန့်ဖြူးရောင်းချမည့်သူနှင့် ချိတ်ဆက်ထားပြီးဖြစ်ပါကြောင်း၊ ဈေးကွက်ပေါက်သွားလျှင် များများထုတ်လုပ်နိုင်ပြီး မိမိတို့သာမက အခြားချည်ထည် လုပ်ငန်းရှင် များကပါထုတ်လုပ်ရောင်းချလာနိုင်မည်ဖြစ်၍ နမူနာအဖြစ် ဝါချည်စောင်များကို အခက်အခဲမရှိ ဈေးနှုန်းချိုသာစွာဖြင့် တင်ပို့လိုပါကြောင်း ပြောကြားလာပါသည်။

          ဆက်လက်၍ ချည်ထည်ယက်လုပ်မှုအကြောင်းကို မေးမြန်းခဲ့ရာကုန်ကြမ်းဗမာချည်များကို မန္တလေးမြို့စက်ရုံမှဝယ်ယူကြောင်း၊ သူဌေးဝါဒစောင်နှင့်ချည်စောင်အမျိုးမျိုးကို ထုတ်လုပ်ရောင်းချ ပြီး ကြာချည်နှင့်ဝါချည်ထည်များကိုလည်း ရက်လုပ်ရောင်းချကြောင်း၊ ကြာချည်ကို စလင်း၊ ဝက်သည်းကန်ဒေသမှ တစ်ပိဿာ(၄သိန်း)(၅သိန်း)ကျပ်ဖြင့် ဝယ်ယူရပြီး အင်းလေးဒေသမှပေါင်း ပြီးသားကြာချည်များကို တစ်ပိဿာ(၈သိန်း) (၉သိန်း)ကျပ်ပေး၍ဝယ်ယူရကြောင်း၊ ကြာချည်  တဘက် တစ်ထည်ကို (၉၀၀၀၀)ကျပ် မှ (၂၈၀၀၀၀)ကျပ်ထိ ရောင်းချရကြောင်း၊ ကြာချည်ဖြင့် ရက်လုပ်သော အင်္ကျီစများကိုလည်း ထုတ်လုပ်ရောင်းချကြောင်း၊ ကြာချည်များသည် ပဒုမ္မာကြာမှ ထုတ်လုပ်ရပြီး ကြာချည်ထည်များမှ ကြာညိုပန်းရနံ့မှာ မည်သည့်အခါမျှ ပျက်ပြယ်မသွားသည်ကို တွေ့ရပါကြောင်း၊ ကြာချည်ထည်များနှင့် ဝါချည်ထည်များသည် Hand Made များဖြစ်သောကြောင့် ရောင်းအားကောင်းသော ချည်ထည်များဖြစ်ကြောင်း သိရပါသည်။

          ဆက်လက်၍ လုပ်ငန်းရှင်မှ ဂျပန်နိုင်ငံနှင့် ထိုင်းနိုင်ငံသို့လည်း  ချည်စောင်များကို တင်ပို့ ရောင်းချရကြောင်း၊ တရုတ်နိုင်ငံ၊ဂျပန်နိုင်ငံများသို့လည်း ကုန်စည်ပြပွဲများ လိုက်လံပြသ၍ ရောင်းချ ရပါကြောင်း၊ အရည်အသွေးကောင်းပြီး လှပသော ချည်စောင်များကိုပို၍ တင်ပို့ရောင်းချရပြီး ချည်ထည်များကို Export လိုင်းနှင့် ပြည်တွင်းဟိုတယ်လိုင်းကို အဓိကထား၍ရောင်းချရပါကြောင်း၊ ငှက်ပျောချည်ကိုလည်းစက်များဖြင့် ထုတ်လုပ်နိုင်ရန် စီစဉ်ဆောင်ရွက်လျက်ရှိပါကြောင်း၊ ဆိုးဆေး အနေဖြင့် သဘာဝဆိုးဆေးကို အဓိကထားအသုံးပြုပြီး ညောင်ခေါက်၊ သရက်ခေါက်၊ မဲနယ်ရွက်၊ ဧကရဇ်ရွက်၊ ငှက်ပျောသီး၊ ဇီးဖြူသီး၊ ဂျုတ်သီး၊ မုံသီး စသည့်အပင်များမှ ထုတ်လုပ်ကြောင်း၊ ချည်ထည်များတွင် ဓာတုဆိုးဆေးကိုအနည်းငယ်သာ အသုံးပြုပြီး သဘာဝဆိုးဆေးကိုသာ အဓိက ထားအသုံးပြုကြောင်း၊ မိမိကိုယ်တိုင်ဦးဆောင်၍ အလုပ်သမားများဖြင့် သဘာဝဆိုးဆေးကို တွင်တွင်ကျယ်ကျယ် ထုတ်လုပ်ကြောင်း၊ အလုပ်သမားဦးရေမှာ(၉၀)ဦးခန့်ရှိကြောင်း၊ ပြည်ပ ဈေးကွက်သို့ ထိုးဖောက်နိုင်လျှင်ဒေသတွင်း အလုပ်အကိုင်အခွင့်အလမ်းများ ပို၍ပေးနိုင်မည်ဖြစ် ကြောင်း၊ ထို့ကြောင့်ကနေဒါနိုင်ငံ၊ ကီလိုဝါမြို့သို့ ဝါချည်ထည်များ ဈေးကွက်ထိုးဖောက်ရန်အတွက် နမူနာတင်ပို့မှုအပိုင်းတွင် စီးပွားရေးနှင့်ကူးသန်းရောင်းဝယ်ရေးဝန်ကြီးဌာနမှ တက်နိုင်သမျှ ကူညီပေးစေလိုကြောင်း လုပ်ငန်းရှင်ဒေါ်နီလာမှ ပြောကြားခဲ့ပါသည်။

          ခရိုင်ဦးစီးမှူးမှ ပြည်တွင်းဝါနှင့်ဝါချည်ထည်ကဏ္ဍ ပြည်ပဈေးကွက် ထိုးဖောက်နိုင်ရန်အတွက် သက်ဆိုင်ရာဌာနများနှင့် ချိတ်ဆက်ဆောင်ရွက်ပေးမည်ဖြစ်ကြောင်း၊ ကနေဒါနိုင်ငံသို့ ချည်ထည်များ နမူနာအဖြစ်တင်ပို့ရန် အခက်အခဲဖြစ်သည်ကိုသိရှိရသည့်အတွက် အထက်ဌာနသို့ တင်ပြပေးသွား မည်ဖြစ်ကြောင်း၊ မိမိတို့ဝန်ကြီးဌာနတွင်လည်း နိုင်ငံအလိုက် စီးပွားရေးသံမှူးများ ခန့်အပ်ထားပါ ကြောင်း၊ ဌာနအကြီးအကဲများသို့ ဆက်လက်တင်ပြ၍ စီးပွားရေးသံမှူးများနှင့် ချိတ်ဆက်နိုင်ရေး၊ ပြည်ပဈေးကွက်ထိုးဖောက်နိုင်ရေး ပူးပေါင်းဆောင်ရွက်ပေးသွားမည်ဖြစ်ကြောင်း သတင်းရရှိပါ သည်။

DOCA(မကွေး)

        စားသုံးသူရေးရာဦးစီးဌာန၊ မအူပင်ခရိုင်ဦးစီးမှူး ဦးဇော်မင်း၊ ညောင်တုန်းမြို့နယ်ဦးစီးမှူး ဦးအောင်လွင်နှင့် UMFCCI ဗဟိုအလုပ်မှုဆောင် ဦးအောင်ကြည်စိုးတို့သည် ညောင်တုန်းမြို့နယ် ထိပ်ဝလေးကျေးရွာ ဟင်းသီးဟင်းရွက် စိုက်ပျိုးထုတ်လုပ်သူ ဦးကျော်ဟိန်း၏နေအိမ်၌ (၂၃.၁.၂၀၂၂)နေ့ နံနက်တွင် စိုက်ပျိုးထုတ်လုပ်နေသော ဟင်းသီး ဟင်းရွက်များ Famer Market ဖော်ဆောင်၍ ဈေးကွက်ရရှိရေး တွေ့ဆုံဆွေးနွေးခဲ့ပါသည်။

          အဆိုပါ ဆွေးနွေးပွဲသို့ စားသုံးသူရေးရာဦးစီးဌာနမှ ခရိုင်ဦးစီးမှူး၊ မြို့နယ်ဦးစီးမှူး စိုက်ပျိုးသူ ဆောင်သူ(၇)ဦးနှင့် UMFCCI ဗဟိုအလုပ်မှုဆောင် ဦးအောင်ကြည်စိုးတို့သည် ဆွေးနွေးရာ UMFCCI ဗဟိုအလုပ်မှုဆောင်အဖွဲ့ဝင် ဦးအောင်ကြည်စိုးမှ သမရိုးကျစိုက်ပျိုးထုတ်လုပ်သည်မှ GMP၊ GAP နည်းစနစ်များဖြင့် စိုက်ပျိုးထုတ်လုပ်ပြီး ဈေးကွက်ရရှိရေးကို စတင်ဆွေးနွေးပြီး တောင်သူတစ်ဦးမှ ဟင်းသီးဟင်းရွက်ဈေးကွက်တည်ငြိမ်ရေး သွင်းအားစုများဈေးနှုန်းသက်သာရေး စိုက်ပျိုးရေး နည်းပညာများ ရရှိရေးတို့ကို တင်ပြလာမှုအပေါ် UMFCCI ဗဟိုအလုပ်မှုဆောင်၊ ခရိုင်ဦးစီးမှူးနှင့် မြို့နယ်ဦးစီးမှူးတို့မှ သဘာဝမြေဩဇာများ အစားထိုးသုံးစွဲရေး စိုက်ပျိုးဧကများကို စာရင်းများ ပြုစု၍ ဈေးကွက်တည်ငြိမ်မှုအတွက် GMP၊ GAP နည်းများဖြင့် စိုက်ပျိုး၍ Famer Market ထူထောင်ရေးတို့ကို အလေးပေးဆွေးနွေးခဲ့ကြောင်း သတင်းရရှိပါသည်။

DOCA(ဧရာဝတီ)

            မန္တလေးတိုင်းဒေသကြီး၊ မိတ္ထီလာမြို့နယ်၊ မြို့သစ်(၁)ရပ်ကွက်ရှိ တစ်ပိုင်တစ်နိုင် အိမ်တွင်းလက်မှု လုပ် ငန်းဖြစ်သော ပလပ်စတစ်ခြင်းယက်လုပ်ခြင်းလုပ်ငန်းသို့ (၁၈.၁.၂၀၂၂) ရက်နေ့၊ နံနက် (၁၀) နာရီခန့်အချိန်တွင် မိတ္ထီလာခရိုင်၊ စားသုံးသူရေးရာဦးစီးဌာန၊ ဒု-ခရိုင်ဦးစီးမှူးနှင့် ဝန်ထမ်းများမှ ကွင်းဆင်းတွေ့ဆုံမေးမြန်း ဆွေးနွေး ခဲ့ပါသည်။

            မန္တလေးတိုင်းဒေသကြီး၊ မိတ္ထီလာမြို့နယ်၊ မြို့သစ်ရက်ကွက် တစ်ခုလုံးသည် ပလပ်စတစ်ခြင်းယက်လုပ် ခြင်းလုပ်ငန်းကို ဘိုးဘွားအစဉ်အလာမပျက် မိရိုးဖလာလုပ်ငန်းအဖြစ်လုပ်ကိုင်ကြပါသည်။ ကုန်ကြမ်းဖြစ်သော ပလပ်စတစ်ကြိုးခွေကို တောင်ကြီးမြို့၊ မန္တလေးမြို့နှင့် ပခုက္ကူမြို့များမှ ဝယ်ယူရရှိပါသည်။ ပလပ်စတစ်ကြိုးခွေ (အဖြူ၊အနက်၊ ပန်းရောင်)တစ်ခွေကို (၁၃၅၀၀)ကျပ်နှင့် အခြားအရောင်ကြိုးခွေတစ်ခွေလျှင် (၁၂၅၀၀)ကျပ်ဖြင့် ဝယ်ယူရကြောင်း သိရှိရပါသည်။ ပလပ်စတစ်ခြင်း ယက်လုပ်သူများသည် ပလပ်စတစ်ခြင်းများကို အကြီးဆိုဒ် (၂၇ ပင်ဖြင့် ယက်လုပ်ခြင်း)၊ အလတ်ဆိုဒ် (၂၅ ပင်ဖြင့် ယက်လုပ်ခြင်း)၊ ပုံမှန်ဆိုဒ် (၂၃ ပင်ဖြင့်ယက်လုပ်ခြင်း)၊ အသေးဆိုဒ်(၂၁ပင်ဖြင့်ယက်လုပ်ခြင်း)နှင့် အလှခြင်းများကိုလည်းမှာယူလိုသူစိတ်ကြိုက် ယက်လုပ်ပေးကြောင်း ပလပ်စတစ်ခြင်းယက်လုပ်ရာတွင် လုပ်သား(၁)ဦးသည် (၂၇) ပင်ခြင်း(၁)လုံးအား (၁)နာရီကြာ ယက်လုပ်ရပြီး တစ်နေ့လျှင် (၁၀)လုံးယက်လုပ်နိုင်ကြောင်း၊ ငှားရမ်းယက်လုပ်ရာတွင် လုပ်အားခအနဖြင့် (၂၇)ပင်ခြင်းတစ်လုံး လျှင် (၅၀၀)ကျပ် စျေးနှုန်းဖြင့် ယက်လုပ်ကြောင်းသိရှိရပါသည်။ ပလပ်စတစ်ကြိုးခွေတစ်ခွေလျှင် (၂၇)ပင်နှင့် ယက်လုပ်သောခြင်းကြီး (၁၅)လုံးခန့်ရရှိပါသည်။

            ပလပ်စတစ်ခြင်းအပျော့ အကြီးဆိုဒ် (၁၅၀၀)ကျပ်၊ အလတ်ဆိုဒ် (၁၄၀၀)ကျပ်၊ ပုံမှန်ဆိုဒ် (၁၂၀၀) ကျပ် နှင့် အသေးဆိုဒ် (၁၀၀၀)ကျပ်၊ ခြင်းအမာ အကြီးဆိုဒ်(၃၅၀၀)ကျပ်၊ အလတ်ဆိုဒ်(၃၀၀၀) ကျပ်၊ ပုံမှန်ဆိုဒ် (၂၅၀၀) ကျပ်၊အသေးဆိုဒ်(၂၀၀၀)ကျပ်နှင့် အလှခြင်းများကိုမှာယူသည့် ဒီဇိုင်းပုံစံပေါ်မူတည်၍ စျေးအမျိုးမျိုးရှိ ကြောင်းသိရှိရပါသည်။ ပလပ်စတစ်ခြင်းများကို တောင်တွင်းကြီးမြို့၊မော်လမြိုင်မြို့နှင့် မိတ္ထီလာ မြို့များအတွင်း အများဆုံးဖြန့်ဖြူးရောင်းချရပြီး၊ Online မှလည်းမှာယူနိုင်ကြောင်း၊ ပလပ်စတစ်ခြင်းယက်လုပ်သူ များအနေဖြင့် နေပူထဲတွင် လုပ်ကိုင်ရန်မလိုဘဲ နေအိမ်တွင်းမှာပင် တစ်ပိုင်တစ်နိုင်ဖြစ်စေ၊ စီးပွားဖြစ် ဖြစ်စေ လုပ်ကိုင်နိုင်သော အိမ်တွင်းမှုစီးပွားရေးလုပ်ငန်းဖြစ်ပါကြောင်း  သတင်းရေးသားတင်ပြလိုက်ရပါသည်။

DOCA(မန္တလေး)