ပြည်တွင်းကုန်သွယ်မှုသတင်း

ဧရာဝတီတိုင်းဒေသကြီး၊ ခရိုင်/ မြို့နယ်အသီးသီးမှ ဆန်နှင့် ဆန်ကွဲကြိတ်ခွဲထွက်ရှိပြီး အခြားဒေသများသို့ (စီးထွက်)လျက်ရှိသည်။ ဧရာဝတီတိုင်းဒေသကြီးများမှ ရန်ကုန်သို့ ဆန်စီးထွက်မှုမှာ ၂၀၂၄ခုနှစ်၊ အောက်တိုဘာလ ၁လတွင်း မအူပင်မြို့နယ်မှ ဆန်အတင် (၄၀၇၅)အိတ်၊ ပန်းတနော်မြို့နယ်မှ ဆန် (၁၀၃၂၄)အိတ်၊ ညောင်တုန်းမြို့နယ်မှ (၅၃၈၁၉)အိတ်၊ ဓနုဖြူမြို့နယ်မှ (၁၄၉၀၆)အိတ်၊ အခြားသော ဧရာဝတီတိုင်းတွင်းမြို့နယ်များမှ ဆန်တင်ပို့မှု (၂၆၁၅၂၈)အိတ်၊ စုစုပေါင်းဆန်အိတ် (၃၄၄၆၅၂) အိတ်ဖြစ်ပြီး ပျမ်းမျှ တန်အားဖြင့် ၁၇၂၃၂.၆ တန်စီးထွက်ခဲ့ကြောင်း မြို့နယ်စစ်ဆေးရေးစာရင်းများအရသိရသည်။
ထို့ပြင် ဆန်ကွဲကို ရန်ကုန်မြို့သို့ တင်ပိုမှုအနေဖြင့် မအူပင်မြို့နယ်မှ ဆန်ကွဲ (၆၈၀)အိတ်၊ ပန်းတနော်မြို့နယ်မှ (၂၅၅၀)အိတ်၊ ဓနုဖြူမြို့နယ်မှ ဆန်ကွဲ (၃၆၅၅)အိတ်၊ ညောင်တုန်းမြို့နယ်မှ ဆန်ကွဲ (၈၀၈၆)အိတ်နှင့် အခြားမြို့နယ်များမှ ဆန်ကွဲ(၄၃၀၁၁) အိတ်၊ စုစုပေါင်းဆန်ကွဲ (၅၇၉၈၂)အိတ်၊ ပျမ်းမျှ တန်အားဖြင့် ၂၈၉၉.၁ တန်စီးထွက်ခဲ့ကြောင်းသိရသည်။ ဆန်/ ဆန်ကွဲများကို ရန်ကုန် ရွှေပြည်သာ၊ လှိုင်သာယာ၊ မရမ်းကုန်း၊ အလုံဆိပ်ကမ်း၊ ကြီးမြင်တိုင်ဆိပ်ကမ်း၊ သီလဝါစက်မှုဇုန်တို့ကိုသာတင်ပိုကြောင်းသိရသည်။
အဆိုပါ စီးထွက်မှုမှာ ၂၀၂၄ခုနှစ်၊ စက်တင်ဘာလနှင့် အောက်တိုဘာလစီးထွက်မှုကိုနှိုင်းယှဉ်ပါက စီးထွက်မှု ဆန်အိတ်(၆၅၅၀၀)အိတ်၊ တန်အားဖြင့် ၃၂၇၀ တန်ပိုမိုတင်ပို့ကြောင်းနှင့် ဆန်ကွဲ အိတ်(၄၅၆၉)အိတ်၊ တန်အားဖြင့် ၂၂၈.၄၅ တန်ပိုမိုစီးထွက်ခဲ့ကြောင်းသိရှိရပါသည်။
DOCA(ဧရာဝတီ)

         မန္တလေးတိုင်းဒေသကြီးအတွင်းမှာဆိုလျှင် မြင်းခြံခရိုင်၏ ဆောင်းကြက်သွန်နီမှာ အကြီးစတစ်ပိဿာလျှင် (၃၆၀၀)ကျပ်မှ(၄၂၀၀)ကျပ်၊ အလတ်စတစ်ပိဿာလျှင်(၂၉၀၀)ကျပ်မှ (၃၄၀၀)ကျပ်၊ အသေးစတစ်ပိဿာလျှင်(၂၆၀၀)ကျပ်မှ(၃၀၀၀)ကျပ်ဖြင့် အမျိုးအစားလိုက် အရောင်းအဝယ်ဖြစ်လျက်ရှိပါသည်။ ယခင်တစ်ပတ်တွင် ဆောင်းကြက်သွန်နီ အကြီးစတစ်ပိဿာလျှင် (၃၅၀၀)ကျပ်မှ(၄၀၀၀) ကျပ်၊ အလတ်စတစ်ပိဿာလျှင်(၂၈၀၀)ကျပ်မှ(၃၃၀၀)ကျပ်၊ အသေးစတစ်ပိဿာလျှင်(၂၅၀၀) ကျပ်မှ(၂၇၀၀)ကျပ်များဖြင့် အသီးသီးအရောင်းအဝယ်ဖြစ်ခဲ့ကြောင်းသိရသည်။ ယခုတစ်ပတ်တွင် ယခင်တစ်ပတ်ထက် ကြက်သွန်နီအရွယ်အစားအလိုက် တစ်ပိဿာလျှင်(၁၀၀)ကျပ်မှ(၃၀၀)ကျပ်ထိမြင့်တက်ခဲ့ပြီး အရည်အသွေး၊ အရွယ်အစားပေါ်မူတည်၍ ဈေးနှုန်းများလဲကွာခြားမှုရှိကြောင်းသိရသည်။

           စိုက်ပျိုးထွက်ရှိရာ ကျေးရွာများမှ မြို့ပေါ်ရှိပွဲရုံများသို့ နေ့စဉ်ကုန်ချိန်ပိဿာ(၅၀၀၀၀) ကျော်မှ(၇၀၀၀၀)ကျော်ခန့် ဝင်ရောက်လျက်ရှိပြီး ဈေးကွက်တင်ပို့မှုအနေဖြင့် မန္တလေး၊ ရန်ကုန်၊ နေပြည်တော်နှင့်မော်လမြိုင်မြို့များသို့(၆)ဘီး၊ (၁၂)ဘီး ကားဖြင့် တင်ပို့လျက်ရှိပြီး၊ ယခုတစ်ပတ်တွင် တင်ပို့မှုအနေဖြင့် ကုန်ချိန်(၆၅၁၆၄) ပိဿာကျော်၊ တန်ချိန်အားဖြင့်(၄၃၃)တန်ခန့် တင်ပို့ခဲ့ကြောင်း၊ ယခင်တစ်ပတ်တင်ပို့မှု အနေဖြင့် (၂၃၈၂၁၉) ပိဿာကျော်၊ တန်ချိန်အားဖြင့်(၃၈၉)တန်ခန့် တင်ပို့နိုင်ခဲ့ကြောင်းသိရသည်။ တင်ပို့နိုင်မှုအနေဖြင့် ယခင်တစ်ပတ်ထက် ယခုတစ်ပတ်တွင် ဆောင်းကြက်သွန်နီကုန်ချိန်ပိဿာ (၂၆၉၄၅)ပိဿာ၊ တန်ချိန်အားဖြင့်(၄၄)တန်ခန့် ပိုမိုတင်ပို့နိုင်ခဲ့ကြောင်း မြင်းခြံမြို့ရှိ ကြက်သွန်နီကုန်သည်တစ်ဦးထံမှ သိရှိရသည်။

           မြင်းခြံခရိုင်မှ ထွက်ရှိသော ဆောင်းကြက်သွန်နီခေါ် နွေကြက်သွန်နီကို နှစ်စဉ် ဒီဇင်ဘာလနှင့် ဇန္နဝါရီလတို့တွက် စတင်စိုက်ပျိုးပြီး၊ မတ်လနှင့်ဧပြီလတို့တွင် ရိတ်သိမ်းကြောင်းသိရသည်။ ထွက်ပေါ်ချိန်မှစ၍ (၈)လကြာ သိုလှောင်နိုင်၍ ရှေ့လာမည့် ဒီဇင်ဘာလတွင် ဆောင်းကြက်သွန်နီများ ဈေးကွက်အတွင်းမှ(ရာသီကုန်ဆုံးတော့မည်) ထွက်ခွာတော့မည်ဖြစ်ပါသဖြင့် ဈေးနှုန်းများအနည်းငယ်မြင့်တက်လျက်ရှိကြောင်းသိရှိရပါသည်။

DOCA(မန္တလေး)

မကွေးတိုင်းဒေသကြီး၊ အထက်မင်းလှမြို့နယ်၊ ထန်းကိုင်းကျေးရွာ၌ ဖူးစားပြောင်း (အဖြူ)မျိုးကို ၂၀၂၄ခုနှစ်၊ အောက်တိုဘာလ(တတိယပတ်)တွင် တောင်သူ(၁၅)ဦးက စိုက်ဧက (၂၅)ဧကခန့် စိုက်ပျိုးထားကြောင်းသိရသည်။
စိုက်ပျိုးရာတွင် ထွန်ကြောင်းဆွဲအစေ့ချစနစ်ဖြင့် စိုက်ပျိုးကြောင်း၊ မျိုးကို အထက်မင်းလှမြို့ရှိ စိုက်ပျိုးရေးဆေးဆိုင်များမှဝယ်ယူပြီး (၁)ဘူးလျှင် ကျပ်(၅၈၀၀၀)ပေးရကြောင်း၊ (၁)ဧကလျှင် မျိုး (၆)ဘူးခန့်ကုန်ကျကြောင်း၊ စိုက်ပျိုးပြီး(၂)လခွဲအကြာတွင် ခူးဆွတ်ရကြောင်း၊ ကုန်ကျစရိတ်အနေဖြင့် ယခင်နှစ်တွင် (၁)ဧကလျှင် မျိုးဖိုး၊ လုပ်အားခနှင့် အခြားသွင်းအားစုစရိတ်အပါအဝင် စုစုပေါင်း ကျပ်(၄) သိန်းခန့်ကုန်ကျခဲ့သော်လည်း ယခုနှစ်တွင် သွင်းအားစုစရိတ်မြင့်တက်လာ၍ ကျပ်(၅)သိန်းခွဲထိကုန်ကျကြောင်း၊ ယခင်နှစ် အထွက်နှုန်းအနေဖြင့် (၁)ဧကလျှင် အဖူးရေ (၅၀၀၀)ထိထွက်ရှိခဲ့ပြီး ဈေးနှုန်းအနေဖြင့် (၁)ဖူးလျှင် လက်ကားဈေး ကျပ်(၃၀၀)ရရှိခဲ့ကြောင်း၊ ဈေးကွက်အနေဖြင့် မင်းလှ-သရက်ကားလမ်းဘေးရှိ ပြောင်းဖူးဒိုင်သို့ တင်သွင်းရောင်းချကြောင်း၊ ယခင်နှစ် အကျိုးအမြတ်အနေဖြင့် (၁)ဧကလျှင် ကျပ်(၉)သိန်းကျော်ရရှိခဲ့ကြောင်း ထန်းကိုင်းကျေးရွာနေ ပြောင်းစိုက်တောင်သူတစ်ဦးထံမှသိရှိရပါသည်။
DOCA(မကွေး)

    စစ်ကိုင်းတိုင်းဒေသကြီး၊ စားသုံးသူရေးရာဦးစီးဌာန၊ မုံရွာခရိုင်ဦးစီးမှူးရုံးသည် စားသုံးသူကာကွယ်ရေးလုပ်ငန်းများကို ဆောင်ရွက်လျက်ရှိပြီး စားသုံးသူများ နေ့စဉ်ဝယ်ယူသုံးစွဲလျက်ရှိသည့် အခြေခံစားသောက်ကုန်များ၏ ဈေးနှုန်း၊ ဈေးကွက်အခြေအနေများကို လေ့လာ၍ နေ့စဉ်၊ အပတ်စဉ်၊ လစဉ်အထက်အဆင့်ဆင့်သို့ တင်ပြဆောင်ရွက်လျက်ရှိကြောင်း သိရသည်။

    စားသုံးသူများ နေ့စဉ်ဝယ်ယူအသုံးပြုလျက်ရှိသည့် အာလူးသီးများကို ရှမ်းပြည်နယ်၊ အောင်ပန်းမြို့မှတစ်ဆင့် မုံရွာမြို့ရှိ လက္ကားကုန်သည်များမှတစ်ဆင့် မုံရွာခရိုင်အတွင်းရှိ လက်လီ အရောင်းဆိုင်များသို့ ဖြန့်ဖြူးရောင်းချပေးလျက်ရှိသည်။

     ၂၀၂၄ ခုနှစ်၊ နိုဝင်ဘာလ ပထမပတ်အတွင်း မုံရွာမြို့၊ ကန်သာယာဈေးရှိ အာလူးသီးဈေးနှုန်းများမှ  အာလူးသီး (၁) ပိဿာလျှင်  ၆၀၀၀ ကျပ်၊ ၈၀၀၀ ကျပ်တို့ဖြင့် ရောင်းချကြောင်း၊ အာလူးသီးဈေးနှုန်းများမြင့်တက်နေသော်လည်း ပုံမှန်အရောင်းအဝယ်ဖြစ်လျက်ရှိကြောင်း သိရပါသည်။

DOCA(စစ်ကိုင်း)

               မန္တလေးတိုင်းဒေသကြီး၊ ကျောက်ဆည်ခရိုင်တွင် သီးနှံမျိုးစုံစိုက်ပျိုးဖြစ်ထွန်းပြီး ရာသီအလိုက်သီးနှံမျိုးစုံစိုက်ပျိုးလျက်ရှိပါသည်။ စိုက်ပျိုးသောသီးနှံများအနက် ဆီထွက်သီးနှံတစ်မျိုးဖြစ်သည့်နှမ်းသီးနှံကိုလည်းစိုက်ပျိုးကြပါသည်။ ဆောင်းနှမ်းကို မြစ်သားမြို့နယ်တွင် (၂၉၀၉) ဧကစိုက်ပျိုးထားရှိကြောင်း ခရိုင်ကြေးတိုင်နှင့် မြေစာရင်းဦးစီးဌာန၏စာရင်းများအရ သိရှိရပါသည်။ အများဆုံးစိုက်ပျိုးသောမျိုးများမှာ နှမ်းနက်နှင့် နှမ်းညိုမျိုးများကို အများဆုံးစိုက်ပျိုးကြပါသည်။ ဆောင်းနှမ်းကို  အောက်တိုဘာလနှင့် နိုဝင်ဘာလများတွင် စတင်စိုက်ပျိုးကြပြီး ဇန်နဝါရီလနှင့်ဖေဖော်ဝါရီလများတွင် ထွက်ရှိမှာဖြစ်ကြောင်း၊ ဆောင်းနှမ်းစိုက်ပျိုးမှုအနေဖြင့် မျိုး၊ သွင်းအားစု၊ လုပ်သားခအပါအဝင် စုစုပေါင်းကုန်ကျစရိတ် (၃၅၀၀၀၀) ကျပ်ခန့်ကုန်ကျကြောင်း၊ အများဆုံးစိုက်ပျိုးသောရွာများမှာ သပြေသာရွာ၊ တမာပင်ရွာနှင့်ဟင်းလျှာကန် ရွာများတွင် အများဆုံးစိုက်ပျိုးထားရှိပါသည်။ ဆောင်းနှမ်းကိုဘောင်ကြောင်းပေးစနစ်ဖြင့် စိုက်ပျိုးကြပါသည်။ ဆောင်းနှမ်းထွက်ပေါ်ချိန်တွင် တစ်ဧကလျှင်  (၁၀ - ၁၁ )တင်းခန့် ထွက်ရှိနိုင်မည်ဖြစ်ကြောင်း၊ နှမ်းဈေးနှုန်းအနေဖြင့် နှမ်းညိုတစ်တင်းလျှင် (၁၀၀၀၀၀/-)ကျပ်၊ နှမ်းနက်တစ်တင်းလျှင် (၉၂၀၀၀/-)ကျပ်၊ နှမ်းဖြူတစ်တင်းလျှင်(၁၃၇၀၀၀/-)ကျပ်ဈေးနှုန်းများဖြင့် ရောင်းဝယ်လျှက်ရှိပါသည်။ နှမ်းပေါ်ချိန်တွင် မြို့ပေါ်ပွဲရုံများသို့သွားရောက်ရောင်းချကြကြောင်း၊ ပွဲရုံများမှ မန္တလေးနှင့် ရန်ကုန်မြို့များသို့ တင်ပို့ရောင်းချကြောင်း၊   ဆောင်းနှမ်းများရိတ်သိမ်းချိန်တွင်လည်း ဈေးနှုန်းများကောင်းမွန်ပါက တောင်သူများအကျိုးအမြတ်ပိုမိုရရှိနိုင်မည်ဖြစ်ကြောင်း နှမ်းစိုက်ပျိုးသောတောင်သူတစ်ဦး၏ ပြောကြားချက်အရသိရှိရပါသည်။

DOCA(မန္တလေး)