ပြည်တွင်းကုန်သွယ်မှုသတင်း

             ပြည်ခရိုင်၊ ပြည်မြို့နယ်အတွင်းရှိ မှော်ဇာအုပ်စုတွင် ကျေးရွာခွဲ (၁၅)ရွာရှိပြီး ဟင်းသီးဟင်းရွက် စိုက်ပျိုးထုတ်လုပ်သည့် ကျေးရွာ (၅)ရွာရှိရာ ရာသီအလိုက် ဟင်းသီးဟင်းရွက်များအပြင် မုန်လာဥ၊ ကြက်သွန်နီ၊ သခွားသီး၊ နှင့်ပြောင်းဖူးများကိုလည်း စိုက်ပျိုးကြောင်းသိရှိရပါသည်။ စိုက်ပျိုးထွက်ရှိသည့် ရာသီအလိုက်ဟင်းသီးဟင်းရွက်များကို မှော်ဇာအုပ်စုရှိ ဟင်းသီးဟင်းရွက်အဝယ်ဒိုင်များသို့ သွားရောက်ရောင်းချကြပါသည်။ ဟင်းသီးဟင်းရွက်အဝယ်ဒိုင်များမှာ ဟင်းသီး/ ဟင်းရွက် စိုက်ပျိုးသောတောင်သူများထံမှ အခင်းပြတ်ဝယ်ယူခြင်းဖြင့်လည်းကောင်း၊ မျိုး၊ စိုက်စရိတ် ကြိုတင်ငွေပေးခြင်းဖြင့်လည်းကောင်း ဝယ်ယူကြသလို ဟင်းသီးဟင်းရွက်ဒိုင်များသို့ လာရောက်ရောင်းချကြပါသည်။ ကုန်စိမ်းဒိုင်များက   တောင်သူများထံမှ သီးနှံပေါက်စျေးအလိုက်ဝယ်ယူ၍ ပြည်မြို့အတွင်းရှိဈေးကွက်များ၊ အခြားနယ်မြို့များ၊ သီရိမင်္ဂလာစျေးနှင့် ဒညင်းကုန်းစျေးများသို့တင်ပို့ရောင်းချကြောင်း လေ့လာသိရှိရပါသည်။

            ပြည်ဈေးကွက်အတွင်းရောင်းချသော ဟင်းသီးဟင်းရွက်စျေးနှုန်းများမှာ မုန်လာဥ(၅)လုံးပါ တစ်တွဲလျှင် (၅၀၀)ကျပ်၊ ပြောင်းဖူးတစ်ဖူးလျှင် (၃၀၀)ကျပ်၊ ကြက်သွန်နီတစ်ပိဿာလျှင် (၂၅၀၀) ကျပ် ၊ သခွားသီးတစ်လုံးလျှင် (၂၀၀) ကျပ်နှင့် နံနံပင်တစ်စည်းလျှင် (၅၀၀)ကျပ်ဖြင့် ရောင်းချလျက်ရှိပါသည်။ ဟင်းသီးဟင်းရွက်သည် စားသုံးသူများ၏ နေ့စဉ်ဝယ်ယူ ချက်ပြုတ်စားသောက်သည့် သီးနှံများဖြစ်သဖြင့် ဟင်းသီးဟင်းရွက်စိုက်တောင်သူများအနေဖြင့် နေ့စဉ်ဝင်ငွေလည်းရ၊ စားသုံးသူများမှာလည်း ရာသီစာသီးနှံမျာကို ၁၂လရာသီသုံးစွဲနိုင်မည်ဖြစ်ကြောင်း လေ့လာသိရှိရပါသည်။

DOCA(ပဲခူး)

           ပြည်ဈေးကွက်တွင် ၂၀၂၄ခုနှစ်၊ မေလတွင်ရောင်းချခဲ့သော ဘိလပ်မြေဈေးများမှာ ကြံ့နီ တစ်အိတ်လျှင် ၁၇၀၀၀ကျပ်၊ Alpha တစ်အိတ်လျှင် ၁၄၀၀၀ကျပ်၊ အပါချီတစ်အိတ်လျှင် ၁၄၅၀၀ ကျပ်ဖြင့် ဈေးများမြင့်တက်လာခဲ့ရာမှ ယခုအပတ်ဖြစ်သော အောက်တိုဘာလတတိယပတ်တွင် ဘိလပ်မြေဈေးများအနည်းငယ်ကျဆင်းလာခဲ့ပါသည်။ ဈေးနှုန်းများအနေဖြင့် ကြံ့နီတစ်အိတ်လျှင် ၁၁၀၀၀ကျပ်၊ Alpha တစ်အိတ်လျှင် ၁၀၈၀၀ကျပ်၊ အပါချီတစ်အိတ်လျှင် ၁၀၀၀၀ကျပ်ဖြင့် ရောင်းချလျှက်ရှိသဖြင့် ဆောက်လုပ်ရေးရာသီမဟုတ်ခြင်းဖြစ်သည့်အတွက် ဈေးနှုန်းများကျဆင်းလာကြောင်း သိရှိရပါသည်။

DOCA(ပဲခူး)

       တောင်ငူခရိုင်၊ ဖြူးမြို့တွင် ယခင်စက်တင်ဘာလက မတ်ပဲ(ပိဿာ ၃၀ ဝင်အိတ်) တစ်အိတ်လျှင် ၁၉၂၀၀၀ ကျပ်ရှိရာမှ ယခုအောက်တိုဘာလ တတိယအပတ်တွင် တစ်အိတ်လျှင် ၁၅၉၀၀၀ ကျပ်ရှိသဖြင့် တစ်အိတ်လျှင် ၃၃၀၀၀ ကျပ် ဈေးနှုန်းကျဆင်းပါသည်။

           ပဲတီစိမ်းမှာ ယခင်လက (ပိဿာ ၃၀ ဝင်အိတ်) တစ်အိတ်လျှင် ၁၁၅၀၀၀ ကျပ်ရှိရာမှ ယခုအပတ်တွင် တစ်အိတ်လျှင် ၁၃၅၀၀၀ ကျပ်ရှိသဖြင့် တစ်အိတ်လျှင် ၂၀၀၀၀ ကျပ် ဈေးတက်ပါသည်။

              ပဲလွန်းဖြူမှာ အရောင်းအဝယ်မဖြစ်ကြောင်း ဖြူးမြို့ ကမ္ဘာကြည်ပွဲရုံမှ သိရှိရပါသည်။

DOCA(ပဲခူး)

          တောင်ငူမြို့နယ်အတွင်းရှိ ဈေးများ၊ ရပ်ကွက်များရှိဆိုင်များအပြင် ကျေးရွာများရှိ ကုန်စုံဆိုင်များတွင်လည်း စားသုံးသူပြည်သူများအနေဖြင့် ဟင်းတစ်မယ်အဖြစ် အလွယ်တကူကြော်၍ လည်းကောင်း၊ ပြုတ်၍လည်းကောင်း၊ ချက်၍လည်းကောင်း သုံးစွဲနိုင်သည့် ကြက်ဥနှင့်ဘဲဥများ ရောင်းချလျက်ရှိပါသည်။ ကြက်ဥ၊ ဘဲဥများကို တောင်ငူမြို့နယ်အတွင်းရှိ မွေးမြူရေးခြံများမှ ရရှိသည့်အပြင် အခြားဒေသများမှလည်း တင်ပို့ရောင်းချလျက်ရှိပါသည်။

               ယခင်လက ကြက်ဥများမှာ အလုံး/ အကြီး၊ အသေးပေါ်မူတည်၍ ကြက်ဥတစ်လုံးလျှင် ၃၇၀ ကျပ်မှ ၃၉၀ ကျပ်ရှိရာမှ ယခုလတွင် တစ်လုံးလျှင် ၃၆၅ ကျပ်မှ ၃၈၅ ကျပ်အထိ ရှိသဖြင့် တစ်လုံးလျှင် ၅ ကျပ်ခန့် ဈေးနှုန်းကျဆင်းပါသည်။

                ဘဲဥမှာလည်း အလုံးအကြီးအသေးအပေါ်မူတည်၍ တစ်လုံးလျှင် ၄၅၀ ကျပ်မှ ၅၀၀ ကျပ် အထိဖြင့် ဈေးနှုန်းတည်ငြိမ်နေပါသည်။ ကြက်ဥ၊ ဘဲဥများသည် ချက်ပြုတ်ရလွယ်ကူပြီး ဈေးနှုန်းလည်းသင့်တင့်သည့်အပြင် အဟာရလည်းကြွယ်သဖြင့် ရောင်းအားကောင်းကြောင်း ကြက်ဥ၊ ဘဲဥ အရောင်းဆိုင်များမှ သိရှိရပါသည်။

DOCA(ပဲခူး)

            တောင်ငူမြို့တွင် ကြက်သွန်နီမှာ ယခင်စက်တင်ဘာလနောက်ဆုံးပတ်က တစ်ပိဿာ လျှင် အသေး၂၀၀၀ ကျပ်၊ အလတ် ၂၃၀၀ ကျပ်၊ အကြီး ၂၅၀၀ ကျပ်ရှိရာမှ ယခုအပတ်တွင် တစ်ပိဿာ လျှင် အသေး ၂၃၀၀ ကျပ်၊ အလတ် ၂၆၀၀ ကျပ်၊ အကြီး ၃၀၀၀ ကျပ်ရှိသဖြင့် တစ်ပိဿာလျှင် ၃၀၀ ကျပ်မှ ၅၀၀ ကျပ် အထိ ဈေးနှုန်းမြင့်တက်ပါသည်။

            ကြက်သွန်ဖြူမှာ တစ်ပိဿာလျှင် အသေး ၁၀၀၀၀ ကျပ်၊ အလတ် ၁၂၀၀၀ ကျပ်၊ အကြီး ၁၃၀၀၀ ကျပ်ဖြင့် ဈေးနှုန်းတည်ငြိမ်နေပါသည်။

          ငရုပ်သီးခြောက် အပု/ အရှည်မှာ ယခင်စက်တင်ဘာလ နောက်ဆုံးပတ်က တစ်ပိဿာလျှင် ၁၀၀၀၀ ကျပ်မှ ၁၅၀၀၀ ကျပ်ရှိရာမှ ယခုအောက်တိုဘာလ တတိယအပတ်တွင် တစ်ပိဿာလျှင် ၁၀၀၀၀ ကျပ်မှ ၁၂၀၀၀ ကျပ်အထိရှိသဖြင့် ဈေးနှုန်းအနည်းငယ်ကျဆင်းပါသည်။

    ငရုပ်သီးခြောက်အပွမှာ ယခင်စက်တင်ဘာလနောက်ဆုံးအပတ်က တစ်ပိဿာလျှင် ၂၀၀၀၀ ကျပ်မှ ၂၂၀၀၀ ကျပ်ရှိရာမှ ယခုအောက်တိုဘာလ တတိယအပတ်တွင် တစ်ပိဿာလျှင် ၁၈၀၀၀ ကျပ်မှ ၂၀၀၀၀ ကျပ်အထိဖြင့် ဈေးနှုန်း ၂၀၀၀ကျပ် ကျဆင်းကြောင်း တောင်ငူမြို့ရှိ ကုန်စုံဆိုင်များမှ သိရှိရပါသည်။

DOCA(ပဲခူး)