ကုန်သွယ်မှုသတင်းများ

    မကွေးတိုင်းဒေသကြီး၊ ပခုက္ကူခရိုင်၊ ကြက်သွန်နီဈေးကွက်သို့ ၂၀၂၄ခုနှစ်၊ ဒီဇင်ဘာလ (ပထမပတ်)တွင် ကုန်ချိန်ဝင်ရောက်မှု နည်းလာပြီး တစ်ရက်လျှင် ကြက်သွန်နီ(အဟောင်း) ပိဿာ (၂)သောင်းခန့် ဝင်ရောက်ပြီး တစ်ပတ်အတွင်း ကုန်ချိန်ပိဿာ (၁)သိန်းခွဲခန့် ကြက်သွန်နီပွဲရုံဈေးကွက်သို့ ဝင်ရောက်အရောင်းအဝယ်ဖြစ်လျက်ရှိကြောင်း၊ ဒေသတွင်းစိုက်ပျိုးမှုများသော လိပ်ခြံ၊ ရေပုတ်၊ ချတောက်၊ ရွာသစ်၊ ကံတွင်း၊ အနောက်ကမ်းဖြူကျေးရွာများအပြင် အခြားမြို့နယ်များမှလည်း ဝင်ရောက်အရောင်းအဝယ်ဖြစ်လျက်ရှိကြောင်း သိရသည်။

     မကွေးတိုင်းဒေသကြီး၊ ပခုက္ကူမြို့နယ် ကျွန်းရွာများဖြစ်ကြသော ကျွန်းဦး၊ ကျွန်းညို၊ မြင်းကျွန်း၊ သင်္ဘောကုန်းကျွန်း၊ ဘောလုံးခုံ၊ လိပ်ခုံး ကျွန်းများတွင် ထောပတ်ခရမ်းသီးများကို ဧကများစွာ စိုက်ပျိုး ကြပါသည်။ ပခုက္ကူမြို့မဈေးနှင့် အမှတ်(၂)ဈေးတို့တွင် ထောပတ်ခရမ်းသီးများ စတင်ဝင်ရောက် အရောင်းအဝယ်ဖြစ်လျက်ရှိပြီး ၂၀၂၄ခုနှစ်၊ ဒီဇင်ဘာလ(ပထမပတ်)တွင် ထောပတ်ခရမ်းသီးများ တစ်နေ့လျှင် ပိဿာချိန် (၅၀၀ မှ ၁၀၀၀ ထိ) ဝင်ရောက်လျက်ရှိကြောင်း သိရသည်။