ပြည်ပကုန်သွယ်မှုသတင်းများ

ဘင်္ဂလားဒေ့ရှ်နိုင်ငံမှ Awami League ပါတီခေါင်းဆောင်များ၏ နယူးဒေလီမြို့သို့ သွားရောက်ခဲ့သည့် ခရီးစဉ်အတွင်း ဘာစမာတီမဟုတ်သောဆန်များအား အိန္ဒိယနိုင်ငံထံမှ ဝယ်ယူတင်သွင်းမှုကို ပြန်လည်စတင်နိုင်ရန် သဘောတူညီမှုရရှိခဲ့ကြောင်း သိရှိရပါသည်။

ကမ္ဘောဒီးယားသည် ယခုနှစ်၏ ပထမခုနစ်လအတွင်း ဆန်တန်ချိန် စုစုပေါင်း ၃၆၂၇၀၈ တန် တင်ပို့နိုင်ခဲ့ပြီး ဝင်ငွေ ဒေါ်လာ ၂၅၃ သန်းခန့် ရရှိခဲ့ကြောင်း ၇-၈-၂၀၂၃ ရက်နေ့၊ တနင်္လာနေ့တွင် တင်ပြခဲ့သည့် ကမ္ဘောဒီးယားဆန်အဖွဲ့ချုပ်၏ အစီရင်ခံစာအရ သိရသည်။

ထိုင်းနိုင်ငံအနေဖြင့် အိန္ဒိယ၏ ဆန်တင်ပို့မှု ပိတ်ပင်ခဲ့ခြင်းကြောင့် အကျိုးအမြတ်ရရှိနေပြီး ပြည်တွင်းစားသုံးရန်နှင့် ပြည်ပတင်ပို့ရန်အတွက် လုံလောက်စွာထွက်ရှိသဖြင့် ဆန်တင်ပို့မှုကို ရပ်တန့်ရန် အကြောင်းမရှိဟု ထိုင်းအစိုးရက ပြောကြားခဲ့ပါသည်။

ဩစတေးလျနိုင်ငံထံမှ ဘာလီ (Barley) ခေါ် မုယောစပါးများ တင်သွင်းမှုအပေါ် ၂၀၂၀ ပြည့်နှစ်၌ ပထမဆုံးအကြိမ် စတင်ချမှတ်ကောက်ခံခဲ့သော ကြီးလေးသည့် စုပုံတင်သွင်းမှု အခွန်အား ဖယ်ရှားမည်ဟု တရုတ်နိုင်ငံက ထုတ်ဖော်ပြောကြားခဲ့အပြီးတွင် ဩစတေးလျရှိ ကောက်ပဲသီးနှံတင်ပို့သည့် အချို့သောဇုန်ကြီးများ၌ မုယောစပါးဈေးနှုန်းများသည် ၁၀% ခန့်အထိ တစ်ဟုန်ထိုး မြင့်တက်ခဲ့ကြောင်း သိရှိရသည်။

အိန္ဒိယနိုင်ငံတွင် ဟင်းသီးဟင်းရွက်ဈေးနှုန်းများ မြင့်မားလျက်ရှိမှုအပေါ် စားသုံးသူများက ပဲမျိုးစုံကို ပိုမိုတိုးမြှင့်စားသုံးလာကြသည့်အပြင် အိန္ဒိယပြည်တွင်း၌ စိုက်ပျိုးထုတ်လုပ်မှု လျော့ကျနေသည့် အခြေအနေတွင် ပဲမျိုးစုံတင်ပို့သည့်နိုင်ငံများ၏ အခွင့်အရေးရယူရန် ကြိုးပမ်းမှုများက နိုင်ငံတကာ ပဲမျိုးစုံဈေးနှုန်းများကို မြင့်တက်စေပြီး အိန္ဒိယပဲမျိုးစုံ လက်ကားဈေးကွက်၌ ရက်သတ္တတစ်ပတ်အတွင်း ၂% မှ ၃% အထိ ဈေးနှုန်းမြင့်တက်မှုကို ဖြစ်ပေါ်စေခဲ့ကြောင်း Economic Times သတင်းဌာနက ဩဂုတ်လ ၉ ရက်နေ့တွင် ဖော်ပြခဲ့သည်။