ကယားပြည်နယ်၊ လွိုင်ကော်မြို့တွင် ဝါးမျှစ်ဆွတ်ခူးသော ရာသီကျရောက်နေသည့် မိုးရာသီစတင်ဝင်ရောက်လာပြီဖြစ်သည့်အတွက် မျှစ်နုလေးများထွက်ပေါ်လာသည့်အချိန်ဖြစ်ပါသည်။ မျှစ်သည် မိုးရာသီတွင်ပေါ်ထွက်ပြီး လူကြိုက်များသောအစားအစာဖြစ်ပါသည်။ မျှစ်နုကိုချိုး၍ မျှစ်စပ်လုပ်စားကြသည့်အပြင် ပြုတ်၍လည်းစားကြပါသည်။ မျှစ်စပ်ကို ယခုအချိန်တွင် ဈေးကွက်ထဲ၌ ရောင်းချသဖြင့် စားသုံးသူများသည် ပေါ်ဦးပေါ်ဖျားဝယ်ယူ၍စားသုံးကြပါသည်။ ဆေးပင်သုတေသနပြုချက်အရ ဝါးပင်မှ ဝါးရွက်သည် သွေးအတွင်းရှိ ကိုလက်ထရောကိုကျစေကာ ကိုယ်လက်လှုပ်ရှားမှုပြုလုပ်သူများအတွက်လည်း အထူးကောင်းမွန်စေပါသည်။ မျှစ်သည် ပရိုတင်းဓာတ်ကြွယ်ဝသည့်အပြင် ကယ်လိုရီပါဝင်မှုနည်းခြင်း၊ သကြားဓာတ်ပါဝင်မှုနည်းခြင်းနှင့် အဆီဓာတ်ပါဝင်မှုနည်းပါးသည့်ဂုဏ်သတ္တိလည်းရှိပါသည်။
ဇွန်လ၊ ဇူလိုင်လ၊ ဩဂုတ်လနှင့် စက်တင်ဘာလများတွင် မျှစ်များလှိုင်လှိုင်ထွက်ပေါ်လေ့ရှိသဖြင့် မျှစ်အစိမ်းနှင့်မျှစ်စပ်များကို လွိုင်ကော်မြို့၊ ဈေးကွက်သို့ ရှားတောမြို့၊ ဘောလခဲမြို့မှ အများဆုံးတင်သွင်း၍ ရောင်းချကြပါသည်။ လွိုင်ကော်မြို့၊ ဈေးကွက်မှတစ်ဆင့် ရန်ကုန်သို့တင်ပို့ရောင်းချသည့်အပြင် မျှစ်ချဉ်၊ မျှစ်ခြောက်များပြုလုပ်၍လည်း တင်ပို့ရောင်းချကြောင်းသိရပါသည်။ ယခုဇွန်လ၊ နောက်ဆုံးအပတ်တွင် မျှစ်စပ်များကို တစ်ပိဿာလျှင် (၃၀၀၀) ကျပ်ဖြင့် အရောင်းအဝယ်ရှိသည်ကိုတွေ့ရပါသည်။
DOCA(ကယား)