ပဲခူးတိုင်းဒေသကြီး ၊ ညောင်လေးပင်ခရိုင် စစ်တောင်းမြစ် အရှေ့ဘက်ခြမ်းရှိ ကျောက်ကြီးမြို့နယ်၊ မုန်းနှင့် ကျောက်ကြီးပေါက်ကျေးရွာများမှ ထွက်ရှိသော ဒူးရင်းသီးများမှာ နှစ်စဉ် မေလမှ အောက်တိုဘာလခန့်အထိ ဖြူးမြို့နယ်အတွင်းသို့ ဝင်ရောက်လျက်ရှိပါသည်။
ယခုနှစ် ဒူးရင်းသီးရာသီတွင်လည်း ဒူးရင်းသီးရောင်းသူများမှာ ဖြူးမြို့တွင်းရှိ ရန်ကုန်-မန္တလေး ကားလမ်းမကြီးဘေးတွင် ယာယီဆိုင်ခန်းများ၊ မော်တော်ယာဉ်ငယ်များ၊ လက်တွန်း လှည်းများဖြင့် ရောင်းချလျက်ရှိသကဲ့သို့ ဖြူးမြို့အနောက်ဘက်ရှိ အမြန်လမ်းမကြီးဘေးမှ ကျေးရွာများကလည်း ကယ်ရီများဖြင့်သယ်ယူကာ အမြန်လမ်းပေါ် သွားလာနေသော ကားများအား ရောင်းချ ပေးပါသည်။
ဈေးနှုန်းမှာ အရွယ်အစားပေါ်မူတည်ပြီး တစ်လုံးလျှင် ၃၅၀၀ ကျပ်မှ ၃၅၀၀၀ ကျပ်အထိ ရှိပါသည်။ ဒေသတွင်းမှ စားသုံးသူပြည်သူများ၊ ခရီးသွားပြည်သူများကို ရောင်းချပေးသည့်အပြင် ကျောက်ပန်းတောင်း၊ တောင်ကြီး၊ လားရှိုးမြို့များသို့လည်း တင်ပို့ရောင်းချရကြောင်း ဖြူးမြို့မှ ဒူးရင်းသီးရောင်းချသူတစ်ဦး၏ ပြောပြချက်အရ သိရပါသည်။
DOCA(ပဲခူး)