ပြည်ခရိုင်အတွင်း ကြက်သွန်ဖြူ(ရှမ်း) လက်လီတစ်ပိဿာလျှင် ၉၀၀၀ကျပ်၊ လက်ကား တစ်ပိဿာလျှင် ၈၅၀၀ကျပ်ဈေးနှင့် (ကြူကုတ်) လက်လီတစ်ပိဿာလျှင် ၇၅၀၀ကျပ်၊ လက်ကား တစ်ပိဿာလျှင် ၇၀၀၀ကျပ်ဈေး ရှိပါသည်။ မန္တလေးနှင့် ရှမ်းပြည်နယ်များမှ သယ်ယူရောင်းချရသည့် အတွက် သယ်ယူစရိတ်များ ဈေးမြင့်နေခြင်း၊ အဝင်နည်းလာခြင်းတို့ကြောင့် ဈေးမြင့်နေရခြင်းဖြစ်ပြီး အရောင်းအဝယ်မှာ အနည်းငယ်အေးကြောင်း သိရပါသည်။
အာလူးသီးနှံအနေဖြင့် ယခင်ပတ်က တစ်ပိဿာလျှင် ၃၂၀၀ ကျပ်ဈေးရှိပြီး ယခုတစ်ပတ်တွင် တစ်ပိဿာလျှင် ၃၄၀၀ကျပ် ဈေးရှိပါသည်။ ယခင်တစ်ပတ်ထက် တစ်ပိဿာလျှင် ၂၀၀ ကျပ် ဈေးမြင့် လာရခြင်းမှာ အဝင်နည်းနေခြင်းကြောင့်ဖြစ်ကြောင်း သိရှိရပါသည်။
ကြက်သွန်နီအနေဖြင့် ယခုနှစ်စိုက်ပျိုးချိန်တွင် သွင်းအားစုဈေးကြီးမြင့်နေခြင်း၊ သယ်ယူခနှုန်းထားများ မြင့်တက်လာခြင်းများကြောင့် ယခင်နှစ်ထက် ဈေးမြင့်နေရခြင်းဖြစ်ပြီး ယခုတစ်ပတ်အတွင်း သီးနှံလှိုင်လှိုင်ပေါ်သည့် ကာလမဟုတ်သည့်အတွက် ဈေးမြင့်နေရခြင်းဖြစ်ပြီး အဝင်များပြီး လက်ကျန်များ ရှိနေသည့်အတွက် ဈေးငြိမ်လျက်ရှိပါသည်။
ဟင်းသီးဟင်းရွက်ကဏ္ဍအနေဖြင့် ဒေသတွင်းစိုက်ပျိုးသည့် သီးနှံအနေဖြင့် စိုက်စရိတ် မြင့်မား လာခြင်းနှင့် သယ်ယူစရိတ်ဈေးမြင့်လာခြင်းတို့ကြောင့် ယခင်နှစ် ဈေးနှင့်နှိုင်းယှဉ်လျှင် ဈေးမြင့်လာရခြင်းဖြစ်ပြီး ခရမ်းချဉ်သီးအနေဖြင့် ရှမ်းသီးများမှာ ယခင်ပတ်များထက် အဝင်များလာသည့်အတွက် လက်လီတစ်ပိဿာလျှင် ၂၀၀၀ကျပ် ၊ လက်ကား တစ်ပိဿာလျှင် ၁၈၀၀ ကျပ်ဖြင့် ဈေးငြိမ်လျက်ရှိပါသည်။
မတ်ပဲ၊ ပဲစဉ်းငုံ၊ ကုလားပဲသီးနှံများအနေဖြင့် ရန်ကုန်ဝယ်လက်များပေါ် မူတည်၍ အရောင်းအဝယ်ဖြစ်သည့်အတွက် ဈေးနှုန်းအနေဖြင့် ယခင်ပတ်နှင့်ယှဉ်လျှင် အနည်းငယ် ဈေးကျလျက်ရှိပါသည်။
သားငါးကဏ္ဍအနေဖြင့် အစာဈေးများ ဈေးနှုန်းမြင့်တက်လာခြင်းနှင့် သယ်ယူစရိတ်များ ဈေးမြင့်လာခြင်းတို့ကြောင့် ယခင်နှစ်ဈေးနှင့်ယှဉ်လျှင် ဈေးနှုန်းမြင့်တက်နေရခြင်းဖြစ်ပြီး အမဲသား၊ ဆိတ်သား အသားဈေးများအနေဖြင့် သတ်မှတ်ဈေးနှုန်းအတိုင်း ရောင်းချလျက်ရှိကြောင်း သိရှိရပါသည်။
DOCA(ပဲခူး)