ပဲခူးမြို့တွင် ဒေသထုတ်ကုန်အနေဖြင့် ငါးချဉ်လုပ်ငန်းကို တစ်နိုင်တစ်ပိုင် လုပ်ကိုင်ဆောင်ရွက်လျက်ရှိကြရာ ပဲခူးမြို့အခြေပြု ထုတ်လုပ်ရောင်းချသော ငါးချဉ်အမှတ်တံဆိပ်များတွင် ပဲခူး(မနီ)၊ ငွေငါး၊ အေးမိစံ၊ ကမ္ဘာကျော်၊ ကောင်းထက်စံ၊ ပဲခူးအောင်၊ မမွန်လေး၊ မနိုင်၊ ကျော်ကြား၊ ရွှေဟင်္သာ စသည့် အမှတ်တံဆိပ်အမျိုးမျိုးဖြင့် ထုတ်လုပ်ရောင်းချလျက်ရှိသည့် လုပ်ငန်းရှင် (၂၀)ဦးကျော်ရှိကြောင်း သိရှိရ ပါသည်။ ပဲခူး၊ ဒိုက်ဦး၊ ညောင်လေးပင်၊ ပြွန်တန်ဆာ၊ ရွှေကျင်၊ ဝေါ၊ သနပ်ပင် စသည့်မြို့များတွင်လည်း ငါးချဉ်လုပ်ငန်းလုပ်ကိုင်သူ အများအပြားရှိကြောင်း သိရှိရပါသည်။
ငါးချဉ်ထုတ်လုပ်သည့် လုပ်ငန်းငယ်တစ်ခုတွင် (၁)ရက် ငါးပိဿာအချိန် (၇၀)မှ (၈၀)အထိ လုပ်ကိုင်နိုင်ပြီး အချိန်(၁၀)လျှင် (၁၀)ကျပ်သား အထုပ်ရေ(၂၀၀)ခန့်ထွက်ရှိကြောင်း၊ အချိန်(၁၀)အတွက် ကုန်ကျစရိတ် (၂)သိန်းခန့် ကုန်ကျကြောင်း၊ ဈေးနှုန်းအနေဖြင့် ငါးချဉ်(၁၀)ကျပ်သား အထုပ်ငယ် တစ်ထုပ်လျှင် (၁၆၀၀)ကျပ်ခန့် ရောင်းချလျက်ရှိပြီး ဈေးကွက်အနေဖြင့် ပဲခူးမြို့တွင် ဒေသထွက် လက်ဆောင်အဖြစ် ဆိုင်များတွင် ရောင်းချကာ မြန်မာပြည်အနှံ့အပြားသို့လည်း တင်ပို့ရောင်းချကြောင်း သိရှိရပါသည်။
တိုင်းဒေသကြီးအစိုးရအဖွဲ့အနေဖြင့် အသေးစား၊ အငယ်စား၊ အလတ်စား MSMES ဒေသထုတ်ကုန်လုပ်ငန်း ဖွံ့ဖြိုးတိုးတက်ရေးကို ဦးစားပေး အလေးစားဆောင်ရွက်ပေးလျှက်ရှိရာ နိုင်ငံ့အကျိုးစီးပွားမြှင့်တင်ရေးရန်ပုံငွေမှ ချေးငွေများထုတ်ချေးပေးခြင်း၊ ဒေသထုတ်ကုန်ပြပွဲများ၊ ဈေးအရောင်းပွဲများတွင် ပြသစေခြင်းဖြင့် MSMEs ထုတ်ကုန်တစ်ခုဖြစ်သည့် ငါးချဉ်လုပ်ငန်းဖွံ့ဖြိုးတိုးတက်ရေး ဆောင်ရွက်ပေးလျက်ရှိပါကြောင်း သိရှိရပါသည်။
DOCA(ပဲခူး)