မိုးရာသီဖြစ်သော ၂၀၂၃ခုနှစ်၊ ဇူလိုင်လအတွင်း နတ်တလင်းခရိုင်၊ နတ်တလင်းမြို့နယ်တွင် ကြက်ဟင်းခါးသီး (အလုံးသေး) များလှိုင်လှိုင်ထွက်ရှိနေပြီး ဇူလိုင်လ၊ တတိယအပတ်တွင် တစ်ပိဿာလျှင် (၅၀၀-၆၀၀) ကျပ်ဈေးနှုန်းဖြင့် ကုန်စိမ်းဒိုင်များကဝယ်ယူနေကြကြောင်း သိရှိရပါသည်။
ကြက်ဟင်းခါးသီး (အလုံးသေး) ကို ဧပြီလနှင့် မေလများတွင် စတင်စိုက်ပျိုးကြပါသည်။ မျိုးစေ့ရွေးချယ်စိုက်ပျိုးရာတွင် ဒေသမျိုးများထက် အသီးအတွက်နှုန်းကောင်းပြီး တင်ပို့ရာတွင် အထိခိုက်ခံသည့်ထိုင်ဝမ်မျိုးများကိုရွေးချယ်ပြီး ပင်ခြားတန်းခြား ခြောက်ပေပတ်လည်လျှင် နှစ်ပင်နှုန်းဖြင့်ကျင်းတူးကာ စီးပွားဖြစ်စင်တင်၍ စိုက်ပျိုးကြပါသည်။ ကြက်ဟင်းခါးသီး (အလုံးသေး) တစ်ကျင်းစိုက်ပျိုးရန်အတွက် ကုန်ကျစရိတ်အဖြစ် မျိုးစေ့၊ မြေသြဇာ၊ ပိုးသတ်ဆေး၊ စင်ပြုလုပ်ရန် ကုန်ကျစရိတ်၊ လုပ်အားခအပါအဝင် စုစုပေါင်း ၁၅၀၀၀၀ကျပ်ခန့်ကုန်ကျကြောင်းသိရှိရပြီး အထွက်နှုန်းအနေဖြင့် သီးနှံသက်တမ်း ၇၅ရက်မှ ၉၀ရက်အတွင်း တစ်ရက်ခြားခူးဆွတ်ရကာ တစ်ကြိမ်လျှင် ပျှမ်းမျှ (၂၀) ပိဿာနှုန်းထွက်ရှိကြောင်းသိရှိရပါသည်။ သီးနှံစတင်ထွက်ရှိချိန် အထွက်နှုန်းနည်းသည့်ကာလတွင် တစ်ပိဿာလျှင် (၁၃၀၀-၁၅၀၀) ကျပ်ပေါက်ဈေးရှိပြီး ယခုဇူလိုင်လ သီးနှံလှိုင်လှိုင်ပေါ်ချိန်တွင် ပေါက်ဈေးမှာ တစ်ပိဿာလျှင် (၅၀၀-၆၀၀) ကျပ်ဈေးသာရှိတော့ကြောင်းသိရှိရပါသည်။ သီးနှံဈေးနှုန်းကျဆင်းသော်လည်း အထွက်နှုန်းတိုးလာသည့်အတွက် တွက်ခြေကိုက်၍ ဝင်ငွေများရရှိနေကြကြောင်းသိရှိရပါသည်။
DOCA(ပဲခူး)