ရခိုင်ပြည်နယ်၊ စားသုံးသူရေးရာဦးစီးဌာန၊ အမ်းမြို့နယ်တာဝန်ခံ ဦးအောင်မင်းခိုင်(ဒု-ဦးစီးမှူး)နှင့်ဝန်ထမ်းများသည် အမ်းမြို့၊ ရေဘုတ်ကျေးရွာ၊ အခြေခံပညာအထက်တန်းကျောင်း (ခွဲ) စာသင်ကျောင်း၌ (၂၃-၈-၂၀၂၃) ရက်နေ့၊ နေ့လယ်(၁၃:၀၀) နာရီအချိန်တွင် စားသုံးသူကာကွယ်ရေးအတွက် အစားအသောက်ဘေးအန္တရာယ်ကင်းရှင်းရေးနှင့်ပတ်သတ်၍ အသိပညာပေးဟောပြောခဲ့ပါသည်။
အဆိုပါ ဟောပြောပွဲတွင် အမ်းမြို့၊ ရေဘုတ်ကျေးရွာ၊ အခြေခံပညာအထက်တန်းကျောင်း (ခွဲ)မှ ကျောင်းအုပ်ဆရာကြီး ဦးကျော်ကျော်သက်က ကျောင်းသား/သူများအား အစားအသောက်နှင့်ပတ်သတ်၍ ဆောင်ရန်၊ရှောင်ရန်အချက်များနှင့် စားသုံးသူကာကွယ်ရေးဆိုင်ရာ ရှင်းလင်းပြောကြားချက်များအား မှတ်သားထားစေရန်လိုအပ်ကြောင်း အဖွင့်အမှာစကားပြောကြားပြီးနောက် စားသုံးသူရေးရာဦးစီးဌာနမှ မြို့နယ်တာဝန်ခံ ဦးအောင်မင်းခိုင် (ဒု-ဦးစီးမှူး) က စားသုံးသူရေးရာဦးစီးဌာနဖြစ်ပေါ်လာပုံကို အကျဉ်းချုပ်ရှင်းလင်းပြောကြားပြီးနောက် ဦးစီးဌာန၏မျှော်မှန်းချက်၊ ရည်မှန်းချက်များကို ချပြပြောကြားခြင်း၊ ကျောင်းသား/သူများသည် နိုင်ငံအတွက် အနာဂတ်မျိုးဆက်သစ်လူငယ်များဖြစ်သည့်အတွက် ကျန်းမာစွာပညာသင်ယူနိုင်ရန်လိုအပ်ပါကြောင်း၊ ကျန်းမာဖို့အတွက် မိမိတို့နေ့စဉ်စားသောက်နေသည့် အစားအစာများသည် ဘေးအန္တရာယ်ကင်းရှင်းပြီး သန့်ရှင်းလတ်ဆတ်သော အစားအစာများရွေးချယ်ဝယ်ယူစားသုံးနိုင်ရန်လိုအပ်ပါကြောင်းနှင့် ကုန်စည် (သို့မဟုတ်) ဝန်ဆောင်မှုကိုဝယ်ယူအသုံးပြုရာတွင်လည်း သိရှိလိုသည့်သတင်းအချက်များအား စီးပွားရေးလုပ်ငန်းရှင်များသို့ မေးမြန်းပြီးမှသာဝယ်ယူသုံးစွဲကြရန်၊ ကုန်စည် (သို့မဟုတ်) ဝန်ဆောင်မှုကိုဝယ်ယူအသုံးပြုရာတွင်လည်း ကုန်အညွှန်းအမှတ်အသားများကို မြန်မာဘာသာဖြင့် ပြည့်စုံစွာဖော်ပြထားသော ကုန်ပစ္စည်းများကိုသာဝယ်ယူအသုံးပြုကြရန်နှင့် စားသုံးသူအခွင့်အရေးနစ်နာဆုံးရှုံးမှုများဖြစ်ပေါ်လာပါက စားသုံးသူရေးရာဦးစီးဌာနသို့ ဆက်သွယ်တိုင်ကြားနိုင်ပါကြောင်း အသိပညာပေးဟောပြောခဲ့ပြီး တက်ရောက်လာသည့်ကျောင်းသား/သူများ၏ မေးမြန်းချက်များအား အကျယ်တဝင့်ပြန်လည်ရှင်းလင်းဖြေကြားကာ ဟောပြောပွဲသို့ ကျောင်းသား/သူ (၁၃၀) ဦးခန့်တက်ရောက်ခဲ့ကြကြောင်း သတင်းရရှိပါသည်။
DOCA(ရခိုင်)