(၃၁-၈-၂၀၂၃)ရက်နေ့၊ နံနက်(၁၀ꓽ၀၀)နာရီအချိန်တွင် စားသုံးသူရေးရာဦးစီးဌာန၊ စစ်ကိုင်းတိုင်းဒေသကြီးဦးစီးမှူးရုံးမှ လက်ထောက်ညွှန်ကြားရေးမှူး ဒေါ်ဇင်မာဦးနှင့် ဝန်ထမ်းများသည် စစ်ကိုင်းတိုင်းဒေသကြီး ငါးလုပ်ငန်းဦးစီးဌာနတွင် စားသုံးသူရေးရာအသိပညာပေးဟောပြောပွဲကျင်းပပြုလုပ်ခဲ့ပါသည်။
စစ်ကိုင်းတိုင်းဒေသကြီး၊ ငါးလုပ်ငန်းဦးစီးဌာနမှ တိုင်းဒေသကြီးဦးစီးမှူး ဒေါက်တာစုမျိုးသွယ်က အဖွင့်အမှာစကားပြောကြားရာတွင် မိမိတို့ဌာနသို့ လာရောက်ဆွေးနွေးပြောကြားပေးပါသော စစ်ကိုင်းတိုင်းဒေသကြီး၊ စားသုံးသူရေးရာဦးစီးဌာနအား ကျေးဇူးအထူးတင်ရှိပါကြောင်း၊ မိမိတို့ ဌာနသည် ငါးလုပ်ငန်းဦးစီးဌာနဖြစ်သည့်အတွက် ဒေသတွင်း ငါးရိက္ခာဖူလုံရေး အဓိကဆောင်ရွက်နေရသည်ဖြစ်ပြီး ဈေးကွက်အတွင်းရောင်းချနေသော ငါးနှင့်ငါးအစာများ ဘေးအန္တရာယ်ကင်းရှင်းရေး စစ်ဆေးကြပ်မတ်ရခြင်း၊ ဓာတ်ခွဲစမ်းသပ်ရခြင်းများပြုလုပ်ရသည့်အတွက် မိမိတို့ဌာနမှာ စားသုံးသူရေးရာဦးစီးဌာနနှင့် ရင်းနှီးမှုများရှိပါကြောင်း၊ ဆက်လက်၍ လုပ်ငန်းများဆောင်ရွက်ရာတွင်လည်း ပူးပေါင်းပါဝင်ဆောင်ရွက်သွားမည်ဖြစ်ကြောင်း၊ ယခုကဲ့သို့ လာရောက်ဟောပြောဆွေးနွေးသည့်အတွက် မိမိတို့ဌာနမှ ဝန်ထမ်းများသည်လည်း နှစ်ဌာနချိတ်ဆက်ဆောင်ရွက်နိုင်သောလုပ်ငန်းများ၊ စားသုံးသူနှင့်ဆိုင်သော အသိပညာဗဟုသုတများ များစွာရရှိမည်ဟုယုံကြည်ပါကြောင်း ပြောကြားခဲ့ပါသည်။
ဆက်လက်၍ စားသုံးသူရေးရာဦးစီးဌာန၊ စစ်ကိုင်းတိုင်းဒေသကြီးဦးစီးမှူးရုံးမှ မူဝါဒလေ့လာရေးနှင့်စီမံကိန်းစာရင်းအင်းဌာနခွဲတာဝန်ခံ လက်ထောက်ညွှန်ကြားရေးမှူး ဒေါ်ဇင်မာဦးက စီးပွားရေးနှင့်ကူးသန်းရောင်းဝယ်ရေးဝန်ကြီးဌာနအကြောင်း၊ ဝန်ကြီးဌာနအောက်ရှိ ဦးစီးဌာန(၄)ခု အကြောင်း၊ စားသုံးသူရေးရာဦးစီးဌာန၏ မျှော်မှန်းချက်များ၊ ရည်မှန်းချက်တာဝန်များအကြောင်းနှင့် လက်ရှိအဓိကဆောင်ရွက်နေရသော လုပ်ငန်းတာဝန်များအကြောင်း၊ စားသုံးသူရေးရာဦးစီးဌာန၊ စစ်ကိုင်းတိုင်းဒေသကြီးဦးစီးမှူးရုံးမှ စားသုံးသူရေးရာဌာနခွဲတာဝန်ခံ ဦးစီးအရာရှိ ဒေါ်ခိုင်မို့မို့က စားသုံးသူကာကွယ်ရေးဥပဒေပေါ်ပေါက်လာပုံအကြောင်း၊ ဥပဒေပါ စာသုံးသူ၊ စီးပွားရေးလုပ်ငန်းရှင်နှင့် နစ်နာဆုံးရှုံးမှုတို့၏ အဓိပ္ပာယ်ဖွင့်ဆိုချက်များအကြောင်း၊ စားသုံးသူအခွင့်အရေး(၈)ချက် အကြောင်း၊ မြန်မာဘာသာဖြင့် မဖြစ်မနေဖော်ပြရမည့် ကုန်အညွှန်းအမှတ်အသားများအကြောင်း၊ စားသုံးသူရေးရာဦးစီးဌာန၊ စစ်ကိုင်းတိုင်းဒေသကြီးဦးစီးမှူးရုံး၊ စားသုံးသူရေးရာဌာနခွဲမှ အငယ်တန်းစာရေး ဦးကျော်သက်ဝေက စားသုံးသူနစ်နာဆုံးရှုံးမှုများနှင့် စပ်လျဉ်း၍ ဌာနသို့ ဆက်သွယ်တိုင်ကြားနိုင်သည့် နည်းလမ်းများအကြောင်းနှင့် ဌာနမှဖြေရှင်းဆောင်ရွက်ပေးခဲ့သော အမှုဖြစ်စဉ်များအကြောင်းတို့အား Power Point များဖြင့် အသီးသီးရှင်းလင်းဆွေးနွေးခဲ့ကြပြီး ဟောပြောပွဲသို့ တက်ရောက်လာသော လူဦးရေ (၁၅)ဦးအား အသိပညာပေးလက်ကမ်းစာစောင်များဖြန့်ဝေခဲ့ ကြောင်း သတင်းရရှိပါသည်။
DOCA(စစ်ကိုင်း)