ဝါသီးနှံကို မိုးကြိုရာသီ၊ မိုးရာသီနှင့် မိုးနှောင်းရာသီများတွင် စိုက်ပျိုးလေ့ရှိပါသည်။ မိုးကြိုရာသီတွင် ဖေဖော်ဝါရီလလယ်မှ ဇွန်လကုန်အတွင်း စိုက်ပျိုးကြပြီး မိုးရာသီတွင် မေလလယ်မှ ဇွန်လကုန်အတွင်း စိုက်ပျိုး၍ မိုးနှောင်းရာသီတွင် ဇူလိုင်လမှ ဩဂုတ်လလယ်အတွင်း စိုက်ပျိုးလေ့ရှိကြပါသည်။ အပင်သန်မာဖြစ်ထွန်းရန်နှင့် ဝါအထွက်နှုန်းကောင်းစေရန်အတွက် ထယ်ရေးနက်နက်နှင့် ထွန်ရေးညက်ညက်ကောင်းအောင် လုပ်ဆောင်ပေးရမည်ဖြစ်ပါသည်။
ဝါစိုက်ပျိုးထားရှိမှုအနေဖြင့် မြင်းခြံခရိုင်ချုပ်တွင် ယခင်နှစ် (၂၀၂၂-၂၀၂၃) တွင် ဝါစိုက်ဧကပေါင်း (၂၀၄၉၂) ဧကစိုက်ပျိုးခဲ့ပြီး ရာသီဥတုကောင်းမွန်သဖြင့် စိုက်ဧကအားလုံးရိတ်သိမ်းနိုင်ခဲ့ပါသည်။ တစ်ဧကလျှင် ပျမ်းမျှအထွက်နှုန်းမှာ (၃၅၈.၇၁) ပိဿာဖြင့် ပိဿာပေါင်း (၇၃၅၀၇၃၀) ပိဿာထွက်ရှိခဲ့ပါသည်။ ယခုနှစ် (၂၀၂၃ -၂၀၂၄) ခုနှစ်၊ ဇူလိုင်လအထိ ဝါစိုက်ဧကမှာ (၆၉၈၅) ဧက စိုက်ပျိုးထားရှိကြောင်း သက်ဆိုင်ရာဌာန၏စာရင်းများအရသိရှိရပါသည်။ မြို့နယ်များအနေဖြင့် ဝါစိုက်ပျိုးထားရှိမှုမှာ မြင်းခြံမြို့နယ်တွင် စိုက်ဧက (၁၂၄၂) ဧက၊ တောင်သာမြို့နယ်တွင် စိုက်ဧက (၃၂၉၂) ဧကနှင့် နွားထိုးကြီးမြို့နယ်တွင် စိုက်ဧက (၂၄၅၁) ဧကစိုက်ပျိုးထားကြောင်းသိရှိရပါသည်။
မြင်းခြံခရိုင်အတွင်း ချည်မျှင်ရှည်ဝါအမျိုးအစားကို အများဆုံးစိုက်ပျိုးထုတ်လုပ်ရောင်းဝယ်ကြပြီး ယခင်နှစ်တွင် ဝါတစ်ပိဿာလျှင် (၂၇၀၀) ကျပ်မှ (၃၀၀၀) ကျပ်ခန့်ဈေးနှုန်းများဖြင့် ရောင်းဝယ်ခဲ့ ကြောင်းသိရှိရပါသည်။
DOCA(မန္တလေး)