စားသုံးသူရေးရာဦးစီးဌာန၊ ရေနံချောင်းမြို့နယ်ဦးစီးမှူးသည် မကွေးတိုင်းဒေသကြီးမှ FDA ဌာန၊ ရေနံချောင်းမြို့နယ်၊ စည်ပင်သာယာရေးအဖွဲ့တို့ပူးပေါင်းပြီး ဒေသခံပြည်သူများ အစားအသောက် ဘေးကင်းလုံခြုံရေးအတွက် ၂၀၂၁ခုနှစ်၊ ဒီဇင်ဘာ(၁၀)ရက် နံနက်ပိုင်း (၀၈:၀၀) အချိန်မှ ရေနံချောင်းမြို့မဈေးရှိ ဈေးဆိုင်များသို့သွားရောက်ပြီး စားသောက်ကုန်ပစ္စည်းများအား အန္တရာယ်ကင်းရှင်းမှုရှိ/မရှိ စစ်ဆေးခြင်း၊ စားသုံးသူပြည်သူများ ဘေးကင်းလုံခြုံစိတ်ချရသော အစားအသောက်များ စားသုံးနိုင်ရေးနှင့် ကုန်အညွှန်းအမှတ်အသား ပြည့်စုံခြင်းမရှိသော စားသောက်ကုန်များ ဖြန့်ဖြူးရောင်းချခြင်း ရှိ/မရှိ ကွင်းဆင်းစစ်ဆေးခြင်းနှင့်အသိပညာပေးခြင်းလုပ်ငန်းများ ဆောင်ရွက်ခဲ့ပါသည်။
ထိုသို့ဆောင်ရွက်ရာ၌ မြို့နယ်စားသုံးသူရေးရာဦးစီးဌာန၊ မြို့နယ်ဦးစီးမှူး ဦးဟာခေါဂေမှ စားသုံးသူပြည်သူများ စားသောက်ကုန်ပစ္စည်းများ ဝယ်ယူသုံးစွဲရာတွင် လုံခြုံစိတ်ချရမှုရှိစေရန် ကုန်အညွှန်းအမှတ်အသားများ ပြည့်စုံစွာဖော်ပြကြရန်နှင့် ကုန်ညွှန်းအမှတ်အသားမပြည့်စုံသော ကုန်ပစ္စည်းများအားဖြန့်ဖြူးရောင်းချခြင်းတွေ့ရှိပါက အရေးယူဆောင်ရွက်သွားမည့် ဥပဒေအကြောင်းအရာများအား အသိပညာပေးရှင်းလင်းဆွေးနွေးပြောကြားခဲ့ပြီး၊ မကွေးတိုင်းဒေသကြီး FDA အဖွဲ့မှ တာဝန်ခံ ဒေါက်တာစိုင်းမင်းထွန်းနှင့်အဖွဲ့သည် ဈေးကွက်အတွင်းရှိ စားသောက်ကုန်အမျိုးအစား (၃၅) မျိုးအား (Mobile Lab)ဖြင့် ဓာတ်ခွဲစမ်းသပ်ရန်အတွက် နမူနာလိုက်လံဝယ်ယူ စစ်ဆေးခဲ့ကြောင်းသိရသည်။ မကွေးခရိုင်၊ စားသုံးသူရေးရာဦးစီးဌာနအနေဖြင့် ခရိုင်အတွင်းရှိမြို့နယ် (၆) မြို့နယ်တွင် စားသုံးသူပြည်သူများအား အစားအသောက်လုံခြုံစိတ်ချရမှုရှိစေရေးအတွက် အခါအားလျော်စွာ ဈေးသူဈေးသားများ၊ ဈေးဆိုင်လုပ်ငန်းရှင်များအား အသိပညာပေးခြင်းနှင့်ကွင်းဆင်းစစ်ဆေးခြင်း လုပ်ငန်းများကို မြို့နယ်စည်ပင်သာယာရေးဈေး၊ ရပ်ကွက်ကျေးရွာများရှိ စားသောက်ကုန် ထုတ်လုပ် ဖြန့်ဖြူးရောင်းချနေသော လုပ်ငန်းရှင်များသို့ ကွင်းဆင်းစစ်ဆေးခြင်းနှင့် အသိပညာပေးခြင်း လုပ်ငန်းများအား ကိုဗစ်-၁၉ စည်းကမ်းချက်များနှင့်အညီ အရှိန်အဟုန်မြှင့်တင် ဆောင်ရွက်လျက်ရှိကြောင်း သိရှိရပါသည်။
စားသုံးသူရေးရာဦးစီးဌာန(မကွေးတိုင်းဒေသကြီး)