ပြည်ခရိုင်၊ ပြည်မြို့နယ်ရှိ ကျေးရွာအုပ်စုများတွင် စပါး၊ ပဲ၊ ပြောင်းတို့ကိုသာ အဓိကထား စိုက်ပျိုးကြသလို ဟင်းသီးဟင်းရွက်ဖြစ်သောသခွားသီးများလည်း စိုက်ပျိုးကြပါသည်။ သခွားသီးတွင် မိုးသခွားနှင့်ဆောင်းသခွာဟူ၍ (၂)မျိုးရှိပြီး မိုးသခွားကို မေလနှင့် ဇွန်လတို့တွင် စိုက်ပျိုးကြပြီး ဆောင်းသခွားကို အောက်တိုဘာလနှင့် နိုဝင်ဘာလတို့တွင် စိုက်ပျိုးကြပါသည်။ သခွားပင်သည် စိုက်ပျိုးပြီး (၁)လခွဲ မှ (၂)လအကြာတွင် အသီးများစတင်ထွက်ရှိပါသည်။ ယခုဈေးကွက်ထဲတွင် မိုးသခွားများ လှိုင်လှိုင်ပေါ်နေပြီဖြစ်ပြီး ပြည်မြို့နယ်အတွင်းရှိ ဈေးကွက်များအတွင်းသို့ ပြည်မြို့အနီး ကျေးရွာများဖြစ်သော မှော်ဇာကျေးရွာ၊ တောင်လုံးညိုကျေးရွာများမှ လာရောက်ရောင်းချကြပါသည်။ ပြည်ခရိုင်အတွင်းရှိ ပုတီးကုန်းမြို့၊ ဝက်ပုတ်မြို့၊ အင်းမမြို့၊ ရွှေတောင်မြို့နယ်များမှလည်း ဟင်းသီးဟင်းရွက်ကုန်စိမ်းဒိုင်များမှတစ်ဆင့် ရန်ကုန်မြို့ရှိ သီရိမင်္ဂလာဈေး၊ ဒညင်းကုန်း ဈေးများသို့လည်း တင်ပို့ရောင်းချကြပါသည်။
ယခုအခါ ပြည်မြို့နယ်အတွင်းရှိ ဈေးများတွင်ရောင်းချလျက်ရှိသော သခွားသီးဈေးများမှာ အကြီးတစ်လုံးလျှင် ၂၀၀-၃၀၀ကျပ်၊ အသေးတစ်လုံးလျှင် ၅၀-၁၀၀ ကျပ်ဖြင့်ရောင်းချလျက်ရှိကြောင်း သိရပါသည်။
DOCA(ပဲခူး)