ဒီဇင်ဘာလဒုတိယပတ်မှစ၍ ပြည်ဈေးကွက်သို့ မကွေးတိုင်း ရေနံချောင်းမြို့မှ ကြက်သွန်နီအသစ်များ စတင်ဝင်ရောက်မှုရှိလာပြီး ၂၈ ပိဿာဝင် အိတ်၅၀ခန့် အဝင်ရှိလာပါသည်။ ကြက်သွန်နီများ ဈေးကောင်းရနေချိန်ဖြစ်၍ အသစ်များကိုတူးဖော်ရောင်းချမှုများရှိပေမယ့် အစိုဓါတ်များ ကျန်ရှိနေသေး၍ အသစ်ဈေးမှာ အဟောင်းဈေးထက်ဈေးနှုန်းချိုသာသော်လည်း အဝယ်မလိုက်သေးကြောင်းလည်း သိရပါသည်။ ကြက်သွန်နီအသစ်ဈေးမှာ လက်လီ/လက်ကား တစ်ပိဿာကို ကျပ် ၃၀၀၀-၃၂၀၀-၃၅၀၀ နှုန်းတို့ဖြင့် အသီးသီးရောင်းချမှုရှိနေပါသည်။
ပြည်ဈေးကွက်သို့ ကြက်သွန်နီအဟောင်းမှာ ဆိပ်ဖြူ၊ အောင်လံ ၊ မကွေးဘက်မှ ပိဿာချိန် ၅ထောင်တစ်ပတ်လည် ရက်ခြားဝင်ရောက်မှုရှိနေပြီး ယခင်ဝင်ရောက်မှုနှင့်နှိုင်းယှဉ်ပါက ပိဿာချိန် ခုနှစ်သောင်းခန့် နည်းပါးသွားကြောင်း သိရပါသည်။ အဝင်နည်းပြီး သယ်ယူပို့ဆောင်မှု အခြေ အနေများကြောင့် ကြက်သွန်နီအဟောင်းဈေးမှာ ပြီးခဲ့သည့် ဒီဇင်ဘာလဆန်းနှင့်နှိုင်းယှဉ်ပါက ကျပ် ၄၀၀-၅၀၀ခန့် မြင့်တက်သွားပါသည်။ အရောင်းအဝယ်မှာ ပုံမှန်ဒေသတွင်း ဝယ်လက်များနှင့် အိတ်ဆွဲဝယ်ရောင်းသမားများ ဧရာဝတီ၊ မြန်အောင်၊ ကြံခင်းစတဲ့ နယ်ကျော်စီးဆင်းမှုများဖြင့် ပုံမှန် ရောင်းဝယ်မှုရှိနေပါသည်။ ကြက်သွန်ဈေးနှုန်းမှာ အလတ်စ လက်လီ/လက်ကားတစ်ပိဿာလျှင် ကျပ် ၄၄၀၀-၄၆၀၀-၄၈၀၀နှုန်းတို့ဖြင့် အသီးသီးရောင်းဝယ်မှုရှိနေကြောင်း သိရှိရပါသည်။
DOCA(ပဲခူး)