မန္တလေးတိုင်းဒေသကြီး၊ကျောက်ဆည်ခရိုင်အတွင်း ပဲမျိုးစုံသီးနှံဖြစ်သည့် ပဲယင်း၊ ပဲကြီး၊ တိုင်ထောင်ပဲ၊ မတ်ပဲ၊ ကုလားပဲ နှင့် ပဲစဉ်းငုံသီးနှံများကို စိုက်ပျိုးလျက်ရှိရာ ၄င်းသီးနှံများ အနက် ပဲယင်းသီးနှံအား မြစ်သားမြို့နယ်တွင်(၅၁၈)ဧက စိုက်ပျိုးထားရှိပြီး အများဆုံးစိုက်ပျိုးသော ရွာများမှာ နွားကူးလေး၊ ခင်လည်၊ ကျီတိုင်၊ ပခမ်းကျေးရွာများတွင်စိုက်ပျိုးလျက်ရှိပါသည်။ ပဲယဉ်း စိုက်ပျိုးမှုတွင်(၁)ဧက မျိုးအနေဖြင့် ၁ ပြည်နှင့် ၄ ဗူး ကုန်ကျပြီး စပါးရိတ်သိမ်းပြီး ရိုးပြတ်ထဲတွင် ထယ်ထိုးပြီး မျိုးစေ့ပတ် ထယ်ဖုန်းစနစ် နှင့် ပတ်ကြဲစနစ်များဖြင့် စိုက်ပျိုးလျက်ရှိရာ ပတ်ကြဲ စိုက်ပျိုးမှုထက် ထယ်ထိုး၊ထယ်ဖုန်းစနစ်က ပိုမိုအထွက်နှုန်းကောင်းကြောင်း ၊ ပဲယင်းသီးနှံစိုက်ပျိုးမှု (၁)ဧက ကုန်ကျစရိတ်အနေဖြင့် မျိုး၊ သွင်းအားစု၊ လုပ်သားခ၊ စုစုပေါင်း(၈၀၀၀၀-၁၀၀၀၀၀)ကျပ် ဝန်းကျင်ကုန်ကျကြောင်း၊မျိုးအနေဖြင့် ပဲယင်းကြီးမျိုးနှင့် ပဲယင်းသေးမျိုးဟူ၍ (၂)မျိုးရှိရာ ပဲယင်းကြီးမျိုးကို ရှမ်းပြည်နယ်ဘက်တွင်သာ အများဆုံးစိုက်ပျိုးကြပြီး ပဲယင်းသေးမျိုးကို မြို့နယ် အတွင်း အများဆုံးစိုက်ပျိုးကြပါသည်။ပဲယင်းသက်တမ်းမှာ စိုက်ပျိုးပြီး(၄)လအကြာတွင် ရိတ်သိမ်းရကြောင်း ၊ အထွက်နှုန်းအနေဖြင့် (၂၅-၃၀)တင်းအထိ ထွက်ရှိကြောင်း ၊ စျေးနှုန်းအနေဖြင့် ယခင်နှစ် ပဲယင်း (၁)တင်းလျှင် (၄၅၀၀၀)ကျပ် ရောင်းချရကြောင်း၊ စိုက်ပျိုးစရိတ်သက်သာပြီး အထွက်နှုန်း ကောင်းမွန်သောပဲယင်းသီးနှံကို တောင်သူများ အများဆုံးစိုက်ပျိုးသင့်ကြောင်း၊ ပဲယဉ်းကိုပြုတ်၍ ထမင်းဆီဆမ်းဖြင့် စားသုံးကြသလို အညာဒေသ ယခုလိုဆောင်းတွင်း အချိန်အခါတွင် မုန့်ပေါင်းနှင့် အကြော်တွဲဖက်၍ စားသုံးကြပါသည်။မုန့်ပေါင်းထဲတွင် အများဆုံးပဲယင်းကိုသာထည့်၍ အသုံးပြုကြပါသည်။ စီးပွားဖြစ်ဝင်ငွေတိုးပြီး ကုန်ကျစရိတ်သက်သာသော ပဲယင်းသီးနှံကို တိုးချဲ့စိုက်ပျိုးသင့်ပါကြောင်း ရေးသားတင်ပြအပ်ပါသည်။
DOCA(မန္တလေး)