ညောင်ချိုဖူး (ခေါ်) ညောင်ရွက်ဆိုသည်မှာ ကန့်ဘလူ၊ ကျွန်းလှဒေသတွင်သာမဟုတ်ဘဲ ဒေသတိုင်း၊ လူသားတိုင်းတို့အတွက် အထွေအထူးပြောပြစရာမလိုသော မြင်ဘူးပြီး/ ရင်းနှီးပြီးသားလည်းဖြစ်ပါသည်။ လူတို့စားသုံးကြသည့် ညောင်ပင်မှာ ညောင်ချိုပင်နှင့် ညောင်ချဉ်ပင်ဆိုဟူ၍ (၂)မျိုးရှိရာမှာ ညောင်ချိုပင်မှထွက်ရှိသော အဖူးနုနုထွတ်ထွတ်များကို လူအများကခူးပြီး ရေနွေးပွက်ပွက်ဆူ၌ထည့်ပြုတ်ကာ ခရမ်းချဉ်သီးငါးပိဆီချက်၊ မြေပဲဆန်ထောင်း၊ နှမ်းထောင်း၊ ကြက်သွန်ကြော်တို့နှင့်သုပ်စားကြသည့်အပြင် ငါးပိရည်နှင့်တို့စရာအဖြစ်လည်းစားသုံးကြပါသည်။ ယခုအချိန် မတ်လ နောက်ဆုံးပတ်တွင် ညောင်ချိုဖူးလေးများ ဈေးကွက်အတွင်းသို့ စတင်ရောက်ရှိလာပြီဖြစ်၍ ညောင်ချိုဖူးနုနုလေးများကိုခူးဆွတ်ပြီး ဈေးကွက်အတွင်းရောင်းချရာတွင် ၎င်းမှာ ရာသီပေါ်စာဖြစ်သဖြင့် ဈေးကောင်းရောင်းရကာ မိသားစုဝင်ငွေရရှိနေကြပါသည်။ ညောင်ချိုဖူးနုနုလေးများကိုပြုတ်၍ ရေညှစ်ပြီး (၅)ကျပ်သားခန့် အလုံးတစ်လုံးလျှင် ကျပ်(၃၀၀)နှင့် (၂)လုံးလျှင် ကျပ်(၅၀၀)နှုန်း၊ တစ်ပိဿာလျှင် ကျပ်(၅၀၀၀)နှုန်းဖြင့် အရောင်းအဝယ်ဖြစ်နေကြောင်း ကန့်ဘလူမြို့ရှိ ကုန်စိမ်းဈေးသည်တစ်ဦးထံမှ သိရှိရပါသည်။
DOCA(စစ်ကိုင်း)