မွန်ပြည်နယ်၊ ကျိုက်မရောမြို့နယ်၊ နောင်လုံကွင်းရှိ လယ်မြေများတွင် ရာသီပေါ် သီးနှံများအား တစ်ပိုင်တစ်နိုင်စိုက်ပျိုးကြရာ အာဟာရပြည့်ပိန်းဥပင်များကို စီးပွားဖြစ်စိုက်ပျိုးလာကြပြီး ယခုနှစ်တွင် အထွက်နှုန်းကောင်းပြီး စျေးကောင်းလည်းရရှိ၍ မိသားစုအဆင်ပြေလျက်ရှိကြောင်းသိရသည်။
အဆိုပါ ပိန်းဥပင်များကို စိုက်ပျိုးရာ၌ ဥမှစပြီး ပျိုးထောင်၍ ပျိုးပင်များ အရွက်ထွက်လာသောအခါ ပိန်းပင်ငယ်လေးများ နေပူရှိန်ကြောင့် မသေစေရန် နှစ်ရက်တစ်ကြိမ်ရေသွင်းပြီး အပင်နှင့်ဥများထွားကြိုင်းစေရန် ဓာတ်မြေသြဇာနှင့် ရွက်ဖြန်းအားတိုးဆေးများကို သုံးရက်တစ်ကြိမ် ကျွေးပေးရကြောင်း၊ ရေပေးရာတွင် နောင်လုံရေထိန်းတံခါးမှ ရေသွယ်၍ ရေများများပေးရသဖြင့် ပိန်းဥများအထွက်နှုန်းကောင်း၍ စျေးကောင်းလည်းရရှိကာ စိုက်ပျိုးသူတောင်သူများ အဆင်ပြေလျက်ရှိကြောင်း ပိန်းဥ စီးပွားဖြစ်စိုက်ပျိုးသူတောင်သူ ဦးအာလီကပြောသည်။
ပိန်းဥပင်ကို ရာသီမရွေးစိုက်ပျိုးနိုင်ပြီး ၎င်းမှာ ရေကြိုက်သောအပင်ဖြစ်ကြောင်း၊ ပိန်းဥကို စတင်စိုက်ပျိုးချိန်မှ ရက်ပေါင်းတစ်ရာကြာလျှင် စတင်တူးဖော်၍ ရောင်းချရကြောင်း၊ ပိန်းဥမှာ အာဟာရဖြစ်၍ ပိန်းဥဟင်းချိုမှာ ထမင်းမြိန်စေပြီး အရွက်နှင့် အရိုးကို ဟင်းခါးအဖြစ် ချက်သောက်ရသဖြင့် ပိန်းဥတစ်ပင်လုံး အသုံးဝင်ပြီး ဘီတာမင်အေကြွယ်ဝသည့် စားဖိုဆောင်သီးနှံဖြစ်ကာ လူမျိုးမရွေးဘာသာမရွေးစားသုံးနိုင်သည့် သီးနှံဖြစ်သောကြောင့် စီးပွားဖြစ်စိုက်ပျိုးကြသူမျာပြားလာကြောင်းသိရှိရပါသည်။
DOCA(မွန်)