ခရမ်းချဉ်သီးကို မြန်မာနိုင်ငံအလယ်ပိုင်းဒေသ၊ မန္တလေးတိုင်းဒေသကြီး၊ ကျောက်ဆည် ခရိုင်အတွင်းရှိ မြို့နယ်များမှ တောင်သူများအနေဖြင့် စီးပွားဖြစ်အများအပြား စိုက်ပျိုးလျက်ရှိ ပါသည်။ မြေတစ်ဧကလျှင် မျိုးစေ့ (၆)ထုပ်မှ (၇)ထုပ်စိုက်ပျိုးရပြီး ခရမ်းချဉ်သီးမျိုးစေ့ အများအပြားရှိသော်လည်း (Wonder 100)မျိုးကို ဒေသရာသီဥတုနှင့် ရေမြေသဘာဝ ကိုက်ညီမှု ရှိသောကြောင့် ဒေသတောင်သူများ အားထား စိုက်ပျိုးလျက်ရှိပါသည်။
မျိုးစေ့တစ်ထုပ်လျှင် ကျပ် ၁၀၀၀၀ မှ ၁၀၅၀၀ ပေးဝယ်ရပြီး ယခင်က မြေတစ်ဧကလျှင် ထွန်ယက်ခြင်း လုပ်သားခ ကျပ် ၁၀၀၀၀ နှုန်းဖြင့် (၈)ရက်ထွန်ယက်ရခြင်း၊ ယခု တစ်ဧကလျှင် မြေပြုပြင်ခ တစ်နာရီလျှင် ကျပ် ၂၀၀၀၀ နှုန်းဖြင့် ထွန်ယက်ရခြင်း၊ စိုက်ပျိုးပြီး ရက်သတ္တပတ် (၃)ပတ်ကျော်လျှင် အလုပ်သမားငှားရမ်းခ တစ်နေ့လျှင်ကျပ်(၆၀၀၀)နှုန်းဖြင့် စိုက်ပျိုးဘောင်များ ပေါင်းပေါက်ပေးရကြောင်း သိရှိရသည်။ ထို့နောက် စိုက်ပျိုးပြီးခရမ်းချဉ်ပင်များအား ဝါးတိုင်များ ထောင်ပေးရခြင်း၊ တစ်ဧကတိုင်ထောင်ရန် ဝါးအလုံးရေ(၅၀၀၀)ခန့်သုံးပေးရခြင်း၊ အားဆေး၊ မှိုဆေး၊ ပိုးသတ်ဆေးများကို (၁)ရက်ကျော်ဖြန်းပေးရကြောင်း သိရှိရပါသည်။ တစ်ဧကလျှင် (ဓာတ်မြေဩဇာ)မြေဆီအိတ်(၅)အိတ်မှ (ရ)အိတ်သုံးပေးရပြီး၊ တစ်အိတ်လျှင် ကျပ် ၈၀၀၀၀ နှုန်းဖြင့် အသုံးပြုရကြောင်း သိရှိရသည်။ ခရမ်းချဉ်ပင်များအား အပင်ထိန်းရန်အတွက် အမျိုးသမီးအလုပ်သမား (၁၀)ဦးခန့် ငှားရမ်းရပြီး၊ ငှားရမ်းခကုန်ကျစရိတ် (၁)ဦးလျှင် ကျပ်(၃၀၀၀)နှုန်းဖြင့် (၂)ပတ် တစ်ခါ ကြိုးဖြင့်ချည်ပေးရခြင်း၊ နှစ်လခန့်အကြာတွင် အပင်အောက်ခြေမှ ရွက်ကြမ်းများအား ညှပ်ပေးရခြင်းများ ပြုလုပ်ပေးရကြောင်းသိရှိရသည်။
စိုက်ပျိုးပြီး(၃)လခန့်အကြာ ဒီဇင်ဘာလမှ ဖေဖော်ဝါရီလ အထိခူးဆွတ်နိုင်ကြောင်း သိရှိ ရပြီး တစ်ဧကလျှင် ကုန်ချိန်ပိဿာ ၇၀၀ မှ ၁၀၀၀ ထိထွက်ရှိပြီး တစ်ပတ်လျှင် (၂)ကြိမ်ခန့် ခူးဆွတ်၍ ပွဲစားများမှ စိုက်ခင်းများအထိ လာရောက်ဝယ်ယူကြောင်း သိရှိရသည်။ ဇန်နဝါရီလတွင် တစ်ပိဿာဈေးနှုန်း ၁၄၀၀ မှ ၁၆၀၀ ထိရောင်းချရပြီး ယခုဖေဖော်ဝါရီလတွင် တစ်ပိဿာ ရောင်းချရဈေးနှုန်း ၄၀၀ မှ ၆၀၀ အထိသာ ရောင်းချခဲ့ရသော်လည်း ယခင်နှစ်ရောင်းချရမှုနှင့် နှိုင်းယှဉ်လျှင် တစ်ဧက ကျပ်သိန်း ၃၀ ဝန်းကျင် အမြတ်အစွန်း အကျိုးခံစားခွင့်ရရှိသော သီးနှံ ဖြစ်သည့် ခရမ်းချဉ်သီးသည် ရာသီချိန်သီးနှံဖြစ်သော်လည်း စတင်စိုက်ပျိုးချိန်မှ (၃)လကြာလျှင် ခူးစွတ်ရသည့်အတွက် သွင်းအားစုနှင့် လုပ်သားခများရှိသော်လည်း ယခုနှစ် ဈေးနှုန်းအနေနှင့် စတင်ထွက်ရှိချိန် (၁)လနီးပါး ဈေးကောင်းရခြင်း၊ ယခု သီးနှံရာသီ ကုန်ခါနီးတွင်လည်း ဈေးနှုန်း အနေနှင့် သင့်တင့်နေသည့်အတွက် တောင်သူများအနေနှင့် သင့်တင့်သည့် အကျိုးအမြတ် တွက်ခြေကိုက်မှုရှိသော သီးနှံတစ်ခုဖြစ်ကြောင်းကို ကျောက်ဆည်ခရိုင်အတွင်းရှိ သံရွာနှင့် သပြေကုန်းကျေးရွာများရှိ တောင်သူများထံမှ သိရှိရပါသည်။
DOCA(မန္တလေး)