ကသာမြို့နယ်သည် ဧရာဝတီမြစ်ဝှမ်းလွင်ပြင်ပေါများသောကြောင့် ဥယျာဉ်ခြံမြေများနှင့် လယ်ယာကိုင်းကျွန်းများတွင် မီးဖိုချောင်သုံးသီးနှံများ စိုက်ပျိုးမှုများပြားပြီး ဆန်စပါး စိုက်ပျိုးမှုနည်းပါးသည်ကိုတွေ့ရသည်။ ဆန်စပါးနှင့်ပတ်သက်၍ မြို့နယ်လူဦးရေစားသုံးမှုနှင့်တွက်ချက်ပါက ဆန်လိုဒေသဖြစ်ကြောင်းသိရပြီး ဆန်ပိုဒေသဖြစ်သော ခရိုင်တွင်းမြို့နယ်များဖြစ်သည့် အင်းတော်မြို့ နယ်၊ ဗန်းမောက်မြို့နယ်နှင့် မော်လူးမြို့နယ်တို့မှ တင်သွင်းရကြောင်းသိရပါသည်။
ကသာမြို့နယ်ရှိ အဓိကဈေးနှုန်းများဖြစ်သည့် မြို့မဈေးကြီးတွင် ဆန်ဆိုင်ကြီး(၄)ဆိုင်ရှိပြီး သီရိခေမာဈေးတွင် ဆန်ဆိုင်ကြီး(၇)ဆိုင်ရှိကြောင်း သက်ဆိုင်ရာဌာနစာရင်းများအရ သိရှိရပြီး ရပ်ကွက်များအတွင်း ဖွင့်လှစ်ရောင်းချသော ဆန်ဆိုင်ကြီးတချို့လည်းရှိကြောင်းသိရသည်။ ဆန်ဆိုင်ကြီးများမှာ ပုံမှန်ဖွင့်လှစ်ရောင်းချလျက်ရှိကြကြောင်း၊ လက်ရှိဆန်ဆိုင်များမှာ ကြီးကြီးမားမားသိုလှောင်ရောင်းချမှုမရှိဘဲ ဆန်မျိုးစုံ အိတ်(၈၀)မှ အိတ်(၁၀၀)ကြားလည်ပတ်ရောင်းချလျက်ရှိကြောင်းနှင့် ဈေးကွက်အတွင်း ဆန်ပြတ်လပ်မှုမရှိစေရေး ဆောင်ရွက်လျက်ရှိကြောင်းသိရသည်။
ကသာမြို့ပေါ်ရှိ ဆန်ဆိုင်ကြီးများ၊ ဆန်သိုလှောင်ရုံများအား စားသုံးသူရေးရာဦးစီးဌာနနှင့် သက်ဆိုင်ရာဌာနများပူးပေါင်းကာ ဆန်ဈေးနှုန်းမြှင့်တက်မှုမရှိစေရေးနှင့် ဈေးနှုန်းတည်ငြိမ်ရေး၊ ဈေးကွက်အတွင်း ဆန်ပြတ်လပ်မှုမရှိစေရေး ကြပ်မတ်ဆောင်ရွက်လျက်ရှိပြီး ကသာမြို့ဈေးအတွင်း ဖွင့်လှစ်ရောင်းချလျက်ရှိသည့် ဆန်ဆိုင်များမှာ ဒေသတွင်းစားသုံးမှုများပြားသည့် ဆင်းဧကရီ(၃) (ခေါ်) ဆင်း(၃) ဆန်၊ ပေါ်ဆန်းမွှေးနှင့် ဧရာမင်းဆန်(၃)များကို အဓိကထားရောင်းချလျက်ရှိကြောင်းနှင့် လက်ရှိရောင်းချလျက်ရှိသော ဆန်ဈေးနှုန်းများမှာ ဆင်း(၃) ဆန်တစ်အိတ်လျှင် (၇၅၀၀၀)ကျပ်၊ ပေါ်ဆန်းမွှေးဆန်တစ်အိတ်လျှင် (၁၆၈၀၀၀)ကျပ်နှင့် ဧရာမင်းဆန်တစ်အိတ်လျှင် (၁၂၀၀၀၀)ကျပ်ရှိကြောင်း ဆန် ရောင်းချသူလုပ်ငန်းရှင်များထံမှသိရပါသည်။
DOCA(စစ်ကိုင်း)