ဧရာဝတီတိုင်းဒေသကြီး၊ စားသုံးသူရေးရာဦးစီးဌာန၊ ဖျာပုံခရိုင်ဦးစီးမှူးဦးထွေးသိမ်း ဦးဆောင်၍ ဖျာပုံမြို့နယ်စစ်ဆေးရေးမှူး ဦးမင်းဇော်နှင့် စည်ပင်သာယာရေးအဖွဲ့ ဝန်ထမ်းများပူးပေါင်း၍ ဧပြီလ(၁)ရက်နေ့ နံနက်(၀၉:၀၀)နာရီတွင် ဖျာပုံမြို့၊ မြို့မဈေးရှိ ကုန်စုံဆိုင်များအား စားသုံးသူ ကာကွယ်ရေးဥပဒေ ပုဒ်မ(၁၅) (ခ) စစ်ဆေးရေးအရာရှိ၏ လုပ်ငန်းတာဝန်များအရ ကုန်အညွှန်းအမှတ်အသားတွင် ဖော်ပြရမည့်အချက်များ ပါဝင်မှုရှိ/မရှိ ဈေးကွက်စောင့်ကြည့် စစ်ဆေးခြင်းများ ဆောင်ရွက်ခဲ့ကြောင်းသိရသည်။
အဆိုပါအရောင်းဆိုင်များအား စစ်ဆေးရာ ကိုရီးယားအစားအစာ အရောင်းဆိုင်တွင် (25)GM ရှိအမွှေးနံ့သာမှုန့်ထုပ်နှင့် (170)GM ရှိ အချဉ်ရည်ထုပ် (ဆော့စ်) များအထုပ်ပေါ်တွင် တရုတ်ဘာသာ စာဖြင့် ရေးသားထားပြီး မြန်မာဘာသာဖြင့် ရေးသားထားသော စာသားများမပါရှိခြင်း၊ နေရပ်လိပ် စာ၊ သက်တမ်းကုန်ဆုံးရက်စွဲများမပါရှိခြင်းတို့ကြောင့် စားသုံးသူကာကွယ်ရေးဥပဒေ ပုဒ်မ(၄၁)(၄၃) နှင့် ကိုက်ညီမှုမရှိသည့်အတွက် ၎င်းကုန်စည်အား ဆက်လက်ရောင်းချခြင်းမပြုရန် တားမြစ်ခဲ့ပြီးဆိုင်ရှင်အား အရေးယူဆောင်ရွက်နိုင်ရေးအတွက် ဆက်လက်တင်ပြ ဆောင်ရွက်သွားမည်ဖြစ် ကြောင်း သတင်းရရှိပါသည်။
DOCA(ဧရာဝတီ)