မန္တလေးတိုင်းဒေသကြီး၊ ကျောက်ဆည်ခရိုင်တွင် သီးနှံစိုက်ပျိုးလျှက်ရှိရာ စားဖိုဆောင်သီးနှံတစ်မျိုးဖြစ်သော နနွင်းကိုလည်းစိုက်ပျိုးကြပါသည်။ ၂၀၂၄-၂၀၂၅ ဘဏ္ဍာနှစ်တွင် နနွင်းစိုက်ဧကအနေဖြင့် ကျောက်ဆည်မြို့နယ်တွင်(၈၄၃)ဧက၊ စဉ့်ကိုင်မြို့နယ်တွင်(၂၆)ဧက၊ မြစ်သားမြို့နယ်တွင် (၁၀၄၆)ဧက၊ စုစုပေါင်း(၁၉၁၅)ဧက စိုက်ပျိုးထားကြောင်း၊ ခရိုင်ကြေးတိုင်နှင့်မြေစာရင်းဦးစီးဌာန၏ စာရင်းများအရ သိရှိရပါသည်။ နနွင်းတစ်ဧက ကုန်ကျစရိတ်အနေဖြင့် မျိုး၊ သွင်းအားစု၊ လုပ်သားခအပါအဝင် စုစုပေါင်း (၂၀၀၀၀၀၀/-)ကျပ် ခန့်ကုန်ကျကြောင်း၊ နနွင်းစျေးနှုန်းအနေဖြင့် နနွင်းတက် (၁)ပိဿာလျှင်(၁၁၅၀၀/-)ကျပ်၊ နနွင်းဂေါင်း(၁)ပိဿာလျှင်(၁၀၀၀၀/-)ကျပ်၊ နနွင်းမှုန့်နို့ဆီဗူး(၁)ဗူးလျှင်(၁၃၀၀/-)ကျပ် စျေးနှုန်းများဖြင့် ရောင်းဝယ်လျှက်ရှိပြီး ယခုအချိန်တွင် နနွင်းစိုက်ခင်များ အောင်မြင်စွာဖြစ်ထွန်းလျှက်ရှိပြီး နနွင်းဖူးများလည်း စတင်ထွက်ရှိနေပြီဖြစ်ရာ နနွင်းအဖူး(၁၀၀) လျှင်လက်လီစျေးအနေဖြင့်(၁၀၀၀၀/-)ကျပ်၊ ဖောက်သည်စျေးအနေဖြင့်(၈၀၀၀/-)ကျပ်စျေးနှုန်းများဖြင့် ရောင်းချလျှက်ရှိပါသည်။နနွင်းဖူးများကို လက်သုပ်အနေဖြင့်သုပ်စား၍ရသလို ငပိရည်၊ ငံပြာရည်တို့ဖြင့် တို့၍လည်းစားသုံးကြပါသည်။ နနွင်းဖူးစားသုံးခြင်းဖြင့် ခန္ဓာကိုယ်အတွင်းအပူကင်းပြီး ကျန်းမာရေးနှင့်ညီညွတ်သောနနွင်းဖူးများကို ဝယ်ယူစားသုံးသင့်ပါကြောင်း သိရှိရပါသည်။
DOCA(မန္တလေး)