စားအုန်းဆီကြမ်း (Crude Palm Oil-CPO) စျေးနှုန်းများသည် လတ်တလောကာလတွင် အားကောင်းနေသော်လည်း၊ ၎င်းအခြေအနေသည် ၂၀၂၄ ခုနှစ်အကုန်တွင် ပျောက်ကွယ်သွားဖွယ်ရှိသည်ဟု Fitch Solutions ကုမ္ပဏီမှ နိုင်ငံတကာ စီးပွားရေးစောင့်ကြည့်လေ့လာရေးအဖွဲ့ (Business Monitor International-BMI) က ပြောကြားခဲ့ကြောင်း The Edge Malaysia သတင်း ဌာနက ၂၅-၁၀-၂၀၂၄ ရက်နေ့တွင် ဖော်ပြပါသည်။
စားအုန်းဆီကြမ်း၏ စျေးနှုန်းများ ခိုင်မာမှု ပျောက်ကွယ်သွားဖွယ်ရှိကြောင်း ခန့်မှန်းသုံးသပ် ရသည့်အကြောင်းအရင်းများမှာ မလေးရှားနှင့် အင်ဒိုနီးရှားရှိ ဆီအုန်းစိုက်ပျိုးမှုအပေါ် လာနီညာ (La Nina) ရာသီဥတု၏ အလားအလာကောင်းများ သက်ရောက်မှုရှိလာနိုင်သည့်အပြင် ၂၀၂၄ ခုနှစ်၊ စတုတ္ထသုံးလပတ်တွင် ဝယ်လိုအားလျော့ပါးလာမှုဖြစ်ပေါ်နိုင်ခြင်း၊ ကမ္ဘာ့မြောက်ပိုင်း ဆောင်းရာသီ အခြေအနေနှင့် ပြည်တွင်း ဆီထွက်သီးနှံ စိုက်ပျိုးသူများအား ကူညီပေးသည့် လုပ်ဆောင်ချက်တစ်ခု အဖြစ် အိန္ဒိယနိုင်ငံက စားအုန်းဆီနှင့် အခြားစားသုံးဆီ တင်သွင်းမှုအပေါ် အခွန် ၂၀ % ခန့်တိုးမြှင့် ကောက်ခံမှုအခြေအနေတို့ကြောင့် ဖြစ်ကြောင်းသိရှိရပါသည်။
၂၀၂၄ ခုနှစ်အတွက် ပျမ်းမျှစားအုန်းဆီတစ်တန်လျှင် ရင်းဂစ် ၃၈၅၀ နှင့် ၂၀၂၅ ခုနှစ် အတွက် တစ်တန်လျှင် မလေးရှားရင်းဂစ် ၃၆၅၀ ရှိနိုင်မည်ဟု BMI က ခန့်မှန်းထားသည်။ ၎င်းနှုန်းထားများသည် သတင်းရေးသားချိန်၌ ၂ နှစ်တာ ကာလအတွင်း အမြင့်ဆုံးအဖြစ် တစ်တန် လျှင် မလေးရှားရင်းဂစ် ၄၆၀၀ အထက်သို့ မြင့်တက်ခဲ့ပြီးဖြစ်သော Bursa Malaysia ကြိုရောင်း ဈေးကွက်စာရင်းဝင် စားအုန်းဆီဈေးနှုန်းများနှင့် နှိုင်းယှဉ်ထားခြင်းဖြစ်သည်။
၂၀၂၄ ခုနှစ်၊ အောက်တိုဘာ တစ်လတည်းတွင် အရှေ့အလယ်ပိုင်းဒေသ၌ ပထဝီနိုင်ငံရေး အန္တရာယ်များနှင့်ပတ်သက်၍ စိုးရိမ်မှုများရှိခြင်းနှင့် အယ်နီညိုရာသီဥတုဆိုးကျိုး သက်ရောက်မှု ရှိခြင်းတို့က ပို့ကုန်လုပ်ငန်းကဏ္ဍအပေါ် သက်ရောက်မှုဖြစ်ပေါ်လာပြီး စားအုန်းဆီဈေး ၁၄ ရာခိုင် နှုန်းမြင့်တက်လာကာ ရင်းဂစ်ငွေတန်ဖိုးကျဆင်းမှုနှင့် ကမ္ဘာလုံးဆိုင်ရာ လောင်စာဆီဈေးကွက် တို့အပေါ် ဆိုးကျိုးသက်ရောက်မှုများ မြင့်မားလာခဲ့ကြောင်း၊ အထက်တွင်ဖော်ပြခဲ့သည့်အတိုင်း ဈေးနှုန်းမြင့်တက်မှုဖြစ်ပေါ်လျက်ရှိသော်လည်း ၂၀၂၄ ခုနှစ် နှစ်ကုန်ပိုင်းတွင် ဈေးနှုန်းမြင့်တက်မှု ပျောက်ကွယ်သွားလိမ့်မည်ဖြစ်ကြောင်း BMI ကပြောကြားထားပါသည်။
အင်ဒိုနီးရှားနိုင်ငံ၏ ဇီဝဒီဇယ်လိုအပ်ချက် ၄၀ ရာခိုင်နှုန်း (B40) လုပ်ပိုင်ခွင့်နှင့် ပထဝီနိုင်ငံရေး အခြေအနေတို့က ဆိုးကျိုးသက်ရောက်မှုများ ဖြစ်စေသည့် အကြောင်းရင်းများဖြစ်ပြီး ရှောင်လွှဲ မရနိုင်သည့်အန္တရာယ်များသာဖြစ်ကြောင်း၊ ထို့ပြင် ဇီဝဒီဇယ်လိုအပ်ချက် ၅၀ ရာခိုင်နှုန်း (B50) ဆောင်ရွက်မည့်အစီအစဉ်က ၂၀၂၅ ခုနှစ် အတွက် စားအုန်းဆီ ဈေးနှုန်းအခြေအနေကို မျှော်မှန်းတွက်ချက်နိုင်ရန်အတွက် အဓိကဘေးထွက် အန္တရာယ်များထဲမှ တစ်ခုအပါအဝင်ဖြစ်ကြောင်း BMI သုတေသနဌာနက သုံးသပ်ဖော်ပြထားပါသည်။
၂၀၂၄ ခုနှစ်၊ စက်တင်ဘာလကုန်တွင် မလေးရှားနိုင်ငံရှိ စားအုန်းဆီကြမ်းသိုလှောင်မှုမှာ တန်ချိန် ၁.၀၆ သန်းရှိပြီး ၂၀၂၃ ခုနှစ် စက်တင်ဘာလ၌ တန်ချိန် ၁.၃၇ သန်းရှိခဲ့မှုနှင့် နှိုင်းယှဉ်ပါက လျော့နည်းလျက်ရှိကြောင်း မလေးရှားစားအုန်းဆီဘုတ်အဖွဲ့၏ အချက်အလက်များအရ သိရသည်။
ကြိုတင်ခန့်မှန်းတွက်ချက်မှုအရ မြောက်ကမ္ဘာခြမ်းဆောင်းရာသီ ပုံမှန်အတိုင်းဖြစ်ပေါ်နိုင်မှု အခြေအနေ၊ ရာသီအလိုက် နှေးကွေးမှုနှင့် အိန္ဒိယနိုင်ငံ၏ ရေနံစိမ်းနှင့် သန့်စင်ပြီးစားသုံးဆီများ တင်သွင်းမှုအပေါ် စည်းကြပ်ခွန်များ တိုးမြှင့်ကောက်ခံခြင်းတို့ကြောင့် ၂၀၂၄ ခုနှစ်၊ စတုတ္ထ သုံးလပတ်အတွက် စားအုန်းဆီတင်သွင်းမှု ဝယ်လိုအားကို သက်သာလာဖွယ်ရှိပြီး စားအုန်းဆီ ဈေးနှုန်းဈေးကွက်တို့အပေါ် ထပ်မံသက်ရောက်မှုရှိလာနိုင်ကြောင်း The Edge Malaysia သတင်းဌာန၏ ဖော်ပြချက်ကို တင်ပြအပ်ပါသည်။
Source: The Edge Malaysia, 25-10-2024(လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)