ဧရာဝတီတိုင်းဒေသကြီး၊ မြန်အောင်မြို့နယ်၊ အမှတ်(၂)ရပ်ကွက်၊ စာတိုက်တဲကြီးကုန်းလမ်းတွင် ဒေသထွက်ကုန်ဖြစ်သော စိမ့်မြေပဲကြော်လုပ်ငန်းသည် ဒေသတွင်းနှင့် အခြားမြို့နယ်၊ ခရိုင်များသို့ ဖြန့်ဖြူးရောင်းချလျှက်ရှိပြီး၊ ဧရာဝတီတိုင်းဒေသကြီး ပုသိမ်မြို့ SMEs ပြခန်းများတွင်လည်း သွားရောက်ပြသရပြီး ပြည်ပသို့ပါဈေးကွက်ရရှိရန် ထိုးဖောက်လျက်ရှိပါသည်။
စိမ့်မြေပဲကြော်ပြုလုပ်ရာတွင် အဓိကကုန်ကြမ်းဖြစ်သော မြေပဲ၊ ပဲမှုန့်၊ ကော်မှုန့်၊ ဆီများ ပါဝင်အသုံးပြုကြပါသည်။ မြေပဲကြော်တစ်ဒယ်လျှင် မြေပဲဆံ ၁ ပြည် ၄ လုံး၊ ပဲမှုန့်နှင့် ကော်မှုန့်၊ ဆီ(၅၀)သား၊ သကြား၊ ဂျင်းနှင့် ကြက်သွန်ဖြူ၊ ဆားတို့ကို သင့်တင့်မျှတစွာရောစပ်၍ ကြော်ရပါသည်။ မြေပဲကြော်ပြုလုပ်ရာတွင် လုပ်သား (၄)ဦးလိုအပ်ပြီး၊ တစ်ဒယ်စာ ကုန်ကျစရိတ် (၃၃၀၀၀/-) ကျပ်ခန့်ကုန်ကျကြောင်း သိရှိရပါသည်။ မြေပဲကြော်တစ်ဒယ်လျှင် ၁၅၀၀/- ကျပ်တန် အထုပ်(၃၀) ခန့်ထွက်ရှိပြီး အကျိုးအမြတ်အနေဖြင့် တစ်ဒယ်လျှင် ၁၂၀၀၀/- မှ ၁၅၀၀၀/- ကျပ်ထိ ရရှိပါသည်။ မြေပဲကြော်ကို တစ်ရက်ခြားကြော်ရပြီး မြန်အောင်မြို့နယ် ဒေသတွင်းနှင့် အခြားမြို့နယ်များသို့ ဒေသလက်ဆောင်အဖြစ် နေ့စဉ်အရောင်းအဝယ်ဖြစ်လျက်ရှိပါသည်။ စိမ့်မြေပဲကြော်အား သရေစာအဖြစ် ရေနွေးကြမ်းနှင့် တွဲဖက်စားသောက်သလို ထမင်းပူပူလေးနှင်လည်း စားသုံးကြပါသည်။ မြန်မာ့ရိုးရာ အစားအစာတစ်ခုဖြစ်သလို ဒေသထွက်မြေပဲဆံကို အသုံးပြုခြင်းကြောင့် အာဟာရပြည့်ဝပြီး အရသာထူးကဲသည့်အတွက် စားသုံးသူများအကြိုက်တွေ့လျက်ရှိကြောင်း၊ မြန်အောင်မြို့နယ်၏ ဒေသလက်ဆောင်အဖြစ်လည်း ဝယ်ယူကြကြောင်း သိရှိရပါသည်။
DOCA(ဧရာဝတီ)