မန္တလေးတိုင်းဒေသကြီး၊ တံတားဦးခရိုင်၊ ငါန်းဇွန်မြို့နယ်အတွင်းရှိ ကျေးရွာတချို့တွင် စိုက်ပျိုးရေးကို အဓိကထားလုပ်ကိုင်ကြပြီး နှစ်စဉ်နှမ်း၊ မြေပဲ၊ ပဲစဉ်းငုံသီးနှံများကို အဓိကထားစိုက် ပျိုးလျက်ရှိသည်။ နှမ်းစိုက်ပျိုးရာ၌ (၁)ဧကလျှင် ကုန်ကျစရိတ်အနေဖြင့် မြေပြင်ချိန်မှစ၍မျိုးစေ့၊ လုပ်အားခနှင့် သွင်းအားစုအပါအဝင် စုစုပေါင်း ငွေကျပ် (၂)သိန်းခန့်မှ(၂)သိန်း(၅)သောင်းခန့်ကုန် ကျကြောင်း၊ စိုက်ပျိုးပြီး(၃)လအကြာတွင်ရိတ်သိမ်းရပြီး (၁)ဧက အထွက်နှုန်းအားဖြင့် (၄)တင်းမှ (၅)တင်းထွက်ရှိကြောင်းသိရသည်။ ဈေးကွက်အနေဖြင့် ထွက်ရှိလာသောနှမ်းများကို တံတာဦး၊ မန္တလေး၊ ကျောက်ဆည်မြို့များသို့ တင်ပို့ရောင်းချရကြောင်း၊ နှမ်းသီးနှံစတင် စိုက်ပျိုးချိန်မှစ၍ နှမ်းတစ်တင်းလျှင် (၁၀၀၀၀၀) ကျပ်ခန့်မှ (၁၀၈၀၀၀) ကျပ်ခန့်ဈေးနှုန်းရှိကြောင်းသိရှိရသည်။ ငါန်းဇွန်မြို့နယ်အတွင်းရှိ ကျေးရွာများတွင် မိုးရေချိန်ကို အဓိကထားစိုက်ပျိုးရသော ဒေသများ ဖြစ်သောကြောင့် ယခုနှစ်တွင်မိုးရေချိန်ရရှိမှုနည်းပါးသောကြောင့် နှမ်းစိုက်တောင်သူများအထွက် နှုန်းလျော့နည်း၍ ဆုံးရှုံးမှုများစွာဖြစ်ပေါ်ခဲ့ကြောင်း နှမ်းစိုက်ပျိုးသောတောင်သူများ ထံမှသိ ရသည်။
DOCA(မန္တလေး)