ဧရာဝတီတိုင်းဒေသကြီး၊ မအူပင်မြို့နယ် ဆန်စက်ပိုင်ရှင်များအသင်း ရွေးချယ်တင်မြောက်ပွဲကို (၂၉.၅.၂၀၂၂) နေ့ နံနက် (၁၀:၀၀) နာရီအချိန်မှစ၍ အစီအစဉ် (၁၀)ရပ်ဖြင့် စတင်ကျင်းပပြုလုပ်ခဲ့ပါသည်။
အဆိုပါ ရွေးချယ်တင်မြောက်ပွဲကို မြန်မာနိုင်ငံဆန်စက်လုပ်ငန်းရှင်အသင်း၏ လမ်းညွှန်မှုအရ တပင်ရွှေထီး ဆန်စက်ပိုင်ရှင်ဦးဉာဏ်ထွန်း၊ စားသုံးသူရေးရာဦးစီးဌာနမှ ဦးအောင်ဇော်ဦးနှင့် မအူပင်မြို့နယ် အထွေထွေအုပ်ချုပ်ရေးဦးစီးဌာနမှ ဒု-ဦးစီးမှူး သီဟကိုကို၊ နိုင်ဝမ်းတူး ဆန်စက်ပိုင်ရှင် ဦးဝင်းမြင့်အောင်နှင့် ဆန်စက်ပိုင်ရှင်အသင်းရုံးအဖွဲ့မှူး ဦးထွန်းအောင်တို့မှ အခမ်းအနား အစီအစဉ်များအတိုင်း ရွေးချယ်ပွဲကို ကျင်းပခဲ့ကြပါသည်။
စားသုံးသူရေးရာဦးစီးဌာနမှ မအူပင်မြို့နယ်ဦးစီးမှူး ဦးအောင်ဇော်ဦးက ဆန်စက်လုပ်ငန်းရှင်များနှင့် ရှေ့ဆက်လက်တွဲလုပ်ဆောင်ရမည့် လုပ်ငန်းစဉ်များ၊ ဌာန၏ မျှော်မှန်းချက်၊ ရည်မှန်းချက်များ ပြည်တွင်းကုန်သွယ်မှုဖွံ့ဖြိုးတိုးတက်ရန် ဆောင်ရွက်နိုင်မည့် နည်းလမ်းကောင်းများကို ၂၀၂၂ ခုနှစ်မှ ၂၀၂၅ ခုနှစ် သက်တမ်းကာလတွင် တာဝန်ထမ်းဆောင်မည့် မအူပင်မြို့နယ် ဆန်စက်လုပ်ငန်းရှင်များအသင်း ဥက္ကဌနှင့် အဖွဲ့ဝင်များသာမက ဆန်စက်ပိုင်ရှင်များကို အကျယ်တဝင့် ဆွေးနွေးခဲ့ကြောင်း သတင်းရရှိပါသည်။
DOCA(ဧရာဝတီ)