ပြည်မြို့ရှိ ဈေးကွက်များအတွင်းသို့ ပြည်မြို့အနီးရှိ ကျေးရွာများနှင့် ဉယျာဉ်များမှ သရက်သီးအစိမ်းများ လာရောက်ရောင်းချလျက်ရှိပြီး စားသုံးသူများကဝယ်ယူစားသုံးကြပါသည်။ ပေါ်ခါစဖြစ်၍ သရက်သီးစိမ်းများမှာ အချဉ်ဓါတ်နည်းပြီး မွှေးကြွပ်မှုရှိသဖြင့် ဈေးကောင်းပေး၍ ဝယ်ယူစားသုံးကြပါသည်။ ယခုအချိန်သည် သရက်သီးစိမ်းများစတင်ပေါ်လာသဖြင့် ရန်ကုန်ဘက်မှ ဝင်ရောက်လာသော သရက်သီးစိမ်း(အကြီး) သီးများမှာ အရောင်းအဝယ် အနည်းငယ် အေးသွားခဲ့ပါသည်။ ထိုသရက်သီးများကို ချဉ်ပေါင်းသည်များကသာဝယ်ယူမှုရှိပါသည်။ စားသုံးသူများ ဝယ်ယူစားသုံးသော တို့စရာအဖြစ်ဝယ်ယူစားသုံးသော သရက်သီးမှာ မန္တလေးရင်ကွဲသီး၊ မြကျောက် သရက်သီး၊ သရက်သခွားသီး နှင့် ဆိုင်သီးများဖြစ်ပါသည်။ ဈေးနှုန်းများအနေဖြင့် မန္တလေး ရင်ကွဲ(အသေး)တစ်လုံးလျှင် ၃၅၀ကျပ်၊ မြကျောက်သရက်သီးအစိမ်း(အသေး)တစ်လုံးလျှင် ၄၀၀ ကျပ်၊ သရက်သခွားသီးအလုံးသေးတစ်လုံးလျှင် ၅၀၀ကျပ်၊ (၅)လုံးပါအတွဲတစ်တွဲလျှင် ၂၀၀၀ကျပ်၊ ဆိုင်သီးတစ်လုံးလျှင် ၇၀၀ကျပ်ဖြင့် အသီးသီးရောင်းချလျက်ရှိပါသည်။ နောက်မကြာမီ ကာလများတွင် သရက်သီးအမှည့်များထွက်ပေါ်လာတော့မည်ဖြစ်ပါသဖြင့် ပေါ်စတွင် ဈေးများမြင့်နေမည်ဖြစ် ကြောင်းခန့်မှန်းရကြောင်းသိရှိရပါသည်။
DOCA(ပဲခူး)