ခရမ်းမြို့နယ်၊ ဖေဖော်ဝါရီလ (၂၅) ရက်
ရန်ကုန်တိုင်းဒေသကြီး၊ သန်လျင်ခရိုင်၊ ခရမ်းမြို့နယ်အတွင် နှစ်စဉ်မိုးစပါးများ ရိတ်သိမ်းပြီး လယ်ဧကများတွင် ဆောင်းသီးနှံပဲတီစိမ်းကို စိုက်ပျိုးခဲ့ရာ ယခင်နှစ်တွင် (၁၀၅၀၁၇) ဧကစိုက်ပျိုးခဲ့ပြီး ယခုနှစ် ၂၀၂၄-၂၀၂၅ ခုနှစ်တွင် (၁၀၄၄၉၄)ဧကအား ရာနှုန်းပြည့် အောင်မြင်စွာ စိုက်ပျိုးနိုင်ခဲ့ကြောင်း သိရသည်။
ခရမ်းမြို့နယ်အတွင်းရှိ ဒေသခံတောင်သူများသည် ဒေသ၏စိုက်ပျိုးမြေကောင်းမွန်မှု ကြောင့် စိုက်ပျိုးရေးအဆင်ပြေ၍ သီးနှံများအား တစ်နှစ်ပတ်လုံးစီးပွားဖြစ်စိုက်ပျိုး လုပ်ကိုင် ကြရာ ခရမ်းဒေသထွက် ပဲတီစိမ်း၊ ပဲတီရွှေဝါသည် ဥရောပနိုင်ငံများထိတင်ပို့ ရောင်းချရသော ဈေးကွက် ဝင်သီးနှံဖြစ်၍ ပြည်ပဝင်ငွေရရှိခြင်း၊ သီးနှံဝင်ငွေတိုးပွားစေရန်နှင့် စားနပ်ရိက္ခာဖူလုံ စေရေးအတွက် တောင်သူများ အဓိကထား၍ နှစ်စဉ်စိုက်ပျိုးလျက်ရှိပြီး ယခုအခါတွင် ခရမ်း တစ်မြို့နယ်လုံးရှိ ကျေးရွာများတွင် ပဲတီစိမ်းသီးနှံများကို ခူးဆွတ်နေပြီး ပဲတီစိမ်းများ လှိုင်လှိုင်ထွက်ပေါ်လျှက်ရှိ၍ ၎င်းပဲတီစိမ်းများအား ပဲအဝယ်ဒိုင်များ၊ ကုန်သည်၊ ပွဲစားများမှ ဝယ်ယူလျက်ရှိရာ ပဲတီစိမ်းတစ်တင်း လျှင် ယခုနှစ်အဖွင့်ဈေးမှာ (၁၁၅၀၀၀)ကျပ်ဖြစ်ပြီး ယခင်နှစ်အဖွင့်ဈေးမှာ (၉၀၀၀၀)ကျပ် ဖြစ်ခဲ့ပြီး ယခုနှစ်တွင် ပဲအထွက်တင်းမှာ ယခင်နှစ်ထက် ပိုမိုထွက်ရှိသောကြောင့် တောင်သူများအကျိုးအမြတ်များ ရရှိကြောင်းသိရသည်။
ခရမ်းပဲတီစိမ်း၊ ပဲတီရွှေဝါများကို မြို့နယ်ရှိကုန်သည်များက ပဲအဝယ်ဒိုင်များဖွင့်လှစ်၍ တောင်သူများထံမှ ဝယ်ယူကြပြီး ရန်ကုန်ဘုရင့်နောင်ပွဲရုံ၊ ရွှေပြည်သာ၊ လှိုင်သာယာစက်မှုဇုံ များရှိ ကုမ္ပဏီများသို့ တင်ပို့ရောင်းချကြောင်း သိရသည်။
DOCA(ရန်ကုန်)