မွန်ပြည်နယ်၊ သထုံမြို့နယ်တွင် မြို့နယ်စီမံအုပ်ချုပ်ရေးအဖွဲ့၏ ဦးဆောင်မှုဖြင့် မြန်မာနိုင်ငံဆီကုန်သည်နှင့် ဆီလုပ်ငန်းရှင်အသင်း၏ အစီအစဉ်ဖြင့် မွန်ပြည်နယ် ဆီကုန်သည်များအသင်းမှ ပြည်သူများထံ သက်သာသောဈေးနှုန်းဖြင့် စားသုံးဆီများကို ရောင်းချပေးလျက်ရှိရာ (၅.၃.၂၀၂၅) ရက်နေ့၊ နံနက်ပိုင်းက သထုံမြို့နယ်၊ သိမ်ကုန်း ရပ်ကွက်နှင့် အောက်ကျင်းရပ်ကွက်တို့၌ ရောင်းချပေးခဲ့ကြောင်း သိရသည်။
စားသုံးဆီများရောင်းချပေးရာတွင် တစ်ပိဿာလျှင် (၇၆၆၁) ကျပ်ဖြင့် လူတစ်ဦးလျှင် ဆီတစ်ပိဿာကို သထုံမြို့နယ်၊ သိမ်ကုန်းရပ်ကွက်နှင့် အောက်ကျင်းရပ်ကွက်၊ မြို့မဈေးအနီးတို့၌ ရောင်းချပေးရာ စားသုံးသူပြည်သူများက အေးချမ်းပျော်ရွှင်စွာ လာရောက်ဝယ်ယူကြပြီး မြို့နယ်စီမံအုပ်ချုပ်ရေးအဖွဲ့ဝင်များ၊ စားသုံးသူရေးရာဦးစီးဌာနမှ တာဝန်ရှိသူများ၊ ဌာနဆိုင်ရာများက လိုအပ်သည်တို့ကို ကူညီဆောင်ရွက်ပေးခဲ့ကြသည်။
အဆိုပါနေ့တွင် စားသုံးသူပြည်သူတို့အား ဆီပိဿာချိန်ပေါင်း (၂၂၀) ရောင်းချပေးခဲ့ ကြောင်း၊ ပြည်သူများအနေဖြင့် အခြေခံစားသောက်ကုန်များအား သက်သာသော ဈေးနှုန်းဖြင့် အဆင်ပြေစွာ အလွယ်တကူ ဝယ်ယူစားသုံးနိုင်ပြီး ကုန်ဈေးနှုန်းတည်ငြိမ်ရေးရည်ရွယ်၍ ယခုကဲ့သို့ ရောင်းချပေးခြင်းဖြစ်ကြောင်း သိရှိရပါသည်။
DOCA(မွန်)