မွန်ပြည်နယ်၊ ကျိုက်မရောမြို့နယ်ရှိ ကျေးရွာများတွင် အတ္တရံမြစ်ရေဖြင့် နွေသခွား သီးများ တစ်ပိုင်တစ်နိုင် စိုက်ပျိုးထားကြရာ အောင်မြင်ဖြစ်ထွန်း၍ စျေးကောင်းရရှိကာ တောင်သူများ အဆင်ပြေလျှက်ရှိသည်။
ကျိုက်မရောမြို့ပေါ် ကမ်းနားလမ်းထုံးဘိုရပ်ကွက်မှ စိုက်ပျိုးရေးကို အဓိကထား လုပ်ကိုင်ကြရာ နွေရာသီ၌ အတ္တရံမြစ်မှရေများကို ပိုက်ဖြင့်သွယ်ယူကာ နွေသခွားများကို စိုက်ပျိုးကြပြီး ယခုနှစ်၌ အထွက်နှုန်းကောင်းသဖြင့် အဆင်ပြေကြောင်း သိရသည်။
သခွားပင်ကို မြေပြင်၌ ဘောင်ထောင်ပြီး အစေ့ချစိုက်ပျိုးပြီး ရက်ပေါင်းနှစ်ဆယ်ခန့် တွင် အညွန့်လေးများ ထွက်လာပြီး ဘောင်ထောင်ပေးရကြောင်း နောက်ထပ် ရက်ပေါင်း သုံးဆယ်အကြာတွင် သခွားပွင့်များပွင့်လာပြီး သခွားသီးများ အပြိုင်အဆိုင် စတင်သီးလာ ကြောင်း သခွားသီးများပွင့်ချိန်၌ အပွင့်အားတိုးဆေးဖြန်းပေးရကြောင်း၊ သခွားသီးကို တစ်ရက်ခြားတစ်ကြိမ် ခူးရကြောင်း တစ်ခါခူးလျှင် ပိဿာချိန်၂၀၀ခန့်ရရှိသဖြင့် စျေးလည်း ကောင်းကာ တစ်ပိဿာကို တစ်ထောင်ကျပ်ထိရရှိပြီး တစ်ရက်ခြား ဝင်ငွေ တစ်သိန်း ရရှိ၍ မိသားစု အပိုဝင်ငွေတိုးကာ စိုက်ပျိုးစရိတ်လည်း ကာမိကာ နှစ်စဥ် သခွားသီးကို စီးပွားဖြစ် စိုက်ပျိုးလာကြကြောင်းသိရသည်။
DOCA(မွန်)