“သင်္ဘောဇီးဖြူသီးစိုက်ပျိုးခြင်းဖြင့်ဝင်ငွေများရရှိ”

          ကျောက်ဆည်ခရိုင်အတွင်းတွင် သီးနှံမျိုးစုံစိုက်ပျိုးလျှက်ရှိရာ ကျေးလက်နေတောင်သူများသည် မိသားစုအပိုဝင်ငွေရရှိစေရေးအတွက် လယ်ကန်သင်းများတွင် သင်္ဘောဇီးဖြူပင်များကို စိုက်ပျိုးထားရှိကြောင်း၊ သင်္ဘောဇီးဖြူပင်ကို အစေ့ပျိုး၍ စိုက်ပျိုးကြောင်း၊ သင်္ဘောဇီးဖြူပင် ဧပြီလ တွင် တစ်ကြိမ်၊ သြဂုတ်လတွင် တစ်ကြိမ် တစ်နှစ်လျှင်နှစ်ကြိမ်အသီးသီးကြောင်း၊ တောင်သူများသည် သင်္ဘောဇီးဖြူပင်ကို အပင်လိုက်အပြတ်ရောင်းချကြောင်း၊ ကုန်စိမ်းသည်များမှ သင်္ဘောဇီးဖြူသီးကို အပင်အကြီး၊အသေးအပေါ်မူတည်၍ စျေးပေးကြောင်း၊ ၎င်းသီးသည် အသားများသော အသီးဖြစ်၍ အစေ့လည်းပါရှိရာ အစေ့သည်မာကျော၏ ၊ အသား၏အရသာသည် ချဉ်၍ခံတွင်းရှင်းသည်၊ များသောအားဖြင့် သင်္ဘောဇီးဖြူသီးကို အချဉ်ထည့်၍ဖြစ်စေ၊ သနပ်ပြုလုပ်၍ဖြစ်စေ စားသုံးကြောင်း၊ သင်္ဘောဇီးဖြူသီးခြောက်၏ ဂုဏ်သည် သွေး၊ သည်းခြေနှင့် ဖြစ်သောလေ၊ သလိပ်နာကိုလည်းကောင်း၊ လျှာခံတွင်းခြောက်သွေ့သော်လည်းကောင်း၊ ရေငတ်သော်လည်းကောင်း၊ သလိပ်သွေး ငန်းခြောက်ခြင်းသော်လည်းကောင်း ၊ အသံပျက်သော်လည်းကောင်း၊ မျက်စိနာသော်လည်းကောင်း၊ အတွင်းပူသော်လည်းကောင်း သက်သာစေသည်ဟု မြန်မာဆေးကျမ်းများမှ ဖတ်ရှုသိရှိရပါသည်။စျေးကွက်ထဲ၌ သင်္ဘောဇီးဖြူသီးတစ်ပြည်လျှင်(၇၀၀-)ကျပ်ဖြင့် အရောင်းအဝယ် ဖြစ်နေကြောင်း သိရှိရပါသည်။

DOCA(မန္တလေး)