ပုသိမ်မြို့နယ်အတွင်းရှိ လယ်ယာစိုက်ပျိုးရေးဈေးများတွင် ကန်စွန်းဥဈေးနှုန်း ယခုလအတွင်း တည်ငြိမ်နေပြီး တောင်သူများ အကျိုးအမြတ်ကောင်းရရှိနေကြောင်း သိရသည်။ ကန်စွန်းဥစိုက်ပျိုးမှု တိုးမြင့်လာခြင်းနှင့်အတူ ပြည်တွင်းဈေးကွက်တွင် ဝယ်လိုအားလည်း ကောင်းမွန်လျက်ရှိသည်။
ကန်စွန်းဥအား ပုသိမ်မြို့နယ်အတွင်းသာမက ရန်ကုန်၊ မန္တလေးနှင့် အခြားမြို့ကြီးများသို့လည်း တင်ပို့ရောင်းချနေရပြီး စားသုံးသူများ၏ အာဟာရလိုအပ်ချက်နှင့် ကျန်းမာရေး အသိပညာတိုးလာမှုကြောင့် ဝယ်လိုအား ပိုမိုမြင့်တက်လာသည်။ ပုသိမ်မြို့နယ်၊ ရွာသစ်ကျေးရွာမှ တောင်သူတစ်ဦးဖြစ်သူက " ဒီနှစ်မှာ ကန်စွန်းဥဈေးကောင်းနေတဲ့အတွက် ဝင်ငွေတိုးလာပါတယ်။ မိုးခေါင်ရေရှားဒဏ်ကို ခံနိုင်တဲ့သီးနှံဖြစ်တာကြောင့် စိုက်ပျိုးရတာ စိတ်ချရပါတယ်" ဟု ပြောကြားခဲ့ပါသည်။
ပုသိမ်မြို့နယ်ရှိ ကျေးရွာနှင့်မြို့ဈေးများတွင် ကန်စွန်းဥအား အောက်ပါဈေးနှုန်းများဖြင့် ရောင်းချလျက်ရှိရာ အကြီး (တစ်ပိဿာ)လျှင် ၂,၅၀၀ ကျပ် မှ ၃,၀၀၀ ကျပ် ၊ အလတ် (တစ် ပိဿာ)လျှင် ၂,၀၀၀ ကျပ် မှ ၂,၅၀၀ ကျပ် ၊ အသေး (တစ်ပိဿာ) - ၁,၅၀၀ ကျပ် မှ ၂,၀၀၀ ကျပ် ဖြစ်ပြီး ထိုဈေးနှုန်းများသည် ယခုနှစ်အတွက် အတန်အသင့်မြင့်မားနေပြီး ယခင်နှစ်ထက် ၁၅% မှ ၂၀% အထိ တိုးတက်လာကြောင်း သိရသည်။
DOCA(ဧရာဝတီ)