ပြည်ပတင်ပို့မှုမရှိသလောက်ဖြစ်နေချိန်တွင် ပြည်တွင်းကြက်သွန်နီဈေးမြင့်တက်လာကြောင်း အိမ်ရှင်မများနှင့် ကုန်သည်အချို့ထံမှ သိရှိရပါသည်။ ထို့ပြင် မြန်မာနိုင်ငံတဝှမ်းက မြို့ကြီးအချို့မှာလည်း ကြက်သွန်နီဈေးများ မြင့်တက်လာနေကာ မွန်ပြည်နယ်၊ မော်လမြိုင်မြို့တွင်လည်း ယခုရက်ပိုင်းအတွင်း ကြက်သွန်နီဈေး တစ်ပိဿာလျှင် ကျပ် (၂၀၀၀/) ကျော်အထိ ဈေးနှုန်းမြင့်တက်လာကြောင်း စားသုံးသူအချို့ထံမှ သိရှိရပါသည်။
ပြီးခဲ့သည့် မေလဆန်းပိုင်းတွင် ကြက်သွန်နီ အလုံးသေး/အလတ် တစ်ပိဿာလျှင် (၆၀၀/၊ ၈၀၀/)ကျပ်၊ အလုံးကြီး အလုံးသန့် တစ်ပိဿာလျှင် (၁၂၀၀/)ကျပ်ခန့်သာရှိခဲ့ပြီး ယခု ဇွန်လကုန်တွင် ကြက်သွန်နီ အလုံးသေး/အလတ် တစ်ပိဿာလျှင် (၂၀၀၀/၊ ၂၄၀၀/) ကျပ်၊ အလုံးကြီး တစ်ပိဿာလျှင် (၂၆၀၀/) ကျပ်အထိ ဈေးနှုန်းမြင့်တက်သွားကြောင်း သိရှိရပါသည်။
ယခင်မေလဆန်းက ကြက်သွန်နီ ၁၀ ပိဿာဝင်တစ်အိတ်လျှင် (၁၀၀၀၀) ကျပ်ဝန်းကျင်ရှိခဲ့ပြီး ယခု ဇွန်လကုန်တွင် ကြက်သွန်နီ ၁၀ ပိဿာဝင်တစ်အိတ်လျှင် (၂၄၀၀၀)ကျပ်ထိ ဈေးနှုန်းမြင့်တက်လာကြောင်း သိရှိရပါသည်။
ယခုကဲ့သို့ ဈေးနှုန်းမြင့်တက်ရခြင်းမှာ စက်သုံးဆီဈေးနှုန်းမြင့်တက်လာသည်နှင့်အမျှ သယ်ယူပို့ဆောင်ရေးစရိတ်မြင့်တက်လာခြင်းကြောင့် ကြက်သွန်နီဈေးနှုန်းများ မြင့်တက်ရခြင်းဖြစ်ကြောင်း သိရှိရပါသည်။
DOCA(မွန်)