ကန်ကြီးထောင့်မြို့နယ်အတွင်းရှိ တောင်သူများသည် ခရမ်းချဉ်သီး စိုက်ပျိုးခြင်းဖြင့် စီးပွားရေး အထောက်အကူဖြစ်စေပြီး ဝင်ငွေများ သိသိသာသာ တိုးတက်လာကြောင်း သိရသည်။ မြို့နယ်၏ ရာသီဥတုနှင့် ရေမြေသဘာဝအခြေအနေတို့သည် ခရမ်းချဉ်သီး စိုက်ပျိုးရန် အထူးသင့်တော်ကာ ဒေသခံတောင်သူများအတွက် အဓိက ဝင်ငွေရရှိရေး လုပ်ငန်းတစ်ခု ဖြစ်လာခဲ့သည်။
ကန်ကြီးထောင့်မြို့နယ်တွင် ခရမ်းချဉ်သီးကို စနစ်တကျ စိုက်ပျိုးနည်းများ ကျင့်သုံး လာခြင်းကြောင့် အထွက်နှုန်းနှင့် ဈေးကွက်ဝယ်လိုအား ကောင်းမွန်လာသည်။ ကျေးရွာအချို့တွင် ခရမ်းချဉ်သီး စိုက်ပျိုးရေးကို အဖွဲ့အစည်းဖွဲ့၍ လုပ်ကိုင်လာကြပြီး ကျေးလက်ဒေသဖွံ့ဖြိုးရေး အဖွဲ့များနှင့် စိုက်ပျိုးရေး ဦးစီးဌာနတို့မှ နည်းပညာ၊ မျိုးစေ့နှင့် ဈေးကွက်ရှာဖွေရေး အထောက်အပံ့များ ပေးခဲ့သည်။ ခရမ်းချဉ်သီး များကို မြို့နယ်အတွင်းရှိ ဈေးများသာမက ပုသိမ်၊ ဟင်္သာတနှင့် ရန်ကုန်မြို့များသို့ပါ တင်ပို့ ရောင်းချနိုင်ခြင်းကြောင့် တောင်သူများ၏ စီးပွားရေး အခြေအနေ တိုးတက်လာသည်ဟု ဆိုသည်။
ကန်ကြီးထောင့်မြို့နယ် စိုက်ပျိုးရေးဦးစီးဌာနမှ ဝန်ထမ်းတစ်ဦးကလည်း "ခရမ်းချဉ်သီး စိုက်ပျိုးမှုကို မြှင့်တင်ပေးခြင်းဖြင့် တောင်သူများ စီးပွားရေး ပိုမိုတည်ငြိမ်လာစေဖို့ ရည်ရွယ် ပါတယ်" ဟု ပြောကြားခဲ့သည်။ ယခုကဲ့သို့ ဈေးကွက်ဝယ်လိုအား ကောင်းသော သီးနှံများ စိုက်ပျိုးခြင်းသည် ကျေးလက်ဒေသဖွံ့ဖြိုးရေးအတွက် အရေးပါသည့် လမ်းကြောင်းတစ်ခု ဖြစ်ပေါ် လာမည်ဖြစ်ပါသည်။
DOCA(ဧရာဝတီ)