မကွေးတိုင်းဒေသကြီး၊ ပခုက္ကူခရိုင်၊ ပခုက္ကူမြို့သည် ပဲမျိုးစုံအရောင်းအဝယ်ဖြစ်လျက်ရှိရာ သင်္ကြန်ပြီးကာလ ဧပြီလ(စတုတ္ထပတ်)အစောပိုင်းတွင် ပြည်တွင်းသုံးကုလားပဲဈေးကွက် ဈေးအနည်းငယ်မြင့်တက် အရောင်းအဝယ်ဖြစ်ကြောင်း သိရှိရသည်။ ပခုက္ကူဈေးကွက်သို့ ကုလားပဲသီးနှံ စိုက်ပျိုးရာဒေသများဖြစ်သော ပခုက္ကူမြို့နယ်အတွင်းရှိ ကျေးရွာများ၊ မြစ်ခြေ၊ ကမ္မ၊ မြိုင်၊ ပေါက်၊ ရေစကြို မြို့နယ်တွင်းရှိ ကျေးရွာများအပြင် မန္တလေးတိုင်းဒေသကြီး ညောင်ဦးမြို့နယ်အတွင်းရှိ ကျေးရွာများနှင့် စစ်ကိုင်းတိုင်းဒေသကြီးအတွင်းရှိ ကျေးရွာများမှ အများဆုံးဝင်ရောက် အရောင်းအဝယ်ဖြစ်ကြောင်း၊ ယခုအချိန်တွင် ကုလားပဲသီးနှံများ ရိတ်သိမ်းပြီးချိန်ဖြစ်၍ ဈေးကွက်သို့ ဒေသအနှံ့အပြားမှ ကုလားပဲ(အသစ်)များ လှိုင်လှိုင်ဝင်ရောက်လျက်ရှိကြောင်း သိရှိရသည်။
၂၀၂၅ခုနှစ်၊ ဧပြီလ(စတုတ္ထပတ်)အစောပိုင်းတွင် ကုလားပဲအမျိုးအစားအလိုက် ဈေးကွက်သို့ အရောင်းအဝယ်ဖြစ်လျက်ရှိရာ ကုလားပဲသီးနှံ(အသစ်)များ အရောင်းအဝယ်သွက်နေကြောင်း၊ ပြည်တွင်းသုံးစွဲမှုများသော ကုလားပဲဈေး အနည်းငယ်မြင့်တက်လာကြောင်း၊ ကုလားပဲ(V2) တစ်တင်းလျှင် ကျပ်(၇၅၀၀၀)၊ ကုလားပဲ(V6) တစ်တင်းလျှင် ကျပ်(၈၂၀၀၀)၊ ကုလားပဲ(HL) တစ်တင်းလျှင် ကျပ်(၇၅၀၀၀)၊ ကုလားပဲ(929)တစ်တင်းလျှင် ကျပ်(၇၆၆၀၀) အရောင်းအဝယ် ဖြစ်ကြောင်း၊ ယခင် ဧပြီလ(ပထမပတ်)နှင့် ဈေးနှုန်းနှိုင်းယှဉ်ပါက တစ်လအတွင်း ကုလားပဲတစ်တင်း လျှင် ကျပ်(၃၀၀၀)ခန့် ဈေးတက်ပြီး အရောင်းအဝယ်ဖြစ်ကြောင်း၊ ပွဲရုံဈေးကွက်သို့ နေ့စဉ် ပိဿာ(၂၀)ဝင်အိတ် (၁၀၀၀ မှ ၁၅၀၀ ထိ) ဝင်ရောက်ကြောင်း၊ သီးနှံအသစ်ပေါ်ချိန်ဖြစ်၍ ဈေးကွက်သို့ ကုန်ဝင်ရောက်မှုများကြောင်း၊ ပြည်ပတင်ပို့မှုနည်းပြီး ကုန်သည်များမှ ဝယ်ယူသိုလှောင် ထားရှိမှု များကြောင်း၊ ပခုက္ကူပွဲရုံ ဈေးကွက်သို့ ဝင်ရောက်သည့် ကုလားပဲများကို တန်ဖိုးမြှင့် ထုတ်ကုန်အမျိုးမျိုး ထုတ်လုပ်လျက်ရှိသော မြို့ပေါ်ရှိ ပဲခွဲစက်လုပ်ငန်းရှင်များ၊ ပဲကြော်/ပဲမုန့် (အစိမ်း/အကျက်)ထုတ်လုပ်သော လုပ်ငန်းရှင်များမှ ဝယ်ယူမှုများကြောင်း၊ ယခုအချိန် ပခုက္ကူ ပဲဈေးကွက်တွင် ကုလားပဲသီးနှံ အသစ်များ အရောင်းအဝယ်ဖြစ်လျက်ရှိကြောင်း၊ ဒေသတွင်းဝယ်ယူသုံးစွဲမှုအပြင် ရန်ကုန်၊ မန္တလေးဈေးကွက်သို့ အများဆုံးတင်ပို့ကြောင်း၊ ကုလားပဲ သီးနှံသည် ကျန်းမာရေးနှင့်ညီညွတ်ပြီး ပြည်တွင်းစားသုံးမှုများ၍ အရောင်းအဝယ်သွက်ကြောင်း မြို့ပေါ်ရှိ ပဲရောင်းဝယ်ရေး လုပ်ငန်းရှင်တစ်ဦးထံမှ သိရှိရပါသည်။
DOCA(မကွေး)