မကွေးတိုင်းဒေသကြီး၊ ပခုက္ကူမြို့ပေါ်ရှိ ခရမ်းချဉ်သီးဈေးကွက်သို့ ရှမ်းပြည်နယ် အောင်ပန်းနှင့်ပုပ္ပါးဒေသထွက် ခရမ်းချဉ်သီးများအပြင် ဒေသစိုက်ခင်းထွက် နွေ(ပင်ထောင်)ခရမ်းချဉ် သီးများ နေ့စဉ်ဝင်ရောက် အရောင်းအဝယ်ဖြစ်လျက်ရှိပြီး (ထိုင်ဝမ်)ခရမ်းချဉ်သီးမျိုးများလည်း အများဆုံး ဝင်ရောက်လျက်ရှိကြောင်း သိရှိရသည်။ (ဗမာ)ခရမ်းချဉ်သီးမှာ အခွံပါးပြီး အနှစ်များသော်လည်း တာရှည်အထားခံမှုမရှိ၍ ဈေးကွက်အတွင်း၌ ဝယ်ယူစားသုံးမှုနည်းခြင်းကြောင့် တောင်သူစိုက်ပျိုးမှု နည်း၍ ဈေးကွက်သို့ ဝင်ရောက်မှုနည်းကြောင်း၊ ထိုင်ဝမ်ခရမ်းချဉ်သီးမျိုးမှာ အခွံထူပြီး အထားခံ၍ အလုံးလှသည့်အပြင် အချဉ်ဓါတ်ပါဝင်မှုနည်းခြင်းကြောင့် ဝယ်ယူစားသုံးမှု များကြောင်း သိရှိရသည်။
ခရမ်းချဉ်သီးဈေးကွက်အနေဖြင့် ၂၀၂၅ ခုနှစ်၊ ဧပြီလ(စတုတ္ထပတ်)မှစ၍ ခရမ်းချဉ်သီး ဈေးနှုန်း ပြန်လည်ကျဆင်း အရောင်းအဝယ်ဖြစ်လျက်ရှိရာ ထိုင်ဝမ်ခရမ်းချဉ်သီး တစ်ပိဿာလျှင် ကျပ်(၈၀၀-၁၀၀၀)ဈေးဖြင့် အရောင်းအဝယ်ဖြစ်ပြီး ဧပြီလ(ပထမပတ်)တွင် ခရမ်းချဉ်သီး တစ်ပိဿာလျှင် ကျပ်(၁၂၀၀-၁၅၀၀)ဖြစ်ကြောင်း၊ ဒေသတွင်း ခရမ်းချဉ်စိုက်ပျိုးထားရှိသော စိုက်ခင်းများမှ နွေခရမ်းချဉ်သီးများ ဈေးကွက်သို့ကုန်ဝင်ရောက်မှုများ၍ ဈေးအနည်းငယ်ကျဆင်းကြောင်း၊ ဧပြီလ (ပထမပတ်)နှင့်နှိုင်းယှဉ်ပါက ကျပ်(၅၀၀)ခန့်ဈေးကျဆင်း၍ အရောင်းအဝယ်ဖြစ်လျက် ရှိကြောင်း ပခုက္ကူမြို့၊ ကုန်စိမ်းသီးနှံရောင်းဝယ်ရေးဈေးကွက်မှ သိရှိရပါသည်။
DOCA(မကွေး)